ᑎᐱᑦ ᐅᓂᑭᒧᐅᓇ 50 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᑲ ᓱᐧᑲᑎᓯᑦ ᒋᓴᒪᓂᑐᐤ, ᑎᐸᔨᒋᒐᓱᐤ ᐅᑦ, ᒋ ᐃᔨᒧᐤ, ᑭᔭ ᒋ ᑕᑈᑎᒻ ᐊᔅᒋᔪᐤ ᑲ ᐅᒋ ᓴᑲᔅᑐᐛᔨᒋ ᐱᓯᒺ ᐊ ᐃᓯ ᐸᒋᓯᒧᔨᒋ ᐃᔅᐱᔅ᙮ 2 ᓴᐃᔭᓂᒡ ᐅᒡ, ᑲ ᒪᐅᒡ ᒥᔪᓇᒂᒡ, ᒋᓴᒪᓂᑐᐤ ᒋ ᐛᓯᓱᐤ᙮ 3 ᒋᒋᓴᒪᓂᑐᒥᓄᐤ ᒋᑭ ᐸᒋ ᐃᑐᑕᐤ, ᓇᒪ ᑭᔭ ᒋᑭ ᒋᐱᑐᐛᐤ ᐃᔅᑯᑕᔪᐤ ᐊ ᓂᓱᐅᓇᒋᐃᐛᒪᑭᓂᔨᒡ ᒋᑭ ᓂᑲᓂᐱᔅᑕᑯᐤ, ᓇᔅᒡ ᑭᔭ ᒋᑭ ᒋᑎᔅᑎᓂᔪᐤ ᐛᔅᑲ ᐊ ᐃᔅᐱᔨᑦ᙮ 4 ᐃᔅᐱᒥᒡ ᒋᑭ ᐅᒋ ᑕᑈᑎᒻ ᒋᓯᒂ, ᑭᔭ ᐊᔅᒋᔪᐤ, ᒐᒋ ᑎᐸᔅᑯᓇᑦ ᐅᑦ ᐃᔨᒪ᙮ 5 “ᒪᐅᒋᑎᒧᐅᒄ ᓂᐸᔭᒋᓯᒥᒡ: ᐊᓐᒡ ᑲ ᓂᔅᑯᒥᒡ ᐊᒋ ᐱᔅᑎᓂᒐᔅᑐᐅᒡ᙮” 6 ᒋᓯᒂ ᒪᒃ ᒋᑭ ᐎᑎᒧᒪᑭᓂᔪᐛ ᐅᑯᐃᔅᑯᑕᑎᓯᐅᓐ: ᐛᔅ ᒋᓴᒪᓂᑐᐤ ᐛᒋᒡ ᑎᐸᔅᑯᓂᒐᐤ᙮ 7 “ᓂᑐᑎᒧᒄ, ᐅ ᓂᑦ ᐃᔨᒥᑐᒄ, ᓂᑭ ᐃᔨᒥᓐ ᒪᒃ; ᐅ ᐃᔅᕋᐃᓪ, ᒋᑭ ᒪᒥᓯᒥᑎᓐ ᒪᒃ: ᓂᔾ ᒋᓴᒪᓂᑐᐤ, ᒋᒋᓴᒪᓂᑐᒻ ᐅᑦ᙮ 8 ᓇᒪᐎᔾ ᒋᑭ ᒋᔅᑐᑎᓐ ᒋᐱᔅᑎᓂᒐᐅᓐ ᐅᒋ ᑭᔭ ᒥᒄ ᒋᑦ ᐃᔎᑕᐤ ᐱᔅᑎᓂᒐᐅᓇ, ᒧᔅ ᒐᒋ ᐅᑎᔅᑲᐎᔅᑲᑯᔭᓐ᙮ 9 ᓇᒪᐎᔾ ᓂᑭ ᐅᑎᓇᐤ ᓇᐸ ᒥᔅᑐᔅ ᒋᒋᒡ ᐅᒡ, ᓇᒪ ᑭᔭ ᓇᐸ ᑲ ᐅᑦ ᐊᔅᑭᓂᓯᔨᒋ ᑲ ᐊᐱᓯᓯᔨᒋ ᐊᐛᓯᓴ ᒋᑦ ᐊᐛᐧᑲᓂᒋᐛᐱᒡ ᐅᒡ᙮ 10 ᐛᔅ ᒥᓯᐛ ᑕᑐᐤ ᐊᐛᓯᔅ ᓄᒋᒥᒡ ᓂᑎᐸᐃᒪᐤ, ᑭᔭ ᓄᑎᒻ ᒥᒋᑎᐧᑯᒡ ᑲ ᑕᒡ ᒐᓯᐱᔪᐤ ᐱᔅᑯᑎᓇᒡ᙮ 11 ᓂ ᒋᔅᒐᔨᒪᐅᒡ ᒥᓯᐛ ᐱᔭᓱᐅᒡ ᐱᔅᑯᑎᓇᒡ: ᑭᔭ ᒥᓯᐛ ᑲ ᐊᒂᑎᓯᒡ ᐊᐛᓯᓯᒡ ᒥᔅᒐᑯᒡ ᓂᑎᐸᔨᒪᐅᒡ᙮ 12 ᒧᔭᒻ ᐛᒥᒋᓱᔭᓂ, ᓇᒪᐎᔾ ᒋᑭ ᐎᑎᒪᑎᓐ; ᐛᔅ ᐊᔅᒋᔾ ᓂᔾ ᓂ ᑎᐸᔨᑕᓐ, ᑭᔭ ᑲ ᐃᓯ ᓴᑭᔅᒋᓇᒡ᙮ 13 ᓂᑭ ᒥᒍᐛᓐ ᐊ ᓇᐸ ᒥᔅᑐᓯᒡ ᐅᐎᔭᓱᐛᐤ, ᑭᔭ ᒥᒄ ᓂᑭ ᒥᓂᐛᓐ ᐊ ᑲ ᐅᑦ ᐊᔅᑭᓂᓯᒡ ᑲ ᐊᐱᓯᓯᒡ ᐊᐛᓯᓯᒡ ᐅᒥᐧᑯᐛᐤ ? 14 ᐸᒋᑎᓂᒧᐛᐧᒃ ᒋᓴᒪᓂᑐᐤ ᓂᓇᔅᑯᒧᐅᓂᔪᐤ; ᑭᔭ ᑎᐸᐊᒧᐤ ᒪᐅᒡ ᒋᔅᑎᓯᑦ ᑲ ᐊᓱᑎᒪᒐᔨᓐ: 15 ᓇᓂᑐᒥ ᒪᒃ ᐊᔨᒥᓱᐤ ᒋᓯᑲᒐ: ᒋᑭ ᐎᐧᑯᒋᐃᑎᓐ, ᐊᑯ ᒐ ᒋᔅᑕᒋᒥᔨᓐ᙮” 16 ᒪᒃ ᐅᒥᒋᑥᐛ ᒋᓴᒪᓂᑐᐤ ᐃᑕᐤ, “ᑕᓐ ᒐ ᐃᑕᐱᒋᑕᔭᒄ, ᒐᒋ ᐛᐎᑎᒪᒄ ᓂᑦ ᐃᑎᓱᐛᐅᓇ, ᑭᔭ ᒥᒄ ᒐᒋ ᐅᑎᓇᒪᒄ ᓂᓂᔅᑯᒥᑐᐅᓐ ᒋᑐᓄᐛᒡ ? 17 ᐊ ᓄᒂᒡ ᐊ ᐛᐧᑲᑎᒥᓐ ᒋᔅᒋᓄᐊᒪᑯᓯᐅᓐ, ᑭᔭ ᒋᔅᐱᔅᑯᓂᒡ ᐊ ᐃᓯ ᐛᐱᓂᒥᓐ ᓂᑦ ᐃᔨᒧᐅᓇ᙮ 18 ᐃᔅᐱ ᐎᔭᐱᒥᑦ ᑲ ᒋᒧᑎᑦ, ᐊᑯ ᑲ ᐎᒋ ᓇᔅᑯᒥᒪᑦ, ᑭᔭ ᔅᒋ ᐎᒐᐛᐅᒡ ᐅᐱᓯᒂᑎᓯᐅᒡ᙮” 19 “ᒋ ᐸᒋᑎᓇᓐ ᒋᑐᓐ ᒐᒋ ᒥᒋᐃᔨᒥᒥᑭᒡ, ᒋᑕᔨᔾ ᒪᒃ ᐅᓯᑕᒥᑭᓐ ᑭᑭᒋᔭᐅᓐ᙮ 20 ᒋᑦ ᐊᐱᓐ ᐊ ᒪᒋ ᐊᔨᒧᒥᑦ ᒋᐧᑲᓂᔅ; ᒋ ᐸᒂᓄᒥᒪᐛ ᑎᐱᔨᐛ ᒋᑲᐎᔾ ᐅᑯᓯᓴ᙮ 21 ᐅᔭ ᔅᒋ ᐃᑐᑕᓐ, ᓂᒋ ᒋᐱᑐᐛᓐ ᒪᒃ; ᔅᒋ ᐃᑕᔨᑕᓐ ᒪᓐ ᒥᒄ ᐊ ᓂᔅᐱᑕᑕᓐ: ᒪᒃ ᒋᑭ ᒋᔅᑐᑎᓐ, ᑭᔭ ᓂᑭ ᐎᔨᔅᑕᓐ ᐅᑎᔅᑯᐤ ᒋᔅᒋᓯᑯᒡ᙮” 22 “ᐅᔭ ᒪᒥᑐᓇᔨᑎᒧᒄ ᐊᑯ, ᒋᔨᐛᐤ ᑲ ᐅᓂᒋᔅᒋᑐᐛᒄ ᒋᓴᒪᓂᑐᐤ, ᒐ ᐊᑲ ᒋ ᐱᓯᐱᑎᑎᑯᒡ, ᑭᔭ ᐊᑲ ᐊᐛᓐ ᐊ ᑕᑦ ᒐᒋ ᐎᐧᑯᒋᐃᐛᑦ᙮ 23 ᐊᐛᓐ ᑲ ᒪᒥᒋᒧᐛᑦ ᓂ ᒋᔅᑕᒋᒥᒄ: ᐊᓐ ᑭᔭ ᑯᐃᔅᒄ ᑲ ᐅᔭᔅᑕᑦ ᐅᑦ ᐃᑕᑎᓯᐅᓐ, ᓂᑭ ᐛᐸᑎᔭᐤ ᒋᓴᒪᓂᑐᐛ ᐅᐱᒪᒋᐃᐛᐅᓂᔪᐤ᙮” |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.