ᑎᐱᑦ ᐅᓂᑭᒧᐅᓇ 63 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐅ ᒋᓴᒪᓂᑐᐤ, ᒋᔭ ᓂᒋᓴᒪᓂᑐᒻ; ᐎᐱᒡ ᒋᑭ ᓇᓂᑐᐛᔨᒥᑎᓐ: ᓂᑦ ᐊᒐᐧᒄ ᒋ ᓄᑕᔭᐸᒂᑐᑕᒄ, ᓂᔭᔅ ᒋ ᐱᒂᔨᒥᑯᓐ, ᐊ ᐸᔅᑕᒡ ᑭᔭ ᐊ ᓄᑕᔭᐸᒂᒥᑭᒡ ᐊᔅᒋᒡ, ᐊᓐᑕ ᐊᑲ ᑎᒂᒡ ᓂᐱᔾ᙮ 2 ᑲᒋ ᐛᐸᑎᒪᓐ ᒋᑭᔅᒋᐅᓐ ᑭᔭ ᒋᒋᔅᑕᔨᑕᑯᓱᐅᓐ, ᑲ ᐃᓯ ᐛᐱᒥᑕᓐ ᐸᔭᒋ ᒥᒋᐛᐱᒡ᙮ 3 ᒋ ᓴᒋᐃᐛᐤ ᒋᓴᐛᑎᓯᐅᓐ ᐊᔪᐛᒃ ᐊ ᒥᔽᓯᒡ ᐃᔅᐱᔅ ᐱᒪᑎᓯᐅᓐ, ᓂᑐᓂᒡ ᒋᑭ ᐅᒋ ᒪᒥᒋᒥᑎᓐ᙮ 4 ᐊᐅᑯᐤ ᒐ ᐃᓯ ᒪᒥᒋᒥᑕᓐ ᒐ ᐃᔅᐱᔅ ᐱᒪᑎᓯᔭᓐ: ᓂᑭ ᐅᐱᓇᓐ ᓂᑎᒋᔭ ᒋᑦ ᐃᓯᓂᐧᑲᓱᐅᓂᒡ᙮ 5 ᓂᑦ ᐊᒐᐧᒄ ᒋᑭ ᒋᔅᐳᐤ ᒧᔭᒻ ᐎᓐ ᑭᔭ ᑲ ᐎᔨᔪᐅᒡ ᐅᒋ; ᓂᑐᓂᒡ ᑭᔭ ᒋᑭ ᐅᒋ ᒪᒥᒋᒥᑎᓐ ᐊ ᒥᔽᔨᑎᒧᓱᐛᔅᒐᔭᓐ᙮ 6 ᐃᔅᐱ ᒐᔅᒋᑕᑕᓂ ᓂᓂᐸᐅᓂᒡ, ᑭᔭ ᒥᔭᒥᑐᓇᔨᒥᑕᓂ ᐊ ᒪᒂᒡ ᑎᐱᔅᑲᒡ᙮ 7 ᒋᔾ ᐊᒋ ᐎᒋᐃᔨᓐ, ᐊ ᐊᑯᓇᐎᓐ ᒋᒥᑯᓇ ᓂᑭ ᒥᔽᔨᑕᓐ᙮ 8 ᓂᑦ ᐊᒐᐧᒄ ᓱᒃ ᒋ ᓄᔅᐱᓇᑎᒄ: ᒋᒥᔪᐎᓐ ᓂ ᓯᑐᓂᑯᓐ᙮ 9 ᐊᓐᒡ ᒪᒃ ᑲ ᓇᓂᑐᐛᔨᒪᒡ ᓂᑦ ᐊᒐᒂ ᒐᒋ ᓂᓱᐅᓇᒋᐊᒡ, ᒋᑭ ᐃᑐᑕᐅᒡ ᒪᐅᒡ ᐊ ᑕᒥᔅᑭᒥᑲᒡ᙮ 10 ᒋᑭ ᐸᒋᓯᓂᒡ ᓂᑐᐱᔪᐅ-ᒧᐧᑯᒪᓇ ᐅᒡ; ᒋᑭ ᐅᑎᓂᑯᐅᒡ ᒪᒐᓱᐛ᙮ 11 ᒪᒃ ᒋᓴᐅᒋᒪᐤ ᒋᑭ ᒥᔽᑕᐤ ᒋᓴᒪᓂᑐᐛ; ᒥᓯᐛ ᐊᐛᓐ ᑲ ᐃᔅᐱ ᒋᒋ ᐃᔅᒋᔄᑦ ᐎᔾ ᐅᒋ ᒋᑭ ᒋᔅᑕᔨᑕᑯᓱᐤ: ᒪᒃ ᐅᑐᓄᐛᐤ ᐊᓐᒡ ᑲ ᑭᑭᒋᔭᒡ ᒋᑭ ᒋᐸᐃᑭᓄᐎᔨᐛ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.