ᑎᐱᑦ ᐅᓂᑭᒧᐅᓇ 59 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐱᒪᒋᐃ ᑲ ᐛᐧᑲᓯᒡ ᐅᒡ, ᐅ ᓂᒋᓴᒪᓂᑐᒻ; ᒥᑕᒂᓂᒧᐎ ᐊᓐᒡ ᐅᒋ ᑲ ᐱᓯᑯᔅᑐᐅᒡ᙮ 2 ᐱᒪᒋᐃ ᐊᓐᒡ ᑲ ᒥᒐᑎᓱᐎ ᑐᑕᒡ ᐅᒡ, ᑭᔭ ᒥᑕᒂᓇᒧᐎ ᑲ ᓂᐸᐃᐛᓯᒡ ᐃᔪᒡ᙮ 3 ᐛᔅ, ᒧᔅ, ᒋᒧᑦ ᐊᔅᑲᒧᐛᐅᒡ ᓂᑦ ᐊᒐᒂ: ᑲ ᓱᐧᑲᑎᓯᒡ ᓂ ᒪᐛᒋᐃᑎᓱᔅᑕᑯᒡ; ᓇᒪᐎᔾ ᓂᐅᓂᑐᑎᒧᐅᓐ, ᓇᒪ ᑭᔭ ᓂᒥᒋᑐᑎᒧᐅᓐ ᐅᒡ, ᐅ ᑎᐸᔨᒋᒐᓱᐤ᙮ 4 ᐱᒥᐸᑕᐅᒡ ᐊ ᐛᐛᓯᐅᒡ ᐊᑎ ᐊᑲ ᐅᒋ ᒥᒋᐃᑐᐅᒡ: ᑯᔅᑯᓯ ᒐᒋ ᐎᒋᐃᔨᓐ, ᑭᓄᐛᐱᒥᔾ ᒪᒃ᙮ 5 ᒋᔾ ᒪᒃ, ᐅ ᑎᐸᔨᒋᒐᓱᐤ ᒥᓯᐛ ᓯᔪᐧᑲᑎᓯᔨᓐ ᒋᓴᒪᓂᑐᐤ, ᐅᒋᓴᒪᓂᑐᒪ ᐃᔅᕋᐃᓪ, ᑯᔅᑯᓯ ᒐᒋ ᓂᑐᐛᐱᒥᑥᐤ ᒥᓯᐛ ᐊᑲ ᐊᔭᒥᐊᒡ: ᐊᑲᐎᔾ ᒋᔅᑎᒪᒐᔨᒥᒡ ᑲ ᐅᓂᑐᑕᒡ᙮ 6 ᒋᐛᐅᒡ ᐛᑕᑯᓯᔨᒋ, ᒧᔭᒻ ᐊᑎᒧᒡ ᐃᑎᑕᑯᓱᐅᒡ, ᑭᔭ ᐛᔅᑲᔅᑭᒧᒡ ᐅᑕᓇᔪᐤ᙮ 7 ᐛᐸᑕ, ᒥᒋ ᐃᔨᒧᐅᒡ: ᓯᒪᑭᓇ ᐅᑐᓄᐛᒡ ᑎᑯᓂᔪᐛ; “ᐛᔅ ᐊᐛᓐ ᐱᔭᑕᐧᒃ ?” ᐃᔅᒋᔄᐅᒡ᙮ 8 ᒪᒃ ᒋᔾ, ᐅ ᑎᐸᔨᒋᒐᓱᐤ, ᒋᑭ ᐅᓯᓄᐛᐅᒡ: ᒋᑭ ᓴᒂᔨᒺᐅᒡ ᒥᓯᐛ ᐊᑲ ᐊᔭᒥᐊᒡ᙮ 9 ᐅᒥᔅᑯᐅᓯᐅᓐ ᐅᒋ ᒋᑭ ᐊᓯᓄᐛᐃᑎᓐ: ᐛᔅ ᒋᓴᒪᓂᑐᐤ ᓂ ᒋᔅᐸᐛᑎᒄ᙮ 10 ᓂ ᓱᐛᔨᒥᑯᓯᔪᐤ ᒋᓴᒪᓂᑐᒻ ᓂᑭ ᐱᒪᒋᐃᒄ: ᒋᓴᒪᓂᑐᐤ ᓂᑭ ᐛᐸᑎᔨᒃ ᒐᒋ ᐃᑎᒡ ᑲ ᐛᐧᑲᓯᒡ ᐊ ᐃᑕᔨᑎᒪᓐ᙮ 11 ᐊᑲᐎᔾ ᓂᐸᐃᒡ, ᒥᔅᑯᒡ ᓂᑦ ᐃᔨᒥᒡ ᒋᑭ ᐅᓂᒋᔅᒋᓯᐅᒡ ᐛᓴᔄᐱᓐᒡ ᒋᓱᐧᑲᑎᓯᐅᓂᒡ; ᓂᒋᐛᐱᓐᒡ ᒪᒃ, ᐅ ᑎᐸᔨᒋᒐᓱᐤ, ᓂᑦ ᐊᒂᓇᐅᓱᐛᑭᓂᓇᓐ᙮ 12 ᐅᒥᒋᑥᐅᓄᐛᐤ ᐅᑐᓄᐛᒡ ᐅᒡ, ᑭᔭ ᐅᑦ ᐃᔨᒧᐅᓄᐛᐛ ᐅᒋ ᐊᑯᔅ ᒋᑭ ᓂᒂᓱᐅᒡ ᐅᒋᔅᑕᔨᒧᐅᓄᐛᒡ: ᑭᔭ ᒪᒐᒋᒧᐛᐅᓐ ᑭᔭ ᑭᑭᒋᔭᐅᓐ ᐅᒋ ᑲ ᐃᔨᒥᒡ᙮ 13 ᓂᓱᐅᓇᒋᐃᒡ ᒋᑦ ᐊᐧᑯᔪᐛᓱᐅᓂᒡ, ᓂᓱᐅᓇᒋᐃᒡ, ᒐ ᐊᑲ ᒋ ᐃᑕᒡ: ᐊᑯᔅ ᒪᒃ ᒋᑭ ᒋᔅᒐᔨᑎᒧᒡ ᒋᓴᒪᓂᑐᐤ ᐊ ᑎᐸᔨᒋᒐᑦ ᒐᑭᐱᒡ, ᒥᓯᐛ ᐊᔅᐱᑎᔅᑭᒥᑲᔨᒡ᙮ 14 ᒋᐛᐅᒡ ᐛᑕᑯᓯᔨᒋ, ᒧᔭᒻ ᐊᑎᒧᒡ ᐃᑎᑕᑯᓱᐅᒡ, ᑭᔭ ᐛᔅᑲᔅᑭᒧᒡ ᐅᑕᓇᔪᐤ᙮ 15 ᐊᑯᔅ ᒪᒃ ᒋᑭ ᐱᐸᒧᑕᐅᒡ ᒐᒋ ᓇᓂᑐᐛᐸᑕᒡ ᒥᒋᒥᔪᐤ, ᑭᔭ ᒋᑭ ᒥᑐᐛᐅᒡ ᒧᔭᒻ ᐊᑲ ᒋᔅᐳᑥᐛ᙮ 16 ᒪᒃ ᓂᔾ ᓂᑭ ᓂᑭᒧᑕᓐ ᒋᓱᐧᑲᑎᓯᐅᓐ; ᓂᐦᐃ, ᐊ ᒋᔄᐛᔭᓐ ᓂᑭ ᓂᑭᒧᑕᓐ ᒋᓱᐛᔨᒋᒐᐅᓐ ᒋᔭᒋᓴᐸᔭᒋ: ᐛᔅ ᒋᔾ ᔅᒋ ᓇᔅᑎᒧᐅᓐ ᑭᔭ ᔅᒋ ᑭᓄᐛᔨᒥᓐ ᐛ ᐊᑎ ᐊᔨᒥᓯᐤ ᒋᓯᑲᒥᔭᓂ᙮ 17 ᒋᔾ, ᐅ ᓂᒥᔅᑯᐅᓯᐅᓐ, ᒋᑭ ᓂᑭᒧᔅᑕᑎᓐ: ᐛᔅ ᒋᓴᒪᓂᑐᐤ ᓂ ᒋᔅᐸᐛᑎᒄ, ᑭᔭ ᓂᓱᐛᔨᒥᑯᓯᔪᐤ ᒋᓴᒪᓂᑐᒻ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.