ᑎᐱᑦ ᐅᓂᑭᒧᐅᓇ 55 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᑐᑕ ᓂᑦ ᐊᔭᒥᐊᐅᓐ, ᐅ ᒋᓴᒪᓂᑐᐤ; ᐊᑲ ᑭᔭ ᑲᓱᔅᑕ ᓂᓂᑐᑎᒪᒐᐅᓐ᙮ 2 ᐱᓯᒋᐃ, ᓂᑐᑐᐎ ᒪᒃ: ᓂ ᑯᒂᒋᒧᐅᓐ, ᑭᔭ ᓂ ᐸᑕᑯᓯᓐ; 3 ᐊ ᐸᑕᑯᓯᑦ ᑲ ᐛᐧᑲᓯᑦ ᐊ ᐊᔨᒥᐃᐛᒡ ᐅᒥᒋᑥᐅᒡ: ᐛᔅ ᓂ ᐛᐱᓂᒪᑯᒡ ᒥᒐᑎᓯᐅᓂᔪᐤ, ᑭᔭ ᐊ ᐊᐧᑯᔪᐛᓯᒡ ᓂ ᐛᐧᑲᑎᑯᒡ᙮ 4 ᓂᑕᐃ ᓂ ᐎᓴᒋᔅᑲᑯᓐ ᐱᒋᔪᐤ; ᑭᔭ ᑲ ᑯᔅᑕᑎᒂᒋ ᓂᐳᐅᓂᒡ ᑲ ᐅᒋᐱᔨᒋ ᓂᒋ ᐱᑎᑯᔅᑲᑯᓐ᙮ 5 ᓴᒋᓯᐅᓐ ᑭᔭ ᓇᓇᒥᐱᔪᐅᓐ ᓂᒋ ᐅᑎᑎᑯᓐ, ᑯᔅᑕᒋᐅᓐ ᓂᒋ ᐛᓴᒥᐃᑯᓐ᙮ 6 ᓂᒋ ᐃᔅᒋᔄᓐ ᒪᒃ, “ᐅ ᓂᑕᒪ ᐅᒥᑯᓄᐛᐱᓇ, ᒧᔭᒻ ᐅᒥᒥᐤ ᐛᔅ ᐊᑯ ᒪᒃ ᓂᐸ ᒋᒋᔭᓐ ᒐᒋ ᐊᔅᑕᔭᔅᑯᓯᔭᓐ᙮ 7 ᐛᔅ ᐊᑯ ᐛᔪᐤ ᓂᐸ ᐱᐸᒥᔭᓇᐱᓐ, ᑭᔭ ᓂᐸ ᑕᓇᐱᓐ ᐸᐧᑯᑎᔅᑭᒥᑲᒡ᙮” 8 “ᓂ ᐸᒋ ᒋᐱᔾ ᒋᑎᓯᒧᓐ ᐊ ᒋᒥᔅᑎᒡ ᑭᔭ ᐊᒋᑎᔅᑎᒡ ᐅᒡ᙮” 9 ᓂᓱᐅᓇᒋᐃᒡ ᐅ ᑎᐸᔨᒋᒐᓱᐤ, ᐸᐸᔅᒋᑎᓂᒻ ᐅᑕᔨᔪᐛᐤ: ᐛᔅ ᓂᒋ ᐛᐸᑕᓐ ᐊᒂᑎᓯᐅᓐ ᑭᔭ ᒂᔪᑐᑕᑐᐅᓐ ᐅᑕᓇᒡ᙮ 10 ᐊ ᒋᓯᑲᔨᒡ ᑭᔭ ᐊ ᑎᐱᔅᑲᔨᒡ ᐃᑐᑎᒧᒡ ᐊᓐᑕ ᑕᐧᑯᒡ ᒪᓂᑭᓂᒡ; ᒥᔭᔨᒐᐅᓐ ᑭᔭ ᑯᐸᑕᔨᑎᒧᐅᓐ ᑕᑕᐅᒡ ᑎᒂᓇ᙮ 11 ᒥᒋᑥᐅᓐ ᐊᑯᑕ ᑕᑕᐅᒡ ᐊ ᑎᒂᒡ: ᐎᔭᓯᒐᒧᐅᓐ ᑭᔭ ᐛᔭᓯᐃᐛᐅᓐ ᓇᒪᐎᔾ ᒋᑐᑕᒪᑭᓇ ᐱᒧᑕᔅᑭᓇᒡ ᐅᒡ᙮ 12 ᐛᔅ ᓇᒪᐎᔾ ᐅᐛᐧᑲᓱᐛᐤ ᑲ ᔅᑐᓯᑦ; ᐛᔅ ᐊᑯ ᒪᒃ ᓂᑭ ᒋ ᓇᑕᐤ: ᓇᒪ ᑭᔭ ᐊᓐ ᑲ ᐛᐧᑲᓯᑦ ᑲᒋ ᒋᔅᑕᒋᒥᑎᓱᔅᑐᐅᑦ, ᐊᑯ ᒪᒃ ᓂᐸ ᒋ ᑲᓱᔅᑐᐛᐤ; 13 ᒪᒃ ᒋᔾ ᐃᔪᐤ ᑲ ᓂᔅᐱᑕᑕᓐ ᓂᔅᒋᓄᑕᐃᐛᒻ, ᑭᔭ ᓂᐎᒐᐛᑭᓐ᙮ 14 ᔅᒋ ᒥᔪ ᑭᒐᔅᒋᒥᑐᓇᓄᐤ, ᑭᔭ ᔅᒋ ᐎᒐᐅᑐᓇᓄᐤ ᐊ ᐃᑐᑕᐛᐧᒄ ᐎᒋᒡ ᒋᓴᒪᓂᑐᐤ᙮ 15 ᐊᑯᔅ ᓂᐳᐅᓂᔪᐤ ᒋᑭ ᐅᑎᑎᓂᑯᐅᐛᒡ, ᐊᑯᔅ ᑭᔭ ᒋᑭ ᒋᐱᔾ ᐃᑐᑕᐅᒡ ᓂᒂᔅᑲᓂᒡ: ᐛᔅ ᒥᒋᑥᐅᓂᔪᐤ ᑎᑯᓂᔪᐤ ᐅᑦ ᐃᑕᐅᓄᐛᒡ, ᑭᔭ ᐊᓐᑕ ᐊ ᐃᑕᒡ᙮ 16 ᓂᔾ ᒪᒃ, ᓂᑭ ᓇᓂᑐᒪᐤ ᒋᓴᒪᓂᑐᐤ; ᑎᐸᔨᒋᒐᓱᐤ ᑭᔭ ᓂᑭ ᐱᒪᒋᐃᒄ᙮ 17 ᐊ ᐅᑕᑯᓯᒡ, ᑭᔭ ᐊ ᒐᒋᓴᐸᔭᒡ, ᑭᔭ ᐊ ᐊᐱᑕᒋᓯᑲᒡ, ᓂᑭ ᐊᔭᒥᐊᓐ, ᑭᔭ ᓂᑭ ᒋᔄᐛᑕᑈᓐ, ᒋᑭ ᓂᑐᑎᒻ ᒪᒃ ᓂ ᐸᑕᑯᓯᐅᓂᔪᐤ᙮ 18 ᒋᔭᒪᔨᑎᒧᐅᓂᒡ ᓂᑦ ᐊᒐᒂ ᒋᑭ ᐱᒪᒋᐊᐤ ᐊᑎ ᐊᒋ ᓂᑐᐱᔨᔅᑕᑯᐅᔭᓐ: ᐛᔅ ᒋ ᒥᒐᑐᐅᒡ ᑲᒋ ᐎᒐᐎᒡ᙮ 19 ᒋᓴᒪᓂᑐᐤ ᒋᑭ ᓂᑐᑎᒻ ᑭᔭ ᒋᑭ ᐊᔨᒥᐊᐤ, ᐎᔾ ᐅᑎ ᐎᐱᒡ ᑲ ᐅᒋ ᐸᒋ ᑕᑦ᙮ ᐊ ᐊᑲ ᐊᐃᒡ ᐅᒋ ᐃᑕᔨᑕᑯᓯᐊᑲᓂᐅᒡ, ᓇᒪ ᓇᓂᒋᔅᑐᐛᐅᒡ ᒋᓴᒪᓂᑐᐛ᙮ 20 ᑯᒋ ᐅᑎᑎᓇᔪᐛ ᐊᓂᔭ ᑲ ᒋᔭᒪᐎᓯᔅᑕᑯᒡ: ᒋ ᐱᑯᓂᒻ ᐅᓂᔅᑯᒧᐅᓐ᙮ 21 ᐃᔨᒧᐅᓇ ᐅᑐᓂᒡ ᑲ ᐅᒋᐱᔨᒋ ᐊᑐᐎᔅ ᒋ ᓱᔎᐛ ᐃᔅᐱᔅ ᑲᐎᔄᐛᒡ, ᒪᒃ ᓂᑐᐱᔪᐅᓂᔪᐤ ᒋ ᑎᑯᓂᔪᐤ ᐅᑕᐃᒡ: ᐅᑦ ᐃᔨᒧᐅᓇ ᐊᑐᐎᔅ ᒋ ᔪᔅᑲᔪᐛ ᐃᔅᐱᔅ ᐱᒥᔾ, ᐊᔪᐛᒡ ᒪᒃ ᐊ ᒐᒋᑯᐱᑕᑭᓄᐎᒡ ᓯᒪᑭᓇ ᐃᓯᓇᑯᓂᔪᐤ᙮ 22 ᐱᔅᑎᓂᒧᐤ ᒋ ᐎᐅᓱᓂᔪᐤ ᑎᐸᔨᒋᒐᓱᐤ, ᒋᑭ ᓴᓯᑐᓂᒄ ᒪᒃ᙮ ᓇᒪ ᓂᑕ ᒋᑭ ᓇᐊᔨᒪᐤ ᐅᑯᐃᔅᑯᑕᑎᓯᐛ ᒐᒋ ᐊᒋᐸᔨᐊᑭᓄᐎᔨᒋ᙮ 23 ᒪᒃ ᒋᔾ, ᐅ ᒋᓴᒪᓂᑐᐤ, ᒋᑭ ᓂᒋᐛᐱᓇᐅᒡ ᓂᓱᐅᓇᑎᓱᐎ ᐛᑎᑯᒡ: ᑲ ᓂᐸᐃᐛᒡ ᑭᔭ ᑲ ᑭᑭᒋᔭᒡ ᐃᔪᒡ ᓇᒪ ᐛᐛᒡ ᐊᐱᑐᐤ ᐅᒋᓯᑲᒧᐛᐤ ᒋᑭ ᐱᒪᑎᓯᐅᒡ᙮ ᒪᒃ ᓂᔾ ᒋᑭ ᒪᒥᓯᑐᑕᑎᓐ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.