ᑎᐱᑦ ᐅᓂᑭᒧᐅᓇ 107 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒥᓯᓇᐃᑭᓐ 5 1 ᐅ ᓂᓇᔅᑯᒥᐧᒄ ᑎᐸᔨᒋᒐᓱᐤ, ᐛᔅ ᒥᔽᑎᓯᐤ: ᐛᔅ ᐅᓴᒋᐃᐛᐅᓐ ᑲᒋᒡ ᐱᒥᐱᔪᐤ᙮ 2 ᐊᑯᔅ ᐅᐱᒪᒋᐊᑭᓇ ᑎᐸᔨᒋᒐᓱᐤ ᒋᑭ ᐃᔅᒋᔄᔪᐛ, ᐊᓂᔭ ᑲᒋ ᐎᐧᑯᒋᐊᑦ ᐅᑎᒋᔨᒡ ᐅᒋ ᑲ ᐛᐧᑲᑎᑯᔨᒋ; 3 ᑭᔭ ᑲᒪᐛᒋᐊᑦ ᒥᓯᐛ ᐊᔅᒋᔭ ᐅᒡ, ᐛᐱᓄᑕᒡ ᐅᒡ, ᑭᔭ ᐊᑎᒪᐱᓯᒧᒡ ᐅᒡ, ᒋᐛᑎᓄᑕᒡ ᐅᒡ, ᑭᔭ ᓴᐅᓄᑕᒡ ᐅᒡ᙮ 4 ᒋ ᐱᐸᒧᑕᐅᒡ ᐸᐧᑯᑎᔅᑭᒥᑲᒡ ᐊᓐᑕ ᐊ ᐱᒋᔅᑲᑕᔨᑕᒂᓂᔨᒡ, ᓇᒪᐎᔾ ᐅᒋ ᒥᔅᑭᒧᒡ ᐅᑕᓂᔪᐤ ᒐᒋ ᐎᒋᒡ᙮ 5 ᐊ ᐎ ᒥᒋᓱᐅᒡ ᑭᔭ ᐊ ᐎ ᒥᓂᒂᒡ, ᒋ ᓄᑕᓯᔪᐛ ᐅᑦ ᐊᒐᐧᑯᐛᐛ᙮ 6 ᐊᑯ ᒥᔭᑐᐛᒡ ᑎᐸᔨᒋᒐᓱᐛ ᐊ ᐊᔨᒥᓯᒡ, ᒋ ᐎᐧᑯᒋᐃᑯᐅᒡ ᒪᒃ ᐅᑦ ᐊᔨᒥᐃᑯᓯᐅᓄᐛᒡ ᐅᒡ᙮ 7 ᒋ ᐊᑎ ᔅᑐᑕᐊᐤ ᒪᒃ ᐊ ᑯᐃᔎᓂᔨᒡ ᒪᔅᑭᓇᒡ, ᒐᒋ ᐅᑎᑎᒥᔨᒋ ᐃᑕᐅᓂᔪᐤ ᐊᓐᑕ ᒐ ᑕᔨᒋ᙮ 8 ᐅ, ᑭᒪ ᐃᔪᒡ ᒪᒥᒋᒪᒡ ᑎᐸᔨᒋᒐᓱᐛ ᐅᒥᔪᑐᑕᒐᐅᓂᔪᐤ ᐅᒡ, ᑭᔭ ᑲ ᐃᓯ ᒪᒥᔅᑲᒡ ᑐᑐᐛᔨᒋ ᐃᔪᐛ ᐅᑦ ᐊᐛᓯᒥᓯᔨᐛ ! 9 ᐛᔅ ᑕᐸᔨᑕᒥᐊᐤ ᑲ ᑲᔅᒐᔨᑎᒥᔨᒋ ᐊᒐᒂ, ᑭᔭ ᒋᔅᐳᐊᐤ ᑲ ᓄᑕᐧᑭᑕᔨᒋ ᐊᒐᒂ ᒥᔪᑐᑕᒐᐅᓂᔪᐤ ᐅᒡ᙮ 10 ᐊᓐᒋ ᑲ ᐊᐱᒡ ᐊᓐᑕ ᐊ ᐅᓂᑎᐱᔅᑲᔨᒡ ᑭᔭ ᐊ ᑎᑲᔅᑕᔅᑲᑯᒡ ᓂᐳᐅᓂᔪᐤ, ᐊ ᒪᒪᒋᒂᐱᓱᒡ ᐊᔨᒥᓯᐅᓂᒡ ᑭᔭ ᐃᓴᒂᔭᐱᒡ; 11 ᐊᒋ ᐊᔪᐛᔨᒧᑐᑎᒺᒡ ᐅᑦ ᐃᔨᒧᐅᓂᔪᐤ ᒋᓴᒪᓂᑐᐛ, ᑭᔭ ᐊᒋ ᒪᒐᔨᑎᒺᒡ ᐅᑭᒐᔅᒋᒧᐛᐅᓂᔪᐤ ᒪᐅᒡ ᒐᔅᑎᓯᔨᒋ; 12 ᐊᔪᐅᒄ ᐛᒋ ᓂᑎᓂᒺᑦ ᐅᑕᐃᔪᐤ ᐊᑐᔅᒐᐅᓂᔪᐤ ᐅᒡ; ᒋ ᐸᒋᓯᓐᒡ, ᓇᒪ ᐊᐛᔪᐛ ᐅᒋ ᑕᔪᐛ ᒪᒃ ᒐᒋ ᐎᒋᐃᑯᒡ᙮ 13 ᐊᑯ ᒥᔭᑐᐛᒡ ᑎᐸᔨᒋᒐᓱᐛ ᐊ ᐊᔨᒥᓯᒡ, ᒋ ᐎᐧᑯᒋᐃᑯᐅᒡ ᒪᒃ ᐅᓇᓇᐧᑲᑕᔨᒧᐅᓄᐛᒡ ᐅᒡ᙮ 14 ᒋ ᐸᒋ ᐎᐎᑕᐊᐤ ᐊᓐᑕ ᐊ ᐅᓂᑎᐱᔅᑲᔨᒡ ᐅᒋ ᑭᔭ ᐊ ᑎᑲᔅᑕᑎᓂᔨᒡ ᓂᐳᐅᓂᔪᐤ, ᑭᔭ ᒋ ᐱᒂᐊᒺᐤ ᐅᒪᒪᒋᒂᐱᔅᑲᐃᑭᓂᔪᐛ᙮ 15 ᐅ, ᑭᒪ ᐃᔪᒡ ᒪᒥᒋᒪᒡ ᑎᐸᔨᒋᒐᓱᐛ ᐅᒥᔪᑐᑕᒐᐅᓂᔪᐤ ᐅᒡ, ᑭᔭ ᑲ ᐃᓯ ᒪᒥᔅᑲᒡ ᑐᑐᐛᔨᒋ ᐃᔪᐛ ᐅᑦ ᐊᐛᓯᒥᓯᔨᐛ ! 16 ᐛᔅ ᒋ ᐱᒂᐊᒻ ᑲ ᐎᔄᐛᐱᔅᑯᔨᒋ ᒋᒋᐃᔎᑕᒪ, ᑭᔭ ᒋ ᒋᒥᓯᒻ ᐃᓴᑯᐤ ᐱᒥᑕᐱᔎ᙮ 17 ᒋᔎᐧᑲᓐᒡ, ᐅᐛᓂᑐᑎᒧᐅᓄᐛᐤ ᐅᒡ, ᑭᔭ ᐅᒥᒐᑎᓯᐅᓄᐛᐤ ᐅᒋ ᐊᔨᒥᓯᐅᒡ᙮ 18 ᐅᑦ ᐊᒐᐧᑯᐛᐛ ᐊᑐᐛᔨᑎᒥᔨᐛ ᒥᓯᐛ ᐊᓯᓇᑯᓂᔨᒡ ᒥᒋᒥᔪᐤ; ᐸᔄᐸᑎᒧᒡ ᒪᒃ ᓂᐳᐅᓂ ᒋᒋᐃᔎᑕᒪ᙮ 19 ᐊᑯ ᒥᔭᑐᐛᒡ ᑎᐸᔨᒋᒐᓱᐛ ᐊ ᐊᔨᒥᓯᒡ, ᐎᐧᑯᒋᐃᑯᐅᒡ ᒪᒃ ᐅᓇᓇᐧᑲᑕᔨᒧᐅᓄᐛᒡ ᐅᒡ᙮ 20 ᒋ ᐃᑎᓴᐊᒻ ᐅᑦ ᐃᔨᒧᐅᓐ ᑭᔭ ᒋ ᒥᓏᒋᐊᐤ, ᑭᔭ ᒋ ᐎᐧᑯᒋᐊᐤ ᐅᓂᓱᐅᓇᑎᓯᐅᓂᔨᒡ ᐅᒡ᙮ 21 ᐅ, ᑭᒪ ᐃᔪᒡ ᒪᒥᒋᒪᒡ ᑎᐸᔨᒋᒐᓱᐛ ᐅᒥᔪᑐᑕᒐᐅᓂᔪᐤ ᐅᒡ, ᑭᔭ ᑲ ᐃᓯ ᒪᒥᔅᑲᒡ ᑐᑐᐛᔨᒋ ᐃᔪᐛ ᐅᑦ ᐊᐛᓯᒥᓯᔨᐛ ! 22 ᐊᑯᔅ ᒪᒃ ᒋᑭ ᐱᔅᑎᓂᒐᐅᒡ ᓂᓇᔅᑯᒧᐅ ᐱᔅᑎᓂᒐᐅᓇ, ᑭᔭ ᒋᑭ ᐎᑎᒺᐅᒡ ᐅᑦ ᐊᑐᔅᒐᐅᓂᔪᐤ ᐊ ᒧᒐᔨᑕᒡ᙮ 23 ᐊᓐᒡ ᑲ ᐱᐸᒪᓯᒡ ᐎᓂᐸᑯᒡ ᑲ ᐱᒪᔅᑎᒡ ᐅᐤᑎᒡ, ᑲ ᐊᑐᔅᒐᒡ ᓂᐱᒡ; 24 ᐅᒋ ᐛᐸᑎᒺᐅᒡ ᐅᑦ ᐊᑐᔅᒐᐅᓂᔪᐤ ᑎᐸᔨᒋᒐᓱᐛ, ᑭᔭ ᐅᒪᒥᔅᑲᒡ-ᐃᑐᐅᓂᔪᐛ ᐊᓐᑕ ᐊ ᒋᔅᑲᔭᐛᔨᒡ᙮ 25 ᐛᔅ ᐃᑎᓱᐛᐤ, ᐊᑯ ᒐᑎᔅᑎᓂᔨᒡ, ᑲ ᐅᒋ ᒪᒪᐧᑲᐊᒡ᙮ 26 ᒋᓯᑯᒡ ᐃᓯ ᐃᔅᐱᔪᐅᒡ, ᐊ ᐃᓯ ᔪᐛᔨᒡ ᑯᑕᐅᐱᔪᐅᒡ: ᐅᑦ ᐊᒐᐧᑯᐛᐛ ᑎᒋᓱᔪᐛ ᐊ ᐊᔨᒥᓯᒡ᙮ 27 ᐛᐛᐱᔪᐅᒡ, ᑭᔭ ᓇᓇᒐᐱᔪᐅᒡ ᒧᔭᒻ ᐊ ᒋᔎᐸᑦ ᐃᔪᐤ, ᑭᔭ ᒥᑐᓐ ᐛᐛᓇᔨᑎᒧᒡ᙮ 28 ᐊᑯ ᒥᔭᑐᐛᒡ ᑎᐸᔨᒋᒐᓱᐛ ᐊ ᐊᔨᒥᓯᒡ, ᐎᐧᑯᒋᐃᑯᐅᒡ ᒪᒃ ᐅᓇᓇᐧᑲᑕᔨᒧᐅᓄᐛᒡ ᐅᒡ᙮ 29 ᐊᔽᔅᑎᓂᑕᐤ ᐊ ᒋᑎᔅᑎᓂᔨᒡ, ᐊᑯ ᐱᓂᐱᔨᒡ ᐊ ᒪᒪᐧᑲᐊᒡ᙮ 30 ᐊᑯ ᓴᒋᔭᓯᒡ ᐊ ᒋᔭᒪᐅᓂᔨᒡ; ᐸᓱᑯᒡ ᒪᒃ ᐊᓐᑕ ᑲ ᐃᓯ ᐱᑯᓴᔨᑕᒡ᙮ 31 ᐅ, ᑭᒪ ᐃᔪᒡ ᒪᒥᒋᒪᒡ ᑎᐸᔨᒋᒐᓱᐛ ᐅᒥᔪᑐᑕᒐᐅᓂᔪᐤ ᐅᒡ, ᑭᔭ ᑲ ᐃᓯ ᒪᒥᔅᑲᒡ ᑐᑐᐛᔨᒋ ᐃᔪᐛ ᐅᑦ ᐊᐛᓯᒥᓯᔨᐛ ! 32 ᐊᑯᔅ ᒋᑭ ᐃᔅᐸᔨᑕᑯᐊᐅᒡ ᐊᓐᑕ ᐊ ᒪᒧᐎᔨᒋ ᐃᔪᐛ, ᑭᔭ ᒋᑭ ᒪᒥᒋᒪᐅᒡ ᐊᓐᑕ ᐊ ᒪᐅᒋᐃᑐᔨᒋ ᑲ ᓂᑲᓇᔨᑕᑯᓯᔨᒋ᙮ 33 ᐃᑐᑎᒻ ᓯᐱᔭ ᒐᒋ ᐸᐧᑯᑎᔅᑭᒥᑯᔨᒋ, ᑭᔭ ᒧᔅᒍᓂᐸᒂ ᐸᒂᔅᑭᒥᑯᑕᒡ; 34 ᐊ ᒥᓂᓱᐎᔨᒡ ᐊᔅᒋᔪᐤ ᐸᒂᑎᔅᑭᒥᑯᑕᐤ, ᐅᒥᒋᑥᐅᓂᔪᐤ ᐅᒋ ᐊᓂᔭ ᐊᓐᑕ ᑲ ᑕᔨᒋ᙮ 35 ᓴᑲᐃᑭᓂᒐᐤ ᐸᐧᑯᑎᔅᑭᒥᑯᔪᐤ, ᑭᔭ ᐸᒂᔅᑭᒥᑯᔪᐤ ᒧᔅᒍᐅᓂᐸᑯᑕᐤ᙮ 36 ᐊᑯᑕ ᒪᒃ ᐊᑎᐊᑦ ᑲ ᓄᑕᐧᑭᑕᔨᒋ, ᒐᒋ ᐛᐛᓯᑕᒪᓱᔨᒋ ᐅᑕᓇᔪᐤ ᒐ ᐃᓯ ᐃᑕᔨᒋ; 37 ᑭᔭ ᓂᑕᐅᒋᑕᔨᒋ ᓂᑕᐅᒋᒋᑭᓇ, ᑭᔭ ᓱᒥᓇᑎᑯᐤ ᓂᑕᐅᒋᒋᑭᓇ, ᒥᔅᑎ ᒐ ᓂᑕᐅᒋᑎᒪᑯᔨᒋ ᒐ ᓂᑕᐅᒋᓂᔨᒋ᙮ 38 ᒥᔽᒋᒪᐤ ᑭᔭ, ᒐᒋ ᐅᒋ ᐊᑎ ᓇᔅᒡ ᒥᒐᑎᔨᒋ; ᓇᒪ ᑭᔭ ᒋ ᓇᐊᔨᒪᐤ ᐅᑦ ᐊᐛᐧᑲᓂᒥᔨᐛ ᒐᒋ ᐊᑲ ᒥᒐᑎᔨᒋ᙮ 39 ᒥᓐ, ᐊᑎ ᑎᑲᐛᓯᐅᒡ ᑭᔭ ᒋᔅᑎᒪᑎᓯᐅᒡ, ᐊᔨᒥᐃᑯᓯᐅᓂᔪᐤ ᐅᒡ, ᒪᒂᔨᑎᒧᐅᓂᔪᐤ, ᑭᔭ ᒥᓴᒪᔨᑎᒧᐅᓂᔪᐤ ᐅᒡ᙮ 40 ᐊᑐᐛᔨᑎᒧᐅᓂᔪᐤ ᓯᒋᒥᒧᐛᐤ ᒋᓴᐅᒋᒪᐛ, ᑭᔭ ᑐᑐᐛᐤ ᒐᒋ ᐱᐸᒧᑕᔨᒋ ᐸᐧᑯᑎᔅᑭᒥᑲᒡ, ᐊᓐᑕ ᐊᑲ ᐊ ᑎᒂᓂᔨᒡ ᒪᔅᑭᓇᔪᐤ᙮ 41 ᐃᔭᐱᒡ ᒪᒃ ᐃᔅᐸᔨᑕᑯᐊᐤ ᐅᒋᔅᑎᒪᑎᓯᐛ ᐊᒋ ᒪᒂᔨᑎᒥᔨᒋ, ᑭᔭ ᐅᑦ ᐊᐛᓯᒥᓯᔨᐛ ᒧᔭᒻ ᐊ ᒪᒧᒥᒐᑎᔨᒋ ᒪᔭᑕᓂᓴ᙮ 42 ᐅᑯᐃᔅᑯᑕᑎᓯᐅᒡ ᒋᑭ ᐛᐸᑎᒧᒡ, ᒋᑭ ᒧᒋᒐᔨᑎᒧᒡ ᒪᒃ; ᑭᔭ ᒥᓯᐛ ᒥᒐᑎᓯᐅᓇ ᒋᑭ ᒋᐳᑐᓇᒥᑭᓇ᙮ 43 ᐊᓐᒋ ᐊᐛᓐᒋ ᑲ ᑭᒐᑕᐛᔨᑕᒡ, ᑭᔭ ᑲ ᓇᑭᑐᐛᔨᑕᒡ ᐅᔭᔪᐛ, ᐊᐅᑯᓐᒡ ᒐ ᓂᔅᑐᑎᒺᒡ ᐅᓴᒋᐃᐛᐤ ᒋᓴᐛᑎᓯᐅᓂᔪᐤ ᑎᐸᔨᒋᒐᓱᐛ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.