ᑎᐱᑦ ᐅᓂᑭᒧᐅᓇ 8 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 8 (New Years Day Year A, B, C; Trinity Year A, C; Proper-22 Year B)

¹ ᐅ ᑎᐸᔨᒋᒐᓱᐤ ᓂᑎᐸᔨᒋᒐᓯᒥᓇᓐ, ᑕᑈ ᒥᔽᔨᑕᑯᓐ ᒋᑦ ᐃᓯᓂᐧᑲᓱᐅᓐ ᒥᓯᐛ ᐊᔅᐱᑎᔅᑭᒥᑲᒡ ! ᒋᔾ ᑲ ᐃᑎᔅᑕᔨᓐ ᒋᒋᔅᑕᔨᑕᑯᓱᐅᓐ ᐃᔅᐱᒥᒡ ᒋᓯᑯᒡ᙮

² ᐅᑐᓄᐛᒡ ᐅᒡ ᐅᔅᑯᐊᐛᓯᓯᒡ ᑭᔭ ᑲᓄᓴᓂᒡ ᔅᒋ ᐅᒋ ᐅᒋᐱᑕᓐ ᒥᔅᑯᐅᓯᐅᓐ, ᐊᓐᒡ ᑲ ᐛᐧᑲᑎᔅᒡ ᐅᒡ, ᒐᒋ ᒋᔭᒪᐎᐃᑦ ᑲ ᐛᐧᑲᓱᐛᑦ ᑭᔭ ᑲ ᒋᐛᑎᐸᐊᒪᒐᑦ᙮

³ ᐃᔅᐱ ᒥᔭᒥᑐᓇᔨᑎᒪᓂ ᒋᒋᒋᓯᑯᒪ, ᒋᑎᒋᒡ ᑲ ᐅᒋ ᐅᓯᑕᔨᓐ, ᑎᐱᔅᑲᐤ ᐱᓯᒻ ᑭᔭ ᐅᒐᑭᑕᐧᑯᒡ, ᑲᒋ ᒋᑭᒧᐃᑥᐤ:

⁴ ᑕᓐ ᐊᑕᔨᑕᑯᓯᑦ ᐃᔪᐤ ᐊᔭᐱᑕᔨᒥᑦ ? ᑭᔭ ᐃᔪᐤ ᐅᑯᓯᓴᓐ, ᐊᒧᐱᔅᑐᐅᑦ ?

⁵ ᐛᔅ ᐊᐱᓯᔅ ᔅᒋ ᑎᐱᑕᔨᑕᑯᐊᐤ ᐃᔅᐱᔅ ᐊᓐᒋᓇ, ᑭᔭ ᔅᒋ ᐅᒋᒪᐅ-ᐊᑯᓂᔎᐅᓇᐊᐤ ᒋᔅᑕᔨᑕᑯᓱᐅᓂᔪᐤ ᑭᔭ ᒋᔅᑎᓯᐅᓂᔪᐤ᙮

⁶ ᔅᒋ ᑎᐸᔨᑎᒥᐊᐤ ᒥᓯᐛ ᒋᑎᒋᒡ ᑲ ᐅᒋ ᐅᓯᑕᔨᓐ; ᒥᓯᐛ ᒐᒂᓇ ᔅᒋ ᐊᔅᑕᐛᓐ ᓯᐸ ᐅᓯᑎᒡ:

⁷ ᒥᓯᐛ ᒪᐃᑕᓂᓴ ᑭᔭ ᒥᔅᑐᓴ, ᓂᐦᐃ, ᑭᔭ ᐊᐛᓯᓴ ᓂᑕᐅᒋᒋᑭᓂᒡ ᑲ ᐃᑕᔨᒋ:

⁸ ᐱᔭᓱᐛ ᑲ ᐱᐸᒥᔭᔨᒋ, ᑭᔭ ᓂᒪᓴ ᐎᓂᐸᑯᒡ, ᑭᔭ ᒥᓯᐛ ᒐᒂᓐ ᑲ ᓴᐳᐸᔨᒡ ᐎᓂᐸᑯᒡ᙮

⁹ ᐅ ᑎᐸᔨᒋᒐᓱᐤ ᓂᑎᐸᔨᒋᒐᓯᒥᓇᓐ, ᑕᑈ ᒥᔽᔨᑕᑯᓐ ᒋᑦ ᐃᓯᓂᐧᑲᓱᐅᓐ ᒥᓯᐛ ᐊᔅᐱᑎᔅᑭᒥᑲᒡ !