ᐸᐃᓕᒪᓐ 1 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᐊ ᐛᒋᔭᒪᑭᓄᐅᑦ ᐸᐃᓕᒪᓐ Philemon 1.1-21 (Proper-18 Year C)

¹ ᓂᔾ ᑈᓪ ᑲ ᒥᓯᓇᐃᒐᔭᓐ᙮ ᑭᔭ ᑎᒧᑎ ᒋᐧᑲᓂᓯᓄᐤ ᑕᐤ ᐅᑕ᙮ ᑲᒪᑯᓄᐛᓯᐅᒋᐛᐱᒡ ᓂ ᑕᓐ ᐊᓄᒡ ᐊᓐ ᐅᒋ ᐊ ᐊᑐᔅᑯᐅᒃ ᒋᓴᔅ ᙭᙮ ᒋᔾ ᓂᐎᒐᐛᑭᓇᓐ ᐸᐃᓕᒪᓐ ᑲ ᒥᓯᓇᐊᒪᑕᓐ ᑭᔭ ᒋᔾ ᑲ ᐊᑐᔅᑯᐅᑦ ᒋᓴᔅ ᒧᔭᒻ ᓂᔭᓐ ᐊ ᐃᓯ ᐊᑐᔅᑯᐅᒋᒡ᙮

² ᐊᓐᒡ ᒪᒧᐤ ᑲ ᐊᔭᒥᐊᐛᑎᓯᒡ ᒋᒋᒡ ᑲ ᒪᒧᐤ ᐊᔭᒥᐊᒡ ᐊᐅᑯᓐᒡ ᑭᔭ ᒪᓯᓇᐊᒧᐅᒂᐤ᙮ ᒋᒥᓯᓄᐤ ᐊᐱᔭ ᑲ ᐃᓯᓂᐧᑲᓱᑦ ᑭᔭ ᐊᕐᑭᐸᔅ ᐊᐅᑯᓐᒡ ᑭᔭ ᒪᓯᓇᐊᒧᐅᒂᐤ᙮ ᑭᔭ ᐎᔾ ᐊᕐᑭᐸᔅ ᓱᒋᑲᐳᐤ ᐊ ᐊᑐᔅᑯᐛᑦ ᒋᓴᓴ ᒧᔭᒻ ᓂᔾ ᐊ ᐃᑐᐅᒡ᙮

³ ᓂᑦ ᐊᔭᒥᐊᐤ ᒋᓴᒪᓂᑐᐤ ᒍᑕᐎᓄᐤ ᑭᔭ ᐅᑎᐸᔨᒋᒐᐤ ᒋᓴᔅ ᒐᒋ ᒥᔪᑐᑎᒪᑕᑯᒡ ᑭᔭ ᒐᒋ ᒥᔨᑕᑯᒡ ᒐᒋ ᒋᔭᒪᔨᑎᒺᒄ᙮

ᐸᐃᓕᒪᓐ ᐅᓴᒋᐃᐛᐅᓐ ᑭᔭ ᐅᑕᑈᑎᒧᐅᓐ

⁴ ᓂᐧᑲᓂᔅ ᐸᐃᓕᒪᓐ ᒧᔅ ᒋ ᒋᔅᒋᓯᑐᑕᑎᓐ ᑕᑥᐤ ᐊ ᐊᔭᒥᐊᔭᓐ᙮ ᓂᓇᔅᑯᒪᐤ ᒪᒃ ᒋᓴᒪᓂᑐᐤ᙮

⁵ ᒧᔅ ᓂ ᐸᑕᓐ ᐊᔅᐱᔅ ᓴᒋᐃᑥᐤ ᑲ ᑕᑈᑕᒡ᙮ ᓂ ᐸᑕᓐ ᑭᔭ ᑕᓐ ᐊ ᐃᓯ ᑕᑈᔭᔨᒥᑦ ᒋᑎᐸᔨᒋᒐᓯᒥᓄᐤ ᒋᓴᔅ᙮

⁶ ᓂ ᓂᑐᑎᒪᓐ ᐊᓂᔭ ᐊ ᐊᑎ ᐊᔨᒧᑎᒧᒡ ᐊᐛᓐᒋ ᑕᓐ ᐊ ᐃᓯ ᑕᑈᑎᒥᓐ ᒐᒋ ᐎᒋᐃᐛᒥᑲᒡ ᐊᑐᐎᔅ ᒐᒋ ᐊᑎ ᒋᔅᒐᔨᑎᒥᓐ ᑕᓐ ᒐᒋ ᐃᓯ ᒥᔪᑐᑎᒪᑕᐧᒄ ᙭ ᒋᓴᔅ᙮

⁷ ᓇᔅᒡ ᑕᑈ ᓂ ᒥᔽᔨᑕᓐ ᑭᔭ ᓇᔅᒡ ᓂ ᒥᔽᔨᒧᐃᑯᓐ ᐊ ᒋᔅᒐᔨᑎᒪᓐ ᐊ ᐃᓯ ᐊᔭᔨᓐ ᓴᒋᐃᐛᐅᓐ, ᓂᐧᑲᓂᔅ, ᐛᔅ ᒥᒐᑦ ᑲ ᑕᑈᑕᒡ ᒋ ᒥᔽᔨᒧᐃᑯᐅᒡ ᑕᓐ ᐊ ᐃᓯ ᐊᔭᔨᓐ ᓴᒋᐃᐛᐅᓐ᙮

ᑈᓪ ᑲ ᐊᔨᒧᒪᑦ ᐅᓂᓯᒪᓴ

⁸ ᐊᐅᒄ ᒪᒃ ᐛᒋ ᐎ ᑯᒂᒋᒥᑕᓐ ᒐᒂᓐ ᐊ ᒋᔅᒐᔨᒥᑕᓐ ᐊᔅᐱᔅ ᓴᒋᐃᑥᐤ ᐊᐛᓐᒋ᙮ ᐊᑈᔅᑕᓐ ᐊ ᑕᔭᓐ ᒋᐸ ᒋ ᐎᓱᐛᑎᑎᓐ ᑕᓐ ᒐ ᐃᑎᔨᓐ᙮

⁹ ᒥᒄ ᒪᒃ ᓴᒋᐃᐛᐅᓐ ᓂ ᐃᑐᑕᑯᓐ ᐃᔭᐱᒡ ᒐᒋ ᑯᒂᒋᒥᑕᓐ᙮ ᓇᒪ ᒋᑭ ᐅᒋ ᐊᔨᐧᑭᒥᐃᑎᓐ ᐊ ᐎᑎᒪᑕᓐ ᑕᓐ ᒋᐸ ᐃᑎᓐ ᐊᑎ ᐊ ᒋᓴᐃᔪᔭᓐ ᑭᔭ ᑲᒪᑯᓄᐛᓯᐅᒋᐛᐱᒡ ᐊ ᑕᔭᓐ ᐊᒋ ᐊᔨᒧᒥᒃ ᒋᓴᔅ᙮

¹⁰ ᒋ ᐎ ᑯᒂᒋᒥᑎᓐ ᒪᒃ ᒐᒋ ᐎᒋᐃᑦ ᐊᓐ ᐛᔅᑭᒡ ᒋᑦ ᐊᐱᒋᐊᑭᓐ ᐅᓂᓯᒪᔅ ᑲ ᐃᓯᓂᐧᑲᓱᑦ᙮ ᐛᔅ ᒧᔭᒻ ᑎᐱᔨᐛ ᓂᑯᔅ ᓂᑦ ᐃᑕᔨᒪᐤ ᓂᔾ ᐊᒋ ᐊᔨᒧᑎᒧᒃ ᒥᔽᒋᒧᐅᓂᔪᐤ ᐃᔅᐱ ᒐ ᑕᑈᔭᔨᒪᑦ ᒋᓴᓴ᙮ ᐅᑕ ᑲᒪᑯᓄᐛᓯᐅᒋᐛᐱᒡ ᐊ ᑕᔭᓐ ᐊᑯᑕ ᑲ ᐱᒪᒋᐅᑦ᙮

¹¹ ᑕᑈ ᑭᑈ ᓇᒪ ᒐᒂᔪᐤ ᒋ ᐅᒋ ᐃᑕᐱᒋᐊᐤ ᐊᓐᑕ ᐅᑕᒡ᙮ ᐊᓄᒡ ᒪᒃ ᑕᐱᔅᑯᓐ ᑕᑈ ᒋᑭ ᒥᔪ ᐊᐱᒋᐊᓄᐤ᙮

¹² ᐊᑯ ᒪᒃ ᑲᐤ ᐊ ᐃᑎᓴᐅᒃ ᐊᓐᑕ ᐊ ᑕᐅᑦ᙮ ᒥᒄ ᒪᒃ ᐎ ᒋᔅᒐᔨᑕ ᓇᔅᒡ ᐊ ᒥᒐᔨᑎᒪᓐ ᐊ ᐱᔅᑎᓂᒃ᙮

¹³ ᓂᐸ ᒥᔽᔨᑕᓐ ᑭᑈ ᐅᑕ ᒋ ᑭᓄᐛᔨᒪᐅᒋᐱᓇ᙮ ᐊᑯ ᒪᒃ ᒧᔭᒻ ᒋᔾ ᐸᐃᓕᒪᓐ ᐊ ᐎᒋᐃᔨᓐ ᒋᐸ ᐃᓯᓇᑯᓐ ᐅᑕ ᒋ ᐃᑕᑯᐱᓇ ᐅᓂᓯᒪᔅ ᒪᒂᒡ ᑲᒪᑯᓄᐛᓯᐅᒋᐛᐱᒡ ᐊ ᑕᐅᒡ ᒥᔽᒋᒧᐅᓐ ᐅᒡ᙮

¹⁴ ᒥᒄ ᒪᒃ ᓇᒪ ᓂ ᐅᒋ ᐎ ᑭᓄᐛᔨᒪᐤ ᐊᑲ ᐊᔅᒄ ᐅᒋ ᓂᔅᑯᒧᔨᓐ᙮ ᓂᐸ ᒥᔽᔨᑕᓐ ᒋᔾ ᑎᐱᔨᐛ ᐛᑕᔨᑎᒥᓐ ᑕᓐ ᒐ ᐃᑎᓱᐛᑎᑦ ᐅᓂᓯᒪᔅ, ᓇᒪ ᒋ ᐎ ᐊᔨᐧᑭᒥᐃᑎᓐ᙮

¹⁵ ᒂᔄᓐ ᐊᔪᐅᒄ ᐅᔭ ᐛᒋ ᐱᔅᑎᓂᑯᑦ ᐅᓂᓯᒪᔅ ᒋᓴᒪᓂᑐᐛ ᒐᒋ ᓂᑭᑎᔅᒃ ᐊᔅᒄ ᐊᓐᑕ ᐸᑎᒪ ᒧᔅ ᒐᒋ ᑕᑦ ᐊᓐᑕ ᐊ ᑕᐅᑦ᙮

¹⁶ ᑕᐸ ᐊᑯ ᐊᐱᒋᐊᑭᓐ ᒋᑭ ᐅᒋ ᐃᓯ ᑭᓄᐛᐱᒪᑭᓄᐤ᙮ ᐃᐛᒃ ᒋᔅᑕᔨᑕᑯᓱᐤ ᐃᔅᐱᔅ ᐊᐱᒋᐊᑭᓇ᙮ ᒧᔭᒻ ᑎᐱᔨᐛ ᒋᐧᑲᓂᓯᓄᐤ ᒋᑭ ᐃᓯ ᑭᓄᐛᐱᒪᓄᐤ᙮ ᐊᔪᐅᒄ ᐛᔅ ᑭᑈ ᓂᔾ ᐊ ᐃᓯ ᑭᓄᐛᐱᒥᒃ᙮ ᐊᐅᑯᓐ ᒪᒃ ᒧᔭᒻ ᑭᔭ ᒋᔾ ᒐ ᐃᓯ ᑭᓄᐛᐱᒥᑦ, ᒧᔭᒻ ᑎᐱᔨᐛ ᒋᐧᑲᓂᔅ ᑭᔭ ᐅᑎᐸᔨᒋᒐᐤ ᐅᑦ ᐊᐱᒋᐊᑭᓇ᙮

¹⁷ ᑕᑈ ᓂᐎᒐᐛᑭᓐ ᐊ ᐃᑕᔨᒧᐅᓇ ᒥᒄ ᐃᓯ ᐱᑎᑲᐃ ᒧᔭᒻ ᓂᔾ ᒋᐸ ᐃᑐᑐᐅᓐ ᓂᑐᐛᐱᒥᑕᓐ᙮

¹⁸ ᒧᔭᒻ ᐊ ᑎᑯᓂᔨᒂ ᑕᓐ ᑲ ᐃᓯ ᒥᒋᐱᔨᐃᔅᒃ ᒪᒃ ᐊ ᑎᑯᓂᔨᒂ ᐊ ᐃᓯ ᒥᓯᓇᐊᒪᔅᒃ ᓂᔾ ᓂᑭ ᒥᔪᐱᔨᑕᓐ᙮

¹⁹ ᐊᑯ ᒪᒃ ᓂᔾ ᑎᐱᔨᐛ ᐊ ᐃᑎᓯᓇᐃᒐᔭᓐ, ᓂᔾ ᑈᓪ, ᒋᑭ ᐱᑯᒥᓯᓇᐊᒪᑎᓐ᙮ ᓇᒪ ᒋᐸ ᐅᒋ ᓂᑐᐛᔨᑕᑯᓐ ᒐᒋ ᒋᔅᒋᓱᒥᑕᓐ ᐊ ᒥᓯᓇᐊᒧᔨᓐ ᒋᔾ ᑎᐱᔨᐛ ᒋᐱᒪᑎᓯᐅᓐ᙮

²⁰ ᐊᑯ ᒪᒃ ᐊ ᓴᒋᐃᑦ ᐅᑎᐸᔨᒋᒐᐤ, ᓂᐧᑲᓂᔅ, ᒋ ᐱᑯᓴᔨᒥᑎᓐ ᒐᒋ ᐃᑐᑎᒥᓐ ᐅ ᑲ ᐃᓯ ᑯᒂᒋᒥᑕᓐ ᒐᒋ ᐃᑎᔨᓐ᙮ ᓇᔅᒡ ᒋᑭ ᒥᔽᔨᑎᒥᐃᓐ ᐃᑐᑎᒥᓇ ᑕᓐ ᑲ ᐃᓯ ᑯᒂᒋᒥᑕᓐ᙮

²¹ ᓂ ᒐᔅᑎᓇᐅᓐ ᒪᒃ ᑕᑈ ᒐ ᐃᑐᑎᒥᓐ ᒥᓯᐛ ᐅ ᑲ ᐃᓯ ᐊᔨᒧᑎᒪᑕᓐ ᒐᒋ ᐃᑎᔨᓐ᙮ ᓂ ᒐᔅᑎᓇᐅᓐ ᑭᔭ ᐊᔪᐛᒃ ᐃᔭᐱᒡ ᒐ ᐃᑐᑎᒥᓐ᙮

²² ᒥᓐ ᑯᑎᒡ ᒐᒂᓐ ᑲ ᐎ ᑯᒂᒋᒥᑕᓐ ᒐᒋ ᐃᑐᑎᒧᔨᓐ᙮ ᒋᐸ ᒋ ᐊᔭᔅᑯᔅᑎᒧᐅᓐ ᐸᐃᒄ ᑲᐱᔅᒋᒐᔭᒡ ᐊᓐᑕ ᒋᒋᒡ᙮ ᐛᔅ ᓂ ᐱᑯᓴᔨᒪᐤ ᒋᓴᒪᓂᑐᐤ ᒐᒋ ᓇᐃᐱᔨᑐᐅᑦ ᐎᐱᒡ ᒐᒋ ᓂᑐᐛᐱᒥᑎᑯᒡ ᒧᔭᒻ ᐊ ᐃᓯ ᓂᑐᑎᒧᐛᒄ᙮

ᐛᒋᔭᒧᐛᐅᓐ

²³ ᒋ ᐎᒐᐛᑭᓄᐤ ᐊᐸᑉᕋᔅ ᑭᔭ ᐎᔾ ᑕᐤ ᐅᑕ ᑲᒪᑯᓄᐛᓯᐅᒋᐛᐱᒡ ᐊᓂᔭ ᐅᒋ ᐊᒋ ᐊᔨᒧᒪᑦ ᒋᓴᓴ᙮ ᒋ ᐛᒋᔭᒥᑯᐛᐤ ᑭᔭ ᐎᔾ᙮

²⁴ ᒋ ᐛᒋᔭᒥᑯᐛᐅᒡ ᑭᔭ ᒪᕐᒃ, ᐊᕆᔅᑕᕐᑲᔅ, ᑎᒪᔅ ᑭᔭ ᓗᒃ᙮ ᑭᔭ ᐎᔨᐛᐤ ᐅᒡ ᐊᑐᔅᑯᐛᐅᒡ ᐅᑎᐸᔨᒋᒐᐛ᙮

²⁵ ᓂ ᓂᑐᑎᒪᓐ ᐅᑎᐸᔨᒋᒐᐤ ᒋᓴᔅ ᙭ ᒥᓯᐛ ᒐᒋ ᓱᐛᔨᒥᑕᒄ᙮ ᐊᒥᓐ᙮