ᑎᐱᑦ ᐅᓂᑭᒧᐅᓇ 45 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᑕᐃ ᒥᑐᓇᔨᑎᒧᒪᑭᓐ ᒥᔪ ᒐᒂᓐ: ᓂᑦ ᐊᔨᒧᑕᓐ ᐊᓂᔭ ᑲᒋ ᐅᓯᑕᔨᓐ ᒋᓴᐅᒋᒪᐤ ᐅᒡ: ᓂᑕᔨᔾ ᐃᓯᓇᑯᓐ ᒧᔭᒻ ᐅᒥᓯᓇᐃᑭᓇᔅᒄ ᐅᒥᓯᓇᐃᒐᐤ ᑲ ᐊᔭᔅᑯᐎᑦ᙮ 2 ᐊᐛᓯᑕ ᒋ ᒥᔪᓇᑯᓯᓐ ᐃᔅᐱᔅ ᐅᑦ ᐊᐛᓯᒥᓱᐛᐛ ᐃᔪᒡ: ᓱᐛᔨᒋᒐᐅᓐ ᓯᒋᓂᑲᓄᐅ ᒋᑐᓂᒡ: ᐊᐅᒄ ᐅᒋ ᒋᓴᒪᓂᑐᐤ ᑲᒋᒡ ᒋ ᒥᔽᒋᒥᒄ᙮ 3 ᐱᒂᑕᐅᑐᑕ ᒋᓯᒪᑭᓐ ᒋᑈᒥᒡ, ᐅ ᒪᐅᒡ ᓱᐧᑲᑎᓯᔨᓐ, ᒋᒡ ᒋᒋᔅᑕᔨᑕᑯᓱᐅᓂᒡ ᑭᔭ ᒋᒋᓴᐅᒋᒪᐛᔨᑕᑯᓯᐅᓂᒡ᙮ 4 ᑭᔭ ᒋᒋᓴᐅᒋᒪᐛᔨᑕᑯᓯᐅᓂᒡ ᐱᒥᑕᑎᐱ ᒥᔽᐱᒪᐅᓯᐃᓂᒡ, ᑕᑈᐅᓐ ᐅᒡ, ᔪᔅᑲᑎᓯᐅᓐ, ᑭᔭ ᑯᐃᔅᑯᑕᑎᓯᐅᓐ; ᒋᒥᔪᐅᓂᒡ ᒪᒃ ᒋᑭ ᒋᔅᒋᓄᐊᒪᑯᓐ ᑲ ᑯᔅᑕᑎᒂᒋ ᒐᒂᓇ᙮ 5 ᒋᑦ ᐊᑭᔎᒡ ᒋᓂᓯᐅᒡ ᐅᑕᐃᐛᒡ ᑲ ᓂᔅᑯᔅᑐᐛᒡ ᒋᓴᐅᒋᒪᐛ: ᑲ ᐅᒋ ᐸᒋᓯᓂᔅᑕᔅᒡ ᐃᔪᒡ᙮ 6 ᒋᒋᓴᐅᒋᒪᐤ ᑕᑎᐳᐛᑭᓐ, ᐅ ᒋᓴᒪᓂᑐᐤ, ᑲᒋᒡ ᑭᔭ ᑲᒋᒡ ᑎᒂᓐ: ᒋᒋᓴᐅᒋᒪᐛᑎᑯᒻ ᑯᐃᔅᒄ ᒋᓴᐅᒋᒪᐛᑎᒄ᙮ 7 ᒋ ᓴᒋᑕᓐ ᑯᐃᔅᑯᑕᑎᓯᐅᓐ, ᑭᔭ ᒋ ᐛᐧᑲᑕᓐ ᒥᒐᑎᓯᐅᓐ: ᐊᐅᒄ ᐅᒋ ᒋᓴᒪᓂᑐᐤ, ᒋᒋᓴᒪᓂᑐᒻ, ᔅᒋ ᑐᒥᔅᑯᓂᒃ ᓯᒋᔭᓱᐎ ᐱᒥᔾ ᐅᒋ ᒐᒋ ᐊᔪᐛᔅᑯᐅᑥᐤ ᒋᐎᒐᐛᑭᓐᒡ᙮ 8 ᒥᓯᐛ ᒋᑦ ᐊᐱᒋᑕᐅᓇ ᒥᔭᑯᓂᔪᐛ ᐎᒋᒪᑯᐱᒍᐤ, ᑭᔭ ᐊᓗᔅ, ᑭᔭ ᑲᓯᔭ, ᒥᐱᑕᐱᔅᑯᐤ ᒋᒋᓴᐅᒋᒪᐅᒋᐛᐸ ᐅᒡ, ᐊᓐᑕ ᑲᒋ ᐅᒋ ᓯᒋᔭᐃᔅᒡ᙮ 9 ᒋᓴᐅᒋᒪᐤ ᐅᑕᓂᓴ ᒋ ᐊᓯᑕᒋᒪᑭᓄᐅᒡ ᒋ ᒋᒋᐃᔎᒥᒡ: ᒋᒥᔪᐅᓂᒡ ᒋᓴᐅᒋᒪᔎᐤ ᒋ ᓂᐳᐤ ᐊ ᑭᓄᐛᔨᑕᐧᒃ ᐎᔄᐅᓱᓇᔭᐱᔅᑯᔪᐤ ᐅᐸᕆᒡ ᑲ ᐅᒋᒥᑭᓂᔨᒡ᙮ 10 ᓂᑐᑕ, ᐅ ᐅᑕᓂᓯᒪᐤ, ᑭᔭ ᒪᒥᑐᓇᔨᑕ, ᓇᐃᑎᔅᑕ ᒪᒃ ᒋᑐᑭᔾ: ᐅᓂᒋᔅᒋᑐᐅᒡ ᒪᒃ ᑎᐱᔨᐛ ᒋᑦ ᐃᔨᒥᒡ, ᑭᔭ ᒍᑕᐎᔾ ᐎᒡ; 11 ᐊᑯ ᒋᓴᐅᒋᒪᐤ ᓇᔅᒡ ᒐ ᒧᔅᑕᓇᐧᒃ ᒋ ᒥᔪᓇᑯᓯᐅᓂᔪᐤ: ᐛᔅ ᐎᔾ ᒋᑎᐸᔨᒋᒐᓯᒻ; ᐎᔾ ᒪᒃ ᐊᔭᒥᐊᔅᑐᐤ᙮ 12 ᑕᐃᕐ ᐅᑕᓂᓴ ᒪᒃ ᐊᓐᑕ ᒋᑭ ᐸᑕᔪᐛ ᒥᔨᐛᐅᓂᔪᐤ; ᑭᔭ ᒥᒄ ᑲ ᐛᔪᑎᓯᒡ ᐃᔪᒡ ᒋᑭ ᓂᑐᐛᔨᑎᒧᒡ ᒋᒥᔪᒂᔅᑕᒐᐅᓂᔪᐤ᙮ 13 ᒋᓴᐅᒋᒪᐤ ᐅᑕᓂᓴ ᒪᒃ ᒥᓯᐛ ᒥᔪᓇᑯᓯᐤ ᐱᒡ: ᑭᓄᐛᐃᑎᒻ ᑲ ᐅᓯᑕᑭᓄᐎᒡ ᐎᓴᐅᓱᓇᐱᔅᑯᔪᐤ᙮ 14 ᒋᑭ ᐸᓱᐛᐤ ᒐᒋ ᓇᑕᑦ ᒋᓴᐅᒋᒪᐛ ᐊ ᑭᓄᐛᔨᑕᐧᒃ ᑲ ᑭᔅᒋᒂᑕᑭᓄᐎᔨᒡ: ᐅᔅᒋᓂᒋᔎᐛ ᐎᒐᐛᑭᓇ ᑲ ᓇᓴᐅᑯᑦ ᒋᑭ ᐸᑥᑯᐅᓐ᙮ 15 ᓯᒋᔭᓯᐅᓂᒡ ᑭᔭ ᒧᒋᒐᔨᑎᒧᐅᓂᒡ ᒋᑭ ᐸᓱᐛᐅᒡ: ᒋᑭ ᐱᒐᐛᐅᒡ ᒋᓴᐅᒋᒪᐛ ᐅᒋᓴᐅᒋᒪᐅᒋᐛᐱᔪᐤ᙮ 16 ᒥᔅᑯᒡ ᒍᑕᐎᔨᒡ ᒋᑭ ᐅᑦ ᐊᐛᓯᒥᓯᓐ, ᒐᒋ ᒋᓴᐅᒋᒪᐅᒡ ᒥᓯᐛ ᐊᔅᒋᒡ᙮ 17 ᓂᑭ ᐃᓯᑕᓐ ᒋᑦ ᐃᓯᓂᐧᑲᓱᐅᓐ ᒐᒋ ᒋᔅᒋᑕᑭᓄᐅᒡ ᒥᓯᐛ ᒐ ᐊᑎ ᐊᓂᔅᒐ ᐱᒪᑎᓯᓇᓄᐅᒡ, ᐊᐅᒄ ᐅᒡ ᐃᔪᒡ ᒋᑭ ᒪᒥᒋᒥᑯᒡ ᑲᒋᒡ ᑭᔭ ᑲᒋᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.