ᑎᐱᑦ ᐅᓂᑭᒧᐅᓇ 146 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 146 (Proper-18, Proper-27 Year B; Proper-21 Year C)

¹ ᒪᒥᒋᒥᐧᒄ ᑎᐸᔨᒋᒐᓱᐤ ! ᒪᒥᒋᒻ ᑎᐸᔨᒋᒐᓱᐤ ᐅ ᓂᑦ ᐊᒐᐧᒄ᙮

² ᒥᒄ ᒐ ᐃᔅᐱᔅ ᐱᒪᑎᓯᔭᓐ ᓂᑭ ᒪᒥᒋᒪᐤ ᑎᐸᔨᒋᒐᓱᐤ, ᐊ ᓂᑭᒧᔭᓐ ᓂᑭ ᒪᒥᒋᒪᐤ ᓂᒋᓴᒪᓂᑐᒻ ᒥᒄ ᒐ ᐃᔅᐱᔅ ᐊᔭᔭᓐ ᓂᐱᒪᑎᓯᐅᓐ᙮

³ ᐊᑲᐎᔾ ᒪᒥᓯᑐᑕᐧᑯᒡ ᐅᒋᒪᐅᒡ, ᐊᑲ ᑭᔭ ᐃᔪᐤ ᐅᑯᓯᓴᓐ, ᐊᑲ ᐅᐎᒋᐃᑯᓯᐅᓂᒡ᙮

⁴ ᐅᔭᔭᐅᓐ ᐎᐎᐱᔪᐤ, ᐅᑦ ᐊᓯᔅᒋᒡ ᐃᓯ ᒋᐛᐤ; ᐊᔪᐅᒄ ᐊᓂᔭᔪᐤ ᐊ ᒋᓯᑲᔨᒡ ᒪᒃ ᐅᑦ ᐃᑕᔨᑎᒧᐅᓇ ᓂᓱᐅᓇᑎᓂᔪᐛ᙮

⁵ ᒥᔽᔨᒧᐤ ᐊᓐ ᑲ ᐎᒋᐃᑯᑦ ᒐᑭᐸ ᐅᒋᓴᒪᓂᑐᒥᔪᐛ, ᑲ ᐊᔅᐸᔨᒧᑐᑐᐛᑦ ᑲ ᑎᐸᔨᒋᒐᔨᒋ ᐅᒋᓴᒪᓂᑐᒪ;

⁶ ᑲ ᐅᓯᑕᑦ ᒋᒋᒋᓯᑯᔪᐤ ᑭᔭ ᐊᔅᒋᔪᐤ, ᐎᓂᐸᑯᔪᐤ ᑭᔭ ᒥᓯᐛ ᐊᓐᑕ ᐊ ᑎᒂᓂᔨᒡ: ᑲ ᑭᓄᐛᔨᑕᐧᒃ ᑕᑈᐅᓂᔪᐤ ᑲᒋᒡ;

⁷ ᐊ ᐃᓯ ᐎᔨᓱᐛᔨᑕᑯᓂᔨᒡ ᑲ ᐃᑐᑎᒧᐛᑦ ᑲ ᐊᔨᒥᐅᔨᒋ; ᑲ ᐊᓴᒪᑦ ᑲ ᓄᑕᐧᑭᑕᔨᒋ᙮ ᑎᐸᔨᒋᒐᓱᐤ, ᓴᓂᒧᐛᐤ ᑲᒋᐸᐛᑭᓄᐎᒋ:

⁸ ᑎᐸᔨᒋᒐᓱᐤ ᑐᑐᐛᐤ ᒐᒋ ᐛᐸᑎᒥᔨᒋ ᐊᑲ ᐛᐸᑎᒥᔨᒋ: ᑎᐸᔨᒋᒐᓱᐤ ᐱᓯᑯᓇᐤ ᐊᓂᔭᔪᐛ ᑲ ᒪᒥᓴᒪᔨᑎᒥᔨᒋ: ᑎᐸᔨᒋᒐᓱᐤ ᓴᒋᐊᐤ ᐅᑯᐃᔅᑯᑕᑎᓯᐛ:

⁹ ᑎᐸᔨᒋᒐᓱᐤ ᑭᓄᐛᔨᒪᐤ ᒪᓐᑕᐛ: ᓇᑎᒧᐛᐤ ᒋᐅᓴᓂᓴ ᑭᔭ ᐃᔎᐛ ᑲ ᓂᐱᔨᒋ ᐅᓇᐸᒥᔪᐛ: ᒪᒃ ᐅᒪᔅᑭᓇᔪᐤ ᐅᒥᒋᑥᐛ ᒂᑎᐱᐱᑎᒺᐤ᙮

¹⁰ ᑎᐸᔨᒋᒐᓱᐤ ᑲᒋᒡ ᒋᑭ ᑎᐸᔨᒋᒐᐤ, ᒋᒋᓴᒪᓂᑐᒻ, ᐅ ᓴᐃᔭᓐ, ᒥᓯᐛ ᒐ ᐊᑎ ᐊᓂᔅᒐ ᐱᒪᑎᓯᓇᓄᐅᒡ᙮ ᒪᒥᒋᒥᐧᒄ ᑎᐸᔨᒋᒐᓱᐤ !