ᑎᐱᑦ ᐅᓂᑭᒧᐅᓇ 27 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 27 (Lent-2 Year C)

¹ ᑎᐸᔨᒋᒐᓱᐤ ᐊᐅᒄ ᓂᐛᔅᑕᐅᓐ ᑭᔭ ᓂᐱᒪᒋᐃᑯᓯᐅᓐ; ᐊᐛᓐ ᒐ ᑯᔅᐸᓇᔨᒥᒃ ? ᑎᐸᔨᒋᒐᓱᐤ ᑲ ᐅᒋ ᒥᔅᑯᐛᒡ ᓂᐱᒪᑎᓯᐅᓐ; ᐊᐛᓐ ᒪᒃ ᒐ ᑯᔅᑎᒃ ?

² ᐃᔅᐱ ᐅᒥᒋᑥᐅᒡ, ᑲ ᐛᐧᑲᓯᒡ ᑭᔭ ᑲ ᓂᑐᐱᔨᒡ ᐅᑦ, ᐱᔭᒋ ᓇᓯᒡ ᒐᒋ ᒋᑕᒡ ᓂᔭᓯᔪᐤ, ᒋ ᐱᓱᓯᓄᐅᒡ ᑭᔭ ᒋ ᐸᒋᓯᓄᐅᒡ᙮

³ ᐊᑎ ᐅᓂᑐᐱᔪᐅ-ᐃᔪᒡ ᐊ ᒥᒐᑎᒡ ᑲ ᐸᒋ ᓂᑐᐱᔨᒡ, ᓇᒪᐎᔾ ᓂᑭ ᓴᑯᑕᓐ: ᐊᑎ ᓂᑐᐱᔪᐅᓐ ᐱᓯᑯᔅᑕᑯᔭᓇ, ᐅᔭ ᓂᑭ ᒐᔅᑎᓇᑕᔨᑕᓐ᙮

⁴ ᐸᐃᒄ ᒐᒂᔪᐤ ᓂᑭ ᐱᑯᓴᔨᒪᐤ ᑎᐸᔨᒋᒐᓱᐤ, ᐊᐅᒄ ᒐ ᓇᓂᑐᐛᔨᑎᒪᓐ; ᒐᒋ ᐎᒍᐅᒡ ᑎᐸᔨᒋᒐᓱᐤ ᐎᒋᒡ ᒐ ᐃᔅᐱᔅ ᐱᒪᑎᓯᔭᓐ, ᒐᒋ ᑭᓄᐛᐸᑎᒧᒡ ᐅᒥᔪᓇᑯᓯᐅᓐ ᑎᐸᔨᒋᒐᓱᐤ, ᑭᔭ ᒐᒋ ᐊᔭᒥᐊᔭᓐ ᐅᒋᓴᐊᔭᒥᐊᐅᒋᐛᐱᒡ᙮

⁵ ᐛᔅ ᒪᒂᒡ ᐊ ᐊᔨᒥ ᒋᓯᑲᔨᒡ ᓂᑭ ᑲᔨᒄ ᐎᒋᒡ: ᐊᓐᑕ ᐊᑲᓱᓇᑯᓂᔨᒡ ᐅᑦ ᐊᔭᒥᐊᐅᒋᐛᐱᒥᒡ ᓂᑭ ᑲᔨᒄ; ᓂᑭ ᑕᑕᔨᒄ ᒪᒃ ᑕᐧᑯᒡ ᒋᔅᑕᐱᔅᑯᒡ᙮

⁶ ᐊᑯ ᓂᔅᑎᒂᓐ ᐸᔅᒡ ᒋᑭ ᐅᐱᓇᑭᓄᐤ ᐃᔅᐱᔅ ᑲ ᐛᐧᑲᓯᒡ ᑲ ᐛᔅᑲᔅᑯᐅᒡ: ᐊᐅᒄ ᐅᒋ ᓂᑭ ᐱᔅᑎᓂᒐᓐ ᐊᔭᒥᐊᐅᐱᒍᐎᔭᓂᒋᐛᐱᒡ ᒥᔽᔨᑎᒧᐅ ᐱᔅᑎᓂᒐᐅᓐ; ᓂᑭ ᓂᑭᒧᓐ, ᓂᐦᐃ ᐊ ᓂᑭᒧᔭᓐ ᓂᑭ ᒪᒥᒋᒪᐤ ᑎᐸᔨᒋᒐᓱᐤ᙮

⁷ ᓂᑐᑕ, ᐅ ᑎᐸᔨᒋᒐᓱᐤ, ᐱᔭᑕᑯᓯᔭᓂ: ᒋᔅᑎᒪᒐᔨᒥ ᑭᔭ, ᓂᔅᑯᒥ ᑭᔭ᙮

⁸ ᐃᔅᐱ ᑲ ᐃᔅᒋᔄᔨᓐ, “ᓇᓂᑐᐛᐸᑎᒧᒄ ᓂᑕᔅᑎᒥᐧᒄ,” ᓂᑕᐃ ᔅᒋ ᐃᑎᑯᓐ, “ᒋᑕᔅᑎᒥᐧᒄ, ᑎᐸᔨᒋᒐᓱᐤ, ᓂᑭ ᓇᓂᑐᐛᐸᑕᓐ᙮”

⁹ ᐊᑲᐎᔾ ᑲᓱᔅᑐᐎ; ᐊᑲᐎᔾ ᐛᐱᓐ ᒋᑦ ᐊᑐᔅᒐᔭᑭᓐ ᒋ ᒋᐛᓱᐅᓂᒡ: ᔅᒋ ᐎᒋᐃᔨᓐ: ᐊᑲᐎᔾ ᓂᑭᓯ, ᐊᑲ ᑭᔭ ᐛᐱᓂ, ᐅ ᓂᐱᒪᒋᐃᑯᓯᐤ ᒋᓴᒪᓂᑐᒻ᙮

¹⁰ ᐃᔅᐱ ᓄᑕᐎᔾ ᑭᔭ ᓂᑲᐎᔾ ᐛᐱᓂᑥᐛ, ᐊᑯ ᑎᐸᔨᒋᒐᓱᐤ ᒐ ᐅᑎᓂᑦ᙮ ᐃᔅᐱ ᓄᑕᐎᔾ ᑭᔭ ᓂᑲᐎᔾ ᓂᑭᓯᑥᐛ, ᑲ ᑎᐸᔨᒋᒐᑦ ᓂᑭ ᐅᑎᓂᒄ᙮

¹¹ ᒋᔅᒋᓄᐊᒧᐎ ᒋᑦ ᐃᓯᑥᐅᓐ, ᐅ ᑎᐸᔨᒋᒐᓱᐤ, ᒋᔅᒋᓄᑕᐃ ᒪᒃ ᑯᐃᔅᒄ ᒪᔅᑭᓇᒡ, ᑲ ᐛᐧᑲᓯᒡ ᐅᒋ᙮

¹² ᐊᑲᐎᔾ ᐱᔅᑎᓂ ᒐᒋ ᐃᑐᑐᐎᒡ ᐊ ᐃᑕᔨᑕᒡ ᑲ ᐛᐧᑲᓯᒡ: ᐛᔅ ᐅᑭᑭᒋᔭᐛᑕᒋᒧᐅᒡ ᓂ ᐱᓯᑯᔅᑕᑯᒡ, ᐊᓐᒡ ᑭᔭ ᑲ ᔭᔭᑐᑕᒡ ᐊᐧᑲᑎᓯᐅᓂᔪᐤ᙮

¹³ ᓂᑭ ᒋ ᓄᑕᓯᓐ ᐃᔅᐱᔅ ᐊᑲ ᐅᒋ ᑕᑈᑎᒧᐛᐸᓇ, ᒐᒋ ᐛᐸᑎᒧᒡ ᐅᒥᔽᑎᓯᐅᓐ ᑎᐸᔨᒋᒐᓱᐤ ᐅᑦ ᐊᔅᒋᐛᒡ ᑲ ᐱᒪᑎᓯᒡ᙮

¹⁴ ᐊᓯᓄᐛᐃᐧᒄ ᑎᐸᔨᒋᒐᓱᐤ; ᓱᒋᑕᐊᒄ, ᒋᑭ ᐊᔨᒋᑕᐤ ᒪᒃ ᒋᑕᐃᔪᐛᐛ᙮ ᐊᓯᓄᐛᐃᐧᒄ ᑎᐸᔨᒋᒐᓱᐤ, ᓂᑦ ᐃᔅᒋᔄᓐ᙮