ᒥᔽᒋᒧᐅᓂᔪᐤ ᑲ~ᒥᓯᓇᐊᐧᒃ ᒪᕐᒃ 2 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᔅ ᑲ ᒥᓏᒋᐊᑦ ᓇᐸᐛ ᐊᑲ ᐅᒋ ᐊᒋᔨᒋ Mark 2.1-12 (Epiphany-7 Year B)

¹ ᓇᒪ ᒥᒐᑐᐤ ᒋᓯᑲᐛ ᐅᒋ ᐎᒪᐱᔪᐛ ᐊᑯ ᒋᓴᔅ ᒥᓐ ᒂ ᐱᒐᑦ ᐊᓂᔭ ᐅᑕᓇᔪᐤ ᑲᐳᕐᓇᐊᒻ ᑲ ᐃᓯᓂᐧᑲᑕᔨᒡ᙮ ᐃᔅᐱ ᒪᒃ ᐃᔪᒡ ᑲ ᐸᑕᒡ ᒥᓐ ᐊᒋ ᐸᒋ ᒋᐛᔨᒋ ᐊᑯ ᒂ ᒥᓯᑕᔭᒋᒧᓇᓄᐎᒡ ᒥᓐ ᐊ ᑕᑦ᙮

² ᑎᐛᒡ ᒪᒃ ᒥᒐᑦ ᐊᐛᔪᐛ ᒋ ᐸᒋ ᑎᑯᓯᓂᔪᐛ, ᒐᒃ ᓇᒪ ᐅᒋ ᑕᐱᔅᑲᑐᔪᐛ ᐊᓂᔭ ᒥᒋᐛᐱᔪᐤ, ᐛᐛᒡ ᐊᓐᑕ ᐎᐎᑎᒥᒡ ᒋᐱᔎᒡ ᒐᒋ ᑐᐛᔨᒡ᙮ ᒋᓴᔅ ᒪᒃ ᒋ ᑭᒐᔅᒋᒪᐤ ᐊᓂᔭᔪᐛ ᑲ ᑎᑯᓯᓂᔨᒋ, ᒋᓴᒪᓂᑐᐛ ᐅᑦ ᐃᔨᒧᐅᓂᔪᐤ ᐊ ᐊᔨᒧᑎᒧᐛᑦ᙮

³ ᐅᔭ ᒪᒃ ᒪᒂᒡ, ᓇᐤ ᓇᐸᐅᒡ ᒋ ᐅᒋ ᐸᓱᐛᐅᒡ ᐎᑕᐸᐛᐛ ᐊᑲ ᓂᔅᑐᓯᔨᒋ ᐅᑦ ᐊᔅᐱᓯᒧᓂᔨᒡ ᐊ ᐱᒥᓯᓂᔨᒋ᙮

⁴ ᐊᓂᔭ ᒪᒃ ᑲ ᐃᔅᐱᔅ ᒋ ᒥᒐᑎᓇᓄᐎᒡ ᓇᒪ ᒥᒋᒪ ᐅᒋ ᓇᑕᐅᒡ ᒋᓴᓴ᙮ ᐊᑯ ᒂ ᐱᑯᓇᐱᑕᒡ ᐊᓐᑕ ᑕᐧᑯᒡ ᐊᓂᔭ ᒥᒋᐛᐱᔪᐤ ᐊᓐᑕ ᑎᐱᔅᑯᒡ ᑲ ᓂᐳᔨᒋ ᒋᓴᓴ᙮ ᐊᑯᑕ ᑲ ᐅᒋ ᐱᔅᑕᐱᒐᓇᒡ ᐊᓂᔭ ᓇᐸᐛ ᐊᔅᐱᓯᒧᓂᒡ ᐊ ᐱᒥᓯᓂᔨᒋ᙮

⁵ ᒋᓴᔅ ᒪᒃ ᒋ ᐛᐸᑎᒺᐤ ᐅᔭ ᓇᐸᐛ ᐊᔅᐱᔅ ᑕᑈᑎᒥᔨᒋ ᐊᑯ ᐊᑕᑦ ᐊᓂᔭ ᓇᐸᐛ ᐊᑲ ᓂᔅᑐᓯᔨᒋ, “ᓂᑯᓴ, ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ᙮”

⁶ ᒋ ᑕᐅᒡ ᐊᓐᑕ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ, ᐊ ᐃᓯ ᒪᒥᑐᓇᔨᑕᒡ,

⁷ “ᒐᒂᔪᐤ ᐅᔭ ᐛᒋ ᐃᓯ ᐃᔨᒥᑦ ᐅ ᓇᐸᐤ ? ᐸᔅᑕᒧᐤ ᐅᔭ ᑲ ᐃᔅᒋᔄᑦ᙮ ᓇᒪ ᐎ ᓇᐸᐤ ᒋᑭ ᒋ ᐛᐸᔨᑎᒪᒐᐤ ᒥᒋᑥᐅᓇ, ᒥᒄ ᒋᓴᒪᓂᑐᐤ ᒋᑭ ᒋ ᐛᐸᔨᑎᒪᒐᐤ᙮”

⁸ ᒋᓴᔅ ᒪᒃ ᑎᐛᒡ ᒋ ᒧᓯᑕᐤ ᐅᑦ ᐊᒐᐧᑯᒡ ᐅᔭ ᐊ ᐃᓯ ᒪᒥᑐᓇᔨᑎᒥᔨᒋ ᐊᑯ ᐊᑕᑦ, “ᒐᒂᓐ ᐊᓐ ᐛᒋ ᐃᓯ ᒪᒥᑐᓇᔨᑎᒪᒄ ?

⁹ ᑕᓐ ᐃᐛᒃ ᐎᔭᑎᒡ ᒐᒋ ᐃᑕᑭᓄᐅᑦ ᐅ ᓇᐸᐤ ᐊᑲ ᓂᔅᑐᓯᑦ, ‘ᒋ ᐛᐸᔨᑎᒪᑯᐅᓐ ᒋᒥᒋᑥᐅᓇ,’ ᑭᔭ ᒪᒃ ᐃᑕᑭᓄᐅᑦ ‘ᐅᓂᔾ, ᐅᑎᓇ ᒋᑦ ᐊᔅᐱᓯᒧᓐ ᒐ ᐊᑎ ᐱᒧᑕᔨᓐ’ ?

¹⁰ ᒋᑭ ᐛᐸᑎᔨᑎᓇᐛᐤ ᐃᔪᐤ ᐅᑯᓯᓴᓐ ᑕᑈ ᐎᔾ ᐊ ᐊᔭᑦ ᑎᐸᔨᒋᒐᐅᓂᔪᐤ ᐅᑕ ᐊᔅᒋᒡ ᒐᒋ ᐛᐸᔨᑎᒪᒐᑦ ᒥᒋᑥᐅᓇ᙮” ᐊᑯ ᐊᑕᑦ ᐊᓂᔭ ᓇᐸᐛ ᐊᑲ ᓂᔅᑐᓯᔨᒋ,

¹¹ “ᒋᑦ ᐃᑎᓐ, ᐱᓯᑯ, ᐅᑎᓇ ᒋᑦ ᐊᔅᐱᓯᒧᓐ, ᒐ ᒋᐛᔨᓐ᙮”

¹² ᑎᐛᒡ ᒪᒃ ᒋ ᐅᒋ ᐱᓯᑯᐤ ᐊᓐ ᓇᐸᐤ ᓇᔅᒡ ᐊᓐᑕ ᐊ ᒥᒐᑎᓇᓄᐎᒡ, ᒂ ᐊᑎ ᐅᑎᓇᐧᒃ ᐊᓂᔭᔪᐤ ᐅᑦ ᐊᔅᐱᓯᒧᓐ ᐊᑯ ᒂ ᐊᑎ ᔅᑐᑕᑦ᙮ ᒥᓯᐛ ᒪᒃ ᐊᓐᒡ ᐊᓐᑕ ᑲ ᑕᒡ ᒋ ᒥᔅᑲᑕᔨᑎᒥᐃᑯᐅᒡ ᐅᔭ ᑲ ᐃᔅᐱᔨᒡ ᑭᔭ ᒋ ᒪᒥᒋᒪᐅᒡ ᒋᓴᒪᓂᑐᐛ ᐊ ᐃᔅᒋᔄᒡ, ᓇᒪ ᓂᑕ ᓂ ᐅᒋ ᐛᐸᑕᓇᓐ ᐅ ᐊ ᐃᔅᐱᔨᒡ᙮

ᒋᓴᔅ ᑲ ᐎᓴᒪᑦ ᓕᐸᐃᔨᒋ ᒐᒋ ᓇᓴᐅᑯᑦ

¹³ ᒋᓴᔅ ᒪᒃ ᑲᐤ ᒋ ᓇᓯᐸᐤ ᐊᓂᔭ ᑲᓕᓕ ᓴᑲᐃᑭᓂᔪᐤ᙮ ᒋ ᒥᒐᑎᔪᐛ ᐊᐛᔪᐛ ᐊ ᐸᒋ ᓂᑐᐛᐱᒥᑯᑦ ᐊᑯ ᒂ ᒋᔅᑯᑎᒧᐛᑦ᙮

¹⁴ ᐊᓂᔭ ᒪᒃ ᐊ ᐊᑎ ᐱᒧᑕᑦ ᒋ ᐅᑎᑕᐤ ᓇᐸᐛ ᒋᓴᐅᒋᒪᐤ ᓱᓇᔭᔪᐤ ᑲ ᒪᒧᓴᒋᓂᒥᔨᒋ ᐊ ᐃᑕᐱᑎᓯᔨᒋ᙮ ᓕᐸᐃ ᒋ ᐃᓯᓂᐧᑲᓱᔪᐛ᙮ ᐊᓪᐱᔭᔅ ᒋ ᐃᓯᓂᐧᑲᓱᔪᐛ ᐅᑕᐎᔪᐛ᙮ ᒪᒂᒡ ᐊᓐᑕ ᐅᒥᓯᓇᐃᑭᓂᒋᐛᐱᒡ ᒋ ᐊᐳᐤ ᐅ ᓕᐸᐃ᙮ ᐊᑯ ᒂ ᐃᑕᑦ ᒋᓴᔅ, “ᐸᒋ ᐱᐸᐎᒐᐎ᙮” ᒋ ᐱᓯᑯᐤ ᒪᒃ ᓕᐸᐃ ᒂ ᐊᑎ ᐎᒐᐛᑦ ᒋᓴᓴ᙮

¹⁵ ᐸᑎᒪ ᒪᒃ ᒋᓴᔅ ᑭᔭ ᒥᒐᑦ ᐅᒋᔅᒋᓄᐊᒧᐛᑭᓇ ᐊ ᐸᒋ ᐎᒐᐅᑯᔨᒋ ᒋ ᒥᒋᓱᐅᒡ ᐊᓐᑕ ᓕᐸᐃᔨᒋ ᐎᒋᔨᒡ᙮ ᐊᑯᑕ ᑲ ᑕᔨᒋ ᑭᔭ ᒥᒐᑦ ᐊᓂᔭᔪᐛ ᒋᓴᐅᒋᒪᐤ ᓱᓇᔭᔪᐤ ᑲ ᒪᒧᓴᒋᓂᒥᔨᒋ ᑲ ᐃᑕᐱᑎᓯᔨᒋ ᑭᔭ ᐊᑯᑕ ᑲ ᑕᔨᒋ ᐊᓂᔭᔪᐛ ᑯᑎᑲ ᐊᐛᔪᐛ ᑲ ᒥᒐᑎᓯᔨᒋ᙮

¹⁶ ᐊᑯ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᐊᓂᔭᔪᐛ ᐸᕆᓯᐊ ᑲ ᐊᐱᒋᐃᑯᒡ ᒋ ᐛᐱᒪᐅᒡ ᒋᓴᓴ ᐊ ᐎᒋᒥᒋᓱᒪᔨᒋ ᐊᓂᔭᔪᐛ ᒋᓴᐅᒋᒪᐤ ᓱᓇᔭᔪᐤ ᑲ ᒪᒧᓴᒋᓂᒥᔨᒋ ᑲ ᐃᑕᐱᑎᓯᔨᒋ ᑭᔭ ᑯᑎᑲ ᐊᐛᔪᐛ ᑲ ᒥᒐᑎᓯᔨᒋ᙮ ᒋ ᑯᒂᒋᒪᐅᒡ ᐅᒋᔅᒋᓄᐊᒧᐛᑭᓂᔪᐛ ᐊ ᐃᑕᒡ, “ᒐᒂᓐ ᐛᒋ ᐎᒋᒥᒋᓱᒪᑦ ᐅᔭ ᑲ ᐃᑕᔨᑕᑯᓯᔨᒋ ?”

¹⁷ ᒋᓴᔅ ᒪᒃ ᒋ ᐸᑐᐛᐤ ᐅᔭ ᐊ ᐃᔅᒋᔄᔨᒋ ᐊᑯ ᒂ ᐃᑕᑦ, “ᓇᒪ ᓂᑐᐛᔨᒪᐅᒡ ᓂᑐᐧᑯᐃᔨᓴ ᐊᓐᒡ ᐊᐛᓐᒋ ᐊᑲ ᐊᐧᑯᓯᒡ, ᒥᒄ ᐊᓐᒡ ᑲ ᐊᐧᑯᓯᒡ ᐊᐅᑯᓐᒡ ᓇᑐᐛᔨᒪᒡ ᓂᑐᐧᑯᐃᔨᓴ᙮ ᓇᒪᔭᐤ ᐅᒡ ᑲ ᑯᐃᔅᑯᑕᑎᓯᒡ ᐛᒋ ᑎᑯᓯᓂᔭᓐ᙮ ᓂᒋ ᑎᑯᓯᓐ ᒐᒋ ᓂᑐᒥᒂᐤ ᐅᒥᒋᑥᐅᒡ ᒐᒋ ᒂᔅᑲᑎᓯᒡ᙮”

ᐊ ᐊᔨᒧᑕᒡ ᐊᑲ ᒥᒋᓱᐅᑦ ᐊᐛᓐ ᒥᒄ ᒐᒋ ᐊᔭᒥᐊᑦ

¹⁸ ᐸᐃᒂᐤ ᒪᒂᒡ ᒠᓐ ᐅᓯᑲᐃᑕᒐᐤ ᐅᒋᔅᒋᓄᐊᒧᐛᑭᓇ ᑭᔭ ᐊᓐᒡ ᐸᕆᓯᔨᒡ ᐅᒋᔅᒋᓄᐊᒧᐛᑭᓄᐛᐛ ᐊ ᐊᑲ ᒥᒋᓱᒡ, ᒋ ᑕᔪᐛ ᐊᐛᔪᐛ ᐊ ᐃᓯ ᑯᒂᒋᒥᑯᑦ ᒋᓴᔅ, “ᒐᒂᓐ ᐛᒋ ᐊᑲ ᒥᒋᓱᔨᒋ ᒠᓐ ᐅᒋᔅᒋᓄᐊᒧᐛᑭᓇ ᑭᔭ ᐊᓐᒡ ᐊᔭᒥᐊᐅ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᐅᒋᔅᒋᓄᐊᒧᐛᑭᓄᐛᐛ ? ᒋᔾ ᒪᒃ ᒋᒋᔅᒋᓄᐊᒧᐛᑭᓐᒡ ᓇᒪ ᐃᑐᐅᒡ ᐎᔨᐛᐤ ᐊᑲ ᒥᒋᓱᒡ᙮”

¹⁹ ᒋᓴᔅ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᒧᔭᒻ ᐊᓐᑕ ᒪᒂᒡ ᐊ ᓂᐳᐅᓇᓄᐅᒡ ᒋᑭ ᒋ ᐃᑐᐅᒡ ᐊ ᒐ ᐊᑲ ᒋ ᒥᒋᓱᒡ ᐊᓐᒡ ᑲ ᐎᓴᒪᑭᓄᐅᒡ ᐊ ᒥᑯᓴᓄᐎᒡ ? ᓇᒪ ᒂᔄᓐ᙮ ᐛᔅ ᒧᔭᒻ ᐊ ᑕᔨᒋ ᐊᓐᑕ ᐊ ᑕᒡ ᐊᓂᔭ ᐅᔅᒋᓂᒋᓱᐛ ᓇᒪ ᐛᐛᒡ ᒋᑭ ᐅᒋ ᐃᑕᔨᑎᒧᒡ ᒐ ᐊᑲ ᒋ ᒥᒋᓱᒡ᙮

²⁰ ᐸᑎᒪ ᒋᑭ ᐅᑎᒋᐱᔪᐤ ᐊᓐ ᐊ ᒋᓯᑲᒡ ᒐ ᐸᒋ ᐅᑎᓇᑭᓄᐅᑦ ᐊᓐ ᐅᔅᒋᓂᒋᓱᐤ ᐊᑯᑕ ᒪᒃ ᐃᔭᒄ ᐊᓐ ᐊ ᒋᓯᑲᒡ ᒐ ᐊᑲ ᐅᒋ ᒥᒋᓱᒡ᙮”

²¹ “ᓇᒪ ᐊᐛᓐ ᐊᐱᒋᑕᐤ ᐱᒍᐎᔭᓂᓯᔪᐤ ᐊᑲ ᐅᒋ ᐅᒋᐱᔨᒡ ᐊ ᐎ ᒥᓴᐊᒃ ᐊᑯᐱᔅᒋᓯᔪᐤ᙮ ᐛᔅ ᐅᔭ ᒥᓯᐃᑲᒐᒐ ᐅᒋᐱᔨᒐ ᒪᒃ ᐊᑐᐎᔅ ᒋᑭ ᐱᑯᐱᔪᐤ ᐊᓐ ᐊᑯᑉ ᑕᓐᑕ ᐊᓐᑕ ᑲ ᐱᑯᐱᔨᒡ᙮

²² ᑭᔭ ᓇᒪ ᐊᐛᓐ ᐱᑕᐸᐅᑕᐤ ᐊ ᐅᔅᑲᑭᒥᔨᒡ ᓱᒥᓇᐳᔪᐤ ᐊᓐᑕ ᒋᔭᔅ ᐅᓯᑭᔾ ᐳᑕᒡ᙮ ᐛᔅ ᐅᔭ ᑎᒐ ᓇᔅᒡ ᒋᑭ ᐸᐧᑲᐱᔪᐛ ᐊᓂᔭ ᐅᓯᑭᔾ ᐳᑎᔭ, ᑭᔭ ᒥᓯᐛ ᒐ ᐃᔭᔪᐛᒡ ᐊᓐ ᓱᒥᓇᐳᔾ ᑭᔭ ᐊᓂᔭᔪᐛ ᐅᓯᑭᔾ ᐳᑎᔭ᙮ ᓇᒪ ᒪᒃ ᒥᓐ ᒋᑭ ᒋ ᐊᐱᑎᓇ᙮ ᓇᒪ ᐊᐛᓐ ᐅᔭ ᐃᑐᐤ ᐛᔅ ᐊ ᐅᔅᑲᑭᒥᒡ ᓱᒥᓇᐳᔾ ᐊᓐᑕ ᐊ ᐅᔅᑲᒡ ᐅᓯᑭᔾ ᐳᑕᒡ ᐱᑕᐸᐅᑕᑭᓄᐤ᙮”

ᒋᓴᔅ ᑲ ᐊᔨᒧᑕᐧᒃ ᐊ ᐊᔭᒥᐊᐅᒋᓯᑲᔨᒡ

²³ ᐸᐃᒂᐤ ᐊ ᒍᐤ ᐊᔭᒥᐊᐅᒋᓯᑲᔨᒡ ᒋᓴᔅ ᒋ ᐱᒧᑕᐤ ᐊᓐᑕ ᐸᒂᓯᑭᓂᒥᓇᑎᒂ ᐊ ᓂᑕᐅᒋᑕᑭᓄᔨᒋ᙮ ᐅᒋᔅᒋᓄᐊᒧᐛᑭᓇ ᒋ ᐎᒐᐅᑯᐤ᙮ ᐊᓂᔭ ᒪᒃ ᐊ ᐊᑎ ᐱᒧᑕᔨᒋ ᒋ ᓂᓇᑥᓂᒥᔪᐛ ᐊᓐᑕ ᐊ ᐅᓂᔎᔅᑯᓂᔨᒋ ᐅᔭ ᐸᒂᓯᑭᓂᒥᓇᑎᒂ᙮

²⁴ ᐊᑯ ᐸᕆᓯᔨᒡ ᒂ ᐃᑕᒡ ᒋᓴᓴ, “ᒐᒂᓐ ᐛᒋ ᐃᑐᑎᒪᒄ ᐊᓐ ᒐᒂᓐ ᐊᑐᒡ ᒋᐸ ᐅᒋ ᐃᑐᑕᑭᓄᐤ ᐊ ᐊᔭᒥᐊᐅᒋᓯᑲᒡ ?”

²⁵ ᒋᓴᔅ ᒋ ᐃᓯ ᐎᑎᒧᐛᐤ ᐊ ᐃᑕᑦ, “ᔅᒋ ᐃᔨᒥᑕᓇᐛᒐ ᒥᓯᓇᐃᑭᓂᒡ ᐊᓐᑕ ᑕᐸᒋᒪᑭᓄᐅᑦ ᐊᓂᔭᐧᑲ ᒋᓴᐅᒋᒪᐤ ᑎᐱᑦ, ᑭᔭ ᒥᓯᐛ ᐊᓂᔭᔪᐛ ᑲ ᐎᒐᐅᑯᑦ ᑕᓐ ᑲ ᐃᑎᒡ ᐃᔅᐱ ᑲ ᐎ ᒥᒋᓱᒡ ?

²⁶ ᒋ ᐱᒐᐅᒡ ᒋᓴᒪᓂᑐᐛ ᐎᒋᔨᒡ ᐊᑯ ᑎᐱᑦ ᒂ ᒧᐛᑦ ᐊᓂᔭ ᑲ ᐸᔭᒋᓯᔨᒋ ᐸᒂᓯᑭᓇ, ᐊᑯ ᒂ ᐊᓯᒪᑦ ᐊᓂᔭᔪᐛ ᐎᒐᐛᑭᓇ᙮ ᒪᒂᒡ ᐊᐱᐊᑕᕐ ᒋ ᒋᓴᐊᔭᒥᐊᐅᒋᒪᐎᒐ ᐅᔭ᙮ ᒥᒄ ᒪᒃ ᐊᔭᒥᐊᐅᒋᒪᐅᒡ ᐃᑕᔨᑕᑯᓱᐅᒡ ᒐᒋ ᒧᐛᒡ ᐅᔭ ᐸᒂᓯᑭᓇ, ᐛᔅ ᐊᐅᑯᓐ ᐊᑎᔅᑕᒡ ᐊᔭᒥᐊᐅ ᐎᓱᐛᐅᒥᓯᓇᐃᑭᓂᒡ᙮”

²⁷ ᐊᑯ ᐅᔭ ᒪᔅᑕᔾ ᒂ ᐊᑎ ᐃᔅᒋᔄᑦ ᒋᓴᔅ, “ᒋᓴᒪᓂᑐᐤ ᒋ ᐅᓯᑕᐤ ᐊ ᐊᔭᒥᐊᐅᒋᓯᑲᔨᒡ ᒐ ᐎᒋᐃᑯᔨᒋ ᓇᐸᐛ, ᓇᒪ ᐅᒋ ᐅᓯᐊᐤ ᓇᐸᐛ ᒥᒄ ᐊᔭᒥᐊᐅᒋᓯᑲᐤ ᐎᓱᐛᐅᓇ ᒐᒋ ᓂᓇᑭᑐᐛᔨᑎᒥᔨᒋ᙮

²⁸ ᐃᔪᐤ ᐅᑯᓯᓴᓐ ᒪᒃ, ᐛᐛᒡ ᐊ ᐊᔭᒥᐊᐅᒋᓯᑲᔨᒡ ᑎᐸᔨᑎᒻ᙮”