ᑎᐱᑦ ᐅᓂᑭᒧᐅᓇ 69 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐱᒪᒋᐃ, ᐅ ᒋᓴᒪᓂᑐᐤ; ᐛᔅ ᓂᐱᔭ ᐱᒋᐱᔪᐛ ᓂᑦ ᐊᒐᐧᑯᒡ, 2 ᓂ ᑯᑕᐅᐱᔨᓐ ᐊᒋᑕᐅᔅᒋᐛᑲᒡ, ᐊᓐᑕ ᐊᑲ ᐊ ᑎᒂᒡ ᓂᐳᐅᓐ: ᓂ ᐱᒋᐱᔨᓐ ᐊᑎᒥᐸᔭᒡ, ᐊᓐᑕ ᑲ ᐸᓯᒋᐸᐃᑯᔭᓐ᙮ 3 ᓂᑦ ᐊᔭᔅᑯᐃᑯᓐ ᓂ ᒪᐅᓐ: ᓂ ᑯᑕᑭᓐ ᐸᔅᑕᐤ; ᓂᑦ ᐊᔭᔎᐱᓐ ᒪᒂᒡ ᐊᓯᓄᐛᐃᒃ ᓂᒋᓴᒪᓂᑐᒻ᙮ 4 ᐊᓐᒡ ᓯᔅᒋᑯᒡ ᑲ ᐛᐧᑲᓯᒡ ᐊᑐᐎᔅ ᒥᒐᑐᐅᒡ ᐃᔅᐱᔅ ᓂᐱᔎᐅᓇ: ᐊᓐᒡ ᑲ ᐎ ᓂᓱᐅᓇᒋᐃᒡ ᓂᑐᐎ ᑲ ᐎ ᒪᓯᐃᒡ, ᓱᐧᑲᑎᓯᐅᒡ: ᐊᑯ ᐸᒋᑎᓇᒪᓐ ᐊᓂᒪ ᐊᑲ ᐅᒋ ᐅᑎᓂᒪᓐ᙮ 5 ᐅ ᒋᓴᒪᓂᑐᐤ, ᒋ ᒋᔅᒐᔨᑕᓐ ᓂᑭᒐᐸᑎᓯᐅᓐ; ᑭᔭ ᓂᒥᒋᑐᑎᒧᐅᓇ ᓇᒪᐎᔾ ᒋ ᑲᑥᑯᐅᓐ᙮ 6 ᐊᑯᔅ ᐊᓐᒡ ᑲ ᐊᓯᓄᐛᐃᔅᒡ, ᐅ ᑎᐸᔨᒋᒐᓱᐤ ᒥᓯᐛ ᐊ ᐃᓯ ᓱᐧᑲᑎᓯᔨᓐ ᒋᓴᒪᓂᑐᐤ, ᐊᑲᐎᔾ ᒋᑭ ᓯᓴᒂᔨᒧᐅᒡ ᓂᔾ ᐅᒡ: ᐊᑯᔅ ᐊᓐᒡ ᑲ ᓇᓂᑐᐛᔨᒥᔅᒡ ᐊᑲᐎᔾ ᒋᑭ ᓴᒂᔨᒧᐎᐛᐅᒡ ᓂᔾ ᐅᒡ, ᐅ ᐃᔅᕋᐃᓪ ᐅᒋᓴᒪᓂᑐᒪ᙮ 7 ᐛᔅ ᒋᔾ ᐅᒋ ᓂᒋ ᒋᑐᑕᑯᐅᓐ; ᓂᔄᒂᐃᒧᐅᓐ ᓂᒋ ᐊᒂᓇᑲᔅᑲᑯᓐ᙮ 8 ᓂᑦ ᐊᑥᔨᒥᑯᒡ ᓂᐧᑲᓂᓯᒡ, ᓂ ᒪᓐᑕᐛᔨᒥᑯᒡ ᓂᑲᐎᔾ ᐅᑦ ᐊᐛᓯᒪ᙮ 9 ᐛᔅ ᐊᔅᐱᔅ ᓴᒋᑕᔭᓐ ᒋᒥᒋᐛᐱᒻ ᓂᒋ ᒋᑕᒪᑯᐅᓐ; ᐅᒋᑐᓯᐛᐅᓄᐛᐛ ᒪᒃ ᐊᓐᒡ ᑲᒋ ᒋᑐᑎᔅᒡ ᓂᒋ ᐅᑕᒥᔅᑲᑯᐛᓐ᙮ 10 ᐃᔅᐱ ᒥᔭᔭᓐ, ᑭᔭ ᐸᓯᔅᑕᐛᒡ ᓂᑦ ᐊᒐᐧᒄ ᐊ ᐊᑲ ᒥᒋᓱᔭᓐ, ᐊᐅᒄ ᓂᒋᑐᑎᑯᓯᐅᓐ᙮ 11 ᓂᒋ ᑐᑕᓐ ᓱᒐᒋᓐ; ᓂᒋ ᐊᑕᔪᐧᑲᓂᐎᒂᒡ ᒪᒃ᙮ 12 ᐊᓐᒡ ᑲ ᐊᐱᒡ ᒋᒋᐃᔎᑕᒥᒡ ᓂ ᐱᑯᓄᒥᑯᒡ; ᑭᔭ ᓂᒋ ᓂᑭᒧᑕᑯᒡ ᐅᒋᔎᐸᐅᒡ᙮ 13 ᒪᒃ ᓂᔾ, ᒋᑦ ᐊᔭᒥᐊᔅᑕᑎᓐ, ᐅ ᑎᐸᔨᒋᒐᓱᐤ, ᐃᔅᐱ ᐊ ᓇᐃᐸᐃᒐ, ᐊ ᒪᒥᒐᒡ ᒋᓱᐛᔨᒋᒐᐅᓇ ᓂᑐᑐᐎ, ᐊ ᐃᓯ ᑕᑈᒥᑲᒡ ᒋᐱᒪᒋᐃᐛᐅᓐ᙮ 14 ᐎᐧᑯᒋᐃ ᐊᓯᔅᒋᐅᒡ ᐅᒡ, ᒐ ᐊᑲ ᒋ ᑯᑐᐎᐸᔨᔭᓐ: ᐊᑯᔅ ᓂᑭ ᐱᒪᒋᐃᑯᐅᓐ ᐊᓐᒡ ᑲ ᐛᐧᑲᓯᒡ ᐅᒡ, ᑭᔭ ᐊᑎᒥᐸᔭᒡ ᐅᒡ᙮ 15 ᐊᑯᔅ ᐊᑲᐎᔾ ᐊ ᑎᒥᒡ ᓂᑭ ᐸᓯᒋᐸᐃᑯᓐ, ᐊᑲ ᑭᔭ ᓂᑭ ᒥᓱᐛᐸᔨᐃᑯᓐ ᑕᒥᐸᒄ, ᐊᑲ ᑭᔭ ᐛᑎᒄ ᓂᑭ ᒋᐳᑐᓇᒪᑯᓐ᙮ 16 ᓂᑐᑐᐎ, ᐅ ᑎᐸᔨᒋᒐᓱᐤ; ᐛᔅ ᒋᓴᒋᐃᐛᐎ ᒋᓴᐛᑎᓯᐅᓐ ᒥᔽᓱᐤ, ᒂᔅᒋᑲᐳᔅᑐᐎ ᑲ ᐃᔅᐱᔅ ᒪᒥᒐᒋ ᒋ ᔪᔅᐱ ᓱᐛᔨᒋᒐᐅᓇ᙮ 17 ᐊᑲᐎᔾ ᒪᒃ ᑲᓱᔅᑐᐤ ᒋᑦ ᐊᑐᔅᒐᔭᑭᓐ; ᐛᔅ ᓂᑦ ᐊᔨᒥᓯᓐ: ᒋᐱᔾ ᓂᑐᑐᐎ᙮ 18 ᐸᔄᐱᒻ ᓂᑦ ᐊᒐᐧᒄ, ᐱᒪᒋ ᒪᒃ: ᐎᐧᑯᒋᐃ ᑲ ᐎ ᐎᔭᔅᑐᑐᐅᒡ ᐅᒡ᙮ 19 ᔅᒋ ᒋᔅᒐᔨᑕᓐ ᓂᒋᑐᑎᑯᓯᐅᓐ, ᓂᐛᐛᓇᔨᑎᒧᐅᓐ, ᑭᔭ ᓂᑦ ᐊᑕᐛᔨᒥᑯᓯᐅᓐ: ᒥᓯᐛ ᑲ ᐎ ᒪᓯᐃᒡ ᒋᑦ ᐅᑎᔅᑲᐎᔅᑲᒂᒡ᙮ 20 ᒋᑐᓱᐛᐅᓐ ᓂᒋ ᐱᑯᑕᐊᔅᑲᑯᓐ, ᓂ ᓴᑭᔅᒋᓇᔅᑲᑯᓐ ᑯᓯᑯᒪᒋᐅᓐ: ᓂᒋ ᐊᓱᐛᐱᒪᐅᒡ ᒪᒃ ᐊᐛᓐᒋ ᒐᒋ ᒋᔅᑎᒪᒋᓄᐅᒡ, ᒪᒃ ᓇᒪᐎᔾ ᐊᐛᓐ ᐅᒋ ᑕᐤ; ᑭᔭ ᒐᒋ ᑲᒋᒋᐃᒡ, ᒪᒃ ᓇᒪᐎᔾ ᐊᐛᓐ ᓂ ᐅᒋ ᒥᔅᑯᐛᐤ᙮ 21 ᓂᒋ ᒥᔨᑯᒡ ᐎᓴᐳᔪᐤ ᒐᒋ ᒥᒍᐅᒡ; ᑭᔭ ᐊ ᓄᐅᑕᔭᐸᒂᐅᒡ ᓂᒋ ᒥᓇᐃᑯᒡ ᓯᐅᑲᐳᔪᐤ᙮ 22 ᐊᑯᔅ ᐅᒥᒋᓱᐛᑭᓇᑎᑯᐛᐤ ᒋᑭ ᓇᒂᑭᓂᔅᑕᑯᐅᒡ: ᑭᔭ ᐊᓂᔭᔪᐤ ᒐᒋ ᐅᒋ ᒥᔽᐱᒪᐅᓯᐛᑯᐱᓇ, ᐊᑯᔅ ᒋᑭ ᐅᓇᐃᑭᓂᐎᔪᐤ᙮ 23 ᐊᑯᔅ ᒋᑭ ᑎᐱᔅᑲᐳᐅᒡ, ᒐ ᐊᑲ ᒋ ᐛᐸᑕᒡ: ᑭᔭ ᐅᔅᐱᔎᓄᐛᐛ ᒧᔅ ᒋᑭ ᓯᑯᐛᐸᔨᔪᐛ᙮ 24 ᓯᒋᓂᒧᐅᒡ ᑯᔭᔅᑕᔨᑕᒧᐅᓂᔪᐤ, ᐊᑯᔅ ᑭᔭ ᒋᑦ ᐊᐧᑯᔪᐛᓯᐤ ᒋᔄᓯᐅᓂᔪᐤ ᒋᑭ ᐅᑎᑎᓂᑯᐅᒡ᙮ 25 ᐊᑯᔅ ᐎᒋᐛᐤ ᒋᑭ ᒺᔅᑕᑎᑯᓂᔪᐤ; ᑭᔭ ᐊᑲᐎᔾ ᐊᐛᔪᐛ ᒋᑭ ᐎᒋᔨᐛ ᐅᒥᒋᐛᐳᐛᒡ᙮ 26 ᐛᔅ ᑯᒂᑕᒋᐊᐅᒡ ᐊᓂᔭ ᑲᒋ ᐸᑲᒪᐅᒪᑦ; ᑭᔭ ᑲᔅᒐᔨᑎᒥᒪᐅᒡ ᐊᓂᔭ ᑲᒋ ᒥᔄᑭᓂᑲᑎᒧᑦ᙮ 27 ᑕᐧᑯᑕ ᒥᒐᑎᓯᐅᓐ ᐅᒥᒐᑎᓯᐅᓄᐛᒡ: ᐊᑲ ᑭᔭ ᓇᐊᔨᒥᒡ ᒐᒋ ᐱᒐᒡ ᒋᑯᐃᔅᑯᑕᑎᓯᐅᓂᒡ᙮ 28 ᐊᑯᔅ ᒪᒃ ᒋᑭ ᑲᓴᐛᐅᒡ ᐅᒥᓯᓇᐃᑭᓂᔨᒡ ᐅᒋ ᐅᐱᒪᑎᓯᓱᐛ, ᐊᑲ ᑭᔭ ᒋᑭ ᐊᓯᔅᑎᓯᓇᓱᐅᒡ ᐅᑯᐃᔅᑯᑕᑎᓯᐛ᙮ 29 ᒪᒃ ᓂᔾ ᓂ ᒋᔅᑎᒪᑎᓯᓐ ᑭᔭ ᓂ ᒥᒋᔨᐛᔨᑕᓐ: ᐊᑯᔅ ᒋᐱᒪᒋᐃᐛᐅᓐ, ᐅ ᒋᓴᒪᓂᑐᐤ ᓂᑭ ᐃᔅᐸᒐᓂᑯᓐ᙮ 30 ᓂᑭ ᒪᒥᒋᑕᒺᓐ ᐅᑦ ᐃᓯᓂᐧᑲᓱᐅᓐ ᒋᓴᒪᓂᑐᐤ ᐊ ᓂᑭᒧᔭᓐ, ᓂᑭ ᒋᔅᑕᒋᒪᐤ ᒪᒃ ᐊ ᓂᓇᔅᑯᒧᔭᓐ᙮ 31 ᐅᔭᔪᐤ ᒪᒃ ᐊᑐᐎᔅ ᒋᑭ ᓇᐊᔨᑕᒥᑯᐤ ᑎᐸᔨᒋᒐᓱᐤ ᐃᔅᐱᔅ ᓇᐸ ᒥᔅᑐᓴ, ᑭᔭ ᒥᒄ ᐃᔭᐸᐛ ᑲ ᐅᑦ ᐊᔅᑲᓂᔨᒋ ᑭᔭ ᑲ ᐊᔅᑲᓯᔨᒋ᙮ 32 ᑲ ᑎᐱᑕᔨᒧᒡ ᒋᑭ ᐛᐸᑎᒧᒡ, ᑭᔭ ᒋᑭ ᓯᒋᔭᓱᐅᒡ: ᒋᑕᐃᐛᐤ ᒋᑭ ᐱᒪᑎᓯᒪᑭᓐ ᒋᔨᐛᐤ ᑲ ᓇᓂᑐᐛᔨᒪᒄ ᒋᓴᒪᓂᑐᐤ᙮ 33 ᐛᔅ ᑎᐸᔨᒋᒐᓱᐤ ᓂᑐᑐᐛᐤ ᑲ ᒋᔅᑎᒪᑎᓯᔨᒋ, ᓇᒪ ᑭᔭ ᐊᑐᐛᔨᒪᐤ ᑲᒪᑯᓇᑭᓄᐎᒋ᙮ 34 ᐊᑯᔅ ᒋᓯᑯᔪᐤ ᑭᔭ ᐊᔅᒋᔪᐤ ᒋᑭ ᒪᒥᒋᒥᑯᐤ, ᐎᓂᐸᑯᔪᐤ, ᑭᔭ ᒥᓯᐛ ᑕᑐᐤ ᒐᒂᓐ ᐊᓐᑕ ᑲ ᐊᔭᒋᐱᔨᒡ᙮ 35 ᐛᔅ ᒋᓴᒪᓂᑐᐤ ᒋᑭ ᐱᒪᒋᑕᐤ ᓴᐃᔭᓂᔪᐤ, ᑭᔭ ᒋᑭ ᐅᓯᑕᐤ ᒍᑕ ᐅᑕᓇᐛ: ᐊᑯᑕ ᒐᒋ ᐎᒋᔨᒋ ᑭᔭ ᒐᒋ ᑎᐱᔨᐛᐅᓯᔨᒋ᙮ 36 ᐅᑦ ᐊᐛᓯᒥᓯᔪᐛ ᑭᔭ ᐅᑦ ᐊᑐᔅᒐᔭᑭᓇ ᒋᑭ ᑎᐸᔨᑎᒥᔪᐛ: ᐊᓐᒡ ᒪᒃ ᑲ ᓴᒋᑕᐛᒡ ᐅᑦ ᐃᓯᓂᐧᑲᓱᐅᓂᔪᐤ ᐊᓐᑕ ᒋᑭ ᐎᒋᐅᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.