ᑎᐱᑦ ᐅᓂᑭᒧᐅᓇ 44 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᒋ ᐸᑕᓇᓐ ᓂᑐᐅᑭᓇᒡ ᐅᒡ, ᐅ ᒋᓴᒪᓂᑐᐤ, ᓄᑕᐎᓇᓐᒡ ᓂᒋ ᐎᑎᒪᑯᓇᓐᒡ ᒐᒂᓐ ᑲᒋ ᐃᑐᑎᒥᓐ ᒪᒂᒡ ᑲ ᐅᒋᓯᑲᒥᒡ, ᑭᔭ ᐎᐱᒡ᙮ 2 ᑲ ᐃᓯ ᐛᔭᐎᑎᓴᐅᑥᐤ ᐊᑲ ᐊᔭᒥᐊᒡ ᒋᑎᒋᒡ ᐅᒡ, ᑭᔭ ᐊᒋ ᐸᒋᑎᓂᑥᐤ; ᑲ ᐃᓯ ᑯᒂᑕᒋᐛᒡ ᐃᔪᒡ, ᑭᔭ ᐊᒋ ᐎᔪᐛᐱᓂᑥᐤ᙮ 3 ᐛᔅ ᓇᒪᐎᔾ ᒋ ᑭᔅᒋᑕᐅᒡ ᐊᔅᒋᔪᐤ ᒐᒋ ᑎᐱᔨᐛᐅᓯᒡ ᑎᐱᔨᐛ ᐅᓯᒪᑭᓄᐛᐤ ᐅᒡ, ᓇᒪ ᑭᔭ ᑎᐱᔨᐛ ᐅᔅᐱᑐᓄᐛᐤ ᒋ ᐱᒪᒋᐃᑯᐅᒡ: ᒪᒃ ᒋᒥᔪᐅᓂᒡ, ᑭᔭ ᒋᔅᐱᑐᓐ, ᑭᔭ ᒋ ᐊᓱᐅᓐ᙮ ᐊᒋ ᒥᔽᔨᒧᒡ᙮ 4 ᒋᔾ ᓂᒋᓴᐅᒋᒪᒻ, ᐅ ᒋᓴᒪᓂᑐᐤ: ᐃᑎᓱᐛᐤ ᒐᒋ ᐎᐧᑯᒋᐊᑭᓄᐅᑦ ᒐᑭᑉ᙮ 5 ᒋᔾ ᐅᒋ ᓂᑭ ᓂᒋᐛᐸᐛᓇᓐᒡ ᑲ ᐛᐧᑲᓯᔭᒥᒡ, ᒋ ᓴᒂᔨᒺᐅᒡ ᒪᒃ ᐊᓐᒡ ᑲ ᐛᐧᑲᓯᓱᒥᒡ᙮ 6 ᐛᔅ ᓇᒪᐎᔭ ᓂᑭ ᒪᒥᓯᑐᑐᐛᐤ ᓂᑦ ᐊᒐᐱᔾ, ᓇᒪ ᑭᔭ ᓂᑭ ᐱᒪᒋᐃᑯᓐ ᓂᓯᒪᑭᓐ᙮ 7 ᒪᒃ ᒋᔾ ᔅᒋ ᐱᒪᒋᐃᓇᓐ ᑲ ᐛᐧᑲᓯᔭᒥᒡ ᐅᒡ, ᑭᔭ ᒋ ᓴᒂᔨᒺᐅᒡ ᐊᓐᒡ ᑲ ᐛᐧᑲᓯᓱᒥᒡ᙮ 8 ᒋᓴᒪᓂᑐᒡ ᒥᒄ ᓂᑭ ᒪᒥᒋᒧᓇᓐ ᐃᔅᑭᓐ ᒋᓯᑲᐛ, ᑭᔭ ᓂᑭ ᒪᒥᒋᑕᓇᓐ ᒋᑦ ᐃᓯᓂᐧᑲᓱᐅᓐ ᑲᒋᒡ᙮ 9 ᒪᒃ ᔅᒋ ᐛᐱᓂᓇᓐ, ᑭᔭ ᔅᒋ ᐛᓇᐃᑕᒥᐃᓇᓐ; ᓇᒪ ᑭᔭ ᒋ ᐎᒐᐛᐅᒡ ᓂ ᑲᒪᓯᒐᒥᓇᓐᒡ᙮ 10 ᒋ ᐃᑐᑐᐅᓇᓐ ᒐᒋ ᐊᑎᒥᑲᐳᐅᔅᑐᐅᒋᒡ ᑲ ᐛᐧᑲᓯᔭᒥᒡ; ᐊᓐᒡ ᑭᔭ ᑲ ᐛᐧᑲᓯᓱᒥᒡ ᓂ ᒪᔅᑲᒥᑯᓇᓐᒡ᙮ 11 ᔅᒋ ᐊᒋᒥᓇᓐ ᑕᐱᔅᑯᓐ ᒪᔭᑕᓂᓯᒡ ᑲ ᐎ ᒥᒋᒧᐎᒡ; ᑭᔭ ᔅᒋ ᒋᑎᓴᐅᓇᓐ ᐊᓐᑕ ᐊ ᐃᑕᒡ ᐊᑲ ᐊᔭᒥᐊᒡ᙮ 12 ᓂᑐᐎ ᒋ ᐃᓯ ᐊᑕᐛᒐᓐ ᒋᑦ ᐃᔨᒥᒡ, ᓇᒪ ᑭᔭ ᒋ ᔭᒋᑕᓐ ᒋᐛᔪᑎᓯᐅᓐ ᑲ ᐅᒋ ᑎᐸᐊᒪᑯᐅᔨᓐ᙮ 13 ᒋ ᑐᑐᐅᓇᓐ ᒐᒋ ᒋᑐᓯᐃᒥᒡ ᓂᒡ ᐃᔨᒥᓇᓐᒡ, ᒐᒋ ᒪᔭᔨᒥᔨᒥᒡ ᑭᔭ ᓯᑲᑕᔨᒥᔨᒥᒡ ᐊᓐᒡ ᐛᔅᑲ ᑲ ᐃᑕᒡ᙮ 14 ᒋ ᑐᑐᐅᓇᓐ ᒐᒋ ᐅᔨᒧᒥᑯᐎᔭᒡ ᐊᓐᑕ ᐊ ᐃᑕᒡ ᐊᑲ ᐊᔭᒥᐊᒡ, ᒐᒋ ᐛᐛᐱᔎᔨᔅᑕᐎᔭᒥᒡ ᐃᔪᒡ᙮ 15 ᓂᐛᐛᓇᔨᑎᒧᐅᓐ ᒧᔅ ᓂᑦ ᐅᑎᔅᑲᐎᔅᑲᑯᓐ, ᑭᔭ ᓂ ᓴᒂᔨᒧᐅᓐ ᓂᒋ ᐊᑯᓇᐅᑯᓐ᙮ 16 ᐅᐸᑕᑯᓯᐅᓐ ᐅᒋ ᐊᓐ ᑲ ᒋᑐᓱᐛᑦ ᑭᔭ ᑲ ᐊᔅᑕᒧᑦ; ᐅᐛᐧᑲᓱᐛᐤ ᐅᒋ ᑭᔭ ᑲᒋᐛᑎᐸᔨᒐᑦ᙮ 17 ᒥᓯᐛ ᐅᔭ ᓂᒋ ᐅᑎᑎᑯᓇᓐ; ᐃᔭᐱᒡ ᒪᒃ ᓇᒪᐎᔾ ᔅᒋ ᐅᓂᒋᔅᒋᑕᑎᓇᓐ, ᓇᒪ ᑭᔭ ᓂᒋ ᑭᑭᒋᔭᓯᐎ ᐊᐸᒋᑕᓇᓐ ᒋᓂᔅᑯᒥᑐᐅᓐ᙮ 18 ᓂᑕᐃᓇᓇ ᓇᒪᐎᔾ ᒋᐛᐱᔪᐛ, ᓇᒪ ᑭᔭ ᓂᒋ ᓂᑭᑕᓇᓐ ᒋᑦ ᐃᓯᑥᐅᓐ᙮ 19 ᐊᑎ ᐊᒋ ᐎᓴᒋ ᐱᑯᐱᓯᔭᒡ ᐊᓐᑕ ᐊ ᐃᑕᒡ ᒥᓯᒋᓇᐱᑯᒡ, ᑭᔭ ᐊᒋ ᐊᑯᓇᐅᔭᒡ ᐊ ᑎᑲᔅᑕᑎᒡ ᓂᐳᐅᓐ᙮ 20 ᒧᔭᒻ ᑲ ᐅᓂᒋᔅᒋᑐᑎᒧᐛᐛᒐ ᐅᑦ ᐃᓯᓂᐧᑲᓱᐅᓐ ᓂᒋᓴᒪᓂᑐᒥᓇᓐ, ᑭᔭ ᒥᒄ ᐱᑐᔅ ᒥᓂᑐᐤ ᑲ ᓱᐅᓂᔅᒐᔨᔅᑐᐛᐛᒐ; 21 ᓇᒪ ᓇ ᐅᔭᔪᐤ ᒋᑭ ᓇᓂᑐᐛᐸᑎᒻ ᒋᓴᒪᓂᑐᐤ ? ᐛᔅ ᒋᔅᒐᔨᑎᒻ ᑲ ᒋᒧᑕᓯᒥᑲᒡ ᒥᑕᐃᒡ᙮ 22 ᓂᐦᐃ, ᒋᔾ ᐅᒋ ᓂ ᓂᐸᐃᑯᐅᓇᓐ ᐃᔅᑭᓐ ᒋᓯᑲᐛ; ᓂᑦ ᐃᑕᒋᒥᑯᐅᓇᓐ ᒧᔭᒻ ᒪᔭᑕᓂᓯᒡ ᑲ ᐎ ᓂᐸᐊᑭᓄᐅᒡ᙮ 23 ᑯᔅᑯᓯ, ᑕᓇᒡ ᐛᒋ ᓂᐸᔨᓐ, ᐅ ᑎᐸᔨᒋᒐᓱᐤ ? ᐱᓯᑯᐤ, ᐊᑲᐎᔾ ᑲᒋᒡ ᐛᐱᓂᓇᓐ᙮ 24 ᑕᓇᒡ ᐛᒋ ᑲᓱᔨᓐ, ᑭᔭ ᐛᓂᒋᔅᒋᔨᓐ ᓂ ᒪᒂᔨᑎᒧᐅᓇᓇ ᑭᔭ ᓂᑦ ᐊᔨᒥᐃᑯᓯᐅᓇᓇ ? 25 ᐛᔅ ᓂᑦ ᐊᒐᐧᑯᓇᓐ ᓄᐛᒋᐤ ᒥᒋᒂᔭᓯᒡ ᐃᔅᑯᐤ: ᓂ ᓂᔅᑭᑎᓇᓇ ᐊᔅᒋᒡ ᒥᒋᒧᐛ᙮ 26 ᐱᓯᑯᐤ ᒐᒋ ᐎᒋᐃᔭᒡ, ᐱᒪᒋᐃᓇᓐ ᒪᒃ ᒋᓱᐛᔨᒋᒐᐅᓐ ᐅᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.