ᑎᐱᑦ ᐅᓂᑭᒧᐅᓇ 41 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 41 (Epiphany-7 Year B)

¹ ᓱᐛᔨᑕᑯᓱᐤ ᐊᓐ ᑲ ᒋᔅᑎᒪᒐᔨᒪᑦ ᐅᒋᔅᑎᒪᑎᓯᐛ; ᑎᐸᔨᒋᒐᓱᐤ ᒋᑭ ᐎᒂᒋᐊᐤ ᑲ ᐊᔨᒥᓂᔨᒡ ᐊ ᒋᓯᑲᔨᒡ᙮

² ᑎᐸᔨᒋᒐᓱᐤ ᒋᑭ ᑭᓄᐛᔨᒪᐤ, ᑭᔭ ᒋᑭ ᐱᒪᒐᐊᐤ; ᒋᑭ ᓱᐛᔨᑕᑯᓱᐤ ᒪᒃ ᐊᔅᒋᒡ: ᓇᒪᐎᔾ ᒪᒃ ᒋᑭ ᐱᔅᑎᓇᐤ ᐅᑦ ᐃᑕᔨᑎᒧᐅᓂᔨᒡ ᐊᓂᔭᔪᐛ ᑲ ᐛᐧᑲᑎᑯᑦ᙮

³ ᑎᐸᔨᒋᒐᓱᐤ ᒋᑭ ᒥᔅᑯᐅᓯᐊᐤ ᐎᓯᒐᔨᑎᒧᐎ ᓂᐸᐅᓂᒡ; ᒋᑭ ᐅᓯᑕᐛᓐ ᒥᓯᐛ ᐅᓂᐸᐅᓐ ᐊ ᐊᐧᑯᓯᑦ᙮

⁴ ᓂᒋ ᐃᔅᒋᔄᓐ, “ᒋᔅᑎᒪᒐᔨᒥ; ᒥᓏᒋ ᓂᑦ ᐊᒐᐧᒄ, ᐛᔅ ᔅᒋ ᒥᒋᑐᑕᑎᓐ᙮”

⁵ ᑲ ᐛᐧᑲᓯᒡ ᓂ ᒥᒋ ᐊᔨᒧᒥᑯᒡ; “ᑕᐃᔅᐱ ᒐ ᓂᐱᑦ ᑭᔭ ᐅᑦ ᐃᓯᓂᐧᑲᓱᐅᓐ ᒐ ᓂᓱᐅᓇᑎᓂᔨᒡ ?”

⁶ ᒧᔭᒻ ᒪᒃ ᐱᐊᒋ ᐛᐱᒥᒋ, ᓂᑐᐎᔾ ᐃᓯ ᐃᔨᒧᐤ: ᐅᑕᐃᒡ ᒪᐅᒋᑕᐤ ᒥᒐᑎᓯᐅᓂᔪᐤ; ᐃᔅᐱ ᒪᒃ ᐛᔪᐎᒋ, ᐎᑎᒻ᙮

⁷ ᒥᓯᐛ ᑲ ᐛᐧᑲᓯᒡ ᑲ ᒋᒧᑦ ᐃᔨᒥᑐᐅᒡ ᐊᔭᔨᒧᒥᒡ: ᓂᔾ ᐃᑕᔨᑎᒧᒡ ᒐᒋ ᒥᒋᑐᑐᐅᒡ᙮

⁸ “ᒥᒋ ᐃᑕᔅᐱᓇᐅᓂᔪᐤ,” ᐃᔅᒋᔄᐅᒡ, “ᒋᒋᐛ ᒋᒋᔅᑲᑯᐤ: ᐊᓄᒡ ᒪᒃ ᐊ ᐱᒥᓯᐧᒃ ᓇᒪ ᓂᑕ ᒥᓐ ᒋᑭ ᐅᓂᐤ᙮”

⁹ ᓂᐦᐃ, ᑎᐱᔨᐛ ᓂᐎᒐᐛᑭᓐ, ᑲ ᒪᒥᓯᑐᑐᐅᒃ, ᑲ ᒧᐛᑦ ᓂᐸᒂᓯᑭᓂᒪ, ᓂᒋ ᐅᐱᓇᒪᒄ ᐅᑐᑎᓐ᙮

¹⁰ ᒪᒃ ᒋᔾ, ᐅ ᑎᐸᔨᒋᒐᓱᐤ, ᒋᔅᑎᒪᒐᔨᒥ, ᐅᓂᓂ, ᒐᒋ ᓴᐧᑯᒋᐃᒃ᙮

¹¹ ᐊᑯᑕ ᐛᒋ ᒋᔅᒐᔨᒥᑕᓐ ᐊ ᒋᔅᑎᒪᒐᔨᒥᔨᓐ, ᐊᓐ ᑲ ᐛᐧᑲᓯᑦ ᐊ ᐊᑲ ᓴᐧᑯᒋᐃᑦ᙮

¹² ᓂᔾ ᒪᒃ, ᒋ ᓯᑐᓐ ᓂᑯᐃᔅᑯᑐᐅᓂᒡ, ᑭᔭ ᒋ ᓇᐊᐱᔨᓐ ᐅᑎᔅᑯᐤ ᒋᑕᔅᑎᒥᐧᒄ ᑲᒋᒡ᙮

¹³ ᒪᒥᒋᑕᑯᓱᐤ ᑎᐸᔨᒋᒐᓱᐤ ᐅᒋᓴᒪᓂᑐᒪ ᐃᔅᕋᐃᓪ, ᑲᒋᒡ ᐅᒋ ᑭᔭ ᑲᒋᒡ ᐃᔅᑯᐤ᙮ ᐊᒥᓐ ᑭᔭ ᐊᒥᓐ᙮