ᑎᐱᑦ ᐅᓂᑭᒧᐅᓇ 102 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

¹ ᓂᑐᑕ ᓂᑦ ᐊᔭᒥᐊᐅᓐ, ᐅ ᑎᐸᔨᒋᒐᓱᐤ, ᐊᑯᔅ ᒪᒃ ᓂ ᒪᐅᓐ ᒋᑭ ᐅᑎᑎᑯᓐ᙮

² ᐊᑲᐎᔾ ᑲᓱᔅᑕᐎ ᐊᔨᒥᓯᔭᓇ ᐊ ᒋᓯᑲᒡ; ᓂᑐᑐᐎ ᐊ ᒋᓯᑲᒡ ᑕᑈᔭᓇ, ᒋᐱᔾ ᓂᔎᐅᓯᐃ᙮

³ ᐛᔅ ᓂᒋᓯᑲᒪ ᒪᒋᐱᔪᐛ ᒧᔭᒻ ᐊ ᐱᐳᑕᒡ, ᓂᔅᑭᓇ ᑭᔭ ᐃᔎᑕᐛ ᒧᔭᒻ ᐃᔅᑯᑕᑲᓇᐱᔅᒄ᙮

⁴ ᓂᑕᐃ ᐅᑕᒪᔨᑭᓄᐤ, ᑭᔭ ᐸᔅᑕᐤ ᒧᔭᒻ ᒥᔅᑯᓯᔭ; ᑲ ᐅᒋ ᐅᓂᒋᔅᒋᔭᓐ ᒐᒋ ᒧᐅᒃ ᓂᐸᒂᓯᑭᓂᒻ᙮

⁵ ᐊ ᐸᑕᑯᓯᔭᓐ ᐊ ᒪᒪᑥᔭᓐ, ᓂᔅᑭᓇ ᓂ ᐎᔭᓯᒡ ᐱᓯᑯᒧᐛ᙮

⁶ ᓂ ᓇᔅᐱᑐᐛᐤ ᐅᐦᐅᐤ ᐸᐧᑯᑎᔅᑭᒥᑲᒡ: ᓂ ᓇᔅᐱᑐᐛᐤ ᐅᐦᐅᒥᓯᐤ ᒪᒂᔅᑲᒥᒡ᙮

⁷ ᓂᑦ ᐊᓱᐛᐱᓐ, ᑭᔭ ᒧᔭᒻ ᒪᒥᔅᑕᔭᒋᔅ ᐊ ᐸᐃᑯᓯᑦ ᑕᐧᑯᒡ ᒥᒋᐛᐱᒡ ᓂᑦ ᐃᓯᓇᑯᓯᓐ᙮

⁸ ᑲ ᐛᐧᑲᓯᒡ ᓂ ᔅᑐᑎᑯᒡ ᐃᔅᑭᓐ ᒋᓯᑲᐛ; ᐊᓐᒋ ᑲ ᒋᓯᔅᑐᐅᒡ ᒋ ᓂᔅᑯᒥᑐᐅᒡ ᒐᒋ ᒥᒋᑐᑐᐅᒡ᙮

⁹ ᐛᔅ ᓂᒋ ᒥᒋᓐ ᐱᐧᑯᑕᐤ ᒧᔭᒻ ᐸᒂᓯᑭᓐ, ᑭᔭ ᐅᒋᑯᐛᐳᐅᓐ ᓂ ᒋᔨᑯᐅᓇᓐ ᓂᒥᓂᒂᐅᓂᒡ᙮

¹⁰ ᒋᒋᓯᔅᑕᒐᐅᓐ ᐅᒋ ᑭᔭ ᒋᑦ ᐊᐧᑯᔪᐛᓱᐅᓐ; ᐛᔅ ᔅᒋ ᐅᐱᓐ, ᑭᔭ ᔅᒋ ᓂᒋᐛᐱᓐ᙮

¹¹ ᓂᒋᓯᑲᒪ ᒧᔭᒻ ᐊ ᑎᑲᔅᑕᒋᒡ ᐊ ᐃᒐᐱᔨᒡ ᐃᓯᓇᑯᓇ; ᓂ ᐸᓱᓐ ᒧᔭᒻ ᒥᔅᑯᓯᔭ᙮

¹² ᒪᒃ ᒋᔾ, ᐅ ᑎᐸᔨᒋᒐᓱᐤ, ᑲᒋᒡ ᒋᑭ ᑕᓐ; ᑭᔭ ᒋᑭ ᒋᔅᒋᑕᑯᐅᓐ ᒥᓯᐛ ᒐ ᐊᑎ ᐱᒪᑎᓯᓇᓄᐅᒡ᙮

¹³ ᒋᑭ ᐱᓯᑯᓐ, ᑭᔭ ᒋᑭ ᒋᔅᑎᒪᒐᔨᒪᐤ ᓴᐃᔭᓐ: ᐛᔅ ᓴᔅ ᐅᑎᒋᐱᔪᐤ ᒐᒋ ᒋᓴᐛᑐᑐᐅᑦ, ᓂᐦᐃ, ᓴᔅ ᒥᑐᓐ ᐅᑎᒋᐱᔪᐤ᙮

¹⁴ ᐛᔅ ᒋᑦ ᐊᑐᔅᒐᔭᑭᓐᒡ ᒥᔽᔨᒥᒪᐅᒡ ᐅᑦ ᐊᓯᓂᒥᐛᐤ, ᑭᔭ ᓴᒋᑕᐛᐅᒡ ᐅᑦ ᐊᓯᔅᒋᔪᐤ᙮

¹⁵ ᐊᑲ ᐊᔭᒥᐊᒡ ᒪᒃ ᒋᑭ ᓇᓂᒋᔅᑎᒺᐅᒡ ᑎᐸᔨᒋᒐᓱᐛ ᐅᑦ ᐃᓯᓂᐧᑲᓱᐅᓂᔪᐤ, ᑭᔭ ᒥᓯᐛ ᒋᓴᐅᒋᒪᐅᒡ ᐊᔅᒋᒡ ᒋ ᒋᔅᑕᔨᑕᑯᓱᐅᓂᔪᐤ᙮

¹⁶ ᐃᔅᐱ ᑎᐸᔨᒋᒐᓱᐤ ᐅᓯᑕᒐ ᓴᐃᔭᓂᔪᐤ, ᒋᑭ ᓄᑯᓯᐤ ᐅᒋᔅᑕᔨᑕᑯᓱᐅᓂᒡ᙮

¹⁷ ᒋᑭ ᓂᑐᑎᒺᐤ ᐅᑦ ᐊᔭᒥᐊᐅᓂᔪᐤ ᐅᒋᔅᑎᒪᑎᓯᐛ, ᓇᒪ ᑭᔭ ᒋᑭ ᐊᑐᐛᔨᑎᒺᐤ ᐅᑦ ᐊᔭᒥᐊᐅᓂᔪᐤ᙮

¹⁸ ᐅᔭᔪᐤ ᒋᑭ ᐃᓯ ᒥᓯᓇᐊᒧᐛᑭᓄᐅᒡ ᐊᓐᒡ ᒐ ᐊᑎ ᐊᓂᔅᒐ ᐱᒪᑎᓯᒡ; ᐃᔪᒡ ᒪᒃ ᐊᔅᒄ ᒐ ᐅᓯᐊᑭᓄᐅᒡ ᒋᑭ ᒪᒥᒋᒪᐅᒡ ᑎᐸᔨᒋᒐᓱᐛ᙮

¹⁹ ᐛᔅ ᓂᑕᒡ ᒋ ᐃᑕᐳᐤ ᐊᔅᐱᔅ ᐃᔅᐸᔨᒡ ᐅᐸᔭᒋ-ᒥᒋᐛᐱᒡ ᐅᒡ; ᑎᐸᔨᒋᒐᓱᐤ ᒋᒋᒋᓯᑯᒡ ᒋ ᐅᒋ ᑭᓄᐛᐸᑎᒻ ᐊᔅᒋᔪᐤ;

²⁰ ᒐᒋ ᐸᑐᐛᑦ ᐊ ᒪᒪᑥᔨᒋ ᒋᐸᐛᑭᓇ; ᒐᒋ ᐊᐸᐛᑦ ᐊᓂᔭ ᑲᒋ ᐃᑕᑭᓄᐎᒋ ᒐᒋ ᓂᐱᔨᒋ;

²¹ ᒐᒋ ᐛᐎᑎᒥᔨᒋ ᐅᑦ ᐃᓯᓂᐧᑲᓱᐅᓐ ᑎᐸᔨᒋᒐᓱᐤ ᓴᐃᔭᓂᒡ, ᑭᔭ ᐅᒪᒥᒋᒥᑯᓯᐅᓐ ᒋᕈᓯᓕᒥᒡ;

²² ᐃᔅᐱ ᐃᔪᒡ ᒪᒧᐤ ᒪᐅᒋᑐᑥᐛ, ᑭᔭ ᐅᒋᒪᐅᓇ, ᒐᒋ ᐊᑐᔅᒐᔅᑐᐛᒡ ᑎᐸᔨᒋᒐᓱᐛ᙮

²³ ᒋ ᐃᔨᔨᒥᑕᐤ ᓂᒥᔅᑯᐅᓯᐅᓂᔪᐤ ᒪᔅᑭᓇᒡ: ᓇᒪ ᐅᒋ ᒥᒐᑐᑕᐤ ᓂᒋᓯᑲᒪ᙮

²⁴ ᓂᒋ ᐃᔅᒋᔄᓐ, “ᐅ ᓂᒋᓴᒪᓂᑐᒻ, ᐊᑲᐎᔾ ᐅᑎᓂ ᒪᒂᒡ ᐊ ᐅᒋᓯᑲᒥᔭᓐ: ᒋᐱᐳᓂᒪ ᐃᔅᐱᔪᐛ ᒥᓯᐛ ᒐ ᐊᑎ ᐱᒪᑎᓯᓇᓄᐅᒡ᙮

²⁵ ᐎᐱᒡ ᔅᒋ ᐊᔨᑎᔅᑕᓐ ᐊᔅᒋᔾ; ᑭᔭ ᒋᓯᒂ ᒋᑎᒋᒡ ᔅᒋ ᐅᒋ ᐅᓯᑕᓐ᙮

²⁶ ᐅᔭ ᒋᑭ ᓂᓱᐅᓇᑎᓇ, ᒪᒃ ᒋᔾ ᒋᑭ ᑕᓐ; ᓂᐦᐃ, ᒥᓯᐛ ᐊ ᑕᑎᒋ ᒋᑭ ᐊᑎ ᓴᐅᓇ ᒧᔭᒻ ᐊᑯᑉ; ᒧᔭᒻ ᐊᐱᒋᑕᐅᓐ ᒋᑭ ᐃᓯ ᒂᔅᒋᓇᑯᐊᐅᒡ, ᐊᑯ ᒪᒃ ᒐ ᒂᔅᒋᑯᓇᑯᓯᒡ᙮

²⁷ ᒪᒃ ᒋᔾ ᐸᐃᑯᓐ ᐊᓯᓇᑯᐃᔨᓐ, ᑭᔭ ᒋᐱᐳᓂᒪ ᓂᒪᐎᔾ ᒋᑭ ᐳᓂᐱᔪᐛ᙮

²⁸ ᐅᑦ ᐊᐛᓯᒥᓱᐛᐛ ᒋᑦ ᐊᑐᔅᒐᔭᑭᓐᒡ ᑕᒡ ᒋᑭ ᐊᔭᔪᐛ, ᑭᔭ ᐅᑦ ᐊᐛᓯᒥᓱᐛᐛ ᐊᓂᔅᒐ ᒋᑭ ᐊᔨᑎᓯᔪᐛ ᐊ ᐅᑎᔅᑲᔅᒋᔨᔅᒋ᙮”