ᑎᐱᑦ ᐅᓂᑭᒧᐅᓇ 34 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒧᔅ ᓂᑭ ᒪᒥᒋᒪᐤ ᑎᐸᔨᒋᒐᓱᐤ: ᐅᒪᒥᒋᒥᑲᓯᐅᓐ ᓇᓂᑎᒻ ᒋᑭ ᑎᒂᓂᔪᐤ ᓂᑐᓂᒡ᙮ 2 ᓂᑦ ᐊᒐᐧᒄ ᑎᐸᔨᒋᒐᓱᐛ ᒋᑭ ᐅᒋ ᒪᒥᑕᑯᒧᐤ: ᑲ ᑎᐱᑕᔨᒧᒡ ᒋᑭ ᐸᑎᒧᒡ, ᑭᔭ ᒋᑭ ᓯᒋᔭᓱᐅᒡ᙮ 3 ᐅ ᐎᒋᐃᒄ ᐊ ᒋᔅᑕᒋᒥᒄ ᑎᐸᔨᒋᒐᓱᐤ, ᐊᑯᔅ ᒪᒧᐤ ᒪᒥᑕᑯᑎᒺᑕᐤ ᐅᑦ ᐃᓯᓂᐧᑲᓱᐅᓐ᙮ 4 ᓂᒋ ᓇᓂᑐᐛᔨᒪᐤ ᑎᐸᔨᒋᒐᓱᐤ, ᓂᒋ ᓂᑐᑕᒄ ᒪᒃ, ᑭᔭ ᓂᒋ ᐎᒂᒋᐃᒄ ᒥᓯᐛ ᓂᑯᔅᑕᒋᐅᓇ ᐅᒡ᙮ 5 ᒋ ᑭᓄᐛᐱᒪᐅᒡ, ᑭᔭ ᒋ ᐛᔅᑕᓂᒧᐛᐅᒡ; ᐅᑕᔅᑎᒥᐧᑯᐛᐛ ᒪᒃ ᓇᒪᐎᔾ ᓴᒂᔨᒧᐅᓇᑯᓂᔪᐛ᙮ 6 ᐅ ᑲ ᒋᔅᑎᒪᑎᓯᑦ ᐃᔪᐤ ᒋ ᑕᑈᐤ, ᒋ ᓂᑐᑕᑎᑯᐤ ᑎᐸᔨᒋᒐᓱᐛ, ᑭᔭ ᒋ ᐱᒪᒋᐃᑯᐤ ᒥᓯᐛ ᐅᑦ ᐊᔨᒥᓯᐅᓂᒡ ᐅᒋ᙮ 7 ᐅᑦ ᐊᓐᒋᓂᒪ ᑎᐸᔨᒋᒐᓱᐤ ᐛᔅᑲᑲᐳᐅᔅᑐᐛᔪᐛ ᒥᓯᐛ ᑲ ᓇᓂᒋᔅᑕᑯᑦ, ᐱᒪᒋᐃᐛᔪᐛ ᒪᒃ᙮ 8 ᐅ ᑯᒋᔅᑎᒧᒄ, ᐛᐸᑎᒧᒄ ᑭᔭ ᐊ ᒥᔽᑎᓯᑦ ᑎᐸᔨᒋᒐᓱᐤ: ᓱᐛᔨᑕᑯᓱᐤ ᐊᓐ ᐃᔪᐤ ᑲ ᒪᒥᓯᑐᑐᐛᑦ᙮ 9 ᐅ ᓇᓂᒋᔅᑕᐧᒄ ᑎᐸᔨᒋᒐᓱᐤ, ᒋᔨᐛᐤ ᐅᐸᔭᒋᓯᒪ: ᐛᔅ ᓇᒪᐎᔾ ᐅᓂᓯᓂᔪᐛ ᐊᓂᔭ ᑲ ᓇᓂᒋᔅᑕᑯᑦ᙮ 10 ᒥᓯᐱᓱᐅᒡ ᒋᔅᑎᒪᑎᓯᐅᒡ, ᑭᔭ ᓄᑕᐧᑭᑕᐅᒡ: ᐊᓐᒡ ᒪᒃ ᑲ ᓇᓂᑐᐛᔨᒪᒡ ᑎᐸᔨᒋᒐᓱᐛ ᓇᒪᐎᔾ ᒋᑭ ᓄᑕᐱᔪᐅᒡ ᒐᒂᔪᐤ ᑲ ᒥᔽᓯᔨᒡ᙮ 11 ᐊᔅᑎᒥᒄ, ᐊᐛᓯᑐᒄ, ᓂᑐᑐᐅᒄ: ᒋᑭ ᒋᔅᑯᑎᒪᑎᓇᐛᐤ ᐅᓇᓂᒋᔅᑕᑯᓯᐅᓐ ᑎᐸᔨᒋᒐᓱᐤ᙮ 12 ᒐᒄ ᐃᔪᐤ ᑲ ᓂᑐᐛᔨᑕᐧᒃ ᐱᒪᑎᓯᐅᓂᔪᐤ, ᑭᔭ ᑲ ᓴᒋᑕᑦ ᒥᒐᑐᐤ ᒋᓯᑲᐛ, ᒐᒋ ᐛᐸᑕᐧᒃ ᑲ ᒥᔽᓯᔨᒡ ? 13 ᑭᓄᐛᔨᑕ ᒋᑕᔨᔾ ᑲ ᒪᔭᑎᒡ ᐅᒡ, ᑭᔭ ᒋᑐᓐ ᒐ ᐊᑲ ᒋ ᒥᒋᐃᔨᒥᒥᑭᒡ᙮ 14 ᓂᑭᑕ ᑲ ᒪᔭᑎᒡ, ᑐᑕ ᒪᒃ ᑲ ᒥᔽᓯᒡ, ᓇᓂᑐᐛᔨᑕ ᒋᔭᒪᔨᑎᒧᐅᓐ, ᓄᓱᔅᑲ ᒪᒃ᙮ 15 ᑎᐸᔨᒋᒐᓱᐤ ᑭᓄᐛᐱᒪᐤ ᐅᑯᐃᔅᑯᑕᑎᓯᐛ, ᑭᔭ ᓂᑐᑎᒺᐤ ᐅᒪᐅᓂᔪᐤ᙮ 16 ᑎᐸᔨᒋᒐᓱᐤ ᒋᔄᓯᔅᑐᐛᐤ ᐊᓂᔭ ᑲ ᒥᒋᑐᑎᒥᔨᒋ, ᒐᒋ ᐳᓂ ᒋᔅᒋᑐᐛᑭᓄᔨᒋ ᐊᔅᒋᒡ᙮ 17 ᐅᑯᐃᔅᑯᑕᑎᓯᐛ ᒪᔪᐛ, ᑎᐸᔨᒋᒐᓱᐤ ᒪᒃ ᐸᑐᐛᐤ, ᑭᔭ ᐎᐧᑯᒋᐊᐤ ᒥᓯᐛ ᐅᑦ ᐊᔨᒥᓯᐅᓂᔨᒡ ᐅᒡ᙮ 18 ᑎᐸᔨᒋᒐᓱᐤ ᐸᓱᐛᐱᒪᐤ ᐊᓂᔭ ᑲ ᐱᑯᑕᐊᔨᒋ; ᐱᒪᒋᐊᐤ ᑭᔭ ᐊᓂᔭ ᑲ ᒋᔅᑎᒪᑎᓯᔨᒋ᙮ 19 ᒥᒐᓂᔪᐛ ᐅᒪᒂᔨᑕᒧᐅᓇ ᐅᑯᐃᔅᑯᑕᑎᓯᐤ: ᒪᒃ ᑎᐸᔨᒋᒐᓱᐤ ᒥᓯᐛ ᐅᒋ ᐎᐧᑯᒋᐊᐤ᙮ 20 ᑭᓄᐛᔨᑎᒺᐤ ᒥᓯᐛ ᐅᔅᑭᓂᔪᐛ: ᓇᒪ ᐛᐛᒡ ᐸᐃᒄ ᓇᑥᐱᔪᐛ᙮ 21 ᑲ ᒪᔭᑎᓂᔨᒡ ᒋᑭ ᓂᐸᐃᑯᐅᒡ ᐅᒥᒋᑥᐅᒡ: ᐊᓐᒡ ᒪᒃ ᑲ ᐛᐧᑲᑕᒡ ᐅᑯᐃᔅᑯᑕᑎᓯᐛ ᒋᑭ ᒥᒋ ᐃᑕᔨᑕᑯᓱᐅᒡ᙮ 22 ᑎᐸᔨᒋᒐᓱᐤ ᐱᒪᒋᐃᒪᐤ ᐅᑦ ᐊᒐᐧᑯᔪᐛ ᐅᑦ ᐊᑐᔅᒐᔭᑭᓇ; ᓇᒪᐎᔾ ᐊᐛᓐ ᒪᒃ ᑲ ᒪᒥᓯᑐᑐᐛᑦ ᒋᑭ ᒥᒋ ᐃᑕᔨᑕᑯᓱᐤ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.