ᑎᐱᑦ ᐅᓂᑭᒧᐅᓇ 46 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 46 (Proper-4 Year A) Psalm 46 (Proper-29 Year C)

¹ ᒋᓴᒪᓂᑐᐤ ᐊᐅᒄ ᒋ ᒋᔅᐸᐛᑎᑯᓯᐅᓄᐤ ᑭᔭ ᒋᒥᔅᑯᐅᓯᐅᓄᐤ, ᑲ ᐎᒋᐃᐛᑦ ᐊ ᐊᔨᒥᓯᓇᓄᐎᒡ᙮

² ᐊᐅᒄ ᐅᒋ ᓇᒪᐎᔾ ᒋᑭ ᑯᔅᑕᒋᓇᓄᐤ, ᐊᑎ ᐊᔅᒋᔾ ᐊᔭᒋᐱᔨᒐ, ᐊᑎ ᑭᔭ ᐱᔅᑯᑎᓇᐛ ᑕᑕᐅᒡ ᐎᓂᐸᑯᒡ ᐃᔅᐸᔨᑕᑭᓄᐅᒂᐛ;

³ ᐊᑎ ᓂᐱᔭ ᐊᑎ ᒋᔄᐛᒥᑭᒂᐛ ᑭᔭ ᒪᒪᐧᑲᐊᒂᐛ, ᐊᑎ ᐱᔅᑯᑎᓇᐛ ᐊᔭᒋᐱᔨᒂᐛ ᐊᔅᐱᔅ ᐸᔅᒋᐱᔨᒋ ᓂᐱᔭ᙮

⁴ ᑎᑯᓐ ᓯᐱᔾ, ᐊ ᓯᐱᓯᐅᒡ ᒋᑭ ᐅᒡ ᓯᒋᔭᓯᓇᓄᐤ ᐅᑦ ᐃᑕᐅᓂᒡ ᒋᓴᒪᓂᑐᐤ, ᐊᓐᑕ ᐊ ᑎᑯᓂᔨᒡ ᐅᐸᔭᒋ-ᒥᒋᐛᐱᒻ ᒪᐅᒡ ᒐᔅᑎᓯᑦ᙮

⁵ ᒋᓴᒪᓂᑐᐤ ᑕᑕᐅᒡ ᑕᐤ: ᓇᒪᐎᔾ ᒋᑭ ᐊᒋᐱᔪᐤ: ᒋᓴᒪᓂᑐᐤ ᒋᑭ ᐎᒋᐃᐛᐤ ᓇᔅᒡ ᐎᐱᒡ᙮

⁶ ᐊᑲ ᐊᔭᒥᐊᒡ ᒋ ᐊᐧᑯᔪᐛᓱᐅᒡ, ᐅᒋᒪᐅᓇ ᒋ ᐊᒋᐱᔪᐛ: ᒋ ᐸᑕᑯᓱᐤ, ᐊᔅᒋᔾ ᒋ ᑎᔅᑕᐤ᙮

⁷ ᒥᓯᐛ ᓱᐧᑲᑎᓯᑦ ᑎᐸᔨᒋᒐᓱᐤ ᒋ ᐎᒐᐅᑯᓄᐤ; ᐅᒋᓴᒪᓂᑐᒪ ᒐᑭᑉ ᒋ ᒋᔅᐸᐛᑎᑯᓄᐤ᙮

⁸ ᐊᔅᑎᒥᒄ, ᐛᐸᑎᒺᐧᒄ ᐅᑦ ᐃᑐᐅᓇ ᑎᐸᔨᒋᒐᓱᐤ, ᑲ ᐃᓯ ᓂᓱᐅᓇᒋᐃᐛᑦ ᐊᔅᒋᒡ᙮

⁹ ᐳᓂᐸᔨᑕᐤ ᓂᑐᐱᔪᐅᓇ ᒥᓯᑕᔅᑲᒥᒡ; ᓇᑥᓇᐤ ᐊᒐᐱᔭ, ᑭᔭ ᐱᒂᐊᒻ ᐊᓯᒪᑭᓂᔪᐤ; ᐃᔎᔄᐤ ᑎᑎᐱᑕᐸᓇᔎ ᐃᔅᑯᑕᒡ᙮

¹⁰ “ᒋᔭᒪᐅᐱᒄ, ᒋᔅᒐᔨᑎᒧᒄ ᐊ ᒋᓴᒪᓂᑐᐎᔭᓐ: ᓂᑭ ᒋᔅᑕᒋᒥᑯᐅᓐ ᐊᓐᑕ ᐊ ᐃᑕᒡ ᐊᑲ ᐊᔭᒥᐊᒡ, ᓂᑭ ᒋᔅᑕᒋᒥᑯᐅᓐ ᐊᔅᒋᒡ᙮”

¹¹ ᒥᓯᐛ ᓱᐧᑲᑎᓯᑦ ᑎᐸᔨᒋᒐᓱᐤ ᒋ ᐎᒐᐅᑯᓄᐤ; ᐅᒋᓴᒪᓂᑐᒪ ᒐᑭᑉ ᒋ ᒋᔅᐸᐛᑎᑯᓄᐤ᙮