ᒥᔽᒋᒧᐅᓂᔪᐤ ᑲ~ᒥᓯᓇᐊᐧᒃ ᒪᕐᒃ 5 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒋᓴᔅ ᑲ ᒥᓏᒋᐊᑦ ᓇᐸᐛ ᒥᒋ ᐊᒐᒂ ᑲ ᐱᒋᔅᑲᑯᔨᒋ ᒪᑎᔪᐤ 8.28-34 ; ᓗᒃ 8.26-39 1 ᒐᒃ ᒋ ᒥᓯᑲᐅᒡ ᓇᑕ ᐊᑲᒥᒡ, ᑲᕋᓯᓐ ᑲ ᐃᓯᓂᐧᑲᑕᔨᒡ ᐊᔅᒋᔪᐤ᙮ 2 ᒋᓴᔅ ᒪᒃ ᑲ ᑭᐸᑦ ᑎᐛᒡ ᒋ ᐸᒋ ᓂᒋᔅᑲᑯᐤ ᓇᐸᐛ ᒥᒋ ᐊᒐᒂ ᐊ ᐱᒋᔅᑲᑯᔨᒋ ᒋᐱ ᐊᔅᒋᒡ ᐊ ᐅᑐᑕᔨᒋ᙮ 3 ᐊᑯᑕ ᐊᓐᑕ ᒋᐱ ᐊᔅᒋᒡ ᑲ ᐎᒋᑦ ᐅ ᓇᐸᐤ᙮ ᓇᒪ ᓴᔅ ᐅᒋ ᐃᑕᐱᐧᑲᓱᐤ ᐊᑎ ᐃᓴᒂᔭᐱᔾ ᐊ ᐊᐱᑎᓂᔨᒋ ᐊ ᒪᑯᐱᑕᑭᓄᐅᑦ᙮ 4 ᒥᒐᑥᐤ ᒋ ᒪᑯᐱᑕᑭᓄᔨᒐᓂ ᐅᑎᒋᔭ ᐃᓴᒂᔭᐱᔭ ᐊ ᐊᐱᑎᓂᔨᒋ ᑭᔭ ᐅᓯᑕ ᒋ ᒥᒪᒋᒪᐱᔅᑲᐃᑭᓄᐅᔪᐛ᙮ ᐃᔭᐱᒡ ᒪᒃ ᒋ ᐱᔅᒋᐱᑎᒻ ᐊᓂᔭ ᐃᓴᒂᔭᐱᔪᐤ ᑭᔭ ᒋ ᐱᑯᒋᑕᐤ ᐊᓂᔭ ᐃᓴᒂ ᐅᓯᑎᒡ ᑲ ᒋᑭᒧᔨᒋ᙮ ᓇᔅᒡ ᒋ ᓴᐧᑯᐊᐤ ᐊᐛᔪᐛ ᐊ ᐎ ᒥᒪᒋᑯᓂᑯᑦ᙮ 5 ᐊᓯᑯᒻ ᑎᐱᔅᑲᐛ ᑭᔭ ᐊᓯᑯᒻ ᒋᓯᑲᐛ ᒋ ᐱᐸᒧᑕᐤ ᐊᓐᑕ ᒋᐱ-ᐊᔅᒋᒡ ᑭᔭ ᐱᔅᑯᑎᓇᒡ ᐱᓯᒄ ᐊ ᐱᐸᑕᑯᓯᑦ ᑭᔭ ᐊ ᒥᒪᑎᓱᓱᑦ ᐊᓯᓂᔭ ᐊ ᐊᐱᒋᐊᑦ᙮ 6 ᐛᔪᐎᔅ ᒪᒃ ᒋ ᐃᑕᐤ ᒂ ᐅᒋ ᐛᐱᒪᑦ ᒋᓴᓴ᙮ ᐃᔅᐱ ᒪᒃ ᐎᔭᐱᒪᑦ ᐊᑯ ᒂ ᐊᑎ ᐸᒋ ᒋᒋᐸᑕᑦ, ᒂ ᐊᑎ ᐅᒋᒋᐧᑯᓂᐱᔪᐅᑦ ᒋᓴᓴ ᐅᓯᑎᔨᒡ, 7 ᐊᑯ ᒂ ᑕᑈᑦ ᐊ ᒋᔄᐛᑦ ᐊ ᐃᔅᒋᔄᑦ, “ᒋᓴᔅ, ᒋᔾ ᑲ ᐅᑯᓯᑐᑕᔅᒃ ᒋᓴᒪᓂᑐᐤ ᒪᐅᒡ ᑲ ᐃᔅᐸᔨᑕᑯᓯᑦ, ᑕᓐ ᐛ ᐃᓯᐧᑯᔨᓐ ? ᒋᑦ ᐃᑎᓐ ᐊ ᐸᑐᐅᑦ ᒋᓴᒪᓂᑐᐤ, ᐊᑲᐎᔾ ᓂᓇᐧᑲᑕᔨᒧᐃ !” 8 ᐊᔪᐅᒄ ᐅᔭ ᑲ ᐃᔅᒋᔄᑦ ᐛᔅ ᒋ ᐃᑎᑯᐤ ᒋᓴᓴ, “ᒋᔾ ᒥᒋ ᐊᒐᐧᒄ, ᒪᒋ ᐎᐎᔾ ᐊᓐᑕ ᐊᓐ ᓇᐸᐤ ᑲ ᐱᒋᔅᑯᐎᑦ᙮” 9 ᐊᑯ ᒋᓴᔅ ᒂ ᐃᑕᑦ, “ᑕᓐ ᐊ ᐃᓯᓂᐧᑲᓱᔨᓐ ?” ᒋ ᐃᑎᑯᐤ ᒪᒃ, “ᑲ ᒥᒐᑎᒡ ᓂᑦ ᐃᓯᓂᐧᑲᓱᓐ, ᐛᔅ ᓇᔅᒡ ᑕᑈ ᓂ ᒥᒐᑎᓇᓐ᙮” 10 ᐊᑯ ᓇᔅᒡ ᑲ ᐎ ᐊᔨᐧᑭᒥᐊᑦ ᒋᓴᓴ ᒐ ᐊᑲ ᒋ ᐃᑎᓴᐛᑦ ᐊᓂᔭ ᒥᒋ ᐊᒐᒂ ᐊᓐᑕ ᐎᐎᑎᒥᒡ ᐊᓂᔭ ᐊᔅᒋᔪᐤ᙮ 11 ᒥᒋᒪ ᒪᒃ ᐊᓐᑕ ᒋ ᑕᐅᒡ ᑯᐧᑯᓯᒡ, ᐊ ᒥᒋᓱᒡ ᐊᓐᑕ ᐊᓂᔭ ᐱᔅᑯᑎᓇᔪᐤ᙮ 12 ᐊᓐᒡ ᒪᒃ ᒥᒋ ᐊᒐᐧᑯᒡ ᒋ ᐊᔨᐧᑭᒥᐊᐅᒡ ᒋᓴᓴ ᐊ ᐃᑕᒡ, “ᐊᓐᑕ ᐸᒋ ᐃᑎᓴᐅᓇᓐ ᐊᓐᒡ ᑯᐧᑯᓯᒡ ᐊ ᑕᒡ ᒐᒋ ᐱᒋᔅᑯᐅᒋᒡ᙮” 13 ᐊᐅᑯᓐ ᒪᒃ ᒂ ᐃᑐᑐᐛᑦ ᒋᓴᔅ ᐊᓂᔭ ᑲ ᐃᔅᒋᔄᔨᒋ᙮ ᐊᓐᒡ ᒪᒃ ᒥᒋ ᐊᒐᐧᑯᒡ, ᐃᔅᐱ ᑲ ᐎᐎᔅᑯᐛᒡ ᐊᓂᔭ ᓇᐸᐛ, ᐊᑯ ᐊᓂᔭ ᑯᐧᑯᓴ ᑲ ᐊᓱᐱᒋᔅᑯᐛᒡ᙮ ᐊᑯ ᐊᓐᒡ ᑯᐧᑯᓯᒡ ᑲ ᔭᒥᑕᐅᒋᐸᔨᑐᒡ ᐊᓐᑕ ᐃᔅ ᓴᑲᐃᑭᓂᒡ, ᑲ ᓂᔅᑕᐸᐛᒡ᙮ ᓴᓯᑲᓐ ᒪᒃ ᓂᔄᐤ ᒐᓯᐱᔪᐤ ᒋ ᑕᑎᓯᒐᓂᒋ ᐅᒡ ᑯᐧᑯᓯᒡ᙮ 14 ᐊᓐᒡ ᒪᒃ ᓇᐸᐅᒡ ᑲ ᑭᓄᐛᔨᒪᒡ ᐅᔭ ᑯᐧᑯᓴ ᒋ ᒋᑎᓯᒧᒡ ᒂ ᐛᐎᑕᒡ ᐊᓐᑕ ᐅᑕᓇᒡ ᑭᔭ ᓂᑕᐅᒋᑕᑭᓐ ᐊᔅᒋᒡ ᐅᔭ ᑲ ᐃᔅᐱᔨᒡ᙮ ᒋ ᐃᔅᐸᔨᑐᐅᒡ ᒪᒃ ᐊᐛᓐᒋ ᐊᓐᑕ ᐊ ᐎ ᐛᐸᑕᒡ ᑕᓐ ᑲ ᐃᔅᐱᔨᒡ᙮ 15 ᐃᔅᐱ ᐛᑎᑕᒡ ᒋᓴᓴ ᒋ ᐛᐱᒪᐅᒡ ᐊᓂᔭ ᓇᐸᐛ ᒥᒐᑦ ᒥᒋ ᐊᒐᒂ ᑲᒋ ᐱᒋᔅᑲᑯᔨᒋ ᐊ ᐊᐱᔨᒋ ᐊᓐᑕ ᐊᒋ ᐛᑕᔅᐱᓱᐎᒂᓂ ᑭᔭ ᐊ ᒋᔭᒪᔨᑕᑯᓯᔨᒋ᙮ ᒋ ᑯᔅᑕᒍᐅᒡ ᒪᒃ ᐃᔅᐱ ᐎᔭᐱᒪᒡ ᐅᔭ ᓇᐸᐛ᙮ 16 ᒋ ᑎᐸᒋᒧᐅᒡ ᐊᓐᒡ ᑲ ᐛᐸᑕᒡ ᑕᓐ ᑲ ᐃᔅᐱᔨᒡ ᐊᓂᔭ ᓇᐸᐛ ᒥᒋ ᐊᒐᒂ ᑲᒋ ᐱᒋᔅᑲᑯᔨᒋ, ᑭᔭ ᒋ ᐎᑎᒧᒡ ᑕᓐ ᑲ ᐃᔅᐱᔨᒋ ᐊᓂᔭᔪᐛ ᑯᐧᑯᓴ᙮ 17 ᐊᑯ ᑲ ᐊᔨᐧᑭᒥᐊᒡ ᒋᓴᓴ ᒐᒋ ᓂᑭᑎᒥᔨᒋ ᐊᓂᔭ ᐅᑦ ᐊᔅᒋᐛᐤ᙮ 18 ᒋᓴᔅ ᒪᒃ ᐊ ᐊᑎ ᐳᓯᑦ ᐅᐤᑎᔪᐤ, ᐊᓐ ᓇᐸᐤ ᑲᒋ ᐱᒋᔅᑲᑯᑦ ᒥᒋ ᐊᒐᒂ ᓇᔅᒡ ᒋ ᐎ ᐎᒐᐛᐤ ᒋᓴᓴ᙮ 19 ᓇᒪ ᒪᒃ ᐅᒋ ᓇᐃᒥᑯᐤ ᒋᓴᓴ ᒐᒋ ᐎᒐᐛᑦ᙮ ᒋ ᐃᑎᑯᐤ, “ᒪᒋ ᒋᐛ, ᓂᑐᐛᐱᒥᒡ ᒋᐎᒐᐛᑭᓂᒡ ᑭᔭ ᒋᐛᐧᑯᒪᑭᓂᒡ, ᒐ ᐎᑎᒧᑥᐤ ᑕᓐ ᑲ ᐃᓯ ᒥᔪᑐᑎᒪᔅᒃ ᒋᓴᒪᓂᑐᐤ, ᑭᔭ ᑕᓐ ᑲ ᐃᓯ ᒋᔅᑎᒪᒐᔨᒥᔅᒃ᙮” 20 ᐊᑯ ᐊᓐ ᓇᐸᐤ ᒂ ᔅᑐᑕᑦ ᒥᓯᐛ ᑲ ᐱᐸᔨᑐᑕᑦ ᐊᓂᔭ ᐊᔅᒋᔪᐤ ᐸᐃᑯᔪᐤ ᐅᑕᓇᐛ ᑲ ᐃᓯᓂᐧᑲᑕᔨᒋ ᐊ ᐛᐎᑕᐧᒃ ᑕᓐ ᑲ ᐃᑐᑎᒪᑯᑦ ᒋᓴᓴ᙮ ᒥᓯᐛ ᒪᒃ ᐊᐛᔪᐛ ᑲ ᐸᑕᑯᑦ ᑕᓐ ᑲ ᐃᓯ ᐎᑕᐧᒃ ᒋ ᒥᔅᑲᓯᑎᒥᔪᐛ᙮ ᒐᐃᕋᔅ ᐅᑕᓂᓴ ᑭᔭ ᐊᓐ ᐃᔎᐤ ᑲ ᑕᒋᓂᒺᑦ ᒋᓴᓴ ᐅᑦ ᐊᑯᐱᔪᐤ Mark 5.21-43 (Proper-8 Year B) ᒪᑎᔪᐤ 9.18-26 ; ᓗᒃ 8.40-56 21 ᐊᑯ ᒥᓐ ᒂ ᐊᓱᐊᐧᒃ ᒋᓴᔅ ᐊᓂᔭ ᓴᑲᐃᑭᓂᔪᐤ᙮ ᐃᔅᐱ ᒪᒃ ᒪᓯᑲᑦ ᓇᑕ ᐊᑲᒥᒡ ᒋ ᒥᔅᑎ ᒥᒐᑎᔪᐛ ᐊᐛᔪᐛ ᐊ ᐸᒋ ᓇᓯᐸᑕᑯᑦ᙮ 22 ᐸᐃᒄ ᓇᐸᐤ ᒐᐃᕋᔅ ᐊ ᐃᓯᓂᐧᑲᓱᑦ ᒋ ᐸᒋ ᐅᑎᑕᒧᓂᐱᔪᐤ ᒋᓴᓴ ᐅᓯᑎᔨᒡ᙮ ᐊᐅᒄ ᐸᐃᒄ ᓇᐸᐤ ᑲᓂᑲᓂᔅᑲᐧᒃ ᐊᔭᒥᐊᐅᒋᐛᐱᔪᐤ᙮ 23 ᒋ ᓂᑐᑎᒧᐛᐤ ᒋᓴᓴ ᐊ ᐃᑕᑦ, “ᓴᔅ ᒐᑲᑦ ᓂᐳᐤ ᓂᑕᓂᔅ᙮ ᒋ ᐎᓴᒥᑎᓐ ᒐᒋ ᐸᒋ ᓴᒥᓂᑦ ᒐᒋ ᒥᓏᑎᓯᑦ ᑭᔭ ᓇᒪ ᒋᑭ ᐅᒋ ᓂᐳᐤ᙮” 24 ᒋᓴᔅ ᒪᒃ ᒋ ᐎᒐᐛᐤ ᐅᔭ ᓇᐸᐛ᙮ ᒥᒐᑦ ᐊᐛᔪᐛ ᒋ ᐎᒐᐅᑯᐤ ᐊ ᓯᓯᑐᐅᔅᑲᑯᑦ ᐊ ᐃᔅᐱᔅ ᒥᒐᑎᔨᒋ᙮ 25 ᒋ ᑕᐤ ᐊᓐᑕ ᐸᐃᒄ ᐃᔎᐤ ᓴᔅ ᓂᓱᓴᑉ ᐱᐳᓇ ᐊᒋ ᐃᑕᐧᑯᓯᒂ ᐊ ᐅᓂᑕᑦ ᒪᓐ ᒥᐧᑯᔪᐤ᙮ 26 ᐊᑎ ᐊᒋ ᓂᑐᐛᐱᒪᑦ ᓂᓇᐧᑯᐤ ᓂᑐᐧᑯᐃᔨᓴ ᒐᒋ ᐎᒋᐃᑯᑦ ᐃᔭᐱᒡ ᒋ ᓂᓇᐧᑲᑕᔨᒧᐃᑯᐤ ᐅᔭ ᑲ ᐃᑕᔅᐱᓇᑦ᙮ ᒐᒃ ᒪᒃ ᒋ ᒪᔅᑎᓂᒻ ᒥᓯᐛ ᐅᓱᓇᔭᓂᒻ ᐊ ᒋᓯᐧᑯᐛᑦ ᐅᔭ ᓂᑐᐧᑯᐃᔨᓴ᙮ ᐃᔭᐱᒡ ᒪᒃ ᐊᐅᑯᓐ ᑲ ᐃᑎᑦ ᐊ ᐅᓂᑕᑦ ᒪᓐ ᒥᐧᑯᔪᐤ᙮ ᐊᑐᐎᔅ ᑭᔭ ᒋ ᐊᑎ ᐊᐧᑯᓱᐤ᙮ 27 ᒋ ᐸᑎᒧᑯᐱᓇ ᑕᓐ ᑲ ᐃᑕᒋᒪᑭᓄᔨᒋ ᒋᓴᓴ ᐊᑯ ᐊᓂᔭ ᐊ ᐸᒋ ᐎᒋᐃᐛᑦ ᐊᓐᑕ ᐊ ᒥᒐᑎᓇᓄᐎᒡ ᒋ ᐎ ᐸᓱᐛᐱᒪᐤ ᒋᓴᓴ ᐊ ᐃᑕᔨᑕᐧᒃ, 28 “ᐊᑎ ᒥᒄ ᑕᒋᓂᒧᒐ ᐅᑦ ᐊᐱᒋᑕᐅᓇ ᓂᑭ ᒋ ᒥᓏᑎᓯᓐ᙮” 29 ᒋ ᑕᒋᓂᒺᐤ ᐅᑦ ᐊᑯᐱᔪᐤ ᐊᑯ ᑎᐛᒡ ᒂ ᒋᐱᒋᑯᐎᔨᒡ ᐅᒥᐧᒄ᙮ ᑭᔭ ᒋ ᒧᓯᑕᐤ ᐱᒋᔪᐤ ᑕᑈ ᐊ ᒥᓏᒋᐊᑭᓄᐅᑦ ᐊᓂᔭ ᑲ ᐃᑕᔅᐱᓇᑦ᙮ 30 ᒋᓴᔅ ᒪᒃ ᑎᐛᒡ ᒋ ᒋᔅᒐᔨᑎᒻ ᒥᓏᒋᐃᐛᐤ ᓱᐧᑲᑎᓯᐅᓂᔪᐤ ᐊᒋ ᐎᐎᐱᔨᒡ ᐊᓐᑕ ᐊ ᑕᑦ ᐅᒡ᙮ ᒂ ᑭᓄᐛᐱᒪᑦ ᒥᓯᐛ ᐊᓂᔭ ᐊᐛᔪᐛ ᐊᑯ ᒂ ᐃᑕᑦ, “ᐊᐛᓐ ᑲ ᐸᒋ ᑕᒋᓇᐧᒃ ᓂᑦ ᐊᑯᐱᔪᐤ ?” 31 ᐅᒋᔅᒋᓄᐊᒧᐛᑭᓇ ᒪᒃ ᒋ ᐃᑎᑯᐤ, “ᒋᐛᐱᒪᐅᒡ ᐊ ᐃᔅᐱᔅ ᒥᒐᑎᒡ ᐊᐛᓐᒋ ᐊᓐᑕ ᐛᔅᑲ ᐊ ᑕᔨᓐ ᐃᔭᐱᒡ ᒪᒃ ᐊ ᐃᔅᒋᔄᔨᓐ ᐊᐛᓐ ᑲ ᐸᒋ ᑕᒋᓂᑦ ?” 32 ᐊᑯ ᒂ ᐃᑕᐱᑦ ᒋᓴᔅ ᐊ ᓇᓂᑐᐛᐱᒪᑦ ᐊᓂᔭ ᐊᐛᔪᐛ ᑲ ᑕᒋᓂᑯᑦ᙮ 33 ᐊᑯ ᒪᒃ ᐊᓐ ᐃᔎᐤ ᐊ ᒋᔅᒐᔨᑕᐧᒃ ᑕᓐ ᑲ ᐃᑐᑎᒧᐛᑭᓄᐅᑦ, ᒋ ᐸᒋ ᐅᑎᑕᒧᓂᐱᔪᐤ ᒋᓴᓴ ᐊ ᑕᔨᒋ ᐊ ᓂᓇᒥᐱᔨᑦ ᐊ ᐃᔅᐱᔅ ᓴᒋᓯᑦ᙮ ᐊᑯ ᒂ ᐎᑎᒧᐛᑦ ᐎᔾ ᐊᒋ ᑕᒋᓇᑦ᙮ 34 ᐊᑯ ᒋᓴᔅ ᒂ ᐃᑕᑦ ᐅᔭ ᐃᔎᐛ, “ᓂᑕᓂᔅ, ᒋᑕᑈᑎᒧᐅᓐ ᒋ ᒥᓏᒋᐃᑯᓐ᙮ ᒪᒋ ᒪᒃ ᒋᔭᒪᔨᑎᒧᐅᓐ ᐊᔭ᙮ ᐛᔅ ᓴᔅ ᑕᑈ ᒋ ᒥᓏᑎᓯᓐ᙮” 35 ᒪᒂᒡ ᒪᒃ ᐊᔅᒄ ᐊ ᐃᔨᒥᑦ ᒋᓴᔅ ᒋ ᐅᒋ ᑎᑯᓯᓂᔪᐛ ᐊᐛᔪᐛ ᐊᓐᑕ ᒐᐃᕋᓴ ᐊ ᑕᔨᒋ ᐊ ᐅᑐᑕᔨᒋ ᒐᒋ ᐸᒋ ᐎᑎᒧᐛᒡ ᒐᐃᕋᓴ ᓴᔅ ᐊᑲ ᐱᒪᑎᓯᔨᒋ ᐅᑕᓂᓯᔪᐛ᙮ ᒋ ᐃᑕᐅᒡ ᒪᒃ ᐊᑲ ᐃᑕᔨᑕᑯᓂᔨᒡ ᐊᑐᐎᔅ ᒐᒋ ᐅᑎᒪᐊᔨᒋ ᒋᔅᑯᑎᒪᒐᓱᐛ᙮ 36 ᒋᓴᔅ ᒪᒃ ᓇᒪ ᐅᒋ ᐊᐱᓯᑐᐛᐤ ᐅᔭ ᐊᑯ ᒂ ᐃᑕᑦ ᐊᓂᔭ ᒐᐃᕋᓴ, “ᐊᑲᐎᔾ ᑯᔅᑕᒋ, ᒥᒄ ᑕᑈᑕ᙮” 37 ᐊᑯ ᒋᓴᔅ ᓇᒪ ᐅᒋ ᐱᔅᑎᓇᐤ ᐊᐛᔪᐛ ᒐᒋ ᓇᓴᐅᑯᑦ ᒥᒄ ᐱᑕᕋ, ᒋᒥᓴ ᑭᔭ ᐊᓂᔭ ᐎᐧᑲᓂᓯᔪᐛ ᒠᓇ᙮ 38 ᐃᔅᐱ ᐛᑎᑎᒺᒡ ᒐᐃᕋᓴ ᐎᒋᔪᐤ ᒋ ᐛᐱᒪᐅᒡ ᐊᓂᔭ ᐊᐛᔪᐛ ᐊᓐᑕ ᑲ ᑕᔨᒋ ᓇᔅᒡ ᐊ ᐃᑎᑕᑯᓯᔨᒋ, ᐊ ᐅᒋᑯᐛᐱᔨᒋ ᑭᔭ ᐊ ᐊᓯᒂᒪᔨᒋ᙮ 39 ᐃᔅᐱ ᒋᓴᔅ ᑲ ᐱᒐᑦ ᐊᓂᔭ ᒥᒋᐛᐱᔪᐤ ᒋ ᐃᔅᒋᔄᐤ, “ᒐᒂᓐ ᐛᒋ ᓇᔅᒡ ᐃᑎᑕᑯᓯᔭᒄ ? ᒐᒂᓐ ᐛᒋ ᐅᒋᑯᐛᐱᔭᒄ ? ᑕᐸ ᓂᐳᐤ ᐅ ᐃᔎᔅ ᒥᒄ ᐛᔅ ᐊᓐ ᓂᐸᐤ᙮” 40 ᑎᐛᒡ ᒥᒄ ᒋ ᐅᓯᓇᑯᐤ ᐅᔭ ᑲ ᐃᑕᑦ᙮ ᐊᑯ ᒥᓯᐛ ᒂ ᐎᐎᑎᓴᐛᑦ᙮ ᐊᑯ ᐊᓐ ᐊᐛᔅ ᐅᑲᐎᔭ, ᑭᔭ ᐅᑕᐎᔭ ᑭᔭ ᐊᓂᔭ ᒋᓴᔅ ᑲ ᐎᓴᒪᑦ ᐊᐅᑯᓂ ᒥᒄ ᐅᔭ ᑲ ᓇᐊᔨᒪᑦ ᒐᒋ ᐱᒐᔨᒋ ᐊᓐᑕ ᐊ ᑕᔨᒋ ᐊᓂᔭ ᐊᐛᓴ᙮ 41 ᒂ ᐅᑎᓂᒺᑦ ᐅᑎᒋᔪᐤ ᐊᓂᔭ ᐊᐛᓴ, ᒂ ᐃᑕᑦ, “ᑕᓕᑕ, ᑯᒻ᙮” ᐊᐅᑯᐤ ᐊ ᐃᓯ ᐃᔅᒋᔄᒥᑲᒡ ᐅ, “ᐃᔎᔅ, ᐅᓂᔾ ᒋᑦ ᐃᑎᓐ᙮” 42 ᑎᐛᒡ ᒪᒃ ᒋ ᐅᓂᐤ ᐊᓐ ᐃᔎᔅ ᑲ ᐊᑎ ᐱᐸᒧᑕᑦ᙮ ᓴᓯᑲᓐ ᒋ ᓂᓱᓴᐳᓇᓯᒐ ᐅ ᐃᔎᔅ᙮ ᒥᓯᐛ ᒪᒃ ᐊᓐᒡ ᐊᓐᑕ ᑲ ᑕᒡ ᓇᔅᒡ ᒋ ᒥᔅᑲᑕᔨᑎᒥᐃᑯᐅᒡ ᑲ ᐛᐸᑕᒡ ᑕᓐ ᑲ ᐃᔅᐱᔨᒡ᙮ 43 ᒋᓴᔅ ᒪᒃ ᒋ ᐃᑎᓱᒪᐤ ᒐ ᐊᑲ ᒋ ᐎᑎᒧᐛᔨᒋ ᑯᑎᑲ ᐊᐛᔪᐛ ᑕᓐ ᑲ ᐃᔅᐱᔨᒡ᙮ ᐊᑯ ᒂ ᐃᑕᑦ ᒐᒋ ᒥᔭᑭᓄᔨᒋ ᐊᓂᔭ ᐃᔎᓴ ᒐᒂᔪᐤ ᒐᒋ ᒥᒋᔨᒋ᙮ |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.