ᑎᐱᑦ ᐅᓂᑭᒧᐅᓇ 77 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᒋ ᒪᑐᐛᐤ ᒋᓴᒪᓂᑐᐤ ᐊ ᐸᑕᑯᓯᔭᓐ, ᒋᓴᒪᓂᑐᐤ ᐅᑎ ᐊ ᐸᑕᑯᓯᔭᓐ; ᓂᒋ ᓂᑐᑕᒄ ᒪᒃ᙮ 2 ᐊ ᒋᓯᑲᒡ ᑲ ᐊᔨᒥᓯᐛᐱᓇ, ᓂᒋ ᓇᓂᑐᐛᔨᒪᐤ ᑎᐸᔨᒋᒐᓱᐤ: ᓂᑦ ᐊᑯᓯᐅᓐ ᒋ ᐱᒥᐱᔪᐤ ᐊ ᑎᐱᔅᑲᒡ, ᓇᒪ ᑭᔭ ᐅᒋ ᐳᓂᐱᔪᐤ: ᓂᑦ ᐊᒐᐧᒄ ᓇᒪᐎᔾ ᐅᒋ ᐎ ᒥᔽᔨᒧᐃᑯᓯᔪᐤ᙮ 3 ᓂᒋ ᒋᔅᒋᑐᐛᐤ ᒋᓴᒪᓂᑐᐤ, ᓂᒋ ᒥᑯᔅᑲᑕᔨᑕᓐ ᒪᒃ: ᓂᒋ ᒪᒥᑐᓇᔨᑕᓐ, ᓂᑦ ᐊᒐᐧᒄ ᒪᒃ ᒋ ᐛᓴᒪᔨᑎᒻ᙮ 4 ᒋ ᑯᔅᑯᓇᓐ ᓂᔅᒋᓯᒂ: ᐊᔅᐱᔅ ᒥᑯᔅᑲᑕᔨᑎᒪᓐ ᓇᒪ ᐛᐛᒡ ᓄᒋ ᐃᔨᒥᓐ᙮ 5 ᓂᒋ ᒪᒥᑐᓇᔨᑕᓐ ᐎᐱᒡ ᐊᒋᓯᑲᒡ, ᒥᒐᑐ ᐱᐳᓇ ᐎᐱᒡ ᑲ ᐱᒥᐱᔨᒋ᙮ 6 ᓂ ᒋᔅᒋᑕᓐ ᓂᓂᑭᒧᐅᓐ ᑕᐱᔅᑲᒋ: ᓂᑦ ᐃᔨᒥᑕᓐ ᑎᐱᔽ ᓂᑕᐃ; ᓂᑦ ᐊᒐᐧᒄ ᑭᔭ ᓱᐧᒃ ᓇᓂᑐᐛᔨᒋᒐᐤ᙮ 7 “ᑎᐸᔨᒋᒐᓱᐤ ᐊ ᑲᒋᒡ ᒋᑭ ᐛᐱᓄᐛᐤ ? ᓇᒪ ᓂᑕ ᐊ ᒥᓐ ᒋᑭ ᒋᓴᐛᑐᑕᒐᐤ ? 8 ᒋᒋᐛ ᐊ ᒋᑐᑕᒪᑭᓂᔪᐤ ᐅᓱᐛᔨᒋᒐᐅᓐ ? ᒋᒋᐛ ᐊ ᓇᒪ ᓂᑕ ᒋᑭ ᒋ ᐊᐱᑎᓂᔪᐤ ᐅᑦ ᐊᓱᑎᒪᒐᐅᓐ ? 9 ᒋ ᐅᓂᒋᔅᒋᓯᐤ ᐊ ᒋᓴᒪᓂᑐᐤ ᒐᒋ ᒋᓴᐛᑐᑕᒐᑦ ? ᐅᒋᔄᓯᐅᓂᒡ ᐊ ᒋ ᒋᐸᐊᒻ ᐅᔪᔅᐱ ᓱᐛᔨᒋᒐᐅᓇ ?” 10 ᓂᒋ ᐃᔅᒋᔄᓐ ᒪᒃ, “ᐊᐅᒄ ᐅ ᓂᑦ ᐃᑕᔅᐱᓇᐅᓐ: ᒪᒃ ᓂᑭ ᒋᔅᒋᓯᓐ ᒥᒐᑐ ᐱᐳᓇ ᐅᒥᔪᐅᓂᒡ ᒪᐅᒡ ᒋᔅᑎᓯᑦ᙮” 11 ᓂᑭ ᒋᔅᒋᓯᑎᒺᓐ ᐅᑦ ᐊᑐᔅᒐᐅᓐ ᑎᐸᔨᒋᒐᓱᐤ; ᒐᔅᑎᓇᔅ ᓂᑭ ᒋᔅᒋᓐ ᐎᐱᒡ ᒋᒥᒪᑕᐅ-ᐃᑐᐅᓇ᙮ 12 ᓂᑭ ᒪᒥᑐᓇᔨᑕᓐ ᑭᔭ ᒥᓯᐛ ᒋᑦ ᐊᑐᔅᒐᐅᓐ, ᓂᑭ ᐊᔨᒧᑕᓐ ᑭᔭ ᒋᑦ ᐃᑐᐅᓇ᙮ 13 ᒋᑦ ᐃᓯᑥᐅᓐ, ᐅ ᒋᓴᒪᓂᑐᐤ, ᐸᔭᒋ-ᒥᒋᐛᐱᒡ ᑎᑯᓐ: ᒐᒄ ᒋᓴᒪᓂᑐᐤ ᐊᔅᐱᔅ ᒋᔅᑎᓯᑦ ᐊᔅᐱᔅ ᒋᔅᑎᓯᔨᒋ ᒋ ᒋᓴᒪᓂᑐᒥᓄᐛ ? 14 ᒋᔾ ᒋ ᒋᓴᒪᓂᑐᐅᓐ ᑲ ᒥᒪᑕᐅ-ᐃᑎᔨᓐ: ᔅᒋ ᐎᑕᓐ ᒋ ᒥᔅᑯᐅᓯᐅᓐ ᐊᓐᑕ ᐊ ᐃᑕᒡ ᐃᔪᒡ᙮ 15 ᒋᔅᐱᑐᓂᒡ ᔅᒋ ᐅᒋ ᐱᒪᒋᐊᐅᒡ ᒋᑦ ᐃᔨᒥᒡ, ᐅᑯᓯᓱᐛᐛ ᒐᑭᑉ ᑭᔭ ᒍᓯᑉ᙮ 16 ᓂᐱᔭ ᔅᒋ ᐛᐱᒥᑯᓐ, ᐅ ᒋᓴᒪᓂᑐᐤ, ᓂᐱᔭ ᔅᒋ ᐛᐱᒥᑯᓐ; ᒋ ᓴᒋᓯᒥᑭᓇ: ᒋ ᒥᑯᔅᑲᒋᐛᐱᔨᐛ ᑭᔭ ᐊᓐᑕ ᐊ ᒋᔅᑲᔨᐛᒡ᙮ 17 ᑭᔅᑯᐅᓂᒡ ᒋ ᐅᒋ ᓯᒋᐱᔪᐤ ᓂᐱᔾ: ᒋᓯᒂ ᒋ ᐸᑕᑯᓇ: ᒋᑦ ᑭᔅᔎᒡ ᑭᔭ ᒋ ᐸᐸᒥᐱᔪᐅᒡ᙮ 18 ᒋ ᐸᑕᑯᓯᐅᒡ ᒋᓂᒥᔅᒋᒥᒡ ᒋᓯᑯᒡ: ᐊ ᐛᔅᑕᐱᔨᒡ ᒋ ᐅᒋ ᐛᔅᑕᓂᑭᓄᐤ ᐊᔅᒋᔾ: ᐊᔅᒋᔾ ᒋᓇᓇᒥᐱᔪᐤ ᑭᔭ ᒋ ᑯᔅᑯᔅᑯᐱᔪᐤ᙮ 19 ᒋ ᒪᔅᑭᓇᐤ ᐎᓂᐸᑯᒡ ᐱᒥᒧ, ᑭᔭ ᒋ ᐱᒧᑕᔅᑭᓄᐤ ᒋᒋ ᓂᐱᒡ, ᑭᔭ ᒋᑕᐧᑯᔅᒐᐅᓇ ᓇᒪᐎᔾ ᒋᔅᒐᔨᑕᑯᓇ᙮ 20 ᔅᒋ ᐱᒧᑕᐊᐅᒡ ᒋᑦ ᐃᔨᒥᒡ ᒧᔭᒻ ᒪᔭᑕᓂᓯᒡ, ᐅᑎᒋᐛᒡ ᐅᒋ ᒧᓱᔅ ᑭᔭ ᐊᕋᓐ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.