ᑎᐱᑦ ᐅᓂᑭᒧᐅᓇ 132 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᑎᐸᔨᒋᒐᓱᐤ, ᒋᔅᒋᑐᐤ ᑎᐱᑦ, ᑭᔭ ᒥᓯᐛ ᐅᒪᒂᔨᑎᒧᐅᓇ᙮

² ᑲᒋ ᐃᓯ ᒋᒋ ᐃᑕᑦ ᑎᐸᔨᒋᒐᓱᐛ, ᑭᔭ ᐊᒋ ᓇᔅᑯᒥᒪᑦ ᑲ ᓱᐧᑲᑎᓯᔨᒋ ᐅᒋᓴᒪᓂᑐᒥᔪᐛ ᒐᑭᐸ:

³ “ᒐᔅᑎᓇᔅ ᓇᒪᐎᔾ ᓂᑭ ᐱᒐᓐ ᐊ ᒥᒋᐛᐳᐅᒡ ᓂᒡ, ᓇᒪ ᑭᔭ ᓂᓂᐸᐅᓂᒡ ᓂᑭ ᐃᑐᑕᓐ;

⁴ ᓇᒪᐎᔾ ᓂᑭ ᓂᐸᒪᑕᓐ ᓂᔅᒋᓯᒂ, ᓇᒪ ᑭᔭ ᓂᑭ ᓯᐸᔭᔨᑕᓐ;

⁵ ᐸᑎᒪ ᒋ ᒥᔅᑭᒪᓇ ᐊᓐᑕ ᒐ ᑕᑦ ᑎᐸᔨᒋᒐᓱᐤ, ᐊᓐᑕ ᒐ ᑕᔨᒋ ᑲ ᓱᐧᑲᑎᓯᔨᒋ ᐅᒋᓴᒪᓂᑐᒪ ᐃᔅᕋᐃᓪ᙮”

⁶ ᐛᐸᑎᒥᒄ, ᓂᒋ ᐸᑕᓇᓐ ᐊᑉᕋᑕᐃᒡ; ᓂᒋ ᒥᔅᑲᓇᓐ ᑕᐧᑯᑕᒥᑎᓐ᙮

⁷ “ᓂᑭ ᐱᑐᒐᐛᓇᓐ ᐅᒥᒋᐛᐱᒥᒡ; ᓂᑭ ᐊᔭᒥᐊᔅᑎᒺᓇᓐ ᐅᑕᐧᑯᔅᑲᒋᑭᓐ᙮

⁸ ᐱᓯᑯᐤ, ᐅᑎᐸᔨᒋᒐᓱᐤ, ᒋᑦ ᐊᔽᐳᐅᓂᒡ; ᒋᔾ ᑭᔭ ᒋ ᒥᔅᑯᐅᓯᐅᓐ ᐅᑦ ᐊᕐᑯᒻ᙮

⁹ ᐊᑯᔅ ᒋᐱᔅᑎᓂᒐᐅ-ᐃᔨᒥᒡ ᒋᑭ ᐎᔭᑎᒧᒡ ᑯᐃᔅᑯᑕᑎᓯᐅᓂᔪᐤ; ᑭᔭ ᒋᐸᔭᒋᓯᒥᒡ ᒋᑭ ᒋᔄᐛᐅᒡ ᐊᑕᑈᒡ ᐊ ᒧᒋᒐᔨᑕᒡ᙮”

¹⁰ ᒋᑦ ᐊᑐᔅᒐᔭᑭᓐ ᑎᐱᑦ ᐅᒡ, ᐊᑲᐎᔾ ᒂᔅᒋᓂᒻ ᐅᑕᔅᑎᒥᐧᒄ ᒋᑦ ᐊᐱᒋᐊᑭᓐ᙮

¹¹ ᑎᐸᔨᒋᒐᓱᐤ ᒋ ᒋᒋ ᐃᑕᐤ ᑕᑈᐅᓂᒡ ᑎᐱᑕ; ᓇᒪᐎᔾ ᒋᑭ ᒂᔅᒐᔨᑎᒻ; “ᒋᔭᒡ ᒐ ᐅᒋᐱᔨᒡ ᓂᑭ ᐅᐛᔨᐱᐊᐤ ᒋᒋᓴᐅᒋᒪᐤ ᑕᑎᐳᐛᑭᓂᒡ᙮

¹² ᐃᔅᐱᔅ ᒋᑦ ᐊᐛᓯᒥᓯᒡ ᑭᓄᐛᔨᑕᒂᐛ ᓂᓂᔅᑯᒥᑐᐅᓂᔪᐤ, ᑭᔭ ᓂᑎᐸᒋᒧᐅᓂᔪᐤ ᒐ ᒋᔅᑯᑎᒧᐅᒂᐤ; ᐅᑦ ᐊᐛᓯᒧᐛᐛ ᐊᓯᒡ ᒋᑭ ᐊᐱᔪᐛ ᒋᒋᓴᐅᒋᒪᐅ-ᑕᑎᐳᐛᑭᓂᒡ ᑲᒋᒡ᙮”

¹³ ᐛᔅ ᑎᐸᔨᒋᒐᓱᐤ ᒋ ᐅᐛᔭᐸᑎᒻ ᓴᐃᔭᓂᔪᐤ: ᒋ ᓂᑐᐛᔨᑎᒻ ᐊᓐᑕ ᒐᒋ ᐎᒋᑦ᙮

¹⁴ “ᐊᐅᒄ ᐅ ᓂᑦ ᐊᔽᐳᐅᓐ ᒧᓯᓇᐤ: ᐅᑕ ᓂᑭ ᑕᓐ; ᐛᔅ ᓂ ᓂᑐᐛᔨᑕᓐ᙮

¹⁵ ᒥᔅᑎᐃ ᓂᑭ ᒥᔽᒋᑎᒺᓐ ᐅᒥᒋᒻ: ᓂᑭ ᒋᔅᐳᐃᒪᐛ ᐅᒋᔅᑎᒪᒋᓯᒪ ᐸᒂᓯᑭᓇ ᐅᒡ᙮

¹⁶ ᑭᔭ ᐱᒪᒋᐃᐛᐅᓂᔪᐤ ᓂᑭ ᒋᔅᑭᒧᑎᔨᒪᐛ ᐅᐱᔅᑎᓂᒐᐅ-ᐃᔨᒪ: ᑭᔭ ᐅᐸᔭᒋᓯᒪ ᒋᑭ ᒋᔄᐛᔪᐛ ᐊᑕᑈᔨᒋ ᐊ ᒧᒋᒐᔨᑎᒥᔨᒋ᙮

¹⁷ ᐊᑯᑕ ᒐ ᐃᑐᑎᒪᓐ ᐅᑦ ᐊᔅᑭᓐ ᑎᐱᑦ ᒐᒋ ᓴᒋᓂᑕᐅᒋᓂᔨᒡ: ᓂᑭ ᐎᔨᔅᑎᒧᐛᐤ ᐛᔅᑕᓂᐱᒪᑭᓂᔪᐤ ᓂᑐᒥᔅᑯᓂᑭᓐ᙮

¹⁸ ᐊᓂᔭ ᑲ ᐛᐧᑲᑎᑯᑦ ᓂᑭ ᒋᔅᑲᒧᑎᔨᒪᐛ ᓴᒂᔨᒧᐅᓂᔪᐤ; ᒪᒃ ᐎᔾ ᐅᔅᑎᒂᓂᒡ ᐅᒋᓴᐅᒋᒪᐅᑯᓂᔎᐅᓐ ᒋᑭ ᒥᔪᓇᑯᓂᔪᐤ᙮”