ᑎᐱᑦ ᐅᓂᑭᒧᐅᓇ 36 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᐅᓂᑐᑎᒧᐅᓄᐛᐤ ᐅᒥᒋᑥᐅᒡ ᓂᐎᑎᒪᑯᓐ ᓂᑕᐃᒡ, “ᐊᑲ ᐊ ᑎᒂᓂᔨᒡ ᐅᔅᒋᓯᑯᒡ ᒋᓴᒪᓂᑐᐛ ᐅᓇᓂᒋᔅᑕᑯᓱᐅᓂᔪᐤ᙮” 2 ᐛᔅ ᒪᒪᑕᐛᐱᒥᑎᓱᐤ ᐅᔅᒋᓯᑯᒡ, ᐸᑎᒪ ᐃᔅᐱᔅ ᒥᔅᑭᒐ ᐅᒥᒐᑎᓯᐅᓐ ᐊᐅᐧᑲᑕᑲᓄᐎᔨᒡ᙮ 3 ᐅᑦ ᐃᔨᒧᐅᓇ ᐅᑐᓂᒡ ᒥᒐᑎᓯᐅᓂᔪᐛ ᑭᔭ ᐎᔭᓯᐃᐛᐅᓂᔪᐛ: ᒋ ᐳᓂᑕᐤ ᒐᒋ ᑭᒐᑕᐛᔨᑕᐧᒃ, ᑭᔭ ᒐᒋ ᒥᔪᑐᑕᐧᒃ᙮ 4 ᐛᐛᓇᔨᑎᒥᑯᐤ ᒪᔭᔨᒐᐅᓂᔪᐤ ᐅᓂᐸᐅᓂᒡ; ᐊᔨᑎᓱᐤ ᐊᑎ ᐊᑲ ᒥᔽᓯᔨᒡ: ᓇᒪᐎᔾ ᐛᐧᑲᑎᒻ ᑲ ᒪᔭᑎᓂᔨᒡ᙮ 5 ᒋᓱᐛᔨᒋᒐᐅᓐ, ᐅ ᑎᐸᔨᒋᒐᓱᐤ, ᒋᓯᑯᒡ ᑎᒂᓐ, ᑭᔭ ᒋᑯᐃᔅᑯᑐᐅᓐ ᐅᑎᑎᒧᐤ ᑭᔅᑯᐅᓂᒡ᙮ 6 ᒋᑯᐃᔅᑯᑐᐅᓐ ᒧᔭᒻ ᒋᒋ ᐱᔅᑯᑎᓇᐛ ᐃᓯᓇᒂᓐ; ᒋᑎᐸᔅᑯᓂᒐᐅᓇ ᓇᔅᒡ ᐊᑎᒥᒡ: ᐅ ᑎᐸᔨᒋᒐᓱᐤ, ᒋ ᑭᓄᐛᔨᒪᐤ ᐃᔪᐤ ᑭᔭ ᐊᐛᓯᔅ᙮ 7 ᑕᑈ ᒋᔅᑕᔨᑕᑯᓐ ᒋᓴᒋᐃᐛᐎ ᒋᓴᐛᑎᓯᐅᓐ, ᐅ ᒋᓴᒪᓂᑐᐤ ! ᐊᐅᒄ ᐅᒡ ᐃᔪᒡ ᐅᑦ ᐊᐛᓯᒥᓱᐛᐛ ᒪᒥᓯᑐᑎᒥᔪᐛ ᐊ ᐊᑯᓇᐎᔨᓐ ᒋᑎᑎᐧᑭᓇ᙮ 8 ᒋᑭ ᑕᐱ ᒋᔅᐳᐅᒡ ᐊ ᐃᓯ ᐎᔨᔪᐎᒡ ᒋᒥᒋᐛᐱᒥᔪᐤ; ᒋᑭ ᒥᓄᐅᒡ ᒪᒃ ᒋ ᒥᔽᔨᑎᒧᐎ ᓯᐱᔪᐤ᙮ 9 ᐛᔅ ᒋᔾ ᐊᑕᔨᓐ ᐅᒋᐱᔪᐤ ᐱᒪᑎᓯᐅᓐ: ᒋᐛᓴᔭᓯᐅᓂᒡ ᓂᑭ ᐛᐸᑕᓇᓐ ᒋᐛᓴᔭᓯᐅᓐ᙮ 10 ᐅ ᐱᒥᐱᑐᐅᒡ ᒋᓴᒋᐃᐛᐎ ᒋᓴᐛᑎᓯᐅᓂᔪᐤ ᐊᓐᒡ ᑲ ᒋᔅᒐᔨᒥᔅᒡ; ᑭᔭ ᒋᑯᐃᔅᑯᑕᑎᓯᐅᓂᔪᐤ ᐊᓐᒡ ᑲ ᑯᐃᔅᑯᑕᐊᒡ᙮ 11 ᐊᑯᔅ ᐊᑲᐎᔾ ᒋᔅᑕᔨᒧᐤ ᒥᓯᑦ ᓂᑭ ᐸᒋ ᐎᔭᔅᑐᑕᑯᓐ, ᐊᑲ ᑭᔭ ᐅᑎᒋᐛᐤ ᐅᒥᒋᑥᐅᒡ ᓂᑭ ᐊᒋᐸᔨᐃᑯᐛᓐ᙮ 12 ᐊᑯᑕ ᐸᒋᓯᒡ ᑲ ᒥᒐᑎᓯᔪᐤ ᐊᐃᑎᒡ: ᓂᒋᐛᐱᓂᒡ, ᓇᒪ ᒪᒃ ᒋᑭ ᑭᔅᒋᑕᐅᒡ ᒐᒋ ᐅᓂᔅᑲᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.