ᑎᐱᑦ ᐅᓂᑭᒧᐅᓇ 81 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᒋᔄᐛ ᓂᑭᒧᔅᑕᐧᒄ ᒋᓴᒪᓂᑐᐤ ᒋ ᒥᔅᑯᐅᓯᐅᓄᐤ: ᒥᔽᔨᑕᒧᐤ ᐸᑕᑯᓯᔅᑕᐧᒄ ᐅ ᒋᓴᒪᓂᑐᒪ ᒐᑭᑉ᙮

² ᐅᑎᓂᒧᒄ ᓂᑭᒧᐅᓐ, ᐸᓱᐛᐧᒄ ᑕᐛᐃᑭᓂᔅ, ᐊ ᒥᔪᑕᒂᒡ ᐊᓯᑭᓇᔭᐱᔾ ᒋᔍᐛᐱᒋᑭᓐ ᐊᓯᒡ ᓂᑭᒧᒋᑭᓐ᙮

³ ᐳᑕᑎᒧᒄ ᐳᑕᒋᑭᓐ ᐊ ᐅᔅᒋᑦ ᐱᓯᒻ, ᐃᔅᐱ ᐊ ᐅᑎᒋᐱᔨᒡ, ᒋᒥᑯᓴᐎ-ᒋᓯᑲᒥᓇᒡ᙮

⁴ ᐛᔅ ᐊᐅᒃ ᑲ ᐃᑎᓱᐛᓄᐅᒡ ᐃᔅᕋᐃᓕᒡ, ᑭᔭ ᒋ ᐎᓱᐛᔪᐛ ᐅᒋᓴᒪᓂᑐᒪ ᒐᑭᑉ᙮

⁵ ᐅᔭᔪᐤ ᒋ ᐃᑎᓱᐛᑕᐤ ᒍᓯᐱᒡ ᒐᒋ ᑎᐸᒋᒧᓇᓄᐎᒡ, ᐃᔅᐱ ᑲ ᓴᐳᔅᑲᐧᒃ ᐃᒋᑉᑦ ᐊᔅᒋᔪᐤ; ᐊᓐᑕ ᑲ ᐸᑎᒪᓐ ᐃᔅᒋᔄᐅᓐ ᐊᑲ ᐅᒋ ᓂᔅᑐᑎᒪᓐ᙮

⁶ “ᓂᒋ ᒐᑐᐛᑕᓇᓐ: ᐅᑎᒋᔭ ᒋ ᐅᒋ ᐎᐧᑯᒋᑕᑭᓄᐎᔪᐛ ᐊᔅᒋᒂ᙮

⁷ ᔅᒋ ᑕᑈᓐ ᐃᔅᐱ ᑲ ᐊᔨᒥᓯᐅᐱᓇ, ᔅᒋ ᐎᐧᑯᒋᔨᑎᓐ ᒪᒃ; ᔅᒋ ᓂᔎᐅᓯᔨᑎᓐ ᐅᑲᓱᐅᓂᒡ ᐅᓂᒥᔅᒍᐤ: ᔅᒋ ᑯᒋᐃᑎᓐ ᒪᕆᐸ ᓂᐱᒡ᙮”

⁸ “ᓂᑐᑎᒧᒄ, ᐅ ᓂᑦ ᐃᔨᒥᑐᒄ, ᒋᑭ ᑎᐸᒋᒧᔅᑕᑎᓇᐛᐤ ᒪᒃ: ᐅ ᐃᔅᕋᐃᓪ, ᒧᔭᒻ ᐎ ᓂᑐᑐᐎᔨᓇ;

⁹ ᓇᒪᐎᔾ ᑯᑎᒃ ᒥᓂᑐᐤ ᒋᑭ ᑕᐤ ᐊᓐᑕ ᐊ ᑕᔭᒄ; ᓇᒪ ᑭᔭ ᒋᑭ ᐊᔭᒥᐊᔅᑕᐛᐛᐤ ᑯᑎᒃ ᒥᓂᑐᐤ᙮

¹⁰ ᓂᔾ ᑕᐸᔨᒋᒐᔭᓐ ᒋᒋᓴᒪᓂᑐᒻ, ᐃᒋᑉᑦ ᐊᔅᒋᒡ ᑲᒋ ᐅᒋ ᐸᒋ ᐅᑐᑕᐃᑕᓐ: ᒥᔅᑎ ᑕᐅᑎ, ᓂᑭ ᓴᑭᔅᒋᓂᑕᓐ ᒪᒃ᙮

¹¹ ᒪᒃ ᓂᑦ ᐃᔨᒥᒡ ᓇᒪᐎᔾ ᓂ ᐅᒋ ᓂᑐᑕᑯᒡ; ᐃᔅᕋᐃᓪ ᒪᒃ ᓇᒪ ᓂ ᐅᒋ ᓂᑐᐛᔨᒥᒃ᙮

¹² ᓂᒋ ᐸᒋᑎᓇᐅᒡ ᒪᒃ ᑲ ᐃᓯ ᒥᒋ ᐃᑕᔨᑕᒡ ᐅᑕᐃᐛᒡ, ᒋ ᐱᒧᑕᑎᒧᒡ ᑭᔭ ᑎᐱᔽ ᐅᓯᒋᒥᑐᐅᓄᐛᐛ᙮

¹³ ᐅ, ᑭᒪ ᓂᑦ ᐃᔨᒥᒡ ᒋ ᓂᑐᑐᐅᒡ, ᑭᔭ ᐃᔅᕋᐃᓪ ᒋ ᐱᒧᑕᑕᒡ ᓂᑦ ᐃᓯᑥᐅᓇ !

¹⁴ ᐎᐱᒡ ᓂᐸ ᒋ ᓴᐧᑯᒋᐃᑎᒪᐛᐅᒡ ᑲ ᐛᐧᑲᑎᑯᒡ, ᑭᔭ ᓂᐸ ᒋ ᐅᑕᒧᒪᔨᐛ ᑲ ᒪᓯᐧᑲᑯᒡ᙮

¹⁵ ᑲ ᐛᐧᑲᑕᒡ ᒋᓴᒪᓂᑐᐛ ᒋᑭ ᒋ ᐱᑕᐱᔅᑕᐛᐸᓐᒡ: ᒪᒃ ᐎᔨᐛᐤ ᐅᒋᓯᑲᒧᐛᐤ ᑲᒋᒡ ᒋᐸ ᒋ ᐊᔭᑕᐛᑯᐱᓐ᙮

¹⁶ ᒋᑭ ᒋ ᓴᒪᑕᑯᐱᓐ ᑭᔭ ᒪᐅᒡ ᑲ ᒥᔪᓯᓯᔨᒋ ᐸᒂᓯᑭᓂᒥᓇ: ᑭᔭ ᑲᓯᐛᓯᐛᐳᔾ ᒋᔅᑕᐱᔅᑯᒡ ᒋᐸ ᒋ ᐅᒋ ᒋᔅᐳᐃᑎᓇᐱᓐ᙮”