ᑎᐱᑦ ᐅᓂᑭᒧᐅᓇ 56 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒋᔅᑎᒪᒐᔨᒥ, ᐅ ᒋᓴᒪᓂᑐᐤ: ᐛᔅ ᐃᔪᐤ ᓂ ᐎ ᐅᓂᐱᔨᐃᒄ; ᒧᓯᓇᐤ ᐊ ᒪᓯᐃᑦ ᓂᑦ ᐊᔨᒥᐃᒄ᙮ 2 ᑲ ᐛᐧᑲᓯᒡ ᒧᓯᓇᐤ ᓂ ᐎ ᐅᓂᐱᔨᐃᑯᒡ: ᐛᔅ ᒥᒐᑐᐅᒡ ᑲ ᒪᓯᐃᒡ, ᐅ ᒋᔾ ᒪᐅᒡ ᒋᔅᑎᓯᔨᓐ᙮ 3 ᐃᔅᐱ ᓴᒋᓯᔭᓇ, ᒋᑭ ᒪᒥᓯᑐᑕᑎᓐ᙮ 4 ᒋᓴᒪᓂᑐᐤ ᓂᑭ ᒪᒥᒋᑕᒺᓐ ᐅᑦ ᐃᔨᒧᐅᓐ; ᒋᓴᒪᓂᑐᐤ ᓂᒋ ᒪᒥᓯᑐᑐᐛᐤ: ᓇᒪᐎᔾ ᓂᑭ ᑯᔅᑕᓐ ᐃᔪᐤ ᒐ ᐃᑐᑐᐅᒂ᙮ 5 ᑕᑥᐤ ᐊ ᒋᓯᑲᔨᒡ ᒂᔅᒋᓇᒧᒡ ᓂᑦ ᐃᔨᒧᐅᓇ: ᒥᓯᐛ ᐅᒪᒥᑐᓇᔨᒋᒐᐅᓄᐛᒡ ᓂ ᒥᒋᐃᑕᔨᒥᑯᒡ᙮ 6 ᒪᒧᐤ ᒪᐅᒋᐃᑐᐅᒡ, ᑲᓱᐅᒡ, ᓇᑭᑐᐛᔨᑎᒧᒡ ᓂᑕᑯᔅᒐᐅᓇ, ᐃᔅᐱ ᐊᔅᑲᒧᐛᒡ ᓂᑦ ᐊᒐᒂ᙮ 7 ᒋᑭ ᒋᑎᓯᒧᐅᒡ ᐊ ᒥᒐᑎᓯᐅᓂᒡ ᐅᒡ ? ᒋᒋᔄᓯᐅᓂᒡ ᓂᒋ ᐛᐱᓐᒡ ᐃᔪᒡ, ᐅ ᒋᓴᒪᓂᑐᐤ᙮ 8 ᒋᑦ ᐊᒋᑕᓐ ᓂᐱᐸᒧᑕᐅᓇ: ᐱᑕᐊ ᓂᑦ ᐅᒋᑯᐛᐳᓇ ᒋᐱᐛᐱᔅᑯᔭᑭᓂᒡ: ᓇᒪ ᐊ ᒋᒥᓯᓇᐃᑭᓂᒡ ᑎᑯᓇ ? 9 ᐃᔅᐱ ᓇᓂᑐᒥᑕᓇ, ᐊᑯ ᒐ ᐊᑎ ᐊᓴᑲᐳᐅᒡ ᑲ ᒪᓯᐃᒡ: ᐅᔭ ᓂ ᒋᔅᒐᔨᑕᓐ; ᐛᔅ ᒋᓴᒪᓂᑐᐤ ᓂ ᒋᔅᐸᐛᑎᒄ᙮ 10 ᒋᓴᒪᓂᑐᐤ ᓂᑭ ᒪᒥᒋᑕᒺᓐ ᐅᑦ ᐃᔨᒧᐅᓐ: ᑎᐸᔨᒋᒐᓱᐤ ᓂᑭ ᒪᒥᒋᑕᒺᓐ ᐅᑦ ᐃᔨᒧᐅᓐ᙮ 11 ᒋᓴᒪᓂᑐᐤ ᓂᒋ ᒪᒥᓯᑐᑐᐛᐤ: ᓇᒪ ᓂᑭ ᑯᔅᑕᓐ ᒐ ᐃᑐᑐᐅᒂ ᐃᔪᐤ᙮ 12 ᒋ ᒋᒋᐃᑥᐅᓇ ᓂ ᒋᒋᔅᑲᑯᓐ, ᐅ ᒋᓴᒪᓂᑐᐤ; ᒋᑭ ᒥᔨᑎᓐ ᒪᒥᒋᒧᐛᐅᓐ᙮ 13 ᐛᔅ ᔅᒋ ᐎᐧᑯᒋᐊᐤ ᓂᑦ ᐊᒐᐧᒄ ᓂᐳᐅᓂᒡ ᐅᒡ: ᓇᒪ ᓇ ᒋᑭ ᑭᓄᐛᔨᑕᓐ ᓂᓯᑕ ᒐ ᐊᑲ ᒋ ᐸᒋᓯᓂᔭᓐ, ᒐᒋ ᒋ ᐱᒧᑕᔅᑐᐅᒄ ᒋᓴᒪᓂᑐᐤ ᐅᐛᓴᔭᓯᐅᓄᐛᒡ ᐸᒪᑎᓯᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.