ᑎᐱᑦ ᐅᓂᑭᒧᐅᓇ 68 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐊᑯᔅ ᒋᑭ ᐱᓯᑯᐤ ᒋᓴᒪᓂᑐᐤ, ᐊᑯᔅ ᑲ ᐛᐧᑲᑎᑯᑦ ᒋᑭ ᐛᓯᔄᐛᑎᓴᐛᑭᓂᐎᔪᐛ; ᐊᑯᔅ ᑭᔭ ᑲ ᐛᐧᑲᑎᑯᑦ ᒋᑭ ᒋᑎᓯᒥᑯᐤ᙮ 2 ᒧᔭᒻ ᐊ ᐱᐳᑕᒡ ᐊ ᐛᐸᔅᑎᒡ, ᐊᑯ ᐃᓯ ᐃᒐᑎᓴᐅᒡ; ᒧᔭᒻ ᐱᓴᒂᐃᑭᓐ ᐊ ᐃᓯ ᑎᒋᔅᑕᒡ ᐅᑎᔅᑯᐤ ᐃᔅᑯᑕᒡ, ᐊᑯᔅ ᐅᒥᒋᑥᐅᒡ ᐊᔪᐛᒃ ᒐ ᐃᓯ ᓂᓱᐛᓇᑎᓯᒡ ᐅᑎᔅᑯᐤ ᒋᓴᒪᓂᑐᐛ᙮ 3 ᒪᒃ ᐊᑯᔅ ᐅᑯᐃᔅᑯᑕᑎᓯᐅᒡ ᒋᑭ ᒥᔽᔨᑎᒧᒡ; ᐊᑯᔅ ᒋᑭ ᒧᒋᒐᔨᑎᒧᔅᑐᐛᐅᒡ ᒋᓴᒪᓂᑐᐛ; ᓂᐦᐃ, ᐊᑯᔅ ᓇᔅᒡ ᒋᑭ ᒧᒋᒐᔨᑎᒧᒡ᙮ 4 ᓂᑭᒧᔅᑕᐧᒄ ᒋᓴᒪᓂᑐᐤ, ᐊ ᓂᑭᒧᔭᒄ ᒪᒥᒋᑕᒺᐧᒄ ᐅᑦ ᐃᓯᓂᐧᑲᓱᐅᓐ: ᒋᔅᑕᒋᒥᐧᒄ ᐊᓐ ᑲ ᑕᑎᐱᑦ ᒋᓯᑯᒡ ᑎᐸᔨᒋᒐᓱᐤ ᑲ ᐃᓯᓂᐧᑲᓱᑦ, ᒧᒋᒐᔨᑎᒥᐃᑯᒃ ᒪᒃ᙮ 5 ᑲ ᐅᑕᐎᒥᑯᑦ ᒋᐅᓴᓂᓴ, ᑭᔭ ᑲ ᑎᐸᔅᑯᓇᑦ ᐃᔎᐛ ᑲ ᓂᐱᔨᒋ ᐅᓇᐸᒥᔪᐛ, ᒋᓴᒪᓂᑐᐤ ᐊ ᑕᑦ ᐅᐸᔭᒋ-ᐃᑕᐅᓂᒡ᙮ 6 ᒋᓴᒪᓂᑐᐤ ᒥᔽᔨᒧᐊᐤ ᑲ ᓂᔭᔅᑎᐛᔨᒧᔨᒋ ᐊᔨᑐᑕᐎᓯᔨᒋ: ᐸᒋ ᐎᐎᑕᐊᐤ ᐊᓂᔭ ᑲ ᒪᒪᒋᒂᐱᓱᔨᒋ: ᒪᒃ ᑲ ᐃᔨᐛᔨᒧᒡ ᑕᐅᒡ ᐊ ᐸᐧᑯᑎᔅᑭᒥᑲᔨᒡ᙮ 7 ᐅ ᒋᓴᒪᓂᑐᐤ, ᐃᔅᐱ ᑲ ᓂᑲᓄᑕᐃᑥᐤ ᒋᑦ ᐃᔨᒥᒡ, ᐃᔅᐱ ᑲ ᓴᐳᔅᑲᒥᓐ ᐸᐧᑯᑎᔅᑭᒥᑲᒡ; 8 ᐊᔅᒋᔾ ᒋ ᑯᔅᑯᐱᔪᐤ, ᒋᓯᒂ ᑭᔭ ᒋ ᔭᓯᐱᔪᐛ ᐅᑎᔅᑯᐤ ᒋᓴᒪᓂᑐᐛ: ᐃᔭᐱᒡ ᓴᐃᓇᐃ ᒋ ᐊᒋᐱᔪᐤ ᐅᑎᔅᑯᐤ ᒋᓴᒪᓂᑐᐛ, ᐅᒋᓴᒪᓂᑐᒪ ᐃᔅᕋᐃᓪ᙮ 9 ᒋᔾ, ᐅ ᒋᓴᒪᓂᑐᐤ, ᔅᒋ ᐃᑎᓴᐊᓐ ᐊ ᒥᔅᑎ ᒋᒺᒡ, ᑲ ᐅᒋ ᒥᔅᑯᐅᑕᔭᓐ ᐊᓐ ᒐ ᑎᐱᔨᐛᐅᓯᔨᓐ, ᐃᔅᐱ ᑲ ᐊᔭᔅᑯᓯᒥᑲᒡ᙮ 10 ᒋ ᒪᐛᒋᐃᑐᒥᒡ ᐊᑯᑕ ᑲ ᑕᒡ: ᒋᔾ, ᐅ ᒋᓴᒪᓂᑐᐤ, ᒋᒥᔽᑎᓯᐅᓂᒡ, ᔅᒋ ᐊᔭᔅᑯᔅᑎᒧᐛᐅᒡ ᑲ ᒋᔅᑎᒪᑎᓯᒡ᙮ 11 ᑎᐸᔨᒋᒐᓱᐤ ᒋ ᒥᔨᐛᐤ ᐃᔨᒧᐅᓂᔪᐤ; ᓇᔅᐱᒡ ᒋ ᒥᒐᑐᐅᒡ ᐊᓐᒡ ᐃᔎᐅᒡ ᑲᒋ ᐛᐎᑕᒡ: 12 ᒋᓴᐅᒋᒪᐅᒡ ᐊ ᑎᐸᔨᒪᒡ ᒪᒧᐤ ᐅᒪᓯᒐᐛ ᒋ ᒋᐱᔾ ᒋᑎᓯᒧᐅᒡ: ᐊᓐ ᒪᒃ ᐎᒋᒡ ᑲ ᐊᐱᑦ ᒋ ᒪᑎᓄᐛᐤ ᒪᔅᑲᑥᐅᓂᔪᐤ᙮ 13 ᐊᑎ ᐊᒋ ᐱᒥᓯᓇᒃ ᒪᒂᔭᔅ ᐊᔅᒋᒂ, ᐊᔪᐛᒡ ᒪᒃ ᒋᑭ ᐃᓯᓇᑯᓯᓇᐛᐤ ᒧᔭᒻ ᐅᒥᒥᐅᑕᑲᒂᓇ, ᑲ ᐊᒂᓇᑲᒧᒋ ᓱᓇᔭᐱᔅᒄ, ᑭᔭ ᐅᒥᑯᓇ ᐎᔄᐅᓱᓇᔭᐱᔅᒄ ᐅᒡ᙮ 14 ᐃᔅᐱ ᒥᓯᐛ ᓱᐧᑲᑎᓯᑦ ᐛᓴᔄᑎᓴᐛᑦ ᒋᓴᐅᒋᒪᐛ ᐎᔾ ᐅᒡ, ᑲ ᐃᔅᐱᔅ ᐛᐱᓯᑦ ᒧᔭᒻ ᑯᓇ ᐊᓐᑕ ᓴᓪᒧᓂᒡ᙮ 15 ᐅᐱᔅᑯᑎᓇᒻ ᒋᓴᒪᓂᑐᐤ ᒧᔭᒻ ᐸᓴᓐ ᐱᔅᑯᑎᓇᐤ ᐊ ᐃᔅᐸᒡ, ᐱᔅᑯᑎᓇᐤ ᒧᔭᒻ ᐸᓴᓐ ᐱᔅᑯᑎᓇᐤ᙮ 16 ᑕᓇᒡ ᐛᒋ ᒂᔅᑯᑎᔭᒄ, ᒋᔨᐛᐤ ᒋᒋ ᐱᔅᑯᑎᓇᐛ ? ᐊᐅᒄ ᐅᔭ ᐱᔅᑯᑎᓇᔪᐤ ᒋᓴᒪᓂᑐᐤ ᑲ ᓂᑐᐛᔨᑕᐧᒃ ᐊᓐᑕ ᒐᒋ ᐎᒋᑦ; ᓂᐦᐃ, ᐊᑯᑕ ᒐ ᐎᒋᑦ ᑎᐸᔨᒋᒐᓱᐤ ᑲᒋᒡ᙮ 17 ᐅᑎᑎᐱᑕᐸᓇᔎ ᒋᓴᒪᓂᑐᐤ ᓂᓱᔪᐤ ᑕᑥᐤ ᒐᓯᐱᔪᐤ ᐃᑕᓯᔪᐛ, ᒥᒐᑦ ᒐᓯᐱᔪᐤ ᐊᓐᒋᓇ ᐅᑎ: ᑎᐸᔨᒋᒐᓱᐤ ᐎᒐᐛᐤ ᒧᔭᒻ ᓴᐃᓇᐃᒡ, ᐸᔭᐧᑭᓂᔨᒡ᙮ 18 ᐃᔅᐱᒥᒡ ᔅᒋ ᐃᓯ ᐅᐱᔅᑲᓐ, ᔅᒋ ᐱᒧᑕᑕᓐ ᐊᐛᑲᓱᐛᐅᓐ ᐊ ᐊᐛᐧᑲᓂᑲᑕᒡ: ᔅᒋ ᐅᑎᓇᓐ ᒥᔨᐛᐅᓇ ᐃᔪᒡ ᐅᒡ; ᓂᐦᐃ ᑲ ᐃᔨᐛᒧᑐᑕᒐᑦ ᐅᒋ ᑭᔭ, ᑎᐸᔨᒋᒐᓱᐤ ᒋᓴᒪᓂᑐᐤ ᒐᒋ ᐎᒋᒪᑦ᙮ 19 ᒪᒥᒋᑕᑯᓱᐤ ᑎᐸᔨᒋᒐᓱᐤ, ᒧᓴᓇᐤ ᐎ ᑲᐛᑕᐃᑕᐧᒄ ᒥᔪᑐᑕᒐᐅᓇ, ᒋᓴᒪᓂᑐᐤ ᐅᑦ, ᐛᒋᐱᔨᒡ ᒋ ᐱᒪᒋᐃᑯᓯᐅᓄᐤ᙮ 20 ᑲ ᐅᒋᓴᒪᓂᑐᒥᔭᒡ, ᐊᐅᒄ ᒋᓴᒪᓂᑐᐤ ᐛᒋᐱᔨᒡ ᐱᒪᒋᐃᐛᐅᓐ; ᑭᔭ ᒋᓴᒪᓂᑐᐤ ᑎᐸᔨᒋᒐᓱᐤ ᐅᑦ ᐊᔭᓂᐤ ᓂᐳᐅᓂᒡ ᑲ ᐅᒋᐱᔨᒋ᙮ 21 ᒪᒃ ᒋᓴᒪᓂᑐᐤ ᒋᑭ ᒥᔄᑭᓂᐧᑲᑕᒺᐤ ᐅᔅᑎᒂᓂᔪᐤ ᑲ ᐛᐧᑲᑎᑯᑦ, ᑭᔭ ᐅᓴᑲᑎᐱ ᑲ ᐅᐱᐛᐎᒡ ᐊᓂᔭ ᐃᔭᐱᒡ ᑲ ᐱᒧᑕᔨᒋ ᐅᓂᑐᑎᒧᐅᓂᒡ᙮ 22 ᑎᐸᔨᒋᒐᓱᐤ ᒋ ᐃᔅᒋᔄᐤ, “ᓂᑭ ᒋᐛ ᐸᓱᐛᐅᒡ ᐸᓴᓂᒡ ᐅᒡ, ᓂᑭ ᐸᓱᐛᐅᒡ ᓂᑦ ᐃᔨᒥᒡ ᐊ ᑕᒥᐸᑯᒡ ᐎᓂᐸᑯᒡ ᐅᒡ: 23 ᒋᓯᑦ ᒐᒋ ᒋᑕᓂᑲᑕᒡ ᐅᒥᐧᑯᒡ ᑲ ᐛᐧᑲᑎᔅᒡ, ᑭᔭ ᐅᑕᔨᔪᐛᐤ ᒋᑦ ᐊᑎᒧᒡ ᐊᑯᑕ ᑭᔭ ᒐᒋ ᐃᔭᐱᒡ ᒐ ᑐᑕᑭᓄᐎᔨᒡ᙮” 24 ᒋ ᐛᐸᑎᒧᒡ ᒋᐱᒧᑕᐅᓇ, ᐅ ᒋᓴᒪᓂᑐᐤ; ᐅᐱᒧᑕᐅᓇ ᓂᒋᓴᒪᓂᑐᒻ ᐅᑦ, ᓂᒋᓴᒪᓂᑐᒻ, ᐸᔭᒋᑭᒥᑯᒡ᙮ 25 ᐅᓂᑭᒧᐅᒡ ᒋ ᓂᑲᓄᑕᐅᒡ, ᑲᔍᐛᐱᒐᒡ ᒋ ᓄᔅᐱᓇᓱᐛᐅᒡ; ᐃᔭᐱᒡ ᒪᒃ ᒋ ᐱᒧᑕᐅᒡ ᐅᔅᒋᓂᒋᔎᐅᒡ ᐊ ᐸᑕᑯᑕᒡ ᑕᐛᐃᑭᓂᓴ᙮ 26 “ᒪᒥᒋᒥᐧᒄ ᒋᓴᒪᓂᑐᐤ ᒪᐛᒋᐃᑐᐅᓂᒡ, ᑎᐸᔨᒋᒐᓱᐤ ᐅᑦ, ᒋᔨᐛᐤ ᐅᒧᔅᒋᐅᓂᒡ ᐃᔅᕋᐃᓪ ᑲ ᐅᒋᔭᒄ᙮” 27 ᐊᑯᑕ ᐊ ᑕᑦ ᑲ ᐊᐱᔅᑕᔨᑕᑯᓯᑦ ᐱᓐᒋᒥᓐ ᐊᓯᒡ ᐅᑦ ᐅᒋᒪᒧᐛᐛ, ᒍᑕ ᒋᓴᐅᒋᒪᓯᒡ ᑭᔭ ᐅᑦ ᐃᔨᒧᐛᐛ, ᓴᐳᓕᓐ ᒋᓴᐅᒋᒪᓯᒡ, ᑭᔭ ᓇᑉᑕᓕ ᒋᓴᐅᒋᒪᓯᒡ᙮ 28 ᒋᒋᓴᒪᓂᑐᒻ ᒋ ᐃᑎᓱᐛᑎᒻ ᒋᒥᔅᑯᐅᓯᐅᓂᔪᐤ; ᒥᔅᑯᐅᓯᑕ, ᐅ ᒋᓴᒪᓂᑐᐤ, ᐊᓂᒪ ᑲᒋ ᐃᑐᑎᒪᐎᔭᒡ᙮ 29 ᒋᒋᓴᐊᔭᒥᐊᐅᒋᐛᑉ ᐅᒋ ᒋᕈᓯᓕᒥᒡ, ᒋᓴᐅᒋᒪᐅᒡ ᒋᑭ ᐸᑥᑯᒡ ᒥᔨᐛᐅᓇ᙮ 30 ᒋᑐᓯᒡ ᑲ ᒪᒧᒥᒐᑎᒡ ᓯᒪᑭᓇᓯᐎᔨᔪᐅᒡ, ᑲ ᒪᒥᒐᑎᒡ ᓇᐸ ᒥᔅᑐᓯᒡ, ᐊᓯᒡ ᐅᒥᔅᑐᓯᒧᐛᐛ ᐃᔪᒡ, ᐸᑎᒪ ᒥᓯᐛ ᐊᑕᑎᓯᒡ ᐸᑕᐱᑥᐛ ᐊ ᐸᑕᒡ ᓱᓇᔭᐱᔅᑯᓴ: ᐛᓴᔄᑎᓴᐅᒡ ᐃᔪᒡ ᑲ ᒥᔽᔨᑕᒡ ᓂᑐᐱᔪᐅᓂᔪᐤ᙮ 31 ᒋᓴᐅᒋᒪᓯᒡ ᐃᒋᑉᑎᒡ ᒋᑭ ᐅᒋ ᐸᒋ ᐃᑐᑕᐅᒡ; ᐃᑎᔪᐱᔭ ᐃᔪᒡ ᐎᐱᒡ ᒋᑭ ᓱᐅᓂᔅᒐᔨᔅᑕᐛᐅᒡ ᒋᓴᒪᓂᑐᐛ᙮ 32 ᓂᑭᒧᔅᑕᐧᒄ ᒋᓴᒪᓂᑐᐤ, ᒋᔨᐛᐤ ᐅᒋᒪᐅᓇ ᐊᔅᒋᒡ; ᐅ ᐊ ᓂᑭᒧᔭᒄ ᒪᒥᒋᒥᐧᒄ ᑎᐸᔨᒋᒐᓱᐤ ! 33 ᐊᓐ ᑲ ᐱᒥᑕᑎᐱᑦ ᒋᒋᒋᓯᒂ, ᐛᔅᑭᒡ ᑲ ᑎᒂᓂᔨᒋ: ᐛᔅ ᐛᐎᑎᓴᐊᒻ ᐅᐸᑕᑯᓯᐅᓐ, ᐊᐅᒄ ᒪᒃ ᐸᑕᑯᓯᐅᓐ ᓇᔅᒡ ᐊ ᒋᔄᐛᒥᑲᒡ᙮ 34 ᐛᐎᑕᒺᐧᒄ ᐊ ᒥᔅᑯᐅᓯᑦ ᒋᓴᒪᓂᑐᐤ: ᐅᒋᔅᑕᔨᑕᑯᓱᐅᓂᒡ ᑎᐸᔨᒪᐤ ᐃᔅᕋᐃᓚ, ᐅᒥᔅᑯᐅᓯᐅᓐ ᑎᑯᓂᔪᐤ ᑭᔅᑯᐅᓂᒡ᙮ 35 ᐅ ᒋᓴᒪᓂᑐᐤ, ᒋ ᑯᔅᑕᑎᑯᓯᓐ ᒋ ᐸᔭᐧᑭᓄᒥᒡ ᐅᒡ: ᐅᒋᓴᒪᓂᑐᒪ ᐃᔅᕋᐃᓪ ᐊᐅᒄ ᐊᓐ ᑲ ᒥᔭᑦ ᒥᔅᑯᐅᓯᐅᓂᔪᐤ ᑭᔭ ᑭᔅᒋᐅᓂᔪᐤ ᐅᑦ ᐃᔨᒪ᙮ ᒪᒥᒋᑕᑯᓱᐤ ᒋᓴᒪᓂᑐᐤ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.