ᑎᐱᑦ ᐅᓂᑭᒧᐅᓇ 148 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 148 (Christmas-1 Year A, B, C; Easter-5 Year C)

¹ ᒪᒥᒋᒥᐧᒄ ᑎᐸᔨᒋᒐᓱᐤ ! ᒪᒥᒋᒥᐧᒄ ᑎᐸᔨᒋᒐᓱᐤ ᒋᓯᑯᒡ ᐅᒡ: ᒪᒥᒋᒥᐧᒄ ᐃᔅᐱᒥᒡ᙮

² ᒪᒥᒋᒥᐧᒄ, ᒥᓯᐛ ᒋᔨᐛᐤ ᐅᑦ ᐊᓐᒋᓂᒪ: ᒪᒥᒋᒥᐧᒄ ᒥᓯᐛ ᒋᔨᐛᐤ ᐅᒪᐅᒋᐃᑐᒪ᙮

³ ᒪᒥᒋᒥᐧᒄ, ᒋᔨᐛᐤ ᐱᓯᒻ ᑭᔭ ᑎᐱᔅᑲᐤ ᐱᓯᒻ: ᒪᒥᒋᒥᐧᒄ ᒥᓯᐛ ᒋᔨᐛᐤ ᑲ ᐛᓯᓱᔭᒄ ᐅᒐᑭᑕᐧᑯᒡ᙮

⁴ ᒪᒥᒋᒥᐧᒄ, ᒋᔨᐛᐤ ᒋᒋᒋᓯᑯᑐᒄ, ᑭᔭ ᒋᔨᐛᐤ ᓂᐱᔭ ᑲ ᐸᔅᒋᐱᔨᒋ ᒋᓯᑯᒡ᙮

⁵ ᐊᑯᔅ ᒋᑭ ᒪᒥᒋᑕᒺᐅᒡ ᑎᐸᔨᒋᒐᓱᐛ ᐅᑦ ᐃᓯᓂᐧᑲᓱᐅᓂᔪᐤ: ᐛᔅ ᒋ ᐃᑎᓱᐛᐤ, ᐊᑯ ᑲ ᐅᓯᐊᑭᓄᐅᒡ᙮

⁶ ᑭᔭ ᒋ ᒥᔅᑯᐅᔅᑕᐤ ᑲᒋᒡ ᑭᔭ ᑲᒋᒡ: ᒋ ᐎᔨᓱᐛᐤ ᒐ ᐊᑲ ᐎᒪᔅᑲᒐᐱᔨᔨᒋ᙮

⁷ ᒪᒥᒋᒥᐧᒄ ᑎᐸᔨᒋᒐᓱᐤ ᐊᔅᒋᒡ ᐅᒋ, ᒋᔨᐛᐤ ᒥᓯᒋᓇᐱᑯᑐᒄ, ᑭᔭ ᒥᓯᐛ ᒋᔅᑲᔨᐛᑐᒄ;

⁸ ᐃᔅᑯᑕᐤ, ᑭᔭ ᐊ ᒂᑯᑲᐛᑕᒡ, ᑯᓐ ᑭᔭ ᐊ ᓂᐱᐛᐱᑕᒡ; ᐊ ᔪᑎᒡ ᐊ ᑎᐱᐸᔨᑕᒧᒥᑭᓂᔨᒡ ᐅᑦ ᐃᔨᒧᐅᓐ;

⁹ ᐱᔅᑯᑎᓇᐛ, ᑭᔭ ᒥᓯᐛ ᐱᔅᑯᑎᓇᓴ; ᑲ ᒥᓂᓯᐅᒡ ᒥᔅᑎᑯᒡ, ᑭᔭ ᒥᓯᐛ ᒪᔅᒋᔅᑲᑎᑯᒡ;

¹⁰ ᐊᐛᓯᓯᒡ ᓂᑐᐎᔾ ᑲ ᐱᐸᒥᐸᑕᒡ ᑭᔭ ᑲ ᑭᓄᐛᔨᒪᑭᓄᐅᒡ; ᑲᐱᒥᑕᒋᒧᒡ, ᑭᔭ ᑲ ᐱᐸᒥᔭᒡ ᐱᔭᓱᐅᒡ;

¹¹ ᒋᓴᐅᒋᒪᐅᒡ ᐊᔅᒋᒡ, ᑭᔭ ᒥᓯᐛ ᐃᔪᒡ; ᒋᓴᐅᒋᒪᓯᒡ, ᑭᔭ ᒥᓯᐛ ᐅᑎᐸᔅᑯᓂᒐᐅᒡ ᐊᔅᒋᒡ;

¹² ᒪᒧᐤ ᐅᔅᒋᓂᒋᓱᐅᒡ, ᑭᔭ ᐅᔅᒋᓂᒋᔎᐅᒡ; ᒋᓴᐃᔪᒡ, ᑭᔭ ᐊᐛᓯᒡ᙮

¹³ ᐊᑯᔅ ᒋᑭ ᒪᒥᒋᑕᒺᐅᒡ ᑎᐸᔨᒋᒐᓱᐛ ᐅᑦ ᐃᓯᓂᐧᑲᓱᐅᓂᔪᐤ: ᐛᔅ ᐎᔾ ᐅᑦ ᐃᓯᓂᐧᑲᓱᐅᓐ ᒥᒄ ᐃᔅᐸᔨᑕᒂᓂᔪᐤ; ᐅᒋᔅᑕᔨᑕᑯᓱᐅᓐ ᐊᔪᐛᒋᔅᑲᒧᒪᑭᓂᔪᐤ ᐊᔅᒋᔪᐤ ᑭᔭ ᒋᓯᑯᔪᐤ᙮

¹⁴ ᐊᓯᒡ ᑭᔭ ᐃᔅᐸᔨᑕᑯᐃᒪᐤ ᐅᑦ ᐊᔅᑲᓂᔨᐛ ᐅᑦ ᐃᔨᒪ, ᐅᒪᒪᑕᑯᒥᑯᓯᐅᓂᔪᐤ ᒥᓯᐛ ᐅᐸᔭᒋᓯᒪ; ᐃᔅᕋᐃᓪ ᐅᑦ ᐃᔨᒪ ᐅᑦ, ᐃᔪᐛ ᑲ ᐸᔄᐱᒥᑯᑦ᙮ ᒪᒥᒋᒥᐧᒄ ᑎᐸᔨᒋᒐᓱᐤ !