ᑎᐱᑦ ᐅᓂᑭᒧᐅᓇ 51 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒋᔅᑎᒪᒐᔨᒥ, ᐅ ᒋᓴᒪᓂᑐᐤ, ᑲ ᐃᔅᐱᔅ ᓴᒋᐃᐛᐤ ᒋᓴᐛᑎᓯᔨᓐ; ᐊ ᐃᓯ ᒥᒐᒋ ᒋ ᔪᔅᐱ ᒋᔅᑎᒪᒐᔨᒋᒐᐅᓇ, ᑲᓯᐊ ᓂᐅᓂᑐᑎᒧᐅᓇ᙮ 2 ᒋᔅᑕᐸᐎ ᒥᑐᓐ ᓂᒥᒐᑎᓯᐅᓂᒡ ᐅᒡ, ᐸᔭᒋᐃ ᒪᒃ ᓂᒥᒋᑐᑎᒧᐅᓂᒡ ᐅᒡ᙮ 3 ᐛᔅ ᓂ ᐎᑕᓐ ᓂᐅᓂᑐᑎᒧᐅᓇ, ᓂᒥᒋᑐᑎᒧᐅᓐ ᒪᒃ ᒧᔅ ᓂᑦ ᐅᑎᔅᑲᐎᔅᑲᑯᓐ᙮ 4 ᒋᔾ, ᒋᔾ ᒥᒄ, ᒋ ᒥᒋᑐᑕᑎᓐ, ᑭᔭ ᓂᒋ ᐃᑐᑕᓐ ᐅᒪ ᑲ ᒪᔭᑎᒡ ᐊ ᑭᓄᐛᐱᒥᔨᓐ; ᒋ ᑯᐃᔅᑯᑕᔨᑕᑯᓯᓐ ᐊ ᐃᔨᒥᔨᓐ ᑭᔭ ᒐᒋ ᐸᔭᒐᔨᑕᑯᓯᔨᓐ ᐊ ᑎᐸᔅᑯᓂᒐᔨᓐ᙮ 5 ᐛᔅ, ᓂᒋ ᐅᓯᐃᑯᐅᓐ ᒥᒐᑎᓯᐅᓂᒡ; ᒥᒋᑥᐅᓂᒡ ᑭᔭ ᓂᒋ ᐊᔭᐅᒄ ᓂᑲᐎᔾ᙮ 6 ᐛᔅ, ᒋ ᓂᑐᐛᔨᑕᓐ ᑕᑈᐅᓐ ᐱᒋᔪᐤ; ᐊᑲᑕᑭᓄᐅᒡ ᒐᒂᓐ ᐅᒡ ᔅᒋ ᒋᔅᒐᔨᑎᒥᔨᓐ ᑭᒐᑕᐛᔨᑎᒧᐅᓐ᙮ 7 ᐸᔭᒋᐃ ᐃᓴᑉ ᐅᒡ, ᐊᑯ ᒐ ᐸᔭᒋᓯᔭᓐ: ᒋᔅᑕᐸᐛᔨ ᐊᑯ ᐊᑐᐎᔅ ᒐ ᐛᐱᓯᔭᓐ ᐃᔅᐱᔅ ᑯᓐ᙮ 8 ᑐᑐᐎ ᒐᒋ ᐸᑎᒪᓐ ᒥᔽᔨᑎᒧᐅᓐ ᑭᔭ ᓯᒋᔭᓯᐅᓐ, ᐊᓂᔭ ᒥᔅᑭᓇ ᑲ ᐱᑯᓇᒥᓐ ᒐᒋ ᒧᒋᒐᔨᑎᒧᒥᑲᒋ᙮ 9 ᐊᑲ ᑭᓄᐛᐸᑕ ᓂᒥᒋᑐᑎᒧᐅᓇ, ᑲᓯᐊ ᒪᒃ ᒥᓯᐛ ᓂᒥᒐᑎᓯᐅᓇ᙮ 10 ᐅᓯᑕᒧᐎ ᐱᒋᔪᐤ ᐸᔭᒋ ᒥᑕᐃ; ᑭᓄᐛᐃᑎᒧᐎ ᒪᒃ ᑯᐃᔅᒄ ᐊᒐᐧᒄ ᒐᒋ ᐱᒋᔅᑯᐎᑦ᙮ 11 ᐊᑲᐎᔾ ᐛᐱᓂ ᐊ ᐸᑕᔅᑎᒥᐱᔨᓐ ᐅᒡ; ᐊᑲᐎᔾ ᑭᔭ ᒥᔅᑭᒥ ᒋ ᐸᔭᒋ ᐊᒐᐧᒄ᙮ 12 ᒋᐛ ᒥᔨ ᒥᔽᔨᑎᒧᐅᓐ ᑲ ᐅᒋᐱᔨᒡ ᒋᐱᒪᒋᐃᐛᐅᓂᒡ; ᓯᑐᓂ ᒪᒃ ᒋ ᒥᔪ ᐊᒐᐧᒄ ᐅᒡ᙮ 13 ᐊᑯ ᒐ ᒋᔅᑯᑎᒧᐅᒂᐤ ᐅᓂᑐᑎᒧᐅᒡ ᒋᑦ ᐃᓯᑥᐅᓇ; ᐅᒥᒋᑥᐅᒡ ᒪᒃ ᒋᑭ ᒂᔅᑲᑎᓯᔅᑕᑯᒡ᙮ 14 ᐎᐧᑯᒋᐃ ᑲ ᒥᐧᑯᐤ ᐅᓂᑐᑎᒧᐅᓐ ᐅᒡ, ᐅ ᒋᓴᒪᓂᑐᐤ, ᒋᔾ ᒋᓴᒪᓂᑐᐤ ᐛᒋᐱᔨᒡ ᓂᐱᒪᒋᐃᑯᓯᐅᓐ: ᑭᔭ ᓂᑕᔨᔨᒡ ᓂᑭ ᒋᔄᐛ ᓂᑭᒧᑕᓐ ᒋᑯᐃᔅᑯᑕᑎᓯᐅᓐ᙮ 15 ᐅ ᑎᐸᔨᒋᒐᓱᐤ, ᐸᔅᒋᑕᓇ ᓂᑐᓐ; ᐊᑯ ᓂᑐᓐ ᒐ ᐛᐸᑎᔨᐛᒥᑭᒡ ᒋ ᒪᒥᒋᒥᑯᓯᐅᓐ᙮ 16 ᐛᔅ ᓇᒪᐎᔾ ᒋ ᓂᑐᐛᔨᑕᓐ ᒥᑐᔅᑕᐊᒪᒐᐅᓐ; ᐛᔅ ᒋᐸ ᒋ ᒥᔨᑎᓇᐱᓐ: ᓇᒪᐎᔾ ᒋ ᓇᐊᔨᑎᒥᐃᑯᓐ ᐃᔅᑯᑕᐤ ᐱᔅᑎᓂᒐᐅᓇ᙮ 17 ᐅᒥᑐᔅᑕᐊᒪᒐᐅᓇ ᑲ ᓇᐊᔨᑎᒥᐃᑯᑦ ᒋᓴᒪᓂᑐᐤ ᐊ ᐱᑯᐱᔨᒋ ᐊᒐᒂ: ᐊ ᐱᑯᐱᔨᒡ ᑭᔭ ᐊ ᒥᑕᒋᔨᐛᓯᒥᑲᒡ ᒥᑕᐃ, ᐅ ᒋᓴᒪᓂᑐᐤ, ᓇᒪᐎᔾ ᒋᑭ ᐊᑐᐛᔨᑕᓐ᙮ 18 ᐊ ᐃᓯ ᒥᔽᔨᑎᒥᓐ ᒥᔪᑐᑕ ᓴᐃᔭᓐ: ᐅᓯᑕᐤ ᒋᕈᓯᓕᒻ ᐅᒪᓂᑭᓇ᙮ 19 ᐊᑯ ᒐ ᒥᔽᔨᑎᒥᐃᑯᔨᓐ ᑯᐃᔅᑯᑕᑎᓯᐤ ᐱᔅᑎᓂᒐᐅᓐ, ᑭᔭ ᐃᔅᑯᑕᐤ ᐱᔅᑎᓂᒐᐅᓇ, ᑭᔭ ᐊ ᒥᓯᑐᐛᔭᒡ ᐃᔅᑯᑕᐤ ᐱᔅᑎᓂᒐᐅᓐ: ᐊᑯ ᒐ ᐱᔅᑎᓂᒐᒡ ᓇᐸ ᒥᔅᑐᓴ ᐱᔅᑎᓂᒐᐅᓇᐱᔅᑯᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.