ᑎᐱᑦ ᐅᓂᑭᒧᐅᓇ 71 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒋᔾ, ᐅ ᑎᐸᔨᒋᒐᓱᐤ, ᒋ ᒪᒥᓯᑐᑕᑎᓐ: ᐊᑲ ᐎ ᓂᑕ ᓇᐊᔨᒥ ᒐᒋ ᓴᒂᔨᒧᐃᑯᐅᔭᓐ᙮ 2 ᐱᒪᒋᐃ ᒋᑯᐃᔅᑯᑕᑎᓯᐅᓂᒡ, ᑐᑐᐎ ᒐᒋ ᐅᓯᒧᔭᓐ: ᓂᑐᑐᐎ, ᑭᔭ ᐱᒪᒋᐃ᙮ 3 ᒋᔾ ᐊ ᐎ ᓂᒥᔅᑯᐅᓯᐤ ᐃᑕᐅᓐ, ᐊᓐᑕ ᒧᔅ ᒐᒋ ᑕᔭᓐ ᔅᒋ ᐃᑎᓱᐛᓐ ᒐᒋ ᐱᒪᒋᐃᑯᐅᔭᓐ; ᐛᔅ ᒋᔾ ᓂᒋᔅᑕᐱᔅᑯᒻ ᑭᔭ ᓂᓂᑐᐱᔪᐅᒋᐛᑉ᙮ 4 ᐎᐧᑯᒋᐃ, ᐅ ᓂᒋᓴᒪᓂᑐᒻ ᐅᑎᒋᐛᒡ ᐅᒋ ᐅᒥᒋᑥᐅᒡ, ᐅᑎᒋᒡ ᐅᒋ ᐊᑲ ᑯᐃᔅᑯᑕᑎᓯᑦ ᑭᔭ ᑲ ᐊᒂᑎᓯᑦ ᐃᔪᐤ᙮ 5 ᐛᔅ ᒋᔾ ᓂᑦ ᐊᔅᐸᔨᒧᐅᓐ, ᐅ ᑎᐸᔨᒋᒐᔨᓐ ᒋᓴᒪᓂᑐᐤ: ᑭᔭ ᔅᒋ ᒪᒥᓯᑐᑕᑎᓐ ᑲ ᐃᔅᐱᔅ ᐸᒋ ᐅᔅᒋᓂᒋᐅᔭᓐ᙮ 6 ᒋᔾ ᔅᒋ ᓯᑐᓐ ᒥᔅᐸᔭᒡ ᐅᒋ: ᒋᔾ ᑲ ᐅᑎᓂᔨᓐ ᓂᑲᐎᔾ ᐅᔅᐸᔭᒡ ᐅᒋ: ᒋᔾ ᓇᓂᑎᒻ ᒋᑭ ᒪᒥᒋᒥᑎᓐ᙮ 7 ᒥᒐᑦ ᓂ ᒪᒥᔅᑲᑎᑯᒡ; ᒋᔾ ᒪᒃ ᓂ ᒥᔅᑯᓯᐤ ᓇᑕᓯᒧᐅᓐ᙮ 8 ᐊᑯᔅ ᓂᑐᓂᒡ ᒋᑭ ᓴᑭᔅᒋᓇᐤ ᒋᒪᒥᒋᒥᑯᓯᐅᓐ, ᑭᔭ ᒋᒋᔅᑕᔨᒥᑯᓯᐅᓐ ᐃᔅᑭᓐ ᒋᓯᑲᐛ᙮ 9 ᐊᑲᐎᔾ ᐛᐱᓂ ᐊ ᐊᑎ ᒋᓴᐃᔪᐎᔭᓐ; ᐊᑲᐎᔾ ᓂᑭᓯ ᐊ ᐊᑎ ᓄᑕᐱᔨᒡ ᓂ ᒥᔅᑯᐅᓯᐅᓐ᙮ 10 ᐛᔅ ᑲ ᐛᐧᑲᓯᒡ ᓂ ᐸᒂᓄᒥᑯᒡ; ᐊᓐᒡ ᑭᔭ ᑲ ᐊᔅᑲᒪᐛᒡ ᓂᑦ ᐊᒐᒂ ᓯᒋᒥᑐᐅᒡ᙮ 11 ᐊ ᐃᔅᒋᔄᒡ, “ᒋᓴᒪᓂᑐᐛ ᒋ ᓂᑭᑎᑯᐤ; ᑯᒂᑕᒋᐃᐧᒄ ᑭᔭ ᐅᑎᓂᐧᒄ; ᐛᔅ ᓇᒪ ᑕᔪᐛ ᒐ ᐱᒪᒋᐃᑯᑦ᙮” 12 ᐅ ᒋᓴᒪᓂᑐᐤ, ᐊᑲᐎᔾ ᔭᐛᐱᒥ: ᐅ ᒋᓴᒪᓂᑐᐤ, ᒋᐱᔾ ᐎᒋᐃ᙮ 13 ᐊᑯᔅ ᒋᑭ ᐛᐛᓇᔨᑎᒧᒡ ᑭᔭ ᒋᑭ ᓂᓱᐅᓇᑎᓱᐅᒡ ᑲ ᓂᔅᑯᔅᑐᐛᒡ ᓂᑦ ᐊᒐᒂ; ᐊᑯᔅ ᒋᑭ ᐊᒂᓂᔅᑲᑯᐅᒡ ᒋᑐᓱᐛᐅᓂᔪᐤ ᑭᔭ ᒪᒐᔨᑕᑯᓱᐅᓂᔪᐤ ᐊᓐᒡ ᑲ ᐎ ᒥᒋᑐᑐᐅᒡ᙮ 14 ᒪᒃ ᓂᑭ ᐊᔅᐸᔨᒧᓐ ᓇᓂᑎᒻ, ᑭᔭ ᐃᔭᐱᒡ ᐊᔭᔅᒃ ᒥᒄ ᒋᑭ ᒪᒥᒋᒥᑎᓐ᙮ 15 ᓂᑐᓂᒡ ᓂᑭ ᐅᒋ ᐛᐸᑎᔨᐛᓐ ᒋᑯᐃᔅᑯᑕᑎᓯᐅᓐ, ᑭᔭ ᒋᐱᒪᒋᐃᐛᐅᓐ ᐃᔅᑭᓐ ᒋᓯᑲᐛ; ᐛᔅ ᓇᒪ ᓂ ᒋᔅᒐᔨᑕᓐ ᑕᓐ ᐊᑕᑎᒋ᙮ 16 ᓂᑭ ᐃᑐᑕᓐ ᐅᒥᔅᑯᐅᓯᐅᓂᒡ ᑎᐸᔨᒋᒐᓱᐤ ᒋᓴᒪᓂᑐᐤ: ᓂᑭ ᐊᔨᒧᑕᓐ ᒋᑯᐃᔅᑯᑕᑎᓯᐅᓐ, ᒋᔾ ᒥᒄ ᑎᐱᔨᐛ᙮ 17 ᐅ ᒋᓴᒪᓂᑐᐤ, ᔅᒋ ᒋᔅᑯᑎᒧᐅᓐ ᐊ ᐸᒋ ᐅᔅᒋᓂᒋᓱᔭᓐ ᐅᒡ: ᐱᐃᒻ ᐊᓄᒡ ᓂᒋ ᐎᑕᓐ ᒋᒪᒥᔅᑲᒡ-ᐃᑐᐅᓇ᙮ 18 ᐊᓄᒡ ᑭᔭ, ᐊ ᒋᓴᐃᔪᐎᔭᓐ ᑭᔭ ᐊ ᐛᐱᔅᑎᒂᓇᔭᓐ, ᐊᑲᐎᔾ ᓇᑭᓯ; ᐸᑎᒪ ᒋ ᐛᐸᑎᔨᒂᐛ ᒋᒥᔅᑯᐅᓯᐅᓂᔪᐤ ᐊᓄᒡ ᑲ ᐱᒪᑎᓯᒡ, ᑭᔭ ᒋᑭᔅᒋᐅᓂᔪᐤ ᒥᓯᐛ ᑕᑐᐤ ᐊᐛᓐ ᒐ ᐸᒋ ᓄᑯᓯᑦ᙮ 19 ᒋᑯᐃᔅᑯᑕᑎᓯᐅᓐ ᑭᔭ, ᐅ ᒋᓴᒪᓂᑐᐤ, ᓇᔅᒡ ᐊ ᐃᔅᐸᔨᑕᒂᒡ, ᑲᒋ ᐃᑐᑎᒥᓐ ᒋᒋ ᒐᒂᓇ: ᐅ ᒋᓴᒪᓂᑐᐤ, ᐊᐛᓐ ᓇᔅᐱᑕᔅᒃ ? 20 ᒋᔾ, ᑲᒋ ᐛᐸᑎᔨᓐ ᒋᒋ ᑭᔭ ᐊᑯ ᐊᔨᒥᓯᐅᓇ, ᒥᓐ ᒋᑭ ᒥᓏᒋᐃᓐ, ᒥᓐ ᒪᒃ ᒋᑭ ᐅᒋ ᐸᓱᐅᓐ ᐊᑕᒥᒡ ᐊᔅᒋᒡ ᐅᒡ᙮ 21 ᒋᑭ ᔭᒋᑕᓐ ᓂᒋᔅᑎᓯᐅᓐ, ᑭᔭ ᒥᓯᐛ ᔭᔨᑐᐤ ᒋᑭ ᐅᒋ ᒥᔽᔨᒧᐎᓐ᙮ 22 ᐊᓯᒡ ᑭᔭ ᒋᑭ ᒪᒥᒋᒥᑎᓐ ᓂᑭᒧᐅᓂᒡ, ᒋᑕᑈᐅᓂᒡ ᐅᑦ, ᐅ ᓂᒋᓴᒪᓂᑐᒻ: ᒋᔾ ᒋᑭ ᓂᑭᒧᔅᑕᑎᓐ ᐊᓯᑭᓇᔭᐱᔾ ᒋᔍᐛᐱᒋᑭᓂᒡ, ᐅ ᒋᔾ ᐃᔅᕋᐃᓪ ᐅᐸᔭᒋᓯᒪ᙮ 23 ᓂᑐᓐ ᓇᔅᒡ ᒋᑭ ᒧᒋᒐᔨᑎᒧᒪᑭᓐ ᐊ ᓂᑭᒧᔅᑕᑕᓐ; ᑭᔭ ᓂᑦ ᐊᒐᐧᒄ ᑲᒋ ᐱᒪᒋᐊᑦ᙮ 24 ᓂᑕᔨᔾ ᑭᔭ ᒋᑭ ᐊᔨᒧᑎᒧᒥᑭᓐ ᒋᑯᐃᔅᑯᑕᑎᓯᐅᓐ ᒥᓯᐛ ᐃᔅᑭᓐ ᒋᓯᑲᐛ: ᐛᔅ ᐛᐛᓇᔨᑕᒪᐊᑭᓄᐅᒡ, ᐛᔅ ᓴᒂᔨᒧᐊᑭᓄᐅᒡ, ᐊᓐᒡ ᑲ ᐎ ᒥᒋᑐᑐᐅᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.