ᑎᐱᑦ ᐅᓂᑭᒧᐅᓇ 39 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᓂᒋ ᐃᔅᒋᔄᓐ, “ᓂᑭ ᐃᔭᒂᒥᓯᓐ ᐊ ᐃᑕᑎᓯᔭᓐ, ᒐ ᐊᑲ ᒋ ᒥᒋ ᐊᐃᑎᔭᓐ ᓂᑕᔨᔨᒡ: ᓂᑭ ᒋᐱᑐᓇᐱᑎᓱᓐ, ᒪᒂᒡ ᐅᒥᒋᑥᐅᒡ ᐊ ᐅᑎᔅᑲᐎᔅᑯᐅᒡ᙮”

² ᓇᒪ ᓄᒋ ᐃᔨᒥᓐ ᐊ ᒋᐱᑐᐛᔭᓐ, ᓇᒪ ᒐᒂᓐ ᓄᒋ ᐃᔅᒋᔄᓐ, ᑲ ᒥᔽᓯᒡ ᐅᒋ ᑭᔭ; ᓇᔅᒡ ᒪᒃ ᓂᒋ ᒪᒥᓴᒪᔨᑕᓐ᙮

³ ᓂᑕᐃ ᒋ ᒋᓯᑕᐤ ᐱᒡ ᓂᔭᒡ; ᒪᒂᒡ ᒪᒃ ᐊ ᒪᒥᑐᓇᔨᑎᒪᓐ, ᐃᔅᑯᑕᐤ ᒋᐎᔨᐃᑕᐤ; ᐊᑯ ᒪᒃ ᑲ ᐃᔨᒥᔭᓐ ᓂᑕᔨᔾ ᐅᒡ᙮

⁴ “ᑎᐸᔨᒋᒐᓱᐤ, ᒋᔅᒐᔨᑎᒥᐃ ᐊᔎᒡ ᓂᐱᒪᑎᓯᐅᓐ, ᑭᔭ ᐊ ᑕᑎᒋ ᓂᒋᓯᑲᒪ, ᒐᒋ ᒋᔅᒐᔨᑎᒥᓐ ᐊᔅᐱᔅ ᐃᔨᒥᓯᔭᓐ᙮

⁵ ᐛᐸᑕ, ᔅᒋ ᐃᓯᑕᓐ ᓂᒋᓯᑲᒪ ᒧᔭᒻ ᐊᔅᐱᔅ ᐃᔨᑭᔅᑲᒡ ᒥᑎᒋᔾ; ᑭᔭ ᓂᑦ ᐃᔅᐱᑎᓯᐅᓐ ᓇᒪ ᒐᒂᓐ ᐃᑕᔨᑕᒂᓐ ᐊ ᑭᓄᐛᐸᑎᒥᓐ: ᑕᑈ ᒥᓯᐛ ᑕᑐᐤ ᐃᔪᐤ ᐊᑎ ᓇᔅᒡ ᒥᔪᒪᒋᐅᑦ ᓇᔅᒡ ᓂᑐᐎ ᐃᑕᔨᑕᑯᓱᐤ᙮”

⁶ “ᒐᔅᑎᓇᔅ ᒥᓯᐛ ᑕᑐᐤ ᐃᔪᐤ ᐱᒧᑕᐤ ᓂᑐᐎ ᐃᓯᓇᑯᓯᐅᓂᒡ: ᑕᑈ ᓂᑐᐎ ᒥᑯᔅᑲᑕᔨᑎᒥᐃᑎᓱᐅᒡ: ᒪᐛᓴᑯᓂᒻ ᐛᔪᑎᓯᐅᓇ, ᓇᒪ ᒪᒃ ᒋᔅᒐᔨᑎᒻ ᐊᐛᔪᐛ ᒐ ᐅᑎᓂᒥᔨᒋ᙮

⁷ ᐊᓄᒡ ᒪᒃ, ᑎᐸᔨᒋᒐᓱᐤ, ᒐᒂᓐ ᐛᒋ ᐊᓯᓄᐛᐸᑎᒪᓐ ? ᒋᔾ ᒋᑦ ᐊᔅᐸᔨᒧᑐᑕᑎᓐ᙮

⁸ ᐎᒂᒋᐃ ᒥᓯᐛ ᓂᐅᓂᑐᑎᒧᐅᓇ ᐅᒡ: ᐊᑲᐎᔾ ᐃᓯᔨᓐ ᒐᒋ ᒋᑐᓯᒡ ᒋᔎᐧᑲᓐᒡ᙮

⁹ ᓂᒋ ᒋᐱᑐᐛᓐ, ᓇᒪᐎᔾ ᓂᒋ ᐸᔅᒋᑐᓇᐃᓐ; ᐛᔅ ᒋᔾ ᑲ ᐃᑐᑎᒥᓐ᙮

¹⁰ ᐃᒐᓂᒧᐎ ᒋᐅᑕᒪᐃᒐᐅᓐ: ᓂ ᓂᓱᐅᓇᒋᐃᑯᓐ ᐊ ᐅᑕᒪᐅᐎᓐ᙮

¹¹ ᐃᔅᐱ ᒋᔾ ᐊ ᒋᑐᑕᑦ ᐃᔪᐤ ᒥᒐᑎᓯᐅᓐ ᐅᒡ, ᒋ ᐛᐸᔨᑎᒺᓐ ᐅᒥᔪᓇᑯᓯᐅᓐ ᒧᔭᒻ ᒥᓐᑐᔅ: ᒐᔅᑎᓇᔅ ᒥᓯᐛ ᑕᑐᐤ ᐃᔪᐤ ᓂᑐᐎ ᐃᑕᔨᑕᑯᓱᐤ᙮”

¹² “ᓂᑐᑕ ᓂᑦ ᐊᔭᒥᐊᐅᓐ, ᐅ ᑎᐸᔨᒋᒐᓱᐤ, ᐸᑕᐎᓐ ᒪᒃ ᐊ ᒧᔅᑯᐛᑎᑕᓐ; ᐊᑲᐎᔾ ᒋᐱᑐᐛ ᐊ ᐅᒋᐧᑯᐛᑎᔭᓐ: ᐛᔅ ᓂ ᒪᓐᑕᐅᓐ ᑭᔭ ᓂᐱᒥᐱᒋᓐ, ᒧᔭᒻ ᒥᓯᐛ ᓄᑕᐅᐱᓐᒡ᙮

¹³ ᐅ ᒥᓇᒋᐃ, ᒐᒋ ᒋᐛ ᐊᔭᔭᓐ ᒥᔅᑯᐅᓯᐅᓐ, ᐊᒺᔭ ᐅᑕ ᐅᒋ ᔅᑐᑕᔭᓐ, ᑭᔭ ᒐ ᐊᑲ ᑕᔭᓐ᙮”