ᑎᐱᑦ ᐅᓂᑭᒧᐅᓇ 74 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐅ ᒋᓴᒪᓂᑐᐤ, ᑕᓇᒡ ᐛᒋ ᒋᒋᐛ ᐛᐱᓂᔭᒡ ? ᑕᓐ ᐊᓂᔨᒡ ᐛᒡ ᐊᒂᐱᑕᔅᑲᑯᒡ ᒪᔭᑕᓂᓯᒡ ᑲ ᑭᓄᐛᔨᒥᑐᐛᐤ ᒋᒋᔄᓯᐅᓂᔪᐤ ? 2 ᒋᔅᒋᑐᐅᒡ ᒋ ᒪᐛᒋᐃᑐᒥᒡ ᑲᒋ ᑎᐸᐅᑥᐤ ᐎᐱᒡ; ᑲ ᑕᑐᑕᐅᓯᑦ ᑲ ᑎᐱᔨᐛᐅᓯᔨᓐ ᑲ ᑎᐸᐊᒪᒐᔅᑎᒧᐅᑦ; ᐅᐛ ᓴᐃᔭᓐ ᐱᔅᑯᑎᓇᐤ, ᐊᓐᑕ ᑲ ᑕᔨᓐ᙮ 3 ᐅᐱᓯᑕᐃᔅᑕ ᑲ ᓇᔅᐱᒡ ᓂᓱᐅᓇᑎᒡ, ᒥᓯᐛ ᐅᑦ ᐅᐛᐧᑲᓱᐛᐤ ᑲ ᐃᓯ ᒥᒋ ᐃᑎᑦ ᐸᔭᒋ-ᒥᒋᐛᐱᒡ᙮ 4 ᑲ ᐛᐧᑲᑎᔅᒡ ᐎᔪᒡ ᐊᓐᑕ ᐊ ᑕᔨᒋ ᒋᒪᐛᒋᐃᑐᒪ; ᒋᒥᑕᐅᒡ ᐅᑦ ᐊᑯᑕᓱᐅᓄᐛᐛ ᐊ ᒋᔅᒋᓄᐛᒋᑕᒡ᙮ 5 ᐃᔪᐤ ᒋ ᐃᑕᒋᒪᑭᓄᐤ ᑲᒋ ᐃᓯ ᐅᐱᓂᒧᐛᑦ ᐊᑭᑕᔅᑯᔪᐤ, ᑲ ᒋᔅᐱᑲᔅᑯᓯᔨᒋ ᒥᔅᑎᒂ᙮ 6 ᒪᒃ ᐊᓄᒡ ᓂᒋᐛᐸᐊᒧᐅᒡ ᐊᒋ ᒧᐧᑯᑕᑭᓄᐎᔨᒋ ᐊᑐᔅᒐᐅᓂᔪᐤ ᑭᔭ ᐊᑭᑕᔅᑯᔪᐤ ᐅᒋ ᑭᔭ ᐅᑕᒪᐃᑭᓇ᙮ 7 ᒋ ᐱᒋᐛᐱᓇᒧᒡ ᐃᔅᑯᑕᔪᐤ ᒋ ᐸᔭᒥᒋᐛᐱᒡ, ᒋ ᐅᓂᑐᐅᒡ ᐊᒋ ᓂᒋᐛᐸᐊᒡ ᒧᔅᑎᔅᑭᒥᒡ ᑲ ᐃᓯ ᑎᑯᓂᔨᒡ ᒋᑦ ᐃᓯᓂᐧᑲᓱᐅᓂᔪᐤ᙮ 8 ᒋ ᐃᔅᒋᔄᐅᒡ ᐅᑕᐃᐛᒡ, “ᐊᑯᔅ ᒪᒧᐤ ᓂᓱᐅᓇᒋᐊᑕᐅᓂᒋ᙮” ᒋ ᐃᔎᓯᒺᐅᒡ ᒥᓯᐛ ᒋᓴᒪᓂᑐᐛ ᐅᑦ ᐊᔭᒥᐊᐅᒋᐛᐱᔪᐛ ᐊᔅᒋᒡ᙮ 9 ᓇᒪ ᓂ ᐛᐸᑕᓇᓐ ᓂᒋᔅᒋᓄᐛᒋᒋᑭᓂᓇᓇ; ᓇᒪ ᑕᐤ ᐅᒋᔅᒋᐛᐃᒐᓱᐤ ᐊᑯ; ᓇᒪ ᑭᔭ ᐊᐛᓐ ᐊᑎᓯᔭᒡ ᑲ ᒋᔅᒐᔨᑕᐧᒃ ᑕᓐ ᐃᔅᐱᔅ ᐊᔅᒄ᙮ 10 ᐅ ᒋᓴᒪᓂᑐᐤ, ᑕᓐ ᒐ ᐃᔅᐱᔅ ᐊᔅᒄ ᒪᓯᒐᑦ ᑲ ᒋᑐᓱᐛᑦ ? ᓇᓂᑎᒻ ᐊ ᒋᑭ ᒥᒋ ᐎᑎᒻ ᐅᐛᐧᑲᓱᐛᐤ ᒋᑦ ᐃᓯᓂᐧᑲᓱᐅᓂᔪᐤ ? 11 ᑕᓇᒡ ᐛᒋ ᒋᐛᓂᔅᒐᔨᓐ, ᒋᒥᔪᐅᓂᒡ ᐅᒡ ? ᒋᒥᔪᐅᓂᒡ ᒋᐱᒥᔪᐅᓂᒡ ᐅᒡ᙮ 12 ᐛᔅ ᒋᓴᒪᓂᑐᐤ ᐛᔅᑭᒡ ᓂᒋ ᐅᒋ ᒋᓴᐅᒋᒪᒥᒥᓐ, ᐊᒋ ᑎᑕᐧᒃ ᐱᒪᒋᐃᐛᐅᓂᔪᐤ ᑕᑕᐅᒡ ᐊᔅᒋᒡ᙮ 13 ᔅᒋ ᐸᐸᔅᒋᑎᓇᓐ ᐎᓂᐸᒄ ᒋ ᒥᔅᑯᐅᓯᐅᓂᒡ ᐅᒡ, ᔅᒋ ᐱᑯᔅᑎᒂᓇᐛᐅᒡ ᒥᓯᒋᓇᐱᑯᒡ ᓂᐱᒡ᙮ 14 ᔅᒋ ᐱᑯᔅᑎᒂᓇᐛᐤ ᓚᐸᐃᔭᑕᓐ, ᑭᔭ ᔅᒋ ᐱᔅᑎᓇᐤ ᒐᒋ ᒧᐅᑯᑦ ᐃᔪᐛ ᐸᐧᑯᑎᔅᑭᒥᑲᒡ ᑲ ᑕᔨᒋ᙮ 15 ᔅᒋ ᑕᔅᒋᐸᔨᑕᓐ ᐊ ᒧᔅᒋᒋᐛᒡ ᑭᔭ ᐊ ᐃᔅᒋᐳᑕᒡ: ᔅᒋ ᐸᓴᓐ ᒥᔅᑎ ᓯᐱᔭ᙮ 16 ᔅᒋ ᑎᐱᔨᐛᐅᓯᓐ ᐊ ᒋᓯᑲᒡ ᑭᔭ ᐊ ᑎᐱᔅᑲᒡ ᔅᒋ ᑎᐱᔨᐛᐅᓯᓐ: ᔅᒋ ᐛᐛᓯᑕᓐ ᐊ ᐛᓴᔭᒡ ᑭᔭ ᐱᓯᒻ᙮ 17 ᔅᒋ ᐃᑎᔅᑕᓐ ᒥᓯᐛ ᐊ ᐃᔎᔅᑭᒥᑲᒡ; ᔅᒋ ᐅᓯᑕᓐ ᐊ ᓂᐱᒡ ᑭᔭ ᐊ ᐱᐳᒡ᙮ 18 ᒋᔅᒋᓯ ᐅ, ᐅᐛᐧᑲᓱᐛᐤ ᐊᒋ ᒋᑐᓱᐛᑦ, ᐅ ᑎᐸᔨᒋᒐᓱᐤ ᑭᔭ ᑲ ᑭᒐᐸᑎᓯᒡ ᐃᔪᒡ ᐊᒋ ᒥᒋ ᐃᔅᒋᔄᑕᒡ ᒋᑦ ᐃᓯᓂᐧᑲᓱᐅᓂᔪᐤ᙮ 19 ᐅ ᐊᑲᐎᔾ ᐱᔅᑎᓂᒻ ᐅᑦ ᐊᒐᒂ ᑯᒥᒥᒻ ᐊ ᒪᒧᐤ ᒥᒐᑎᔨᒋ ᐅᒥᒋᑥᐛ: ᐊᑲᐎᔾ ᑲᒋᒡ ᐅᓂᒋᔅᒋᑐᐅᒡ ᑲ ᒪᒧᒥᒐᑎᒡ ᒋ ᒋᔅᑎᒪᑎᓯᒥᒡ᙮ 20 ᒋᔅᑕᔨᑕ ᓂᔅᑯᒥᑐᐅᓐ: ᐛᔅ ᐊᓐᑕ ᐊ ᐅᓂᑎᐱᔅᑲᒡ ᐊᔅᒋᒡ ᓴᑭᔅᒋᓇᐤ ᐊᒂᑎᓯᔪᐎᓐ ᐊ ᑎᒂᒡ᙮ 21 ᐅ ᐊᑯᔅ ᐊᑲᐎᔾ ᒋᑭ ᒋᐛᐅᒡ ᑲ ᐊᔨᒥᐊᑭᓄᐅᒡ ᐊ ᓴᒂᔨᒧᒡ: ᐊᑯᔅ ᐅᒋᔅᑎᒪᑎᓯᐅᒡ ᑭᔭ ᐅᐅᐛᓂᓯᔪᐅᒡ ᒋᑭ ᒪᒥᒋᑕᒧᒡ ᒋᑦ ᐃᓯᓂᐧᑲᓱᐅᓂᔪᐤ᙮ 22 ᐱᓯᑯᐤ, ᐅ ᒋᓴᒪᓂᑐᐤ, ᐃᔨᒥᔅᑎᒪᓱᐤ: ᒋᔅᒋᓯ ᒧᓴᒡ ᐊ ᐃᓯ ᒥᒋ ᐃᑎᔅᒃ ᑲ ᑭᒐᐸᑎᓯᑦ ᐃᔪᐤ᙮ 23 ᐊᑲᐎᔾ ᐅᓂᒋᔅᒋᓯ ᐊ ᐸᑕᑯᓯᒡ ᑲ ᐛᐧᑲᑎᔅᒡ: ᓇᓂᑎᒻ ᐃᔭᒋᐱᔨᔪᐤ ᐅᒋᔎᔭᑎᓯᐅᓄᐛᐤ ᐊᓐᒡ ᑲ ᐱᓯᑯᔅᑕᔅᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.