ᑎᐱᑦ ᐅᓂᑭᒧᐅᓇ 111 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

Psalm 111 (Epiphany-4 Year B; Proper-23 Year C)

¹ ᒪᒥᒋᒥᐧᒄ ᑎᐸᔨᒋᒐᓱᐤ ! ᓂᑭ ᒪᒥᒋᒪᐤ ᑎᐸᔨᒋᒐᓱᐤ ᒥᓯᐛ ᓂᑕᐃᒡ, ᐊᓐᑕ ᐊ ᒪᒧᐎᒡ ᑲ ᑯᐃᔅᑯᑎᒡ ᑭᔭ ᐊᓐᑕ ᐊ ᒪᐅᒋᐃᑐᓇᓄᐅᒡ᙮

² ᐅᑦ ᐊᑐᔅᒐᐅᓇ ᑎᐸᔨᒋᒐᓱᐤ ᒋᒋ ᐃᑕᔨᑕᑯᓂᔨᐛ, ᐊ ᓇᓂᑐᐛᔨᑎᒥᔨᒋ ᒥᓯᐛ ᑲ ᒥᔽᔨᑎᒥᔨᒋ᙮

³ ᐅᑦ ᐊᑐᔅᒐᐅᓐ ᒋᒋ ᐃᑕᔨᑕᑯᓂᔪᐤ ᑭᔭ ᒋᔅᑕᔨᑕᑯᓂᔪᐤ: ᐅᑯᐃᔅᑯᑕᑎᓯᐅᓐ ᑭᔭ ᑲᒋᒡ ᒋᑭ ᑎᑯᓂᔪᐤ᙮

⁴ ᒋ ᐃᓯᓇᑯᑕᐤ ᐅᒪᒥᔅᑲᒡ-ᐃᑐᐅᓇ ᒐᒋ ᒋᔅᒋᑕᑭᓄᐎᒋ: ᑎᐸᔨᒋᒐᓱᐤ ᒋᓴᐛᑎᓯᐤ ᑭᔭ ᓴᑭᔅᒋᓇᔅᑲᑯᐤ ᒋᔅᑎᒪᒐᔨᒋᒐᐅᓂᔪᐤ᙮

⁵ ᒋ ᐊᓴᒪᐤ ᐊᓂᔭᔪᐛ ᑲ ᓇᓂᒋᔅᑕᑯᑦ: ᑲᒋᒡ ᒋᑭ ᒋᔅᒋᓯᐤ ᐅᓂᔅᑯᒥᑐᐅᓐ᙮

⁶ ᒋ ᐛᐸᑎᔭᐤ ᐅᑦ ᐃᔨᒪ ᐊᔅᐱᔅ ᓱᐧᑲᑎᓯᒪᑭᓂᔨᒋ ᐅᑦ ᐊᑐᔅᒐᐅᓇ, ᒐᒋ ᒥᔭᑦ ᐅᑎᐱᔨᐛᐅᓯᐅᓂᔪᐤ ᐊᑲ ᐊᔭᒥᐊᔨᒋ᙮

⁷ ᐅᑦ ᐊᑐᔅᒐᐅᓇ ᐅᑎᒋᒡ ᑕᑈᐅᓄᐎᔨᐛ ᑭᔭ ᑎᐸᔅᑯᓂᒐᐅᓄᔨᐛ: ᒥᓯᐛ ᐅᑦ ᐃᑎᓱᐛᐅᓇ ᒐᔅᑎᓇᑕᔭᔨᑕᑯᓂᔨᐛ᙮

⁸ ᐊᔨᑎᔅᑕᔪᐛ ᑲᒋᒡ ᑭᔭ ᑲᒋᒡ, ᑭᔭ ᑐᑕᑭᓄᐎᔨᐛ ᑕᑈᐅᓂᒡ ᑭᔭ ᑯᐃᔅᑯᑐᐅᓂᒡ᙮

⁹ ᐱᒪᒋᐃᐛᐅᓂᔪᐤ ᒋ ᐃᑎᓴᐊᒧᐛᐤ ᐅᑦ ᐃᔨᒪ: ᐃᑎᓱᐛᐤ ᐅᓂᔅᑯᒥᑐᐅᓐ ᑲᒋᒡ ᒐᒋ ᑎᒂᓂᔨᒡ: ᐸᔭᐧᑭᓂᔪᐤ ᑭᔭ ᒋᔅᑕᔨᑕᑯᓂᔪᐤ ᐅᑦ ᐃᓯᓂᐧᑲᓱᐅᓐ᙮

¹⁰ ᐅᓇᓂᒋᔅᑕᑯᓯᐅᓐ ᑎᐸᔨᒋᒐᓱᐤ ᐊᑯᑕ ᐛᒋ ᒋᒋᐱᔨᒡ ᑭᒐᑕᐛᔨᑎᒧᐅᓐ: ᒥᔪ ᓂᔅᑐᑎᒧᐅᓂᔪᐤ ᐊᔭᐅᒡ ᒥᓯᐛ ᐊᓐᒡ ᑲ ᐃᑐᑎᒺᒡ ᐅᑦ ᐃᑎᓱᐛᐅᓂᔨᐛ: ᐅᒪᒥᒋᒥᑯᓯᐅᓐ ᑲᒋᒡ ᑎᑯᓂᔪᐤ᙮