ᑎᐱᑦ ᐅᓂᑭᒧᐅᓇ 58 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᑕᑈ ᐊ ᒋᑦ ᐊᐃᔨᒧᑕᓇᐛᐤ ᑯᐃᔅᑯᑕᑎᓯᐅᓐ, ᐅ ᑲ ᒪᒧᐤ ᐎᒋᐃᑐᐅᔭᒄ ? ᑯᐃᔅᒄ ᐊ ᒋ ᑎᐸᔅᑯᓂᒐᓇᐛᐤ, ᐅ ᐃᔪᐤ ᐅᑯᓯᓴᓂᑐᒄ ?

² ᓂᐦᐃ, ᒋᑕᐃᐛᒡ ᒋᑦ ᐊᑐᔅᑲᔅᑕᓇᐛᐤ ᒥᒋᑥᐅᓐ; ᒋ ᑕᐸᐸᔅᑯᑕᓇᐛᐤ ᐊᔅᐱᔅ ᐛᒂᑎᓯᒥᑲᒋ ᒋᑎᒋᐛᐛ ᐊᔅᒋᒡ᙮

³ ᐅᒥᒋᑥᐅᒡ ᒪᓐᑕᐎᐛᒡ ᒥᔅᐸᔭᒡ ᐅᒡ: ᒋᓴᒡ ᐊᑎ ᓂᑕᐅᒋᒡ, ᐊᑎ ᐅᓂᓯᓄᐅᒡ, ᐊ ᑭᑭᒋᔭᒡ᙮

⁴ ᐅᐱᒋᐳᔨᐛᐅᓄᐛᐤ ᐃᓯᓇᑯᓂᔪᐤ ᒧᔭᒻ ᐅᐱᒋᐳᔨᐛᐅᓂᔪᐤ ᒥᔅᑎᒋᓇᐱᒂ; ᓂᔅᐱᑐᐛᐅᒡ ᐊᑲ ᐸᑎᒥᔨᒋ ᒋᓇᐱᒂ ᐊᑲ ᓂᑕᑎᒥᔨᒋ;

⁵ ᐊᓐ ᐊᑲ ᐎ ᓂᑐᑐᐛᑦ ᐅᒥᔪᑕᑯᓱᐛ, ᐊᑎ ᓇᔅᒡ ᒥᔪᑕᑯᓯᔨᒋ᙮

⁶ ᐱᑯᓂᒻ ᐎᐱᑐᐛᐛ, ᐅ ᒋᓴᒪᓂᑐᐤ, ᐅᑐᓄᐛᒡ; ᐱᑯᓂᒻ ᐎᐱᑐᐛᐛ ᒥᓯᐱᓯᓯᒡ, ᐅ ᑕᐸᔨᒋᒐᔨᓐ᙮

⁷ ᐊᑯᔅ ᒋᑭ ᑎᒋᓱᐅᒡ ᒧᔭᒻ ᓂᐱᔭ ᓇᓂᑎᒻ ᑲ ᐱᒥᒋᐛᒋ: ᐎᔭᒋᓇᑦ ᐅᑦ ᐊᒐᐱᔭ ᒐᒋ ᐱᒧᒐᑦ ᐊᑯᔅ ᒧᔭᒻ ᐊ ᐱᐱᔄᑭᓄᔨᒋ ᒋᑭ ᐃᓯᓇᑯᓯᔪᐛ᙮

⁸ ᒧᔭᒻ ᐱᒪᔅᑯᑎᓯᔅ ᑲ ᑎᔅᑕᒡ, ᐊᑯᔅ ᒥᓯᐛ ᐊᑎᓯᒡ ᒋᑭ ᐃᒐᐱᔪᐅᒡ; ᒧᔭᒻ ᐊᑲ ᐱᒪᑎᓯᔨᒋ ᐊᒋ ᐎ ᐛᐱᒪᐅᓱᑦ ᐃᔎᐤ, ᒐ ᐊᑲ ᒋ ᐛᐱᒪᔨᒋ ᐱᓯᒺ᙮

⁹ ᐊᒺᔭ ᒋᑦ ᐊᔅᒋᐧᑯᓯᐛᐛ ᒋ ᒧᓯᑕᒡ ᓯᑲᐎᒥᓇᑯᓯᔭ, ᒋᑭ ᐃᒐᓇᐤ ᒧᔭᒻ ᑲᓯᐱᓯᐛᓱᐤ, ᒪᒧᐤ ᐊ ᐱᒪᑎᓯᔨᒋ, ᑭᔭ ᐅᒋᔄᓯᐅᓂᒡ᙮

¹⁰ ᐅᑯᐃᔅᑯᑕᑎᓯᐤ ᒋᑭ ᒥᔽᔨᑎᒻ ᐃᔅᐱ ᐛᐸᑕᒐ ᒋᐛᑎᐸᒪᒐᐅᓂᔪᐤ: ᒋᑭ ᓱᑈᒋᓂᒻ ᐅᓯᑕ ᐅᒥᐧᑯᔨᒡ ᐅᒥᒋᑥᐛ᙮

¹¹ ᐊᑯ ᒪᒃ ᐃᔪᐤ ᒐ ᐃᔅᒋᔄᑦ, “ᑕᑈ ᑎᐸᒧᐛᑭᓄᐅᒡ ᐅᑯᐃᔅᑯᑕᑎᓯᐅᒡ: ᑕᑈ ᐎᔾ ᒋᓴᒪᓂᑐᐤ ᑲ ᑎᐸᔅᑯᓂᒐᑦ ᐊᔅᒋᒡ᙮”