ᑎᐱᑦ ᐅᓂᑭᒧᐅᓇ 49 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᑐᑎᒧᒄ ᐅ, ᒥᓯᐛ ᐃᔨᑐᒄ; ᓇᐃᔅᑕᒄ ᒋᑐᑭᐛᐛ ᒥᓯᐛ ᑲ ᑕᔭᒄ ᐊᔅᒋᒡ᙮ 2 ᑲ ᑎᐱᑕᔨᑕᑯᓯᔭᒄ ᑭᔭ ᑲ ᒋᔅᑎᓯᔭᒄ, ᑲ ᐛᔪᑎᓯᔭᒄ ᑭᔭ ᑲ ᒋᔅᑎᒪᑎᓯᔭᒄ ᒪᒧᐤ᙮ 3 ᓂᑐᓐ ᒋᑭ ᐊᔨᒧᑎᒧᒥᑭᓐ ᑭᒐᑕᐛᔨᑎᒧᐅᓐ; ᑭᔭ ᓂᑕᐃᒡ ᓂᑭ ᒪᒥᑐᓇᔨᑕᓐ ᓂᔅᑐᑎᒧᐅᓐ᙮ 4 ᓂᑭ ᓂᑐᑕᓐ ᓂᔅᐱᑎᐛᐤ ᐊᑎᔪᐧᑭᓐ: ᓂᑭ ᓄᑯᑕᓐ ᓂ ᑎᐱᔅᒋᓱᐎ ᐃᔨᒧᐅᓐ ᐊᓯᑭᓇᔭᐱᔾ ᒋᔍᐛᐱᒋᑭᓂᒡ᙮ 5 ᒐᒂᓐ ᒐ ᐅᒋ ᓴᒋᓯᔭᓐ ᐃᔅᐱ ᒪᒋ ᒋᓯᑲᒋ, ᐃᔅᐱ ᓂ ᒥᒐᑎᓱᐎ ᑕᐱᒂᓇ ᒐ ᐛᔅᑲᔅᑲᑯᔭᓐ ? 6 ᐊᓐᒡ ᑲ ᒪᒥᓯᑐᑕᒡ ᐅᐛᔪᑎᓯᐅᓄᐛᐤ, ᑭᔭ ᑲ ᒪᒥᒋᒧᒡ ᐊᔅᐱᔅ ᒥᒐᓂᔨᒋ ᐅᐛᔪᑎᓯᐅᓄᐛᐛ; 7 ᓇᒪᐎᔾ ᐊᐛᓐ ᐊᑎᓯᒡ ᒋᑭ ᒋ ᐱᒪᒋᐊᐤ ᐎᐧᑲᓂᓴ, ᓇᒪ ᑭᔭ ᑎᐸᐃᒐᔅᑎᒪᒐᐅᓂᔪᐤ ᒋᑭ ᒋ ᒥᔭᐤ ᒋᓴᒪᓂᑐᐛ; 8 (ᐛᔅ ᐊ ᐱᒪᒋᐊᑭᓄᔨᒋ ᐅᑦ ᐊᒐᐧᑯᐛᐛ ᐊᔨᒪᒋᑕᒂᓂᔪᐤ, ᑭᔭ ᐳᓂᐱᔪᐤ ᑲᒋᒡ;) 9 ᐃᔭᐱᒡ ᑲᒋᒡ ᒐᒋ ᐱᒪᑎᓯᔨᒋ, ᐊᑲ ᑭᔭ ᒐᒋ ᐛᐸᑎᒥᔨᒋ ᓂᓱᐅᓇᑎᓯᐅᓂᔪᐤ᙮ 10 ᐛᔅ ᐛᐸᑎᒻ ᑲ ᑭᒐᑕᐛᔨᑎᒥᔨᒋ ᐃᔪᐛ ᐊ ᓂᐱᔨᒋ, ᐊᓯᒡ ᑭᔭ ᑲᒋᔎᔨᒋ ᑭᔭ ᑲᒪᒐᑎᓯᒋ ᐃᔪᐛ ᐊ ᓂᓱᐅᓇᑎᓯᔨᒋ, ᑭᔭ ᐊ ᓂᑭᑎᒧᐛᔨᒋ ᐅᐛᔪᑎᓯᐅᓂᔪᐤ ᑯᑎᑲ᙮ 11 ᐸᒡ ᐃᑕᔨᑎᒧᒡ ᐎᒋᐛᐛ ᓇᓂᑎᒻ ᒐᒋ ᑎᒂᓂᔨᒋ, ᑭᔭ ᐅᑕᓇᒧᐛᐛ ᒥᓯᐛ ᒐ ᐊᑎ ᐊᔭᓂᔅᒐ ᐱᒪᑎᓯᓇᓄᐎᒡ: ᐊ ᐃᓯᓂᐧᑲᓱᒡ ᐃᓯᓂᐧᑲᑕᒧᒡ ᐅᑦ ᐊᔅᒋᐛᐤ᙮ 12 ᐊᔪᐛᒃ ᒪᒃ ᐃᔪᐤ ᐊ ᐊᑎ ᒋᔅᑎᓯᑦ ᓇᒪᐎᔾ ᒧᔅ ᐃᑕᐤ: ᓇᔅᐱᑐᐛᐤ ᐊᐛᓯᓴ ᑲ ᓂᓱᐅᓇᑎᓯᔨᒋ᙮ 13 ᐅᔭ ᐅᑦ ᐃᑕᑎᓯᐅᓄᐛᐤ ᐊᐅᒄ ᐅᒋᔎᐅᓄᐛᐤ: ᐊᔪᐛᒃ ᒪᒃ ᐅᑦ ᐊᐛᓯᒥᓱᐛᐛ ᒋᔅᑕᔨᑕᒥᔪᐛ ᐅᑦ ᐃᔨᒧᐅᓄᐛᐛ᙮ 14 ᒧᔭᒻ ᒪᔭᑕᓂᓯᒡ ᐱᒥᓯᒪᑭᓄᐅᒡ ᓂᒂᔅᑲᓂᒡ; ᒋᑭ ᒧᑯᐅᒡ ᓂᐳᐅᓂᔪᐤ; ᒋᑭ ᑎᐸᔨᒥᑯᐅᒡ ᒪᒃ ᐅᑯᐃᔅᑯᑐᐛ ᒐᒋᓴᐸᔭᔨᒐ; ᑭᔭ ᐅᒥᔪᓇᑯᓯᐅᓄᐛᐤ ᒋᑭ ᐃᔭᔪᓂᔪᐤ ᓂᒂᔅᑲᓂᒡ, ᐎᒋᐛᐛᒡ ᐅᒡ᙮ 15 ᒪᒃ ᒋᓴᒪᓂᑐᐤ ᒋᑭ ᐎᐧᑯᒋᐊᐤ ᓂᑦ ᐊᒐᒂ ᓂᒂᔅᑲᓐ ᓱᐧᑲᑎᓯᐅᓂᒡ ᐅᒡ: ᐛᔅ ᓂᑭ ᐅᑎᓂᒄ᙮ 16 ᐊᑲᐎᔾ ᑯᔅᑕᒋ ᐃᔅᐱ ᐊᐛᓐ ᐛᔪᑎᓯᒐ, ᐃᔅᐱ ᐊ ᐃᓯ ᒋᔅᑕᔨᑕᒂᓂᔨᒡ ᐎᒡ ᐊᑎ ᔭᒋᐱᔨᒐ; 17 ᐛᔅ ᐃᔅᐱ ᓂᐱᒐ ᓇᒪᐎᔾ ᒐᒂᔪᐤ ᒋᑭ ᒋᔅᑐᑕᐤ; ᓇᒪᐎᔾ ᐅᒋᔅᑕᔨᑕᑯᓱᐅᓐ ᒋᑭ ᓇᓴᐅᑯᐤ᙮ 18 ᐊᑎ ᒪᒂᒡ ᑲ ᐱᒪᑎᓯᑦ ᐊᒋ ᒥᔽᒋᒪᑦ ᐅᑦ ᐊᒐᒂ: ᐃᔪᒡ ᑭᔭ ᒋᑭ ᒥᔽᒋᒥᑯᒡ ᐃᔅᐱ ᒪᔪᑐᑕᓱᐎᓂ᙮ 19 ᒋᑭ ᓇᑕᐤ ᐅᑦ ᐊᓂᔅᒐ ᐅᑕᐅᐱᓇ; ᓇᒪ ᓂᑕ ᒋᑭ ᐛᐸᑎᒧᒡ ᐛᔅᑕᐅᓂᔪᐤ᙮ 20 ᐃᔪᐤ ᑲ ᒋᔅᑎᓯᑦ, ᐊᑲ ᒪᒃ ᑲ ᐅᓂᔅᑐᑎᒧᓂᑦ, ᓇᔅᐱᑐᐛᐤ ᐊᐛᓯᓴ ᑲ ᓂᓱᐅᓇᑎᓯᔨᒋ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.