ᑎᐱᑦ ᐅᓂᑭᒧᐅᓇ 40 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓯᐱᔪᐛᓯᐅᓂᒡ ᓂᒋ ᐊᓯᓄᐛᐊᐤ ᑎᐸᔨᒋᒐᓱᐤ; ᓂᒋ ᐱᔅᒐᔨᒥᒄ ᒪᒃ, ᑭᔭ ᒋ ᓂᑐᑎᒻ ᓂᒪᐅᓂᔪᐤ᙮ 2 ᓂᒋ ᐎᐎᐱᑎᒄ ᒪᒃ ᐊ ᑯᔅᑕᑎᑯᓂᔨᒡ ᐛᑎᑯᔪᐤ ᐅᒡ, ᐊ ᒋᔅᑕᐅᔅᑲᔨᒡ ᐅᒡ, ᒋ ᐃᑎᔅᑕᐤ ᒪᒃ ᓂᓯᑕ ᒋᔅᑕᐱᔅᑯᒡ, ᑭᔭ ᒋ ᒥᔅᑯᐅᔅᑕᐤ ᓂᐱᒧᑕᐅᓇ᙮ 3 ᑭᔭ ᐅᔅᒋ ᓂᑭᒧᐅᓂᔪᐤ ᒋ ᐊᔅᑕᐤ ᓂᑐᓂᒡ, ᒐᒋ ᒪᒥᒋᒥᒃ ᐅᑦ ᒋᒋᓴᒪᓂᑐᒥᓄᐤ᙮ ᒥᒐᑦ ᒪᒃ ᐊ ᐛᐸᑕᒡ, ᒋᑭ ᓇᓂᒋᐛᐅᒡ, ᑭᔭ ᒋᑭ ᒪᒥᓯᑐᑕᐛᐅᒡ ᑎᐸᔨᒋᒐᓱᐛ᙮ 4 ᓱᐛᔨᑕᑯᓱᐤ ᐊᓐ ᐃᔪᐤ ᑲ ᒪᒥᓯᑐᑐᐛᑦ ᑎᐸᔨᒋᒐᓱᐛ; ᐊᑲ ᑭᔭ ᒋᔅᑕᔨᒪᑦ ᐅᒋᔅᑕᔨᒧᐛ, ᐊᓂᔭ ᑭᔭ ᑲ ᓇᑕᒥᔨᒋ ᑭᑭᒋᔭᐅᓂᔪᐤ᙮ 5 ᒥᒐᓇ, ᑎᐸᔨᒋᒐᓱᐤ ᓂᒋᓴᒪᓂᑐᒻ, ᒋ ᒪᒥᔅᑲᒋ ᐃᑐᐅᓇ ᑲᒋ ᐃᑐᑎᒥᓐ, ᑭᔭ ᐊ ᐃᑕᔨᒥᔭᒡ; ᓇᒪᐎᔾ ᓇᔅᒡ ᒋᑭ ᒋ ᐊᒋᑕᒪᑯᐅᓐ: ᐃᔅᐱᔅ ᐎ ᐎᑎᒪᓐ ᑭᔭ ᐊᔨᒧᑎᒪᓐ, ᓇᒪᐎᔾ ᒋᑭ ᒋ ᑕᐱ ᐊᒋᑕᑭᓄᐎᔪᐛ᙮ 6 ᒥᑐᔅᑕᐊᒪᒐᐅᓐ ᑭᔭ ᐱᔅᑎᓂᒐᐅᓐ ᓇᒪᐎᔾ ᒋ ᐅᒋ ᓂᑐᐛᔨᑕᓐ: ᔅᒋ ᐊᐸᐊᓐ ᓂᑐᑭᔭ: ᐃᔅᑯᑕᐤ ᐱᔅᑎᓂᒐᐅᓇ ᑭᔭ ᒥᒋᑐᑎᒧᐅ ᐱᔅᑎᓂᒐᐅᓇ ᓇᒪᐎᔾ ᒋ ᐅᒋ ᓂᑐᐛᔨᑕᓐ᙮ 7 ᐊᑯ ᑲ ᐃᔅᒋᔄᔭᓐ, “ᐛᐸᑎᒥᒄ, ᓂ ᐸᒋ ᑎᑯᓯᓐ: ᒥᓯᓇᐃᑭᓂᒡ ᓂ ᒥᓯᓇᓱᓐ᙮ 8 ᓂ ᒥᔽᔨᑕᓐ ᒐᒋ ᐃᑐᑎᒪᓐ ᒋᑦ ᐃᑕᔨᑎᒧᐅᓐ, ᐅ ᓂᒋᓴᒪᓂᑐᒻ: ᓂᐦᐃ, ᒋᑦ ᐃᑎᓱᐛᐅᓐ ᓂ ᐱᒋᑕᐊᔅᑲᑯᓐ᙮” 9 ᓂᒋ ᑭᒐᔅᒋᒧᐛᓐ ᑯᐃᔅᑯᑕᑎᓯᐅᓐ ᒋᒋ ᒪᐛᒋᐃᑐᐅᓂᒡ: ᐛᐸᑎᒥᒄ, ᓇᒪᐎᔾ ᓂ ᐅᒋ ᓂᑲᓇᓐ ᓂᑐᓐ ᐅ ᑎᐸᔨᒋᒐᓱᐤ, ᒋ ᒋᔅᒐᔨᑕᓐ᙮ 10 ᓇᒪᐎᔾ ᓂ ᐅᒋ ᑲᑕᓐ ᒋᑯᐃᔅᑯᑕᑎᓯᐅᓐ ᓂᑕᐃᒡ; ᓂᒋ ᐎᑕᓐ ᒋᑯᐃᔅᑯᑐᐅᓐ ᑭᔭ ᒋᐱᒪᒋᐃᐛᐅᓐ: ᒋᓴᒋᐃᐛᐎ ᒋᓴᐛᑎᓯᐅᓂᔪᐤ ᑭᔭ ᒋᑕᑈᐅᓂᔪᐤ ᓇᒪᐎᔾ ᓂ ᐅᒋ ᑲᑐᐛᐅᒡ ᑲ ᒥᒐᑎᒡ ᐊ ᒪᒧᐎᔨᑐᒡ᙮ 11 ᐊᑲᐎᔾ ᒥᒋᒥᓂᒧᐎ ᒋ ᔪᔅᐱ ᒋᔅᑎᒪᒐᔨᒋᒐᐅᓐ, ᐅ ᑎᐸᔨᒋᒐᓱᐤ: ᐊᑯᔅ ᒋ ᓴᒋᐃᐛᐤ ᒋᓴᐛᑎᓯᐅᓐ ᑭᔭ ᒋᑕᑈᐅᓐ ᒧᔅ ᓂᑭ ᑭᓄᐛᔨᒥᑯᓐ᙮ 12 ᐛᔅ ᐊᑲ ᐊᒋ ᐊᒋᒋᑕᑭᓄᐅᒋ ᒥᒋ ᒐᒂᓇ ᓂ ᐛᔅᑲᔅᑲᑯᓐ: ᓂᒥᒐᑎᓯᐅᓇ ᓂᒋ ᒪᒋᑯᓂᑯᓐ, ᐛᒋ ᐊᑲ ᑭᔅᒋᑕᔭᓐ ᒐᒋ ᑕᔅᑎᓴᐱᔭᓐ ᐊᔪᐛᒡ ᒥᒐᓂᔨᐛ ᐃᔅᐱᔅ ᐅᐱᐎᔭ ᓂᔅᑎᒂᓂᒡ: ᐊᐅᒄ ᐅᒋ ᓂ ᓄᑕᓯᒥᑯᓐ ᓂᑕᐃ᙮ 13 ᒥᔽᔨᑕ, ᐅ ᑎᐸᔨᒋᒐᓱᐤ, ᒐᒋ ᐱᒪᒋᐃᔨᓐ: ᐅ ᑎᐸᔨᒋᒐᓱᐤ, ᒋᐱᔾ ᒐᒋ ᐎᒋᐃᔨᓐ᙮ 14 ᐊᑯᔅ ᒋᑭ ᓴᒂᔨᒧᐅᒡ ᑭᔭ ᒪᒧᐤ ᐛᐛᓇᔨᑎᒧᒡ, ᑲ ᓇᓂᑐᐛᔨᒪᒡ ᓂᑦ ᐊᒐᒂ ᒐᒋ ᓂᓱᐅᓇᒋᐊᒡ; ᐊᑯᔅ ᒋᑭ ᐊᓴᑲᐸᐎᐛᐅᒡ, ᑭᔭ ᒋᑭ ᓴᒂᔨᒧᐅᒡ, ᑲ ᒥᒋ ᐃᑕᔨᒥᒡ᙮ 15 ᐊᑯᔅ ᒋᑭ ᒪᒥᓯᒪᐃᑎᒧᒡ ᐊ ᑎᐸᐊᒪᒡ ᐅᓂᓇᐸᐎ ᐊ ᓴᒂᔨᒧᐤ ᐊᔨᑐᐅᓄᐛᐛ, ᑲ ᐃᓯᒡ, “ᐊᐦᐊ, ᐊᐦᐊ !” 16 ᐊᑯᔅ ᒥᓯᐛ ᑲ ᓇᓂᑐᐛᔨᒥᔅᒡ ᒋᑭ ᒥᔽᑎᑯᒡ ᑭᔭ ᓯᒋᔭᓯᔅᑕᑯᒡ: ᐊᑯᔅ ᐊᓐᒡ ᑲ ᓴᒋᑕᒡ ᒋ ᐱᒪᒋᐃᐛᐅᓂᔪᐤ ᒧᔅ ᒋᑭ ᐃᔅᒋᔄᐅᒡ, “ᑎᐸᔨᒋᒐᓱᐤ ᒋᑭ ᐎ ᒋᔅᑕᒋᒪᑭᓄᐤ᙮” 17 ᒪᒃ ᓂᔾ ᓂ ᒋᔅᑎᒪᑎᓯᓐ ᑭᔭ ᓂ ᐛᐛᓇᔨᑕᓐ; ᐃᔭᐱᒡ ᒪᒃ ᑎᐸᔨᒋᒐᓱᐤ ᓂᒪᒥᑐᓇᔨᒥᒄ: ᒋᔾ ᒋ ᐎᒋᐃᓐ ᑭᔭ ᒋ ᐱᒪᒋᐃᔨᓐ; ᐊᑲᐎᔾ ᒋᐱᒋ, ᐅ ᓂᒋᓴᒪᓂᑐᒻ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.