ᑎᐱᑦ ᐅᓂᑭᒧᐅᓇ 5 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 5.1-8 (Proper-6 Year C)

¹ ᓂᑐᑕ ᓂᑦ ᐃᔨᒧᐅᓇ, ᐅ ᑎᐸᔨᒋᒐᓱᐤ, ᐱᔅᒐᔨᑕ ᓂ ᒥᑐᓇᔨᒋᑭᓐ᙮

² ᓂᑐᑕ ᐊ ᐃᔅᒋᔄᒥᑲᒡ ᓂᑕᑈᐅᓐ, ᓂᒋᓴᐅᒋᒪᒻ, ᑭᔭ ᓂᒋᓴᒪᓂᑐᒻ: ᐛᔅ ᒋᔾ ᒋᑭ ᐊᔭᒥᐊᔅᑕᑎᓐ᙮

³ ᓂᐸᑕᑯᓯᐅᓐ ᒋᑭ ᐸᑕᓐ ᒋᔭᒋᓴᐸᔭᒋ, ᐅ ᑎᐸᔨᒋᒐᓱᐤ; ᒋᔭᒋᓴᐸᔭᒋ ᒋᑭ ᐊᔭᒥᐊᔅᑕᑎᓐ, ᑭᔭ ᓂᑭ ᑎᔅᑎᓴᐱᓐ᙮

⁴ ᐛᔅ ᓇᒪᐎᔾ ᒋᑦ ᐊᐎᓐ ᒋᓴᒪᓂᑐᐤ ᑲ ᒥᔽᔨᑕᐧᒃ ᒥᒋᑐᑎᒧᐅᓂᔪᐤ; ᓇᒪ ᑭᔭ ᒋᑭ ᐎᒋᒥᑯᓐ ᒥᒋᐃᑐᐅᓐ᙮

⁵ ᒋᔎᐧᑲᓐᒡ ᓇᒪᐎᔾ ᒋᑭ ᐅᑎᔅᑯᑲᐳᔅᑕᑯᒡ: ᒋ ᐛᐧᑲᑕᐅᒡ ᒥᓯᐛ ᑲ ᒥᒐᑎᓯᒡ᙮

⁶ ᒋᑭ ᓂᓱᐅᓇᒋᐊᐅᒡ ᐊᓐᒡ ᑲ ᑭᑭᒋᔭᒡ: ᑎᐸᔨᒋᒐᓱᐤ ᒋᑭ ᐛᐧᑲᑕᐤ ᑲ ᐎᒋ ᐎᔭᓯᒐᒧᔨᒋ ᑭᔭ ᑲᔅᑎᒪᔪᐛᔨᒋ ᐃᔪᐛ᙮

⁷ ᒪᒃ ᓂᔾ ᓂᑭ ᐸᒋ ᐱᒐᓐ ᒋᒋᒡ ᐊ ᐃᓯ ᒪᒥᒐᒋ ᒋᓱᐛᔨᒋᒐᐅᓇ; ᑭᔭ ᐊ ᓇᓂᒋᔅᑕᑕᓐ ᓂᑭ ᐊᔭᒥᐊᔅᑎᒪᒐᓐ ᒋ ᐸᔭᒋ ᐊᔭᒥᐊᐅᒋᐛᐱᒡ᙮

⁸ ᐱᒧᑕᐃ, ᐅ ᑎᐸᔨᒋᒐᓱᐤ, ᒋᑯᐃᔅᑯᑕᑎᓯᐅᓂᒡ ᐊᓐᒡ ᑲ ᐛᐧᑲᓯᒡ ᐅᒡ; ᓂᑲᓐ ᑯᐃᔅᑯᒧᑐᐎ ᒋ ᒪᔅᑭᓇᒻ᙮

⁹ ᐛᔅ ᓇᒪ ᑎᒂᓂᔪᐤ ᑯᐃᔅᑯᑐᐅᓂᔪᐤ ᐅᑐᓄᐛᒡ; ᐅᐱᒋᔭᐛᐛ ᓇᔅᒡ ᒥᒐᑎᓯᒪᑭᓂᔪᐤ; ᐅᑯᑕᑭᓄᐛᐛ ᑲ ᔪᑕᑯᑕᔨᒡ ᒋᐱᐃᒋᐛᐱᔪᐤ; ᑲ ᒥᒐᒋᒧᐊᓯᒡ ᐅᑕᔨᐛᐛ ᐅᒡ᙮

¹⁰ ᓂᓱᐅᓇᒋᐃᒡ, ᐅ ᒋᓴᒪᓂᑐᐤ; ᐊᑯᔅ ᒋᑭ ᐸᒋᓯᒥᑯᐅᒡ ᑎᐱᔪᐛ ᐅᑭᒐᔅᒋᒧᐛᐅᓄᐛᐤ; ᐎᔪᐛᐱᓂᒡ ᐊ ᒪᒥᒐᓂᔨᒋ ᐅᐛᓂᑐᑎᒧᐅᓄᐛᐛ; ᐛᔅ ᔅᒋ ᐃᔨᐛᔨᒧᔅᑕᑯᒡ᙮

¹¹ ᒪᒃ ᐊᑯᔅ ᒥᓯᐛ ᐊᓐᒡ ᑲ ᒪᒥᓯᑐᑕᔅᒡ ᒋᑭ ᒥᔽᔨᑎᒧᒡ: ᐊᑯᔅ ᑲᒋᒡ ᒋᑭ ᒋᔄᐛᑕᑈᐅᒡ ᐊ ᐃᔅᐱᔅ ᓯᒋᔭᓯᒡ; ᐊᑯᔅ ᒥᓯᐛ ᐊᓐᒡ ᑭᔭ ᑲ ᓴᒋᑕᒡ ᒋᑦ ᐃᓯᓂᐧᑲᓱᐅᓂᔪᐤ ᒋᑭ ᒥᔽᑎᒧᒡ ᒋᔾ ᐅᒡ᙮

¹² ᐛᔅ ᒋᔾ, ᑎᐸᔨᒋᒐᓱᐤ, ᒋᑭ ᒥᔽᒋᒪᐅᒡ ᐅᑯᐃᔅᑯᑕᑎᓯᐅᒡ; ᑭᔭ ᒋᓴᐛᑎᓯᐅᓂᔪᐤ ᒋᑭ ᐛᔅᑲᔅᑲᒧᑎᔭᐅᒡ ᒧᔭᒻ ᐊᑯᓇᐅᓱᐛᑭᓐ ᐅᒋ᙮