ᑎᐱᑦ ᐅᓂᑭᒧᐅᓇ 83 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐊᑲᐎᔾ ᒋᐱᑐᐛ, ᐅ ᒋᓴᒪᓂᑐᐤ: ᐊᑲᐎᔾ ᐳᓂ ᐃᔨᒥ, ᐊᑲ ᑭᔭ ᒋᔭᒪᐅᐱ, ᐅ ᒋᓴᒪᓂᑐᐤ᙮ 2 ᐛᔅ, ᐛᐸᑕ, ᑲ ᐛᐧᑲᑎᔅᒡ ᒋ ᑭᒐᐸᒋᑎᓯᐤ ᐃᑐᐅᒡ, ᐊᓐᒡ ᑭᔭ ᑲ ᐛᐧᑲᑎᔅᒡ ᒋ ᐅᐱᔎᔪᐅᒡ᙮ 3 ᒋ ᑭᑭᒋᔭᐅ-ᓯᒋᒥᑐᐅᒡ ᒐᒋ ᒥᒋᑐᑐᐛᒡ ᒋᑦ ᐃᔨᒪ, ᑭᔭ ᒋ ᑭᒐᔅᒋᒥᑐᐅᒡ ᒐᒋ ᒥᒋᑐᑐᐛᒡ ᐊᓂᔭᔪᐛ ᑲ ᑲᔨᒥᑎ᙮ 4 ᒋ ᐃᔅᒋᔄᐛᒡ, “ᒪᒋᑕᐤ, ᒋᒥᔄᑕᐛᓐᒋ ᒐ ᐊᑲ ᒋ ᐸᐃᑯᔅᑲᓇᓯᒡ ᐃᔪᒡ; ᐊᑲ ᓂᑕ ᒥᓐ ᒐᒋ ᒋᔅᒋᑕᑭᓄᐅᒡ ᐃᔅᕋᐃᓪ ᐃᓯᓂᐧᑲᓱᐅᓐ᙮” 5 ᐛᔅ ᒋ ᒪᒧᐤ ᓯᒋᒥᑐᐅᒡ ᐊ ᐸᐃᑯ ᒥᑐᓇᔨᒋᑭᓂᒡ; ᐊ ᒪᒧᐤ ᐱᓯᑯᔅᑕᔅᒡ᙮ 6 ᐅᒥᒋᐛᐱᒧᐛᐤ ᐃᑕᒻ, ᑭᔭ ᐃᔅᒪᐃᔭᓪ ᐃᔪᒡ, ᒧᐊᑉ, ᑭᔭ ᐊᑲᕆ ᐃᔪᒡ; 7 ᑭᐸᓪ, ᑭᔭ ᐊᒧᓐ, ᑭᔭ ᐊᒪᓕᒃ; ᐱᓕᔅᑕᐃᓐ ᐃᔪᒡ ᐊᓯᒡ ᑲ ᐎᒋᒡ ᑕᐃᕆᒡ; 8 ᐊᓴᕐ ᑭᔭ ᐎᒐᐛᐤ: ᒋ ᐎᒋᐃᒪᐅᒡ ᓗᑕ ᐅᑦ ᐊᐛᓯᒥᔪᐛ᙮ 9 ᑐᑐᐅᒡ ᒧᔭᒻ ᑲ ᑐᑐᐅᑥᐤ ᒥᑎᔭᓐ ᐃᔪᒡ; ᓯᓯᕋ, ᑭᔭ ᒐᐱᓐ, ᑭᓴᓐ ᓯᐱᓯᒡ; 10 ᑲ ᓂᓱᐅᓇᑎᓯᒡ ᐊᓐᑐᕆᒡ: ᒋ ᐊᑎ ᐃᓯᓇᑯᓱᐅᒡ ᒧᔭᒻ ᒥᔅᑯᓯᐤ ᒥᔅᑎᑯᓴ ᐊᔅᒋᒡ᙮ 11 ᐃᓯᐃᒻ ᐅᑦ ᐅᒋᒪᒧᐛᐛ ᒧᔭᒻ ᐅᕆᑉ, ᑭᔭ ᒧᔭᒻ ᓯᑉ; ᓂᐦᐃ, ᒥᓯᐛ ᐅᒋᓴᐅᒋᒪᓯᒧᐛᐛ ᒧᔭᒻ ᓴᐸ, ᑭᔭ ᒧᔭᒻ ᓴᓪᒧᓇ: 12 ᑲ ᐃᔅᒋᔄᒡ, “ᐊᑯᔅ ᐅᑎᓂᒪᓱᑕᐤ ᒥᓯᐛ ᐎᒐ ᒋᓴᒪᓂᑐᐤ ᒐᒋ ᑎᐸᔨᑎᒺᐧᒄ᙮” 13 ᐅ ᓂᒋᓴᒪᓂᑐᒻ, ᐃᓯᐃᒡ ᒧᔭᒻ ᑲᑎᑎᐱᔨᑦ; ᒧᔭᒻ ᒪᑕᒥᓇᔎ ᐊ ᔪᑎᒡ᙮ 14 ᒧᔭᒻ ᐃᔅᑯᑕᐤ ᐊ ᐃᔎᓯᒥᑲᒡ ᒥᑕ, ᑭᔭ ᒧᔭᒻ ᐊ ᐛᔨᑕᒡ ᐛᒋ ᐃᔎᑕᒋ ᐱᔅᑯᑎᓇᐛ; 15 ᐊᑯ ᒧᔭᒻ ᓂᓇᐧᑲᒋᐃᒡ ᒋ ᒋᔅᑎᓂᒥᒡ ᐅᒡ, ᑭᔭ ᓴᒋᐃᒡ ᒋᒋᔅᑎᓂᒥᔪᐤ ᐅᒡ᙮ 16 ᓴᑭᔅᒋᓂᑕᐤ ᓴᒂᔨᒧᐅᓂᔪᐤ ᐅᑕᔅᑎᒥᐧᑯᐛᒡ; ᒐᒋ ᓇᓂᑐᐛᔨᑕᒡ ᒋᑦ ᐃᓯᓂᐧᑲᓱᐅᓂᔪᐤ, ᐅ ᑎᐸᔨᒋᒐᓱᐤ᙮ 17 ᐊᑯᔅ ᒋᑭ ᐛᐛᓇᔨᑎᒧᒡ ᑭᔭ ᒥᑯᔅᑲᑕᔨᑎᒧᒡ ᑲᒋᒡ: ᓂᐦᐃ, ᐊᑯᔅ ᒋᑭ ᓴᒂᔨᒧᐅᒡ, ᑭᔭ ᒋᑭ ᓂᓱᐅᓇᑎᓯᐅᒡ᙮ 18 ᐃᔪᒡ ᒐᒋ ᒋᔅᒐᔨᑕᒡ ᒋᔾ ᒥᒄ ᒋᓴᒪᓂᑐᐤ ᐊ ᐃᓯᓂᐧᑲᓱᔨᓐ, ᐊ ᒪᐅᒡ ᒋᔅᑎᓯᔨᓐ ᐊ ᑎᐸᔨᑎᒥᓐ ᒥᓯᐛ ᐊᔅᒋᔾ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.