ᑎᐱᑦ ᐅᓂᑭᒧᐅᓇ 25 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒋᔾ, ᐅ ᑎᐸᔨᒋᒐᓱᐤ, ᒋᑦ ᐅᐱᓂᒪᑎᓐ ᓂᑦ ᐊᒐᐧᒄ᙮ 2 ᐅ ᓂᒋᓴᒪᓂᑐᒻ, ᒋ ᒪᒥᓯᑐᑕᑎᓐ: ᐊᑲᐎᔾ ᓇᐊᔨᒥ ᒐᒋ ᐛᐛᓇᔨᑎᒪᓐ, ᐊᑲᐎᔾ ᓇᐊᔨᒥᒡ ᑲ ᐛᐧᑲᓯᒡ ᒐᒋ ᓴᐧᑯᒋᐃᒡ᙮ 3 ᓂᐦᐃ, ᐊᑯᔅ ᐊᑲᐎᔾ ᒋᑭ ᐛᐛᓇᔨᑎᒧᒡ ᐊᓐᒡ ᑲ ᐊᓯᓄᐛᐃᔅᒡ: ᐊᑯᔅ ᒪᒃ ᒋᑭ ᐛᐛᓇᔨᑎᒧᒡ ᐊᓐᒡ ᓂᑐᐎᔾ ᑲ ᐅᓂᑐᑕᒡ᙮ 4 ᐛᐸᑎᔾ ᒋᑦ ᐃᓯᑥᐅᓇ, ᐅ ᑎᐸᔨᒋᒐᓱᐤ; ᒋᔅᒋᓄᐅᒧᐎᔾ ᒋᒪᔅᑭᓇᐛ᙮ 5 ᒋᔅᒋᓄᑕᐃᔾ ᒋᑕᑈᐅᓂᒡ ᐃᔅ, ᑭᔭ ᒋᔅᑯᑎᒧᐎᔾ: ᐛᔅ ᒋᔾ ᓂ ᐱᒪᒋᐃᐛᐤ ᓂᒋᓴᒪᓂᑐᒻ; ᒋᔾ ᒋᑦ ᐊᓯᓄᐛᐃᑎᓐ ᐃᔅᑭᓐ ᒋᓯᑲᐛ᙮ 6 ᒋᔅᒋᓯ, ᐅ ᑎᐸᔨᒋᒐᓱᐤ, ᒋ ᔪᔅᐱ ᒋᔅᑎᒪᒐᔨᒐᐅᓐ ᑭᔭ ᒋ ᓴᒋᐃᐛᐤ ᒋᓴᐛᑎᓯᐅᓐ; ᐛᔅ ᐎᐱᒡ ᐅᒋ ᒋ ᐸᒋ ᑎᑯᓇ᙮ 7 ᐊᑲᐎᔾ ᒋᔅᒋᑕ ᓂᒥᒋᑥᐅᓇ ᑲ ᐸᒋ ᐅᔅᒋᓂᒋᓱᐅᔭᓐ ᐅᒡ, ᐊᑲ ᑭᔭ ᓂᐅᓂᑐᑎᒧᐅᓇ: ᐊ ᐃᓯ ᒋᔅᑎᒪᒐᔨᒧᐛᔨᓐ ᒋᔅᒋᑐᐎᔾ ᒋᒥᔽᑎᓯᐅᓐ ᐅᒡ, ᐅ ᑎᐸᔨᒋᒐᓱᐤ᙮ 8 ᒥᔪᑥᐤ ᑭᔭ ᑯᐃᔅᑯᑐᐤ ᑎᐸᔨᒋᒐᓱᐤ: ᐊᔪᐛᒃ ᐅᒡ ᒋᑭ ᒋᔅᒋᓄᐅᒧᐛᐤ ᐅᒥᒋᑥᐛ ᒪᔅᑭᓇᒡ ᐃᔅ᙮ 9 ᐅᔪᔅᑲᑎᓯᐛ ᒋᑭ ᒋᔅᒋᓄᑕᐊᐤ ᑎᐸᔅᑯᓂᒐᐅᓂᒡ ᐃᔅ: ᐅᔪᔅᑲᑎᓯᐛ ᑭᔭ ᒋᑭ ᒋᔅᑯᑎᒧᐛᐤ ᐅᑦ ᐃᑎᓱᐛᐅᓇ᙮ 10 ᒥᓯᐛ ᐅᒪᔅᑭᓄᐛ ᑎᐸᔨᒋᒐᓱᐤ ᒋᔅᑎᒪᒐᔨᒐᐅᓄᐎᔪᐛ ᑭᔭ ᑕᑈᐅᓄᐎᔪᐛ, ᐊᓂᔭᔪᐛ ᐅᒡ ᑲ ᑭᓄᐛᔨᑎᒥᔨᒋ ᐅᓂᔅᑯᒥᑐᐅᓐ ᑭᔭ ᐅᑎᐸᒋᒧᐅᓇ᙮ 11 ᒋᑦ ᐃᓯᓂᐧᑲᓱᐅᓐ ᐅᒡ, ᐅ ᑎᐸᔨᒋᒐᓱᐤ, ᐳᓇᔨᑕ ᓂᒥᒐᑎᓯᐅᓐ; ᐛᔅ ᒥᓴᐤ᙮ 12 ᐊᐛᓐ ᐃᔪᐤ ᑲ ᓇᓂᒋᔅᑐᐛᑦ ᑎᐸᔨᒋᒐᓱᐛ ? ᐊᐅᑯᓂᐃ ᒐ ᒋᔅᒋᓄᐅᒧᐛᑦ ᒪᔅᑭᓇᔪᐤ ᒐ ᐛᐛᔭᐸᑎᒥᔨᒋ᙮ 13 ᐅᑦ ᐊᒐᒂ ᒋᑭ ᑕᔪᐛ ᒥᔽᑎᓯᐅᓂᒡ; ᐅᑦ ᐊᐛᓯᒥᓴ ᑭᔭ ᒋᑭ ᑎᐸᔨᑎᒥᔪᐛ ᐊᔅᒋᔪᐤ᙮ 14 ᐅᑲᑎᒪᒐᐅᓐ ᑎᐸᔨᒋᒐᓱᐤ ᐎᒐᐎᑯᔪᐛ ᑲ ᓇᓂᒋᔅᑕᑯᑦ; ᒋᑭ ᐛᐸᑎᔭᐤ ᒪᒃ ᐅᓂᔅᑯᒥᑐᐅᓂᔪᐤ᙮ 15 ᓂᔅᒋᓯᒂ ᐅᒋ ᒧᔅ ᓂ ᑭᓄᐛᐱᒪᐤ ᑎᐸᔨᒋᒐᓱᐤ; ᐛᔅ ᒋᑭ ᒐᑎᔭᐸᒐᓇᒻ ᓂᓯᑕ᙮ 16 ᒂᔅᒋᑲᐳᔅᑐᐎ, ᒋᔅᑎᒪᒐᔨᒥ ᒪᒃ: ᐛᔅ ᓂ ᒋᐛᔭᔨᑕᓐ ᑭᔭ ᓂ ᒪᒂᐃᑕᓐ᙮ 17 ᐊᔨᒥᓯᐅᓇ ᓂᑕᐃᒡ ᒥᓴᐛ: ᐅ ᐎᐎᐱᓯ ᓂᑭᔅᒐᔨᑎᒧᐅᓂᒡ ᐅᒡ᙮ 18 ᑭᓄᐛᐸᑕ ᓂᒥᑯᔅᑲᑕᔨᑎᒧᐅᓐ ᑭᔭ ᓂᐎᓯᒐᔨᑎᒧᐅᓐ; ᐳᓇᔨᑕ ᒪᒃ ᒥᓯᐛ ᓂᒥᒋᑐᑎᒧᐅᓇ᙮ 19 ᓇᑭᑐᐛᐱᒥᒡ ᑲ ᐛᐧᑲᓯᒡ; ᐛᔅ ᒥᒐᑐᐅᒡ; ᓂ ᐛᐧᑲᑎᑯᒡ ᒪᒃ ᐊᑯ ᐛᐧᑲᓯᐛᐅᓂᒡ᙮ 20 ᐅ ᑭᓄᐛᔨᒻ ᓂᑦ ᐊᒐᐧᒄ, ᑭᔭ ᐱᒪᒋᐃ: ᐊᑯᔅ ᐊᑲᐎᔾ ᓂᑭ ᒪᒂᐃᑕᓐ; ᐛᔅ ᒋ ᒪᒥᓯᑐᑕᑎᓐ᙮ 21 ᐊᑯᔅ ᑯᐃᔅᑯᑐᐅᓐ ᑭᔭ ᒥᔪᐃᑐᐅᓐ ᓂᑭ ᑭᓄᐛᔨᒥᑯᓐ; ᐛᔅ ᒋᑦ ᐊᔅᐸᔨᒧᑐᑕᑎᓐ᙮ 22 ᐱᒪᒋ ᐃᔅᕋᐃᓪ, ᐅ ᒋᓴᒪᓂᑐᐤ, ᒥᓯᐛ ᐅᑦ ᐊᔨᒥᓯᐅᓂᒡ ᐅᒡ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.