ᑎᐱᑦ ᐅᓂᑭᒧᐅᓇ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 2 (Transfiguration Year A)

¹ ᒐᒂᔪᐤ ᐛᒋ ᐊᐧᑯᔪᐛᓯᒡ ᐊᑲ ᐊᔭᒥᐊᒡ: ᑭᔭ ᒐᒂᔪᐤ ᐛᒋ ᓂᑐᐎᔾ ᒐᒂᔪᐤ ᒪᒥᑐᓇᔨᑕᒥᐃᑯᒡ ᐃᔪᒡ ?

² ᒋᓴᐅᒋᒪᐅᒡ ᐊᔅᒋᒡ ᐊᔨᒋᑲᐳᐎᐃᑐᐅᒡ, ᑭᔭ ᐅᑎᐸᔨᒋᒐᐅᒡ ᓯᒋᒥᑐᐅᒡ ᐊ ᐎ ᓂᔅᑯᔅᑐᐛᒡ ᑎᐸᔨᒋᒐᓱᐛ, ᑭᔭ ᐅᑦ ᐊᐱᒋᐊᑭᓂᔪᐛ ᐊ ᐃᔅᒋᔄᒡ,

³ “ᐊᑯᔅ ᐱᑯᐱᑎᒺᑕᐤ ᐅᒪᒋᒂᐱᔅᑲᐃᑭᓄᐛᐛ, ᑭᔭ ᐛᐱᓂᒺᑕᐤ ᐅᒪᐧᑯᐱᒋᑭᓇᔭᐱᐛᐛ᙮”

⁴ ᐊᓐ ᑲ ᐊᐱᑦ ᒋᒋᒋᓯᑯᒡ ᒋᑭ ᐸᐳᐤ: ᑎᐸᔨᒋᒐᓱᐤ ᒋᑭ ᐅᓯᓄᐛᐤ᙮

⁵ ᐊᑯ ᒐ ᐃᔨᒪᐊᑦ ᐊᐧᑯᔪᐛᓯᑦ, ᑭᔭ ᒋᑭ ᒥᑯᔅᑲᒋᐊᐤ ᐅᑦ ᐊᐧᑯᐎᔭᔅᑕᔨᑎᒧᐅᓂᒡ:

⁶ “ᐃᔭᐱᒡ ᒪᒃ ᓂᒋ ᑕᑕᔭᐤ ᓂᒋᓴᐅᒋᒪᒻ ᓂ ᐸᔭᒋ ᐱᔅᑯᑎᓇᒥᒡ ᓴᐃᔭᓂᒡ᙮”

⁷ ᓂᑭ ᐎᑕᓐ ᐃᑎᓱᐛᐅᓐ: “ᑎᐸᔨᒋᒐᓱᐤ ᓂᒋ ᐃᑎᒄ, ᒋᔾ ᓂᑯᔅ; ᐊᓄᒡ ᑲᓯᑲᒡ ᔅᒋ ᓂᑕᐅᒋᐃᑎᓐ᙮

⁸ ᓂᑐᑎᒧᐎ, ᐊᑯ ᒐ ᒥᔨᑕᓐ ᐊᑲ ᐊᔭᒥᐊᒡ ᒐᒋ ᑎᐱᔨᐛᐅᓯᔨᓐ, ᑭᔭ ᐊ ᐃᔎᔅᑭᒥᑲᒡ ᒐᒋ ᑎᐸᔨᑎᒥᓐ᙮

⁹ ᒋᑭ ᐱᒂᐛᐅᒡ ᐃᔨᓴᒄ ᐱᓯᔅᑕᐃᑭᓂᔪᐤ ᐅᒡ; ᒋᑭ ᐱᐱᓴᐛᐅᒡ ᒧᔭᒻ ᐊᓯᔅᒋᔾ ᐎᔭᑭᓂᒐᐤ ᐎᔭᑭᓂᔪᐤ᙮”

¹⁰ ᐊᐅᒄ ᐅᒡ ᑭᒐᑕᐛᔨᑎᒧᒄ, ᐅ ᒋᔨᐛᐤ ᒋᓴᐅᒋᒪᑐᒄ: ᒋᔅᒋᓄᐊᒪᑯᓯᒄ, ᒋᔨᐛᐤ ᑲ ᑎᐸᔅᑯᓂᒐᔭᒄ ᐊᔅᒋᒡ᙮

¹¹ ᐊᑐᔅᒐᔅᑐᐎᐧᒄ ᑎᐸᔨᒋᒐᓱᐤ ᐊ ᓇᓂᒋᔭᒄ, ᒥᔽᔨᑎᒧᒄ ᒪᒃ ᐊ ᓴᒋᓯᔭᒄ᙮

¹² ᓱᐛᔨᒥᐧᒄ ᐅᑯᓯᓯᒪᐤ, ᒐ ᐊᑲ ᒋ ᒋᔄᓯᑦ, ᒐ ᐊᑲ ᒋ ᓂᓱᐅᓇᑎᓯᔭᒄ ᒪᔅᑭᓇᒡ ᐅᒡ, ᐃᔅᐱ ᐊᐱᓯᔅ ᒥᒄ ᐊᐧᑯᔪᐛᓯᑦ᙮ ᓱᐛᔨᑕᑯᓱᐅᒡ ᒥᓯᐛ ᐊᓐᒡ ᑲ ᒪᒥᓯᑐᑐᐛᒡ᙮