ᑎᐱᑦ ᐅᓂᑭᒧᐅᓇ 47 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐅᑕᒥᑕᒄ ᔅᑎᒋᐛᐛ ᒥᓯᐛ ᐃᔨᑐᒄ; ᒋᔄᐛᑕᑈᑎᐧᒄ ᒋᓴᒪᓂᑐᐤ ᐊ ᓴᐧᑯᒋᐃᐛᐎ ᐸᑕᑯᓯᔭᒄ᙮ 2 ᐛᔅ ᑎᐸᔨᒋᒐᓱᐤ ᒪᐅᒡ ᒋᔅᑎᓯᑦ ᑯᔅᑕᑎᑯᓯᐤ; ᐎᔾ ᒪᐅᒡ ᒋᓴᐅᒋᒪᐅᐤ ᒥᓯᐛ ᐊᔅᒋᒡ᙮ 3 ᒋᑭ ᓴᐧᑯᒋᑎᒪᑯᓄᐤ ᐃᔪᐛ, ᑭᔭ ᐸᐱᑐᔅ ᐊ ᐃᑎᔅᑲᓇᓯᔨᒋ ᐃᔪᐛ ᓯᐸ ᒋᓯᑎᓇᒡ᙮ 4 ᒋᑭ ᐛᐛᔭᐸᑎᒪᑯᓄᐤ ᒋᑎᐸᐃᑎᒧᐅᓄᐤ, ᐅᒥᔪᑎᐱᔨᐛᐅᓯᐅᓂᔪᐤ ᒐᑭᐸ, ᑲᒋ ᓴᒋᐊᑦ᙮ 5 ᒋᓴᒪᓂᑐᐤ ᒋ ᐅᐱᔅᑲᐤ ᐊ ᒋᔄᐛᑕᑈᓄᐎᒡ, ᑎᐸᔨᒋᒐᓱᐤ ᐊ ᐸᑕᒂᓂᔨᒡ ᐳᑕᒋᑭᓂᔪᐤ᙮ 6 ᓂᑭᒧᒃ ᐊ ᒪᒥᒋᒪᒄ ᒋᓴᒪᓂᑐᐤ, ᓂᑭᒧᒃ ᒪᒥᒋᒧᐛᐅᓇ: ᓂᑭᒧᒃ ᐊ ᒪᒥᒋᒪᒄ ᒋᒋᓴᐅᒋᒪᒥᓄᐤ, ᓂᑭᒧᒃ ᒪᒥᒋᒧᐛᐅᓇ᙮ 7 ᐛᔅ ᒋᓴᒪᓂᑐᐤ ᒋᒋᐅᒋᒪᐧᑲᑕᒻ ᒥᓯᐛ ᐊᔅᒋᔪᐤ: ᓂᑭᒧᒃ ᒪᒥᒋᒧᐛᐅᓇ ᓂᔅᑐᑎᒧᐅᓂᒡ᙮ 8 ᒋᓴᒪᓂᑐᐤ ᑎᐸᔨᒪᐤ ᐊᑲ ᐊᔭᒥᐊᔨᒋ: ᒋᓴᒪᓂᑐᐤ ᐊᐳᐤ ᐅᐸᔭᒋ-ᒋᓴᐅᒋᒪᐤ ᑕᑎᐳᐛᑭᓂᒡ᙮ 9 ᐅᒋᓴᐅᒋᒪᓯᒧᐛᐛ ᐃᔪᒡ ᒪᒧᐤ ᒪᐅᒋᐃᑐᔪᐛ, ᐅᑦ ᐃᔨᒥᔪᐛ ᐅᑎ ᐅᒋᓴᒪᓂᑐᒪ ᐊᑉᕋᐊᒻ: ᐛᔅ ᐊᔅᒋᔾ ᐊᒂᓇᐅᓱᐛᑭᓇ ᐅᑦ ᐊᔭᓂᐤ ᒋᓴᒪᓂᑐᐤ: ᓇᔅᒡ ᒋᔅᑕᒋᒪᑭᓄᐤ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.