ᑎᐱᑦ ᐅᓂᑭᒧᐅᓇ 103 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ1 ᒪᒥᒋᒻ ᑎᐸᔨᒋᒐᓱᐤ ᐅ ᓂᑦ ᐊᒐᐧᒄ: ᑭᔭ ᒥᓯᐛ ᑲ ᐱᒋᔅᑲᑯᔭᓐ, ᒪᒥᒋᑎᒻ ᐅᐸᔭᒋ-ᐃᓯᓂᐧᑲᓱᐅᓐ᙮ 2 ᒪᒥᒋᒻ ᑎᐸᔨᒋᒐᓱᐤ, ᐅ ᓂᑦ ᐊᒐᐧᒄ: ᐊᑲ ᑭᔭ ᐅᓂᒋᔅᒋᑎᒻ ᒥᓯᐛ ᐅᒥᔪᑐᑕᒐᐅᓇ; 3 ᑲ ᐛᐸᔨᑕᐧᒄ ᒥᓯᐛ ᒋᒥᒐᑎᓯᐅᓇ; ᑲ ᒥᓏᒋᑕᑦ ᒥᓯᐛ ᒋᑦ ᐃᑕᔅᐱᓇᐅᓇ; 4 ᑲ ᐎᐧᑯᒋᑕᑦ ᒋᐱᒪᑎᓯᐅᓂᔪᐤ ᓂᓱᐅᓇᑎᓯᐅᓂᒡ ᐅᒡ; ᑲ ᐳᔅᑕᔅᑐᑎᓇᐃᔅᒃ ᐅᓴᒋᐃᐛᐎ ᒋᓴᐛᑎᓯᐅᓐ ᑭᔭ ᐅᔪᔅᐱ ᓱᐛᔨᒋᒐᐅᓇ; 5 ᑲ ᓴᑭᔅᒋᓂᑕᑦ ᒋᑐᓂᔪᐤ ᒥᔪ ᒐᒂᓇ; ᒋᑦ ᐅᔅᒋᓂᒋᓱᐅᓐ ᑲ ᐅᒋ ᐅᔅᒋᐱᔨᒡ ᒧᔭᒻ ᒥᒋᓱᐤ᙮ 6 ᑎᐸᔨᒋᒐᓱᐤ ᑎᐱᑐᑎᒪᐛᐤ ᑯᐃᔅᑯᑕᑎᓯᐅᓂᔪᐤ ᑭᔭ ᑎᐸᔅᑯᓂᒐᐅᓂᔪᐤ ᒥᓯᐛ ᐊᓂᔭ ᑲ ᐊᔨᒥᐊᑭᓄᔨᒋ᙮ 7 ᒋ ᒋᔅᒐᔨᑎᒥᐊᐤ ᐅᑦ ᐃᓯᑥᐅᓇ ᒧᓱᓴ, ᐅᑦ ᐃᑐᐅᓇ ᐃᔅᕋᐃᓚ ᐅᑦ ᐊᐛᓯᒥᓯᔪᐛ᙮ 8 ᑎᐸᔨᒋᒐᓱᐤ ᒋᔅᑎᒪᒐᔨᒧᐛᐤ ᑭᔭ ᒋᓴᐛᑎᓯᐤ, ᓇᒪ ᐎᐱᒡ ᒋᔄᓯᐤ, ᑭᔭ ᐛᔪᑎᓯᐤ ᓱᐛᔨᒋᒐᐅᓂᔪᐤ᙮ 9 ᓇᒪᐎᔾ ᒧᔅ ᒋᑭ ᒋᔅᑐᓱᐛᐤ; ᓇᒪ ᑭᔭ ᒋᑭ ᐱᒥᔨᐛᓯᐤ ᑲᒋᒡ᙮ 10 ᓇᒪᐎᔾ ᔅᒋ ᐃᑐᑕᑯᓄᐤ ᑲ ᐃᓯ ᒥᒋᑐᑎᒪᐧᒄ; ᓇᒪ ᑭᔭ ᔅᒋ ᑎᐸᐊᒪᑯᓄᐤ ᐊ ᐃᓯ ᒥᒐᑎᓯᔭᐧᒄ᙮ 11 ᐛᔅ ᒧᔭᒻ ᒋᒋᒋᓯᒄ ᐊ ᐃᔅᐱᔅ ᐃᔅᐸᒡ ᐊᔅᒋᔾ ᐅᒡ, ᐊᑯ ᒺᒡ ᑲ ᐃᔅᐱᔅ ᒥᓯᑎᒧᐛᑦ ᐅᒋᔅᑎᒪᒐᔨᒋᒐᐅᓐ ᐊᓂᔭ ᑲ ᓇᓂᒋᔅᑕᑯᑦ᙮ 12 ᐊᔅᐱᔅ ᔭᐅᓇᒂᒡ ᐛᐱᓄᑕᒡ ᐊᑎᒪᐱᓯᒧᒡ ᐅᒡ, ᐊᑯ ᐊᔅᐱᔅ ᑲᒋ ᐃᒐᓂᒪᑕᐧᒄ ᒋᐅᓂᑐᑎᒧᐅᓄᐛ᙮ 13 ᒧᔭᒻ ᐅᑕᐎᒪᐤ ᑲ ᐃᓯ ᒋᔅᑎᒪᒐᔨᒪᑦ ᐅᑦ ᐊᐛᓯᒥᓴ; ᐊᑯ ᒺᒡ ᑎᐸᔨᒋᒐᓱᐤ ᐊᓯ ᒋᔅᑎᒪᒐᔨᒪᑦ ᐊᓂᔭ ᑲ ᓇᓂᒋᔅᑕᑯᑦ᙮ 14 ᐛᔅ ᒋᔅᒐᔨᑎᒻ ᐊᓯᓇᑯᓯᔭᐧᒄ; ᒋᔅᒋᓱᐤ ᐱᓯᓯᒄ ᐊ ᐊᓯᔅᒋᐎᔭᐧᒄ᙮ 15 ᐃᔪᐤ ᒪᒃ ᐎᔾ, ᐅᒋᓯᑲᒪ ᒧᔭᒻ ᒥᔅᑯᓯᔭ ᐃᓯᓇᑯᓂᔪᐛ: ᒧᔭᒻ ᐛᐱᑯᓇ ᓂᑕᐅᒋᒋᑭᓂᒡ ᐊᑯ ᐊᓯ ᐅᐱᒋᑦ᙮ 16 ᐛᔅ ᔪᑎᓂᓯᐤ, ᐊᑯ ᒪᒃ ᓇᒪ ᑕᐤ, ᐊᓐᑕ ᒪᒃ ᑲ ᐃᓯ ᓂᑕᐅᒋᑦ ᓇᒪ ᓂᑕ ᒥᓐ ᒋᑭ ᒋᔅᒐᔨᒥᑯᐤ᙮ 17 ᒪᒃ ᐅᒋᔅᑎᒪᒐᔨᒋᒐᐅᓐ ᑎᐸᔨᒋᒐᓱᐤ ᑲᒋᒡ ᑭᔭ ᑲᒋᒡ ᒋᒋᔅᑲᑯᔪᐛ ᐊᓂᔭᔪᐛ ᑲ ᓇᓂᒋᔅᑕᑯᑦ, ᑭᔭ ᐅᑯᐃᔅᑯᑕᑎᓯᐅᓐ ᐊᐛᓴ ᐅᑦ ᐊᐛᓯᒥᓯᔪᐛ; 18 ᐊᓂᔭᔪᐛ ᐅᑎ ᑲ ᑭᓄᐛᔨᑎᒥᔨᒋ ᐅᓂᔅᑯᒥᑐᐅᓐ, ᐊᓂᔭ ᑭᔭ ᑲ ᒋᔅᒋᑎᒥᔨᒋ ᐅᑦ ᐃᑎᓱᐛᐅᓇ ᒐᒋ ᐃᑐᑎᒥᔨᒋ᙮ 19 ᑎᐸᔨᒋᒐᓱᐤ ᒋ ᐊᐛᓯᑕᐤ ᐅᒋᓴᐅᒋᒪᐅ-ᑕᑎᐳᐛᑭᓐ ᒋᒋᒋᓯᑯᒡ; ᐅᑦ ᐅᒋᒪᐅᓐ ᒪᒃ ᒥᓯᐛ ᑎᐸᔨᑎᒧᒪᑭᓂᔪᐤ᙮ 20 ᒪᒥᒋᒥᐧᒄ ᑎᐸᔨᒋᒐᓱᐤ, ᒋᔨᐛᐤ ᐅᑦ ᐊᓐᒋᓂᒪ ! ᐊᔪᐛᒃ ᑲ ᒥᔅᑯᐅᓯᔭᒄ, ᑲ ᐃᑐᑎᒺᒄ ᐅᑦ ᐃᑎᓱᐛᐅᓇ, ᐊ ᓂᑐᑎᒺᒄ ᐅᑦ ᐃᔨᒧᐅᓇ᙮ 21 ᒪᒥᒋᒥᐧᒄ ᑎᐸᔨᒋᒐᓱᐤ, ᒥᓯᐛ ᒋᔨᐛᐤ ᐅᑎᐸᔨᒪᑭᓇ; ᒋᔨᐛᐤ ᐅᑦ ᐊᑐᔅᒐᔭᑭᓂᒪ, ᑲ ᐃᑐᑎᒺᒄ ᑲ ᐃᓯ ᒥᔽᔨᑕᐧᒃ᙮ 22 ᒪᒥᒋᒥᐧᒄ ᑎᐸᔨᒋᒐᓱᐤ, ᒥᓯᐛ ᐅᑦ ᐊᑐᔅᒐᐅᓇ, ᒥᓯᐛ ᐊᓐᑕ ᐅᑦ ᐅᒋᒪᐅᓂᒡ: ᒪᒥᒋᒻ ᑎᐸᔨᒋᒐᓱᐤ, ᐅ ᓂᑦ ᐊᒐᐧᒄ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.