ᑎᐱᑦ ᐅᓂᑭᒧᐅᓇ 17 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᑐᑕ ᑲ ᑯᐃᔎᒡ, ᑎᐸᔨᒋᒐᓱᐤ; ᐱᓯᒋᑕ ᓂᑕᑈᐅᓐ; ᐸᑕ ᓂᑦ ᐊᔭᒥᐊᐅᓐ, ᐊᑲ ᑭᑭᒋᔭᐎ ᒥᑐᓂᒡ ᑲ ᐅᒋ ᐎᐎᐱᔨᒡ᙮ 2 ᐊᑯᔅ ᓂ ᑎᐸᔅᑯᓂᑯᓯᐅᓐ ᐊ ᐸᑕᔅᑎᒥᐱᔨᓐ ᒋᑭ ᐸᒋ ᐅᒋᐱᔪᐤ; ᐊᑯᔅ ᑭᓄᐛᐸᑕ ᑕᐱᔅᑯᓐ ᑲ ᐃᑕᔨᑕᒂᒋ᙮ 3 ᔅᒋ ᑯᒂᒋᑕᓐ ᓂᑕᐃ; ᔅᒋ ᓇᓯᓐ ᒪᒂᒡ ᐊ ᑎᐱᔅᑲᒡ; ᔅᒋ ᑯᒂᒋᐃᓐ, ᓇᒪ ᒐᒂᓐ ᒪᒃ ᒋᑭ ᒥᔅᑲᓐ: ᓂ ᒐᔅᒋᓇᔭᔨᑕᓐ ᓂᑐᓐ ᒐ ᐊᑲ ᒋ ᒥᒋ ᐊᔨᒥᒥᑲᒡ᙮ 4 ᐅᑦ ᐊᑐᔅᒐᐅᓄᐛᐛ ᐃᔪᒡ ᐅᒋ, ᒋᑦ ᐃᔨᒧᐅᓇ ᒋᑐᓂᒡ, ᓂᒋ ᐅᒋ ᑭᓄᐛᔨᒥᓱᓐ ᐅᒪᔅᑭᓇᒡ ᐅᒋ ᐅᓂᓱᐅᓇᒋᐃᐛᐤ᙮ 5 ᒥᒋᒥᓇ ᓂᐱᒧᑕᐅᓇ ᒋᒪᔅᑭᓇᒡ, ᒐ ᐊᑲ ᒋ ᒋᐃᓯᓂᔭᓐ᙮ 6 ᔅᒋ ᓇᑐᒥᑎᓐ; ᐛᔅ ᒋᑭ ᐸᑐᐅᓐ, ᐅ ᒋᓴᒪᓂᑐᐤ: ᓂᑐᑐᐎ, ᑭᔭ ᐱᓯᒋᑕ ᑲ ᐃᔅᒋᔄᔭᓐ᙮ 7 ᐛᐸᑎᔨᐛ ᒋᒪᒥᔅᑲᒋ-ᓴᒋᐃᐛᐎ ᒋᓴᐛᑎᓯᐅᓐ, ᐅ ᒋᔾ ᒋᒥᔪᐅᓂᒡ ᑲ ᐅᒋ ᐱᒪᒋᐃᑥᐤ ᐊᓐᒡ ᑲ ᒪᒥᓯᑐᑕᔅᒡ ᐊᓂᔭ ᐅᒋ ᑲ ᐸᓯᑯᔅᑕᑯᒡ᙮ 8 ᑭᓄᐛᔨᒥ ᒧᔭᒻ ᑕᑐᐎᒡ ᒥᔅᒋᓯᑯᒡ, ᑲᔨ ᐊ ᐊᑯᓇᐎᓐ ᒋᒥᑯᓇ, 9 ᐅᒥᒋᑥᐅᒡ ᐅᒋ ᑲ ᐊᔨᒥᐃᒡ, ᐊᓐᒡ ᓂᐳᐅᓂᒡ ᑲ ᐃᓯ ᐛᐧᑲᓯᒡ ᐅᒡ, ᑲ ᐛᔅᑲᔅᑯᐎᒡ᙮ 10 ᐱᒋᐱᔪᐛᒡ ᑎᐱᔽ ᐅᐎᔨᔪᓄᐛᒡ: ᐅᑐᓄᐛᒡ ᐅᒋ ᑲᒋᒋᒧᐛᒡ᙮ 11 ᐊᓄᒡ ᓂᒋ ᐛᔅᑲᔅᑲᑯᓇᓐᒡ ᐊ ᑕᑕᑯᔅᒐᐅᒋᒡ: ᒋ ᐎᔨᑯᑕᐅᒡ ᐅᔅᒋᓯᑯᐛᐛ ᐊᓇᒡ ᒧᔅᑎᔅᑭᒥᒡ ᐊ ᐃᑕᐱᒡ᙮ 12 ᒧᔭᒻ ᒥᓯᐱᓱᐤ ᑲ ᐅᐧᑲᓯᑦ ᐅᒪᔅᑲᑥᐅᓐ, ᑭᔭ ᒧᔭᒻ ᒥᓯᐱᓯᔅ ᑲ ᐃᓯ ᔅᑲᒪᒐᑦ ᐊᓐᑕ ᐊ ᐊᑯᐛᐤ᙮ 13 ᐱᓯᑯᐤ, ᐅ ᑎᐸᔨᒋᒐᓱᐤ, ᒪᓯᐧᑯᐤ, ᓂᒋᐛᐱᓐ: ᐎᐧᑯᒋ ᓂᑦ ᐊᒐᐧᒄ ᐅᒪᒋᑥᐅᒡ ᐅᒡ, ᑲ ᐅᓯᒪᑭᓂᒥᔭᓐ: 14 ᐃᔪᒡ ᐅᒋ ᑲ ᐅᑎᒋᔨᓐ, ᐅ ᑎᐸᔨᒋᒐᓱᐤ, ᐊᔅᒋᐤ ᐃᔪᒡ ᐅᒡ, ᑲ ᒪᑎᓂᒧᐛᑭᓄᔨᒋ ᒪᒂᒡ ᐊᓄᒡ ᐊ ᐱᒪᑎᓯᓇᓄᐎᒡ, ᑭᔭ ᐅᔅᑭᑎᔭ ᑲ ᓴᑭᔅᒋᓂᑕᐅᑦ ᒋ ᒋᒧᒡ ᐛᔪᑎᓯᐅᓇ; ᓴᑭᔅᒋᓇᔅᑲᑯᐅᒡ ᐊᐛᓴ, ᑭᔭ ᑲ ᐃᔅᑯᐱᔨᒋ ᐅᑦ ᐊᔭᓄᐛᐛ ᓂᑭᑎᒧᐛᐅᒡ ᐅᑦ ᐊᐛᓯᒥᓱᐛᐛ᙮ 15 ᓂᔾ ᒪᒃ, ᓂᑭ ᑭᓄᐛᐸᑕᓐ ᒋᑕᔅᑎᒥᐧᒄ ᑯᐃᔅᑯᑕᑎᓯᐅᓂᒡ: ᓂᑭ ᑕᐱᒐᔨᑕᓐ ᐸᑯᐱᔭᓇ ᒐᒋ ᐃᓯᓇᑯᓯᔭᓐ ᐊ ᐃᓯᓇᑯᓯᔨᓐ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.