ᑎᐱᑦ ᐅᓂᑭᒧᐅᓇ 48 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒋᔅᑎᓯᐤ ᑎᐸᔨᒋᒐᓱᐤ, ᓇᔅᒡ ᒪᒃ ᒐᒋ ᒪᒥᒋᒪᑭᓄᐅᑦ, ᐅᑕᓇᒥᒡ ᒋ ᒋᓴᒪᓂᑐᒥᓄᐤ, ᐅᐸᔭᒋ-ᐱᔅᑯᑎᓇᒥᒡ᙮ 2 ᒥᔪᓇᑯᓐ ᐊ ᐃᑎᔅᑕᒡ, ᑲ ᐅᒋ ᒋᔅᑕᔨᑕᒂᒡ ᒥᓯᐛ ᐊᔅᒋᔾ, ᐊᐅᒄ ᐊᓐ ᓴᐃᔭᓐ ᐱᔅᑯᑎᓇᐤ ᒋᐛᑎᓄᑕᒡ ᐃᑕᒐ, ᐅᑕᓇᒥᒡ ᒐᔅᑎᓯᑦ ᒋᓴᐅᒋᒪᐤ᙮ 3 ᒋᓴᒪᓂᑐᐤ ᒋᔅᒐᔨᑕᑯᓱᐤ ᐅᑦ ᐅᒋᒪᐅᒋᐛᐱᒡ ᐊ ᒋᔅᐸᐛᓱᐛᑦ᙮ 4 ᐛᔅ, ᒪᒂᒡ, ᒋᓴᐅᒋᒪᐅᒡ ᒋ ᒪᐛᒋᐃᑐᐅᒡ, ᒋ ᒪᒧᑕᐅᒡ᙮ 5 ᒋ ᐛᐸᑎᒧᒡ, ᒋ ᒪᒥᔅᑲᑕᒧᒡ ᒪᒃ; ᒋ ᒥᑯᔅᑲᑕᔨᑎᒧᒡ, ᒋ ᒋᐱᔾ ᔅᑐᑕᐅᒡ ᒪᒃ᙮ 6 ᑯᔅᑕᒍᐅᓂᔪᐤ ᒋ ᐅᑎᑎᓂᑯᐅᒡ ᐊᓐᑕ, ᑭᔭ ᐎᓯᒐᔨᑎᒧᐅᓂᔪᐤ, ᒧᔭᒻ ᐃᔎᐤ ᐊ ᐎ ᐛᐱᒪᐅᓱᑦ᙮ 7 ᔅᒋ ᐱᒂᔅᑎᑕᓐ ᑕᕐᓯᔅ ᑲ ᐱᒪᔅᑎᒋ ᐅᐤᑕ ᐊ ᐛᐱᓐ ᔪᑎᒡ ᐅᒡ᙮ 8 ᑲᒋ ᐃᓯ ᐸᑎᒪᒡ, ᐊᑯ ᑭᔭ ᑲ ᐃᓯ ᐛᐸᑎᒪᒡ, ᐅᑕᓇᒥᒡ ᑎᐸᔨᒋᒐᓱᐤ ᒥᓯᐛ ᓱᐧᑲᑎᓯᑦ, ᐅᑕᓇᒥᒡ ᓂᒋᓴᒪᓂᑐᒥᓇᓐ: ᒋᓴᒪᓂᑐᐤ ᒋᑭ ᐊᔨᒋᑕᐤ ᑲᒋᒡ᙮ 9 ᓂᒋ ᒪᒥᑐᓇᔨᑕᓇᓐ ᒋᓴᒋᐃᐛᐎ ᒋᓴᐛᑎᓯᐅᓐ ᐅ ᒋᓴᒪᓂᑐᐤ, ᐱᒡ ᒋᒋᓴᐊᔭᒥᐊᐅᒋᐛᐱᒡ᙮ 10 ᐊ ᐃᓯᓂᐧᑲᓱᔨᓐ, ᐅ ᒋᓴᒪᓂᑐᐤ, ᐊᐅᑯᐤ ᐊ ᐃᓯ ᒪᒥᒋᒥᑯᐅᔨᓐ ᒥᓯᐛᔅᑭᒥᒡ: ᒋᒥᔪᐅᓂᒡ ᓴᑭᔅᒋᓇᐤ ᒋᑯᐃᔅᑯᑕᑎᓯᐅᓐ᙮ 11 ᐊᑯᔅ ᓴᐃᔭᓐ ᐱᔅᑯᑎᓇᐤ ᒋᑭ ᒥᔽᑕᒧᒪᑭᓐ, ᐊᑯᔅ ᒍᑕ ᐅᑕᓂᓯᒪᐅᒡ ᒋᑭ ᓯᒋᔭᓱᐅᒡ, ᒋᑎᐸᔅᑯᓂᒐᐅᓇ ᐅᒡ᙮ 12 ᐱᐸᒧᑕᒄ ᓴᐃᔭᓂᒡ, ᐛᔅᑲᔅᑭᒧᒄ ᑭᔭ: ᐊᒋᑎᒧᒄ ᐊᓱᐛᐳᐅᓇ ᐊᓐᑕ᙮ 13 ᓂᓇᑭᑐᐛᐸᑎᒧᒄ ᒪᓂᑭᓇ, ᒪᒥᑐᓇᔨᑎᒧᒄ ᐅᒋᒪᐅᒋᐛᐸ; ᒐᒋ ᐸᒋ ᐎᑎᒧᐛᑯᒡ ᒐ ᐸᒋ ᐊᓂᔅᒐ ᐱᒪᑎᓯᒡ᙮ 14 ᐛᔅ ᐅ ᒋᓴᒪᓂᑐᐤ ᐊᐅᒄ ᒋ ᒋᓴᒪᓂᑐᒥᓄᐤ ᑲᒋᒡ ᑭᔭ ᑲᒋᒡ: ᒋᑭ ᒋᔅᒋᓄᑕᐃᑯᓄᐤ ᐃᔅᐱᔅ ᓂᐳᐅᓂᒡ ᐃᓯ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.