ᑎᐱᑦ ᐅᓂᑭᒧᐅᓇ 80 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓇᐃᔅᑕ ᒋᑐᑭᔾ, ᐅᒪᔭᑕᓂᓯᐅ-ᐃᔨᒪ ᐃᔅᕋᐃᓪ, ᒋᔾ ᑲ ᐱᒧᑕᐃᑦ ᒍᓯᑉ ᒧᔭᒻ ᒪᔭᑕᓂᓯᒡ: ᒋᔾ ᑲ ᑕᔨᓐ ᑎᔅᑐᐎᒡ ᒐᕋᐱᒥᒡ, ᐛᓯᓱᐤ᙮ 2 ᐅᑎᔅᑯᐤ ᐃᑉᕋᐃᒻ, ᑭᔭ ᐱᓐᒋᒥᓐ, ᑭᔭ ᒥᓇᓴ, ᒧᔅᒋᐱᔨᑕ ᒋᒥᔅᑯᓯᐅᓐ, ᐸᒋ ᐱᒪᒋᐃᓇᓐ ᒪᒃ᙮ 3 ᒂᔅᒋᑲᐳᐅᔅᑐᐅᓇᓐ ᐅ ᒋᓴᒪᓂᑐᐤ, ᐛᓯᓱᔅᑐᐅᓇᓐ ᒪᒃ; ᐊᑯ ᒪᒃ ᒐ ᐱᒪᒋᐃᑯᐅᔭᒡ᙮ 4 ᐅ ᑎᐸᔨᒋᒐᓱᐤ ᒥᓯᐛ ᐊ ᐃᓯ ᓱᐧᑲᑎᓯᔨᓐ ᒋᓴᒪᓂᑐᐤ, ᑕᓐ ᒐ ᐃᔅᐱᔅ ᐊᔅᒄ ᐎᔭᔅᑕᔨᑎᒧᑦ ᐅᑦ ᐊᔭᒥᐊᐅᓄᐛᐤ ᒋᑦ ᐃᔨᒥᒡ ? 5 ᒋᑦ ᐊᓯᒪᐅᒡ ᐅᒋᑯᐛᐳᐤ ᐸᒂᓯᑭᓇ; ᑭᔭ ᒥᔅᑎ ᒋ ᒥᓇᐊᐅᒡ ᒪᑐᓇᐳᔪᐤ᙮ 6 ᒋᑦ ᐃᓯᐃᓇᓐ ᒐᒋ ᐅᒋ ᐎᔭᔅᑕᔨᒥᔨᒥᒡ ᓂᒡ ᐃᔨᒥᓇᓐᒡ: ᑲ ᐛᐧᑲᓯᔨᒥᒡ ᒪᒃ ᒪᒧᐤ ᐸᐳᐅᒡ᙮ 7 ᒂᔅᒋᑲᐳᐅᔅᑐᐅᓇᓐ, ᐅ ᒋᓴᒪᓂᑐᐤ ᒥᓯᐛ ᓱᐧᑲᑎᓯᔭᓐ, ᐛᓯᓱᔅᑐᐅᓇᓐ ᒪᒃ; ᐊᑯ ᒪᒃ ᒐ ᐱᒪᒋᐃᑯᐅᔭᒡ᙮ 8 ᐃᒋᑉᑎᒡ ᔅᒋ ᐅᒋ ᐸᓱᐛᐤ ᓱᒥᓇᑎᒄ: ᔅᒋ ᐎᐎᐛᐱᓇᐅᒡ ᐊᑲ ᐊᔭᒥᐊᒡ, ᑭᔭ ᐊᔅᒋᒡ ᔅᒋ ᒋᒥᔭᐤ 9 ᔅᒋ ᑐᐎᔅᑎᒧᐛᐤ, ᑭᔭ ᔅᒋ ᐃᓯᐊᐤ ᒐᒋ ᐅᒐᐱᒋᐅᑦ, ᐊᑯ ᓯᐊᑭᔅᒋᓇᑦ ᐊᔅᒋᒡ᙮ 10 ᐊ ᑎᑲᔅᑕᓯᐧᒃ ᒋ ᐊᐅᑲᔅᑕᑎᓇ ᐱᔅᑯᑎᓇᐛ, ᑭᔭ ᐊᐅᑎᐧᑲᓄᐅᑦ ᒧᔭᒻ ᒥᔪ ᒪᔅᒋᓯᑲᑎᑯᒡ ᒋ ᐃᓯᓇᑯᓂᔪᐛ᙮ 11 ᐎᓂᐸᑯᒡ ᐃᑎᒧᔪᐛ ᐅᑎᐧᑯᓇ, ᓯᐱᒡ ᐃᔅ ᒋ ᐃᔅᐱᔪᐛ ᐅᑎᐧᑯᓇ᙮ 12 ᒐᒂᔪᐤ ᒪᒃ ᐛᒋ ᐱᒂᐊᒧᑦ ᐅᒪᓂᔅᑲᑎᒂ, ᒥᓯᐛ ᐊᓐᑕ ᐊ ᐱᒧᑕᒡ ᐊ ᒥᓂᐱᑕᒡ ᓯᒥᓇ ? 13 ᑯᐧᑯᔅ ᓄᒋᒥᒡ ᐅᒡ ᓂᓱᐅᓇᒋᐊᐤ, ᑭᔭ ᐸᐧᑲᒡ ᐊᐛᓯᓯᒡ ᒪᔅᒐᑯᒡ ᒋᑕᒺᐅᒡ᙮ 14 ᒂᔅᒋ, ᒋ ᐱᑯᓴᔨᒥᑎᓇᓐ, ᐅ ᒥᓯᐛ ᐊ ᐃᓯ ᓱᐧᑲᑎᓯᔨᓐ ᒋᓴᒪᓂᑐᐤ, ᒋᒋᒋᓯᑯᒡ ᐅᒡ ᐃᑕᐱ, ᑭᓄᐛᐱᒻ ᑭᔭ ᐸᒋ ᓂᑐᐛᐱᒻ ᐅ ᓱᒥᓇᑎᒄ; 15 ᑭᔭ ᓱᒥᓇᑎᑯ ᓂᑕᐅᒋᒋᑭᓐ ᒋᒥᔪᐅᓂᒡ ᑲᒋ ᐅᒋ ᓂᑕᐅᒋᑕᔨᓐ, ᑭᔭ ᐅᑎᐧᑯᓐ ᑲ ᒥᔅᑯᐅᑎᒪᓱᔨᓐ᙮ 16 ᐃᔎᑕᐤ ᐃᔅᑯᑕᐤ ᐅᒡ, ᓇᑥᑲᐃᑭᓄᐤ: ᓂᓱᐅᓇᑎᓯᐅᒡ ᐊ ᒋᓱ ᑭᓄᐛᐱᒥᑥᐤ᙮ 17 ᐊᑯᔅ ᒋᑎᒋᔪᐤ ᒋᑭ ᒋᒋᔅᑲᑯᐤ ᐊᓐ ᐃᔪᐤ ᑲ ᓯᑐᓂᑯᑦ ᒋ ᒥᔪᓂᔪᐤ, ᐃᔪᐤ ᐅᑯᓯᓴᓐ ᐅᑎ ᑲ ᒥᔅᑯᐅᓯᐅ ᐅᓯᑎᒪᓱᔨᓐ᙮ 18 ᐊᑯ ᒐ ᐊᑲ ᓂᑭᑎᑕᒡ: ᐱᒪᒋᐃᓇᓐ, ᐊᑯ ᒐ ᓇᓂᑐᑎᒪᒡ ᒋᑦ ᐃᓯᓂᐧᑲᓱᐅᓐ᙮ 19 ᒂᔅᒋᑲᐳᐅᔅᑐᐅᓇᓐ, ᐅ ᑎᐸᔨᒋᒐᓱᐤ ᒥᓯᐛ ᓱᐧᑲᑎᓯᔨᓐ ᐛ ᐃᓯ ᓱᔅᑐᐅᓇᓐ; ᐊᑯ ᒪᒃ ᒐ ᐱᒪᒋᐃᑯᐅᔭᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.