ᑎᐱᑦ ᐅᓂᑭᒧᐅᓇ 73 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒥᓯᓇᐃᑭᓐ 3 1 ᑕᑈ ᒋᓴᒪᓂᑐᐤ ᒥᔪᑐᑐᐛᐤ ᐃᔅᕋᐃᓚ, ᐊᓂᔭ ᐅᑎ ᑲ ᐸᔭᒋᑕᐊᔨᒋ᙮ 2 ᒥᒄ ᓂᔾ, ᓂᓯᑕ ᒐᑲᑦ ᓱᔅᑯᐱᔪᐛ; ᒐᑲᑦ ᓂᒋ ᒋᐃᓯᓐ᙮ 3 ᐛᔅ ᓂᒋ ᐅᑕᔨᒪᐅᒡ ᒋᔎᐧᑲᓐᒡ, ᐃᔅᐱ ᐎᔭᐸᑎᒪᓐ ᐊᔅᐱᔅ ᒥᔽᐱᒪᐅᓯᒡ ᐅᒥᒋᑥᐅᒡ᙮ 4 ᐛᔅ ᓇᒪ ᑎᑯᓂᔪᐤ ᒪᑯᐱᓱᐅᓂᔪᐤ ᐅᓂᐳᐅᓄᐛᒡ; ᒪᒃ ᐅᒥᔅᑯᐅᓯᐅᓄᐛᐤ ᒥᔅᑯᐛᐃᔪᐤ᙮ 5 ᓇᒪᐎᔾ ᐅᔅᑕᐱᔪᐅᒡ ᒧᔭᒻ ᑯᑎᑭᒡ ᐃᔪᒡ: ᓇᒪ ᑭᔭ ᐃᑕᔅᐱᓇᐅᒡ ᒧᔭᒻ ᑯᑎᑭᒡ ᐃᔪᒡ᙮ 6 ᐊᐅᒄ ᐅᒋ ᒋᔅᑕᔨᒧᐅᓂᔪᐤ ᐛᔅᑲᔅᑲᑯᐅᒡ ᒧᔭᒻ ᐃᓴᒂᔭᐱᔪᐤ; ᐊᒂᑎᓯᐅᓂᔪᐤ ᐊᒂᓇᐅᑯᒡ ᒧᔭᒻ ᐊᐱᒋᑕᐅᓂᔪᐤ᙮ 7 ᐸᐧᑲᒐᐱᔪᐅᒡ ᐊᔅᐱᔅ ᐎᔨᔪᐅᒡ; ᐊᑐᐎᔅ ᐊᔭᐅᒡ ᑲ ᐃᔅᐱᔅ ᐱᑯᓴᔨᒧᒡ᙮ 8 ᐎᓂᓱᐅᒡ, ᑭᔭ ᒥᒋᐃᔨᒧᐅᒡ ᐊᐃᔨᒧᐅᓂᔪᐤ ᐅᒡ; ᒋᔅᑕᔨᒧᐤ ᐃᔨᒧᐅᒡ᙮ 9 ᐱᔎᐧᑲᑕᒧᒡ ᒋᓯᑯᔪᐤ, ᑭᔭ ᐅᑕᔨᔪᐛᐛ ᐱᐸᒧᑕᒥᑭᓂᔪᐛ ᒥᓯᐛ ᐊᔅᒋᒡ᙮ 10 ᐊᔪᐛᒃ ᒪᒃ ᐛᒋ ᐸᒋ ᒋᐛᔨᒋ ᐅᑦ ᐃᔨᒪ: ᑭᔭ ᐊ ᓴᑭᔅᒋᓇᐸᔨᒡ ᒥᓂᒂᑭᓂᔪᐤ ᐃᔅᐱᔅ ᒋᑭ ᓯᓂᐸᑕᓂᑭᓇᐎᔨᐛ᙮ 11 ᐃᔅᒋᔄᐅᒡ ᒪᒃ, “ᑕᓐ ᐊᓯ ᒋᔅᒐᔨᑕᐧᒃ ᒋᓴᒪᓂᑐᐤ ? ᐅᒋᔅᒐᔨᑎᒧᐅᓄᐤ ᐊ ᒪᐅᒡ ᒐᔅᑎᓯᑦ ?” 12 ᐛᐸᑎᒧᒄ, ᐅᒋ ᐊᐅᒄ ᐊᓐᒡ ᐊᑲ ᐊᔭᒥᐊᒡ, ᑲ ᒥᔽᐱᒪᐅᓱᒡ ᐊᔅᒋᒡ; ᐊᔭᔅᒃ ᐛᔪᑎᓯᔪᐅᒡ᙮ 13 ᑕᑈ, ᓂᑐᐎ ᓂ ᒋ ᐃᓯ ᐸᔭᒋᑕᓐ ᓂᑕᐃ, ᑭᔭ ᓂ ᒋ ᐃᓯ ᒋᔅᑕᐸᐅᑕᓐ ᓂᑎᒋᔭ ᐸᔭᒋᓯᐅᓂᒡ᙮ 14 ᐛᔅ ᐃᔅᑭᓐ ᒋᓯᑲᐛ ᓂ ᒋ ᒥᑯᔅᑲᒋᐃᑯᐅᓐ, ᑭᔭ ᓂ ᒋ ᐱᓯᔅᑕᐅᑯᐅᓐ ᑕᑥᐤ ᐊ ᒐᒋᓴᐸᔭᒡ᙮ 15 ᒥᓱ ᐃᔭᓇ, “ᐅ ᓂᑭ ᐃᓯ ᐃᔨᒥᓐ,” ᓂᑭ ᐛᓂᑐᑐᐛᑎᔨᒡ ᒐ ᐊᑎ ᐊᓂᔅᒐ ᐱᒪᑎᓯᒡ ᒋᑦ ᐊᐛᓯᒥᒡ᙮ 16 ᐃᔅᐱ ᐅ ᒥᔭᒥᑐᓇᔨᑎᒪᓐ, ᐅᓴᒻ ᓂᒋ ᐊᐧᑯᐃᑯᓐ᙮ 17 ᐸᑎᒪ ᑲ ᐱᒐᐅᒡ ᐅᐸᔭᒋ-ᒥᒋᐛᐱᒡ ᒋᓴᒪᓂᑐᐤ; ᐊᑯ ᓇᔅᑐᑎᒪᓐ ᐊᓯ ᐳᓂᐸᔨᒡ᙮ 18 ᒐᔅᑎᓇᔅ ᔅᒋ ᐊᔭᐛᒡ ᐊᓯ ᒋᔭᔨᒡ: ᓂᓱᐅᓇᑎᓯᐅᓂᒡ ᔅᒋ ᐃᓯ ᓂᒋᐛᐱᓇᐅᒡ᙮ 19 ᑕᑈ ᓯᔅᒋᑯᒡ ᐸᓱᐛᑭᓄᐅᒡ ᐊᓐᑕ ᐊᒋᐅᓴᐃᑕᑯᓂᒡ ! ᒥᑐᓐ ᓂᓱᐅᓇᒋᐃᑯᐅᒡ ᓴᒋᓯᐅᓂᔪᐤ᙮ 20 ᒧᔭᒻ ᐳᐛᒧᐅᓐ ᐊᐛᓐ ᐊ ᐸᑯᐱᔨᑦ; ᐊᑯ, ᐅ ᑎᐸᔨᒋᒐᓱᐤ, ᐸᑯᐱᔨᓇ, ᒋᑭ ᐊᑐᐛᔨᑎᒺᓐ ᐅᑦ ᐃᓯᓇᑯᓱᐅᓄᐛᐤ᙮ 21 ᐊᐅᒄ ᑲ ᐃᓯ ᒥᒋᔨᐛᓯᒥᑭᒡ ᓂᑕᐃ, ᑭᔭ ᓂᒋ ᒋᔅᑕᐅᑯᐅᓐ ᐱᒋᔪᐤ᙮ 22 ᑲ ᐃᔅᐱᔅ ᑭᒐᐸᑎᓯᔭᓐ, ᑭᔭ ᐊ ᐊᑲ ᐅᒋᔅᒐᔨᑎᒧᐅᓂᔭᓐ: ᓂᒋ ᓂᔅᐱᑐᐛᐤ ᐊᐛᓯᔅ ᐊ ᐅᑎᔅᑲᐎᔅᑕᑕᓐ᙮ 23 ᐃᔭᐱᒡ ᒪᒃ ᒧᔅ ᔅᒋ ᐎᒐᐅᑎᓐ: ᔅᒋ ᒥᒋᒥᓐ ᓂᒥᔪᐅᓂᒡ᙮ 24 ᒋᑭ ᒋᔅᒋᓄᑕᔨᓐ ᐊ ᑭᒐᔅᒋᒥᔨᓐ, ᐸᑎᒪ ᒪᒃ ᒋᑭ ᐅᑎᓐ ᒋᔅᑕᔨᑕᑯᓱᐅᓂᒡ ᐃᓯ᙮ 25 ᐊᐛᓐ ᐊᔭᐅᒃ ᒋᒋᒋᓯᑯᒡ ᒋᔾ ᒥᒄ ? ᓇᒪ ᑭᔭ ᐊᐛᓐ ᐊᔅᒋᒡ ᓂ ᓂᑐᐛᔨᒪᐤ ᒋᔾ ᒥᒄ᙮ 26 ᓂᔭᔅ ᑭᔭ ᓂᑕᐃ ᓄᑕᐱᔪᐤ: ᒋᓴᒪᓂᑐᐤ ᒪᒃ ᒥᔅᑯᐎᑕᐤ ᓂᑕᐃᔪᐤ, ᑭᔭ ᓂᑎᐱᔨᐛᐅᓯᐅᓐ ᑲᒋᒡ᙮ 27 ᐛᔅ ᐊᓐᒡ ᑲ ᔭᐛᐱᒥᔅᒡ ᒋᑭ ᓂᓱᐅᓇᑎᓯᐅᒡ: ᔅᒋ ᓂᓱᐅᓇᒋᐊᐅᒡ ᒥᓯᐛ ᑲ ᐱᓯᒂᑎᓯᐤ ᓂᑭᑎᔅᒡ᙮ 28 ᒪᒃ ᒥᔽᓯᔪᐤ ᓂᔾ ᒐᒋ ᐸᔄᐱᒥᒄ ᒋᓴᒪᓂᑐᐤ: ᓂᒋ ᒪᒥᓯᑐᑐᐛᐤ ᑎᐸᔨᒋᒐᓱᐤ ᒋᓴᒪᓂᑐᐤ, ᒐᒋ ᐎᑎᒪᓐ ᒪᒃ ᒥᓯᐛ ᒋᑦ ᐊᑐᔅᒐᐅᓐ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.