ᑎᐱᑦ ᐅᓂᑭᒧᐅᓇ 143 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᓂᑐᑕ ᓂᑦ ᐊᔭᒥᐊᐅᓐ, ᐅ ᑕᐸᔨᒋᒐᔨᓐ, ᐱᓯᒋᑕ ᓂᓂᑐᑎᒪᒐᐅᓇ: ᒋᑯᐃᔅᑯᑐᐅᓂᒡ ᓂᔅᑯᒥ, ᑭᔭ ᒋᑯᐃᔅᑯᑕᑎᓯᐅᓂᒡ᙮ 2 ᐊᑲᐎᔾ ᑭᔭ ᑎᐸᔅᑯᓐ ᒋᑦ ᐊᑐᔅᒐᔭᑭᓐ; ᐛᔅ ᐊᐸᑕᔅᑎᒥᐱᔨᓐ ᓇᒪᐎᔾ ᐊᐛᓐ ᐊ ᐱᒪᑎᓯᑦ ᒋᑭ ᒥᔪᑥᐛᔨᒪᑭᓄᐤ᙮ 3 ᐛᔅ ᑲ ᐛᐧᑲᓯᒡ ᒋ ᓂᓇᐧᑲᒋᐊᐅᒡ ᓂᑦ ᐊᒐᒂ: ᒧᔅᑎᔅᑭᒥᒡ ᒋ ᐃᓯ ᓂᓯᐛᐸᐊᒻ ᓂᐱᒪᑎᓯᐅᓂᔪᐤ: ᓂᒋ ᐃᑐᑕᐧᒃ ᒐᒋ ᑕᔭᓐ ᐊᓐᑕ ᐊ ᐅᓂᑎᐱᔅᑲᔨᒡ, ᒧᔭᒻ ᐊᓐᒡ ᓇᐅᔅ ᑲᒋ ᓂᐱᒡ᙮ 4 ᐊᐅᒄ ᐅᒋ ᓂᑦ ᐊᒐᐧᒄ ᐛᓴᒪᔨᑎᒻ ᑕᒥᔪᐤ ᓂᔭᒡ: ᓂᑕᐃ ᐊ ᐱᒋᔅᑲᑯᔭᓐ ᐱᔅᓯᒂᐤ᙮ 5 ᓂ ᒋᔅᒋᓐ ᐎᐱᒡ ᒋᓯᑲᐛ; ᓂ ᒪᒥᑐᓇᔨᑕᓐ ᒥᓯᐛ ᒋᑦ ᐊᑐᔅᒐᐅᓇ; ᓂ ᓇᑭᑐᐛᔨᑕᓐ ᒋᑎᒋᒡ ᑲᒋ ᐅᒋ ᐅᓯᑕᔨᓐ᙮ 6 ᒋ ᓱᓂᔅᒐᔨᔅᑕᑎᓐ; ᓂᑦ ᐊᒐᐧᒄ ᒋ ᓄᑕᔭᐸᒂᑐᑕᒃ, ᒧᔭᒻ ᑲ ᓄᑕᔭᐸᒂᒥᑭᒡ ᐊᔅᒋᔾ᙮ 7 ᒋᐱᔾ ᓂᑐᑐᐎ, ᐅ ᑎᐸᔨᒋᒐᓱᐤ: ᓂᑦ ᐊᒐᐧᒄ ᓄᑕᓯᓐ: ᐊᑲᐎᔾ ᑲᓱᔅᑐᐎᔾ; ᒐ ᐊᑲ ᒋ ᓂᔅᐱᑐᐛᒡ ᐊᓐᒡ ᑲ ᓂᑕᑐᐎᒡ ᐛᑎᑯᓂᒡ᙮ 8 ᑐᑐᐎ ᒐᒋ ᐸᑎᒪᓐ ᒋᓴᒋᐃᐛᐤ ᒋᓴᐛᑎᓯᐅᓐ ᒋᔭᒋᓴᐸᔭᒋ; ᐛᔅ ᒋᔾ ᒋ ᒪᒥᓯᑐᑕᑎᓐ; ᒋᔅᒐᔨᑎᒥᐃ ᐊᓐᑕ ᒐ ᐱᒧᑕᔭᓐ; ᐛᔅ ᒋᑦ ᐅᐱᓇᒪᑎᓐ ᓂᑦ ᐊᒐᐧᒄ᙮ 9 ᐎᐧᑯᒋᐃ, ᐅ ᑎᐸᔨᒋᒐᓱᐤ, ᑲ ᐛᐧᑲᓯᒡ ᐅᒡ: ᒋ ᓇᑎᓯᒧᔅᑕᑎᓐ ᒐᒋ ᑲᔨᔨᓐ᙮ 10 ᒋᔅᑯᑎᒧᐎ ᒐᒋ ᐃᑐᑎᒪᓐ ᒋᑦ ᐃᑕᔨᑎᒧᐅᓐ; ᐛᔅ ᒋᔾ ᓂᒋᓴᒪᓂᑐᒻ: ᒋᑦ ᐊᒐᐧᒄ ᒥᔽᑎᓯᐤ, ᐃᑐᑕᐃ ᑯᐃᔅᑯᑐᐤ ᐊᔅᒋᒡ᙮ 11 ᒋᓯᐎᓯᐃ, ᐅ ᑎᐸᔨᒋᒐᓱᐤ, ᒋᑦ ᐃᓯᓂᐧᑲᓱᐅᓐ ᐅᒡ: ᒋᑯᐃᔅᑯᑕᑎᓯᐅᓐ ᐅᒋ ᐎᐎᐱᔅ ᓂᑦ ᐊᒐᐧᒄ ᐊᔨᒥᓯᐅᓂᒡ ᐅᒡ᙮ 12 ᑭᔭ ᒋᓱᐛᔨᒋᒐᐅᓂᒡ ᒋᒥᓱᒡ ᑲ ᐛᐧᑲᓯᒡ, ᓂᓱᐅᓇᒋᐃᒡ ᒪᒃ ᒥᓯᐛ ᐊᓐᒡ ᑲ ᓇᓇᐧᑲᒋᐊᒡ ᓂᑦ ᐊᒐᒂ; ᐛᔅ ᒋᑦ ᐅᑦ ᐊᑐᔅᒐᔭᑭᓂᒥᑐᐅᓐ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.