ᒥᔽᒋᒧᐅᓂᔪᐤ ᑲ~ᒥᓯᓇᐊᐧᒃ ᒪᕐᒃ 4 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒋᔅᑯᑎᒪᒐᐤ ᑎᐸᒋᒧᐅᓐ ᐊᓐᑕ ᑲ ᐊᔨᒧᒪᑭᓄᐅᑦ ᓇᐸᐤ ᑲ ᐊᓯᒋᐛᐱᓇᐧᒃ ᓂᑕᐅᒋᑕᑭᓇ ᒪᑎᔪᐤ 13.1-9 ; ᓗᒃ 8.4-8 1 ᐸᐃᒂᐤ ᒥᓐ ᐊ ᒋᔅᑯᑎᒪᒐᑦ ᒋᓴᔅ ᓯᓱᒡ ᑲᓕᓕ ᓴᑲᐃᑭᓂᒡ, ᒐᒃ ᒋ ᐊᑎ ᒥᒐᑎᔪᐛ ᐊᐛᔪᐛ ᐊ ᐸᒋ ᓂᑐᑕᑯᑦ᙮ ᐊᑯ ᒂ ᐳᓯᑦ ᐅᐤᑎᔪᐤ, ᑲ ᐊᑯᒧᑦ ᐊᓐᑕ ᓴᑲᐃᑭᓂᒡ᙮ ᐊᑯ ᐊᓂᔭ ᒥᒐᑦ ᐊᐛᔪᐛ ᒂ ᐸᒋ ᑎᑯᓯᓂᔨᒋ ᐊ ᐎ ᓂᑐᑕᑯᑦ ᐊᓐᑕ ᓯᓱᒡ ᒋ ᑕᔪᐛ᙮ 2 ᒥᔅᑎ ᒪᒃ ᒋ ᒋᔅᑯᑎᒧᐛᐤ ᒋᔅᑯᑎᒪᒐᐤ ᑎᐸᒋᒧᐅᓇ ᐊ ᐊᐱᒋᑕᑦ᙮ ᒋ ᐃᑕᐤ ᒪᒃ, 3 “ᓂᑐᑎᒧᒄ ᒪ, ᐸᐃᒂᐤ ᓇᐸᐤ ᒋ ᓂᑕᐅᒋᑕᐤ ᐊᓐᑕ ᐅᓂᑕᐅᒋᑕᑭᓐ ᐊᔅᒋᒡ᙮ 4 ᐊᓂᔭ ᒪᒃ ᐊ ᐊᓯᒋᐛᐱᓇᐧᒃ ᓂᑕᐅᒋᑕᑭᓇ ᐱᔅᒐ ᐊᓐᑕ ᐱᑎᑕᔅᑭᓄᐤ ᒋ ᐸᐸᒋᑎᓂᔪᐛ, ᐊᑯ ᐱᔭᓯᓴ ᒥᓯᐛ ᒂ ᒥᒋᔨᒋ᙮ 5 ᑯᑎᑲ ᓂᑕᐅᒋᑕᑭᓇ ᐊ ᐊᓯᓂᐅᔨᒡ ᒋ ᐸᐸᒋᑎᓂᔪᐛ, ᐊᓐᑕ ᐊᑲ ᒥᒂᒡ ᐊᔅᒋᔪᐎᒡ, ᐎᐱᒡ ᒪᒃ ᒋ ᓴᒋᓂᑕᐅᒋᓂᔪᐛ ᐛᔅ ᑕᐸ ᐅᒋ ᒋᔅᐱᑲᐤ ᐊᓐᑕ ᐊᔅᒋᔾ᙮ 6 ᐃᔅᐱ ᒪᒃ ᓯᔭᑲᔅᑐᐛᑦ ᐱᓯᒻ ᒋ ᐃᔎᑕᐛ ᐊᓂᔭᔪᐛ ᓂᑕᐅᒋᑕᑭᓇ᙮ ᒐᒃ ᒋ ᐊᑎ ᓂᐱᒥᑭᓇ ᐛᔅ ᑕᐸ ᐅᒋ ᐅᑎᐱᒥᑭᓇ᙮ 7 ᐊᑯ ᐊᓂᔭ ᓂᑕᐅᒋᑕᑭᓇ ᑲ ᐸᐸᒋᑎᒋ ᐊᓐᑕ ᑲ ᑲᓱᑕᐛᔅᑯᒋ ᓂᐱᓯᔭᑎᒂ ᐊ ᑎᑯᓂᔨᒋ, ᐊᑯᑕ ᐊᓐᑕ ᒐᒃ ᑲ ᐊᑎ ᐊᓯᒡ ᓂᑕᐅᒋᒋ᙮ ᒐᒃ ᒪᒃ ᓇᒪ ᐅᒋ ᒥᔪ ᓂᑕᐅᒋᓇ ᐊᓂᔭ ᑲ ᓂᑕᐅᒋᑕᑭᓄᐅᒋ ᐊᒋ ᒋᐱᔅᑲᑐᒥᑲᒋ ᐊᓂᔭ ᑲ ᑲᐛᔎᒋ ᓂᐱᓯᔭᑎᒂ᙮ ᓇᒪ ᒪᒃ ᐅᒋ ᒥᓂᓱᐅᐛ᙮ 8 ᐱᔅᒐ ᒪᒃ ᐊᓂᔭ ᓂᑕᐅᒋᑕᑭᓇ ᐊ ᒥᔪᔅᑭᒥᑲᔨᒡ ᐊᑯᑕ ᑲ ᐃᓯ ᐸᐸᒋᑎᓂᔨᒋ, ᒋ ᒥᔪ ᓂᑕᐅᒋᓇ ᐅᔭ ᑭᔭ ᒂ ᒥᔪ ᒥᓂᓱᔨᒋ᙮ ᐱᔅᒐ ᐅᔭ ᓂᑕᐅᒋᑕᑭᓇ ᓂᔅᑐᔪᐤ ᓂᑕᐅᒋᑕᑭᓇ ᒋ ᐅᒋ ᓂᑕᐅᒋᓇ ᐊᓐᑕ ᐅᒋ, ᐊᑯ ᐱᔅᒐ ᐊᓱᑕᒡ ᑕᑐᔪᐤ ᒋ ᐅᒋ ᓂᑕᐅᒋᓇ, ᐊᑯ ᑯᑎᑲ ᐸᐃᑯ ᒥᑕᓯᒥᑎᓄᐤ᙮” ᐊᔪᐅᒄ ᐅᔭ ᑎᐸᒋᒧᐅᓂᔪᐤ ᑲ ᐎᑕᐧᒃ ᒋᓴᔅ᙮ 9 ᒋ ᐃᑕᐤ ᒪᒃ, “ᐊᓐ ᐊᐛᓐ ᑲ ᐎᑐᐅᑲᑦ ᐊ ᓂᓇᐃᑕᐧᒃ ᒪᒃ, ᐃᔭᒂ ᒋᑭ ᐎ ᓂᑐᑎᒻ᙮” ᐊ ᐃᑎᑕᒂᒋ ᒋᔅᑯᑎᒪᒐᐤ ᑎᐸᒋᒧᐅᓇ ᒪᑎᔪᐤ 13.10-17 ; ᓗᒃ 8.9 , 10 10 ᐃᔅᐱ ᒪᒃ ᒥᓐ ᒥᒄ ᐎᔨᐛᐤ ᐊ ᑕᒡ ᒋᓴᔅ, ᐱᔅᒐ ᐊᐛᔪᐛ ᑭᔭ ᐊᓂᔭᔪᐛ ᓂᓱᓴᑉ ᐅᒋᔅᒋᓄᐊᒧᐛᑭᓇ, ᒋ ᑯᒂᒋᒥᑯᐤ ᑕᓐ ᐊ ᐃᓯ ᐎᑎᒪᒐᒥᑭᓂᔨᒡ ᐊᓂᔭ ᑲ ᐃᓯ ᑎᐸᒋᒧᑦ᙮ 11 ᐊᑯ ᒂ ᐃᑕᑦ, “ᔅᒋ ᒥᔨᑯᓇᐛᐤ ᒋᔨᐛᐤ ᒐᒋ ᒋᔅᒐᔨᑎᒪᒄ ᐊᓐ ᒐᒂᓐ ᑯᑎᑭᒡ ᐊᐛᓐᒋ ᐊᑲ ᒥᔭᑭᓄᐎᒡ ᒐᒋ ᒋᔅᒐᔨᑕᒡ, ᐊᐅᒄ ᒐᒋ ᒋᔅᒐᔨᑎᒺᒄ ᒋᓴᒪᓂᑐᐤ ᐅᒋᓴᐅᒋᒪᐅᓐ᙮ ᑯᑎᑭᒡ ᐊᐛᓐᒋ ᐊ ᐊᔨᒧᑎᒧᐛᑭᓄᐎᒡ ᒋᓴᒪᓂᑐᐛ ᐅᒋᓴᐅᒋᒪᐅᓂᔪᐤ᙮ ᒋᔅᑯᑎᒪᒐᐤ ᑎᐸᒋᒧᐅᓇ ᐎᑎᒧᐛᑭᓄᐎᒡ ᒐᒋ ᑎᐱᐱᔨᒡ ᐅ ᑲ ᐃᑎᔅᑕᒡ ᒋᓴᒪᓂᑐᐤ ᐅᑦ ᐃᔨᒧᐅᓂᒡ, 12 ᐊᑎ ᐊ ᐛᐸᑕᒡ ᓇᒪ ᒋ ᓂᔅᑐᓂᒧᒡ ᑭᔭ ᓱᒃ ᐊ ᓂᑐᑐᐛᒡ ᓇᒪ ᒋ ᓂᔅᑐᑎᒧᒡ᙮ ᐛᔅ ᒋ ᓂᔅᑐᓂᒧᐛᐛᒂ ᑭᔭ ᒋ ᓂᔅᑐᑎᒧᐛᐛᒂ, ᓂᐸ ᐸᒋ ᒋᐛ ᓇᑎᑯᒡ ᒐᒋ ᐛᐸᔨᑎᒧᐅᒂᐤ᙮” ᒋᓴᔅ ᑲ ᐊᔨᒧᑕᐧᒃ ᓂᑕᐅᒋᑕᑭᓂᔪᐤ ᒪᑎᔪᐤ 13.18-23 ; ᓗᒃ 8.11-15 13 ᐊᑯ ᒋᓴᔅ ᒥᓐ ᒂ ᐊᑎ ᐃᔅᒋᔄᑦ, “ᓇᒪᐎᔾ ᐊ ᒋ ᓂᔅᑐᑕᓇᐛᐤ ᒋᔨᐛᐤ ᐊ ᐃᓯ ᐎᑎᒪᒐᒥᑲᒡ ᐅ ᑎᐸᒋᒧᐅᓐ ? ᑕᓐᑕ ᒪᒃ ᒐᒋ ᐅᒋ ᓂᔅᑐᑎᒪᒄ ᐊᓂᔭᔪᐛ ᑯᑎᑲ ᑎᐸᒋᒧᐅᓇ ? 14 ᐊᓐ ᐊᐛᓐ ᑲ ᐛᐎᑕᐧᒃ ᒋᓴᒪᓂᑐᐛ ᐅᒥᔽᒋᒧᐅᓂᔪᐤ ᒧᔭᒻ ᓂᑕᐅᒋᒐᓱᐤ ᓂᑕᐅᒋᑕᑭᓇ ᑲ ᐊᓯᒋᐛᐱᓇᐧᒃ ᐃᓯᓇᑯᓱᐤ᙮ 15 ᐊᓂᔭ ᒪᒃ ᓂᑕᐅᒋᑕᑭᓇ ᐱᑎᑕᔅᑭᓄᐤ ᑲ ᐸᒋᑎᒋ, ᐊᐅᑯᓐᒡ ᐅᒡ ᐊᐛᓐᒋ ᐃᔅᐱ ᐱᔭᑕᒡ ᒥᔽᒋᒧᐅᓂᔪᐤ, ᑎᐛᒡ ᒥᒋᒥᓂᑐᐛ ᑎᑯᓯᓂᔪᐛ ᐊ ᐊᑎ ᐅᑎᓂᒥᔨᒋ ᐊᓂᔭ ᒋᐸ ᐃᓯ ᓂᑕᐅᒋᓂᔪᐤ ᐅᑕᐃᐛᒡ᙮ 16 ᐊᑯ ᐊᓂᔭ ᐊᓐᑕ ᐊ ᐊᓯᓂᐅᔨᒡ ᑲ ᐸᒋᑎᒋ ᐊᐅᑯᓐᒡ ᐅᒡ ᐊᐛᓐᒋ ᑎᐛᒡ ᒥᒄ ᑲ ᐃᓯ ᐅᑎᓇᒡ ᐅᔅᑭᒡ ᐱᔭᑕᒡ ᒥᔽᒋᒧᐅᓂᔪᐤ ᓇᔅᒡ ᐊ ᒧᒋᒐᔨᑎᒥᐃᑯᒡ᙮ 17 ᒥᒄ ᒪᒃ ᓇᒪ ᑎᑯᓂᔪᐤ ᑕᓐᑕ ᒐᒋ ᐅᒋ ᔭᐃᒡ ᓂᑕᐅᒋᒡ ᑭᔭ ᓇᒪ ᓇᐅᔅ ᒋ ᐃᓯᑲᐳᐎᒡ᙮ ᐃᔅᐱ ᓇᒋᔅᑲᒡ ᐊ ᐊᔨᒥᓂᔨᒡ ᒪᒃ ᐊ ᒪᔭᔨᒪᑭᓄᐅᒡ ᐊᓂᔭ ᐃᔨᒧᐅᓂᔪᐤ ᐅᒋ ᐊᑯᑕ ᑎᐛᒡ ᒂ ᒋᐛᑲᐳᐅᒡ᙮ 18 ᐊᑯ ᑯᑎᑭᒡ ᐊᐛᓐᒋ ᒧᔭᒻ ᐊᓂᔭ ᓂᑕᐅᒋᑕᑭᓇ ᑲ ᐸᒋᑎᒋ ᐊᓐᑕ ᑲ ᑲᓱᑕᐛᐧᑲᒡ ᒪᔅᑯᓱᐛ ᐊ ᑎᒂᒋ ᐊᐅᑯᓐ ᐊ ᐃᓯᓇᑯᓯᒡ᙮ ᐊᐅᑯᓐᒡ ᐅᒡ ᑲ ᐸᑕᒡ ᒥᔽᒋᒧᐅᓂᔪᐤ, 19 ᒥᒄ ᒪᒃ ᐊᓂᔭ ᓇᔅᒡ ᐊ ᒥᑯᔅᑲᒋᑕᒡ ᐊᔅᒋᔪᐤ ᒐᒂᔪᐛ ᑭᔭ ᓇᔅᒡ ᒥᒄ ᐊ ᐎ ᐅᓱᓇᔭᓂᒥᒡ ᐊ ᐃᑎᒡ ᑭᔭ ᐱᓯᒄ ᐊ ᒧᔅᑕᓇᒡ ᒐᒂᔪᐛ ᒐᒋ ᐊᔭᒡ ᐊᔪᐅᒄ ᐅᔭ ᒐᒃ ᐛᒋ ᓂᓱᐅᓇᑎᓂᔨᒡ ᐅᑕᑈᑎᒧᐅᓄᐛᐤ᙮ ᐊᑯ ᒪᒃ ᓇᒪ ᒋ ᒥᓂᓱᐅᒡ ᐅᐱᒪᑎᓯᐅᓄᐛᒡ᙮ 20 ᐊᑯ ᑯᑎᑭᒡ ᐊᐛᓐᒋ ᒧᔭᒻ ᐊᓂᔭ ᓂᑕᐅᒋᑕᑭᓇ ᑲ ᐸᒋᑎᒋ ᐊᓐᑕ ᐊ ᒥᔪᔅᑭᒥᑲᒡ ᐊᑯᓐ ᐊ ᐃᓯᓇᑯᓯᒡ᙮ ᐃᔅᐱ ᐱᔭᑕᒡ ᒥᔽᒋᒧᐅᓂᔪᐤ ᑎᐛᒡ ᐅᑎᓂᒧᒡ ᑭᔭ ᓄᑯᓂᔪᐤ ᐅᐱᒪᑎᓯᐅᓄᐛᒡ ᒧᔭᒻ ᐊ ᐊᑎ ᒥᓂᓱᐅᒡ ᐊ ᐃᓯᓇᑯᓯᒡ᙮ ᒧᔭᒻ ᓂᑕᐅᒋᑕᑭᓇ ᐊ ᒥᔅᑎ ᒥᓂᓱᐅᒋ ᒐᒃ ᐊᑯᓐ ᐊ ᐊᑎ ᐃᓯᓇᑯᓯᒡ ᐅᒡ᙮ ᑯᑎᑭᒡ ᓂᔅᑐᔪᐤ ᒥᓂᓴ ᒋ ᓂᑕᐅᒋᓂᔪᐛ ᐊᓐᑕ ᐅᒋ ᐊ ᑕᒡ, ᐊᑯ ᑯᑎᑭᒡ ᐊᓱᑕᒡ ᑕᑐᔪᐤ, ᐊᑯ ᑯᑎᑭᒡ ᐸᐃᑯ ᒥᑕᓯᒥᑎᓄᐤ᙮” ᐊᔪᐅᒄ ᐅᔭ ᑲ ᐃᑕᑦ ᒋᓴᔅ ᐊᓂᔭ ᑲ ᑕᑈᔭᔨᒥᑯᑦ᙮ ᐛᔅᑕᐅᓐ ᐊ ᐊᔨᒧᑕᒡ ᓗᒃ 8.16-18 21 ᒥᓐ ᒂ ᐊᑎ ᐃᔅᒋᔄᑦ ᒋᓴᔅ, “ᐃᑐᐤ ᐊ ᐊᐛᓐ ᐊᒋ ᓯᔅᑲᐊᒃ ᐛᔅᑕᓂᐱᒪᑭᓂᔪᐤ ᓯᐸ ᓂᐸᐅᓂᒡ ᒐᒋ ᐊᔅᑕᑦ, ᑭᔭ ᒪᒃ ᒐᒋ ᐊᔅᑕᑦ ᐛᔅᑕᓂᐱᒪᑭᓇᑎᑯᒡ ᐛᔅᑕᓂᐱᒪᑭᓂᒡ ? ᓇᒪᐎᔾ ᐊ ᓴᓯᑲᓐ ᐊᓐᑕ ᓇᐸᒥᔅᑕᐤ ? 22 ᒥᓯᐛ ᒐᒂᓐ ᐊᑲ ᓄᑯᑕᑭᓄᐅᒡ ᒋᑭ ᓄᑯᑕᑭᓄᐤ, ᐊᑯ ᐊᓐ ᑲ ᐊᑯᓇᐃᑭᓄᐅᒡ ᒋᑭ ᒧᓴᔅᑕᐤ᙮ 23 ᓂᑐᑎᒧᒄ ᒪᒃ, ᐊᓐ ᐊᐛᓐ ᑲ ᐎᑐᐅᑲᑦ ᐊ ᓂᓇᐃᑕᐧᒃ ᒪᒃ ᐃᔭᒂ ᒋᑭ ᐎ ᓂᑐᑎᒻ᙮” 24 ᒋᓴᔅ ᑭᔭ ᒋ ᐃᔅᒋᔄᐤ, “ᓂᓇᑭᑐᐛᔨᑎᒧᒄ ᓱᒃ ᒐᒋ ᓂᑐᑎᒪᒄ᙮ ᒥᒄ ᑕᓐ ᒐ ᐃᔅᐱᔅ ᒥᔨᐛᐛᒂ ᐊᑯᓐ ᒐ ᐃᔅᐱᔅ ᒥᔨᑯᔭᒄ ᑭᔭ ᒋᔨᐛᐤ᙮ ᐊᑐᐎᔅ ᒪᒃ ᒥᔅᑎ ᒋᑭ ᒥᔨᑯᓇᐛᐤ᙮ 25 ᐊᓐ ᒪᒃ ᐊᐛᓐ ᑲ ᐊᔭᑦ ᒐᒂᔪᐤ ᐊᑐᐎᔅ ᒋᑭ ᒥᔭᑭᓄᐤ᙮ ᐊᑯ ᐊᓐ ᐊᑲ ᐊᔭᑦ ᒐᒂᔪᐤ ᐊᑎ ᐊᓂᔭ ᑕᓐ ᐊ ᐃᓯ ᐊᐱᓯᔅ ᐊᔭᑦ ᒋᑭ ᐅᑎᓇᑭᓄᐅᔪᐤ᙮” ᓂᑕᐅᒋᑕᑭᓐ ᑲ ᓂᑕᐅᒋᑕᑭᓄᐅᒡ ᑲ ᑎᐸᑐᑕᒡ 26 ᒋᓴᔅ ᑭᔭ ᒥᓐ ᒋ ᐊᑎ ᐃᔅᒋᔄᐤ, “ᒧᔭᒻ ᓇᐸᐤ ᑲ ᐊᓯᒐᐛᐱᓇᑦ ᓂᑕᐅᒋᑕᑭᓇ ᐅᓂᑕᐅᒋᑕᑭᓐ ᐊᔅᒋᒡ ᐊᐅᑯᓐ ᐊ ᐃᑕᔨᑕᑯᓂᔨᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ᙮ 27 ᐊᓐ ᓇᐸᐤ ᓂᐸᐤ ᐊ ᑎᐱᔅᑲᔨᒡ ᐊᑯ ᐃᔅᐱ ᐱᔭᑕᐱᓂᔨᒋ ᐛᓂᑦ᙮ ᓂᑕᐅᒋᓂᔪᐛ ᒪᒃ ᐊᓂᔭᔪᐛ ᓂᑕᐅᒋᑕᑭᓇ ᑲ ᓂᑕᐅᒋᑕᑦ ᒥᒄ ᓇᒪ ᒋᔅᒐᔨᑎᒻ ᑕᓐᑕ ᐛᒋ ᓂᑕᐅᒋᓂᔨᒋ᙮ 28 ᐛᔅ ᐊᔅᒋᔾ ᓂᑕᐅᒋᐃᐛᒥᑭᓐ ᑭᔭ ᓇᑕᐅᒋᔨᒋ ᐊᓂᔭ ᓂᑕᐅᒋᑕᑭᓇ᙮ ᓂᔅᑎᒻ ᓴᒋᓂᑕᐅᒋᓇ ᐊᓐᑕ ᐊ ᓂᐱᓯᐅᒋ ᒐᒃ ᒂ ᐊᑎ ᒋ ᐃᓯ ᓂᑕᐅᒋᒋ ᑭᔭ ᒂ ᐊᑎ ᒥᓂᓱᐅᒋ᙮ 29 ᐅᑎᒋᐱᔨᒐ ᒪᒃ ᒐ ᒥᓂᓯᑲᓄᐅᒋ, ᐃᔅᐱ ᒥᓂᓱᓂᒂᐛ ᐊᓂᔭᔪᐛ ᓂᑕᐅᒋᑕᑭᓇ ᐊᑯ ᒐ ᐊᑐᔅᒐᑦ ᐊᓐ ᓇᐸᐤ ᐊ ᒪᒥᓂᓴᐧᒃ ᐊᓂᔭᔪᐛ ᐅᓂᑕᐅᒋᑕᑭᓇ, ᒥᔅᑯᓯ ᒧᐧᑯᒪᓂᔪᐤ ᐊ ᐊᐱᒋᑕᑦ᙮” ᓂᑕᐅᒋᑕᑭᓐ ᒪᐅᒡ ᑲ ᐊᐱᓴᓯᒡ ᑲ ᑎᐸᑐᑕᒡ ᒪᑎᔪᐤ 13.31 , 32 , 34 ; ᓗᒃ 13.18 , 19 30 ᐊᑯ ᐅᔭ ᒂ ᐊᑎ ᐃᔅᒋᔄᑦ ᒋᓴᔅ, “ᒐᒂᓐ ᒪᒃ ᒐᒋ ᐎᑎᒪᐧᒄ ᒐᒋ ᐃᔅᒋᔄᔭᐧᒄ ᐊᑯᓐ ᐊ ᐃᑕᔨᑕᑯᓂᔨᒡ ᒋᓴᒪᓂᑐᐤ ᐅᒋᓴᐅᒋᒪᐅᓐ ? ᒐᒄ ᒋᔅᑯᑎᒪᒐᐤ ᑎᐸᒋᒧᐅᓐ ᒐᒋ ᐎᑎᒪᐧᒄ ᒐᒋ ᐅᒋ ᒋᔅᒐᔨᑕᒂᒡ ? 31 ᒧᔭᒻ ᐊᓐ ᓂᑕᐅᒋᑕᑭᓐ ᒪᐅᒡ ᑲ ᐊᐱᓯᓯᑦ ᐅᑕ ᐊᔅᒋᒡ ᒪᔅᑎᕐᑦ ᑲ ᐃᓯᓂᐧᑲᑕᑭᓄᐅᑦ ᐊᐅᑯᓐ ᐊ ᐃᓯᓇᒂᒡ ᒋᒋᒋᓯᒄ ᐅᒋᒪᐅᓐ᙮ ᓇᐸᐤ ᐅᑎᓇᐤ ᐅᔭ ᓂᑕᐅᒋᑕᑭᓇ ᐊᑯ ᐊᔅᒋᒡ ᐊ ᐱᔅᑎᓇᑦ ᒐᒋ ᓂᑕᐅᒋᔨᒋ᙮ 32 ᒐᒃ ᒪᒃ ᐊ ᐊᑎ ᓂᑕᐅᒋᔨᒋ᙮ ᐃᔅᐱ ᒪᒃ ᑲᒋ ᐃᓯ ᓂᑕᐅᒋᔨᒋ ᐊᔪᐅᒄ ᐅᔭ ᒪᐅᒡ ᒐᓏᔅᑯᓂᔨᒡ ᐊ ᐃᑕᑎᓂᔨᒋ ᑯᑎᑲ ᓂᑕᐅᒋᑕᑭᓇ᙮ ᐊ ᐃᔅᐱᔅ ᐱᒂᓯᑦ ᐅ ᒥᔅᑎᑯᔅ ᐱᔭᓯᓯᒡ ᐅᐎᒋᔅᑐᓂᐧᑲᓱᐅᒡ ᐊᓐᑕ ᐅᑎᐧᑯᓂᒡ ᐊᓐᑕ ᐊ ᐅᑲᔅᑕᔭᔎᔭᔨᒡ᙮” 33 ᒥᒐᑥᐤ ᒋ ᑎᐸᒋᒧᐤ ᒋᓴᔅ ᐅᔭ ᐊ ᐃᑕᔨᑕᑯᓂᔨᒋ ᑎᐸᒋᒧᐅᓇ ᐊ ᐛᐎᑎᒧᐛᑦ᙮ ᐊᔪᐅᒄ ᐅᔭ ᑲ ᐊᐱᒋᑕᑦ ᐊ ᐛᐎᑎᒧᐛᑦ ᒥᔽᒋᒧᐅᓂᔪᐤ᙮ ᒥᒄ ᑕᓐ ᒐᒋ ᐃᔅᐱᔅ ᓂᔅᑐᑎᒥᔨᒋ ᐊᑯᓐ ᑲ ᐃᓯ ᐎᑎᒧᐛᑦ᙮ 34 ᐊᔪᐅᒄ ᐅᔭ ᐱᓯᒄ ᑲ ᐊᐱᒋᑕᑦ ᐊ ᐃᔨᒪᐊᑦ ᐊᐛᔪᐛ᙮ ᒥᒄ ᒪᒃ ᐃᔅᐱ ᒥᒄ ᐎᔨᐛᐤ ᐊ ᑕᒡ ᐅᒋᔅᒋᓄᐊᒧᐛᑭᓇ ᐊᑯᑕ ᑲᒋ ᐛᐎᑎᒧᐛᑦ ᑕᓐ ᐊ ᐃᓯ ᐃᔅᒋᔄᒥᑭᓂᔨᒋ ᐅᔭ ᑎᐸᒋᒧᐅᓇ᙮ ᑲ ᒥᔅᑎᔪᑎᒡ Mark 4.35-41 (Proper-7 Year B) ᒪᑎᔪᐤ 8.23-27 ; ᓗᒃ 8.22-25 35 ᐊᓂᔭ ᐛᑕᑯᓯᔨᒡ, ᒋᓴᔅ ᒋ ᐃᑕᐤ ᐅᒋᔅᒋᓄᐊᒧᐛᑭᓇ, “ᓇᑕ ᐊᑲᒥᒡ ᐃᔅᒋᒪᑕᐤ᙮” 36 ᐊᑯ ᐊᓐᒡ ᒋᔅᒋᓄᐊᒧᐛᑭᓐᒡ ᒂ ᓂᑭᑕᒡ ᐊᓂᔭᔪᐛ ᐊᐛᔪᐛ ᑲ ᒥᒐᑎᔨᒋ ᐊᑯ ᒂ ᐳᓯᒡ ᐊᓂᔭ ᐅᐤᑎᔪᐤ ᐊᓐᑕ ᑲ ᑕᔨᒋ ᒋᓴᓴ, ᐊᑯ ᒂ ᒋᒋᒪᒡ ᒋᓴᓴ ᐊ ᐳᓯᐊᒡ᙮ ᒋ ᑎᑯᓇ ᑭᔭ ᑯᑎᑲ ᐊ ᒥᓴᔨᒋ ᐅᐤᑕ ᐊ ᐊᑎ ᒧᓴᐅᐱᔨᒋ᙮ 37 ᒐᒃ ᒋ ᐅᒋ ᒥᔅᑎ ᔪᑎᓂᔪᐤ᙮ ᐊᓂᔭ ᒪᒃ ᐊ ᐳᓯᐸᔨᑐᔨᒋ ᑭᔅᑭᓇ ᐅᑦ ᐅᐤᑐᐛᒡ, ᒐᑲᑦ ᒋ ᓴᑭᔅᒋᓇᐸᔪᐤ ᐅᑦ ᐅᐤᑐᐛᐤ᙮ 38 ᐊᓐᑕ ᒪᒃ ᑕᐧᑯᐃᑭᓂᒡ ᒋ ᑕᐤ ᒋᓴᔅ ᐊ ᓂᐸᑦ ᐊ ᐊᔎᓯᒧᑦ ᐊᔎᓯᒧᓂᔪᐤ᙮ ᒋᔅᒋᓄᐊᒧᐛᑭᓐᒡ ᒪᒃ ᒋ ᐸᑯᓄᐅᒡ ᐊ ᐃᑕᒡ, “ᒋᔅᑯᑎᒪᒐᓱᐤ, ᓇᒪᐎᔾ ᐊ ᒐᒂᓐ ᒋᑭ ᐅᒋ ᐃᑕᔨᑕᓐ ᓂᔅᑕᐸᐛᔭᒐ ?” 39 ᒂ ᐅᓂᑦ ᒋᓴᔅ, ᐊᑯ ᒂ ᐃᑎᓱᐛᑕᐧᒃ ᐊᓂᔭ ᑲ ᔪᑎᓂᔨᒡ ᒐᒋ ᐳᓂᐱᔨᒡ, ᐊᑯ ᐊᓂᔭ ᑭᔅᑭᓇ ᒂ ᐃᑕᑦ, “ᒋᔭᒥᓯᒄ, ᐊᑯᓐ ᐊᑯ᙮” ᒋ ᒋᒥᔅᑎᓂᔪᐤ ᑭᔭ ᒂ ᐅᒋ ᐃᔽᔅᑎᓂᔨᒡ᙮ 40 ᒋ ᐃᑕᐤ ᒪᒃ ᒋᓴᔅ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ, “ᒐᒂᓐ ᐛᒋ ᑯᔅᑕᒋᔭᒄ ? ᑕᓐᑕ ᐊᓂᔭ ᒋᑕᑈᑎᒧᐅᓄᐛᐤ ?” 41 ᒋ ᒥᔅᑎ ᒥᔅᑲᑕᔨᑎᒧᒡ ᒪᒃ ᐊᓐᒡ ᒋᔅᒋᓄᐊᒧᐛᑭᓐᒡ ᑕᓐ ᑲ ᐃᓯ ᐛᐸᑕᒡ ᐊ ᐃᔅᐱᔨᒡ ᐊᑯ ᑲ ᐃᔅᒋᔄᒡ, “ᐊᐛᓐ ᐅ ᐛᐛᒡ ᐊ ᔪᑎᓂᔨᒡ ᑭᔭ ᑭᔅᑭᓇ ᐊ ᐱᓯᒋᐃᑯᑦ ?” |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.