ᒥᔽᒋᒧᐅᓂᔪᐤ ᑲ~ᒥᓯᓇᐊᐧᒃ ᒪᕐᒃ 13 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᔅ ᑲ ᐊᔨᒧᑕᐧᒃ ᒐ ᓂᓱᐅᓇᒋᑕᑭᓄᐎᒡ ᒋᓴᐊᔭᒥᐊᐅᒋᐛᐱᔪᐤ Mark 13.1-8 (Proper-28 Year B)

¹ ᒋᓴᔅ ᒪᒃ ᐊ ᐊᑎ ᐎᐎᑦ ᐊᓂᔭ ᒋᓴᐊᔭᒥᐊᐅᒋᐛᐱᔪᐤ, ᐸᐃᒄ ᐅᒋᔅᒋᓄᐊᒧᐛᑭᓇ ᒋ ᐃᑎᑯᐤ, “ᒋᔅᑯᑎᒪᒐᓱᐤ, ᐃᑕᐱ ᒪ᙮ ᐊᔪᐛᒡ ᒥᔪᓯᐅᒡ ᐅᒡ ᐊᓯᓂᔨᒡ ᐅᑕ ᒥᒋᐛᐱᒡ ᑲ ᒋᑭᒧᒡ ᑭᔭ ᐅᔭ ᒥᒋᐛᐸ ᐊᔪᐛᒡ ᒥᔽᓱᐛ᙮”

² ᒋ ᐃᑕᐤ ᒪᒃ ᒋᓴᔅ, “ᒋ ᐛᐸᑕᓇᐛᐤ ᐊ ᐅᔭ ᒥᒋᐛᐸ ᑲ ᒪᒥᓴᒋ ? ᓇᒪ ᐛᐛᒡ ᐸᐃᒄ ᐊᓯᓂᔾ ᒋᑭ ᐅᒋ ᐊᑯᑐᐳᐤ ᑯᑎᑲ ᐊᓯᓂᔭ ᑕᓐ ᐊᓂᔭ ᑲ ᐃᑕᐊᑭᓄᐅᑦ᙮ ᒥᓯᐛ ᐊᓯᓂᔨᒡ ᑲ ᐃᓯ ᐊᐱᒋᐊᑭᓄᐎᒡ ᑲ ᐅᓯᑕᑭᓄᐅᒋ ᐅᔭ ᒥᒋᐛᐸ ᒋᑭ ᓂᑎᒋᐛᐱᓇᑭᓄᐎᒡ᙮”

ᑕᓐ ᒐ ᐃᓯ ᐊᔨᒥᐅᓇᓄᐅᒡ ᑭᔭ ᒐ ᐃᓯ ᓂᓇᐧᑲᑕᔨᒧᓇᓄᐅᒡ

³ ᒪᒂᒡ ᒪᒃ ᐊ ᐊᐱᑦ ᐊᓐᑕ ᐊᓕᐱᔅ ᐱᔅᑯᑎᓇᒡ ᑎᐱᔅᑯᒡ ᐊᓐᑕ ᐊᓂᔭ ᒋᓴᐊᔭᒥᐊᐅᒋᐛᐱᔪᐤ ᑲ ᑎᑯᓂᔨᒡ, ᒋ ᓇᑎᑯᐤ ᐱᑕᕋ, ᒋᒥᓴ, ᒠᓇ ᑭᔭ ᐊᓐᑎᕈᐊ ᒐᒋ ᑯᒂᒋᒥᑯᑦ ᒪᒂᒡ ᒥᒄ ᐎᔨᐛᐤ ᐊ ᑕᒡ᙮

⁴ ᒋ ᐃᑎᑯᐤ, “ᐎᑎᒧᐅᓇᓐ ᒪ ᑕᐃᔅᐱ ᒐ ᐃᔅᐱᔨᒡ ᐅ᙮ ᒐᒂᓐ ᒐ ᐃᔅᐱᔨᒡ ᒐᒋ ᐅᒋ ᒋᔅᒐᔨᑕᒂᒡ ᐊ ᐅᑎᒋᐱᔨᒡ ᐊᔅᒄ ᒐ ᐃᔅᐱᔨᒋ ᐅᔭ ᒐᒂᔪᐛ ?”

⁵ ᒋᓴᔅ ᒪᒃ ᒋ ᐃᑕᐤ, “ᐃᔭᒂᒥᒄ ᐊᑲ ᐊᐛᓐ ᒐᒋ ᐎᔭᓯᒥᑕᒄ᙮

⁶ ᐛᔅ ᒋᑭ ᒥᒐᑐᐅᒡ ᐊᐛᓐᒋ ᐊ ᑎᑯᓯᒡ ᓂᑦ ᐃᓯᓂᐧᑲᓱᐅᓂᔪᐤ ᐊ ᐊᐱᒋᑕᒡ ᐊ ᐃᔅᒋᔄᒡ, ‘ᐊᐅᒄ ᓂᔾ ᙭᙮’ ᒥᒐᑦ ᒪᒃ ᐊᐛᔪᐛ ᒋᑭ ᐎᔭᓯᒪᐅᒡ᙮

⁷ ᐊᑲᐎᔾ ᑭᔭ ᒋᑭ ᐅᒋ ᒥᑯᔅᑲᑕᔨᑎᒥᐃᑯᐅᓇᐛᐤ ᐸᑎᒪᒂ ᐊ ᓂᑐᐱᔨᓇᓄᐅᒡ ᒥᒋᒪ ᐊᓐᑕ ᐊ ᑕᔭᒄ ᑭᔭ ᐸᑎᒪᒂ ᐊ ᑎᐸᑕᑭᓄᐅᒡ ᐊ ᓇᓂᑐᐱᔨᓇᓄᐅᒡ ᐊᓐᑕ ᐛᔪᐤ᙮ ᐊᐅᒄ ᐛᔅ ᐅ ᓂᔅᑎᒻ ᓇᑐᐛᔨᑕᒂᒡ ᒐᒋ ᐃᔅᐱᔨᒡ, ᒥᒄ ᒪᒃ ᓇᒪ ᐊᔅᒄ ᒋᑭ ᐅᒋ ᐃᔎᐱᔪᐤ᙮

⁸ ᐸᐃᑯᓄᒡ ᑲ ᐃᑎᔅᑲᓇᓯᒡ ᐊᐛᓐᒋ ᒋᑭ ᒪᓯᐧᑲᑐᐅᒡ ᐊᓂᔭᔪᐛ ᑯᑎᑲ ᐊᐛᔪᐛ ᐃᔭᒡ ᑲ ᐃᑎᔅᑲᓇᓯᔨᒋ᙮ ᑭᔭ ᐊᓐᒡ ᑲ ᐅᒋᒪᐅᒡ ᒋᑭ ᓂᑐᐱᔨᑐᐛᐅᒡ ᐊᓂᔭ ᑯᑎᑲ ᑲ ᐅᒋᒪᐎᔨᒋ᙮ ᑭᔭ ᓂᓇᐧᑯᐤ ᐊᓐᑕ ᐃᔭᒡ ᐊᓐᑕ ᒋᑭ ᑭᐃᐧᑯᓐ᙮ ᑭᔭ ᒋᑭ ᑎᑯᓐ ᐊ ᑯᐧᑭᑕᓄᐅᒡ᙮ ᐅ ᒪᒃ ᓂᓇᐧᑯᐤ ᒐ ᐃᔅᐱᔨᒡ, ᐊᐅᒄ ᐱᒐᐃᒃ ᐊ ᒋᒋᐱᔨᒡ ᓂᓇᐧᑲᑕᔨᒧᐅᓐ, ᒧᔭᒻ ᐃᔎᐤ ᐊ ᒋᒋᐱᔨᒡ ᐊ ᒧᓯᐅᑦ ᒐ ᐊᐧᑯᓯᑦ᙮”

⁹ “ᐃᔭᒂᒥᒄ ᐛᔅ ᒋᑭ ᑕᐅᒡ ᐊᓐᒡ ᒐ ᒪᑯᓂᑕᑯᒡ ᐊᑯ ᐊᓐᑕ ᑲ ᓂᑲᓂᔅᑲᒐᔨᒋ ᐊ ᑕᔨᒋ ᒐ ᐃᑐᑕᐃᑕᑯᒡ ᒐᒋ ᑎᐸᔅᑯᓂᑯᔭᒄ᙮ ᑭᔭ ᐊᓐᑕ ᐊᔭᒥᐊᐅᒋᐛᐱᒡ ᐊᑯᑕ ᒐ ᐸᐱᓯᔅᑕᐅᑯᔭᒄ᙮ ᒋᑭ ᐃᑐᑕᐃᑯᓇᐛᐤ ᒥᒋᒪ ᑭᔭ ᒋᓴᐅᒋᒪᐅᒡ ᐊ ᑕᒡ ᒐᒋ ᑎᐸᔅᑯᓂᑕᑯᒡ ᐊᓐ ᐅᒋ ᐊ ᓇᓴᐅᔭᒄ᙮ ᒋᑭ ᓂᑐᐛᔨᑕᑯᓯᓇᐛᐤ ᑯᐃᔅᒄ ᒐᒋ ᐃᓯ ᐊᔨᒧᒥᔭᒄ᙮

¹⁰ ᐊᔅᒄ ᒪᒃ ᐊᑲ ᐃᔅᐱᔭᒂ ᐅ, ᓂᔅᑎᒻ ᒋᐸ ᑭᒐᔅᒋᒪᑭᓄᐎᒡ ᒥᓯᐛ ᐊ ᐃᑎᔅᑲᓇᓯᒡ ᐊᐛᓐᒋ ᐊ ᐛᐎᑎᒧᐛᑭᓄᐎᒡ ᒥᔽᒋᒧᐅᓂᔪᐤ᙮

¹¹ ᐃᔅᐱ ᒪᒃ ᒪᑯᓂᑯᔭᒂ ᑭᔭ ᐃᑐᑕᐃᑯᔭᒂ ᐊᓐᑕ ᒐ ᑎᐸᔅᑯᓂᑯᔭᒄ ᐊᑲᐎᔾ ᓂᑲᓐ ᒋᑭ ᐅᒋ ᐊᔨᒪᔨᑎᒥᐃᑯᓇᐛᐤ ᑕᓐ ᒐ ᐃᔅᒋᔄᔭᒄ, ᒥᒄ ᑕᓐ ᒐ ᐃᓯ ᒥᔨᑯᐛᒂ ᒐ ᐃᔅᒋᔄᔭᒄ ᒪᒂᒡ ᐊᓐᑕ ᑕᔭᒂ ᐊᑯᓐ ᐊᓐ ᐃᔅᒋᔄᒄ᙮ ᐛᔅ ᑕᐸ ᒋᔨᐛᐤ ᒋᑭ ᐅᒋ ᐃᔨᒥᓇᐛᐤ ᐊᓐᑕ ᒪᒂᒡ ᐃᔨᒥᔭᒂ, ᑲ ᐸᔭᒋᓯᔨᒡ ᐊᒐᐧᒄ ᐊᐅᒄ ᒐ ᐃᔨᒥᑦ᙮”

¹² “ᒪᐅ ᑭᔭ ᒐ ᐃᔅᐱᔨᒡ᙮ ᐎᐧᑲᓂᓯᒪᐤ ᒋᑭ ᐎᔭᓯᐱᔅᑎᓇᐤ ᑎᐱᔨᐛ ᐎᐧᑲᓂᓴ ᒐᒋ ᓂᐸᐊᑭᓄᔨᒋ᙮ ᐅᑕᐎᒪᐤ ᑭᔭ ᐊᑯᓐ ᒐ ᐃᑐᑐᐛᑦ ᐅᑦ ᐊᐛᓯᒪ᙮ ᐊᐛᓯᒡ ᑭᔭ ᒋᑭ ᒋᔄᐃᑯᐅᒡ ᐅᓂᒋᐃᑯᐛᐛ ᐊᑯ ᒐ ᐃᑐᑐᐛᒡ ᒐᒋ ᓂᐸᐊᑭᓄᔨᒋ᙮

¹³ ᒥᓯᐛ ᐊᐛᓐ ᒋᑭ ᐛᐧᑲᑎᑯᐛᐤ ᐊ ᓇᓴᐎᔭᒄ᙮ ᒥᒄ ᒪᒃ ᐊᓐ ᐊᐛᓐ ᒐ ᐊᔨᒋᑲᐳᒂ ᒐ ᐃᔅᐱᔅ ᐱᒪᑎᓯᒂ ᐊᐅᒄ ᒐ ᐱᒪᒋᐊᑭᓄᐅᑦ᙮”

ᐊᓐ ᒪᐅᒡ ᑲ ᐛᐧᑲᑕᔨᑕᑯᓯᑦ ᑲ ᐊᔨᒧᒪᑭᓄᐅᑦ

¹⁴ “ᐃᔅᐱ ᒪᒃ ᐛᐱᒪᒂ ᐊᓐ ᐊᐛᓐ ᒪᐅᒡ ᑲ ᐛᐧᑲᑕᔨᑕᑯᓯᑦ ᐊ ᓂᐳᐅᑦ ᐊᓐᑕ ᐊᑐᒡ ᒋᐸ ᐅᒋ ᓂᐳᐅᐤ” (ᐊᓐ ᐊᐛᓐ ᑲ ᐃᔨᒥᑕᑦ ᐅᔭ ᒋᑭ ᐎ ᓂᔅᑐᑎᒻ), “ᐊᑯᔅ ᐱᔅᑎᓇᐧᑯᒡ ᐊᓐᒡ ᒍᑎᔭ ᑲ ᑕᒡ ᐊᓐᑕ ᐊ ᐅᒋᒍᐅᓂᔨᒡ ᒐᒋ ᐃᑎᓯᒧᒡ᙮ ᐊᐅᑯᓐ ᐅᔭ ᐊᓂᔭ ᐅᒋᔅᒋᐛᐃᒐᓱᐤ ᑕᓂᔭᓪ ᑲ ᐊᔨᒧᒪᑦ᙮

¹⁵ ᑭᔭ ᐊᓐ ᐊᐛᓐ ᑕᐧᑯᒡ ᐎᒋᒡ ᑲ ᑕᑦ ᐊᑲᐎᔾ ᐱᔅᑎᓇᐧᒄ ᒐᒋ ᐱᒐᑦ ᐎᒡ ᒐᒋ ᓂᑐᐛᐸᑕᐧᒃ ᒐᒂᔪᐤ᙮

¹⁶ ᑭᔭ ᐊᓐ ᐊᐛᓐ ᓂᑕᐅᒋᑕᑭᓐ ᐊᔅᒋᒡ ᑲ ᑕᑦ ᐊᑲᐎᔾ ᐱᔅᑎᓇᐧᒄ ᒐᒋ ᒋᐛᑦ ᐅᑦ ᐊᑯᑉ ᐊ ᐎ ᓂᑐᐛᐸᑕᐧᒃ᙮

¹⁷ ᑕᑈ ᒋᑭ ᐊᔨᒥᐅᐅᒡ ᐊᓐᒡ ᒪᒂᒡ ᑲ ᑭᓄᐛᔨᒪᓱᒡ ᑭᔭ ᐊᓐᒡ ᑲ ᓄᓴᓂᐊᐅᓱᒡ ᐊᓂᔭᔪᐛ ᐊ ᒋᓯᑲᔨᒋ᙮

¹⁸ ᐊᔭᒥᐊᒄ ᐊᑲ ᐊ ᒪᒂᐱᐳᒡ ᒐᒋ ᐃᔅᐱᔨᒡ ᐅ᙮

¹⁹ ᐛᔅ ᐅᔭ ᐊ ᒋᓯᑲᒋ ᐅᑎᒋᐱᔨᒂᐛ ᐊᔪᐛᒡ ᒋᑭ ᑎᑯᓐ ᐊ ᓂᓇᐧᑲᑕᔨᒧᒡ ᐊᐛᓐᒋ᙮ ᑲ ᐃᔅᐱᔅ ᑎᒂᒡ ᐅ ᐊᔅᒋᔾ, ᒋᓴᒪᓂᑐᐤ ᑲ ᐅᓯᑕᑦ, ᓇᒪ ᓂᑕ ᐅᒋ ᐃᑕᔨᑕᑯᓐ ᑕᓐ ᒐ ᐃᑕᔨᑕᒂᒡ ᐅ ᓂᓇᐧᑲᑕᔨᒧᐅᓐ᙮ ᑭᔭ ᓇᒪ ᒥᓐ ᓂᑕ ᒋᑭ ᐅᒋ ᑎᑯᓐ ᐅ ᐊ ᐃᑕᔨᑕᒂᒡ ᓂᓇᐧᑲᑕᔨᒧᐅᓐ ᐃᔅᐱ ᒋ ᐅᑎᒋᐱᔨᒐ᙮

²⁰ ᐊᑲ ᐅᒋ ᓇᑲᐊᒧᒂ ᒋᓴᒪᓂᑐᐤ ᐊᑐᐎᔅ ᓇᐅᔅ ᒐᒋ ᑎᑯᓂᔨᒡ ᓂᓇᐧᑲᑕᔨᒧᐅᓂᔪᐤ ᓇᒪ ᒋᐸ ᐅᒋ ᑕᐤ ᐊᐛᓐ ᐊ ᐱᒪᑎᓯᑦ᙮”

²¹ “ᑭᔭ ᐃᑎᑕᒂ ᐊᐛᓐ, ‘ᐃᑕᐱᒄ ᒪ, ᐊᐅᒄ ᐛᔅ ᐅ ᙭,’ ᒪᒃ ᐃᑎᑯᐅᔭᒂ, ‘ᒪᓇ ᙭,’ ᐊᑲᐎᔾ ᒋᑭ ᐅᒋ ᑕᑈᑕᓇᐛᐤ᙮

²² ᒋᑭ ᑕᐅᒡ ᐊᐛᓐᒋ ᐊ ᐎᔭᓯᐃᐛᒡ ᐊ ᐃᔅᒋᔄᒡ ᓂᔾ ᙭᙮ ᒋᑭ ᑕᐅᒡ ᑭᔭ ᒥᒋ ᐅᒋᔅᒋᐛᐃᒐᓱᒡ᙮ ᐊᐅᑯᓐᒡ ᒪᒃ ᐅᒡ ᓂᓇᐧᑯᐤ ᒪᒥᔅᑲᒡ ᐛᐸᑎᔨᐛᐅᓇ ᒐ ᐛᐸᑎᔨᐛᒡ ᑭᔭ ᒋᑭ ᐃᑐᑎᒧᒡ ᐊ ᒪᒥᔅᑲᑕᔨᑕᑯᓂᔨᒋ ᒐᒂᔪᐛ᙮ ᐊᑯᑕ ᒪᒃ ᒐ ᐅᒋ ᐎᔭᓯᐊᒡ ᐊᐛᔪᐛ ᓂᑎᒥᒄ ᒐᒋ ᐃᓯ ᑕᑈᑎᒥᔨᒋ᙮ ᐊᓂᔭᔪᐛ ᒪᒃ ᒋᓴᒪᓂᑐᐛ ᑲ ᐅᑎᓇᔨᒋ ᐊᐛᔪᐛ ᐊᐅᑯᓂ ᐊᓂᔭᔪᐛ ᒐ ᐎ ᐎᔭᓯᐊᒡ᙮

²³ ᐃᔭᒂᒥᒄ ᒪᒃ᙮ ᓴᔅ ᓂᑲᓐ ᔅᒋ ᐎᑎᒪᑎᓇᐛᐤ ᒐ ᐃᔅᐱᔨᒋ ᐅᔭ ᒐᒂᔪᐛ᙮”

ᒥᓐ ᑎᑯᓯᒐ ᒋᓴᔅ Mark 13.24-37 (Advent-1 Year B)

²⁴ “ᐃᔅᐱ ᒋ ᐎ ᒪᐱᔨᒐ ᐊ ᓂᓇᐧᑲᑕᔨᒧᓇᓄᐅᒡ, ᐱᓯᒻ ᒋᑭ ᑎᐱᔅᒋᐱᔪᐤ, ᑭᔭ ᑎᐱᔅᑲᐤ ᐱᓯᒻ ᓇᒪ ᒋᑭ ᐅᒋ ᒋᐧᑲᔭᔅᑐᐛᐤ,

²⁵ ᐅᒐᑭᑕᐧᑯᒡ ᒋᓯᑯᒡ ᒋᑭ ᐅᒋ ᐸᐸᒋᓯᓄᐅᒡ ᑭᔭ ᒥᓯᐛ ᑕᓐ ᐊ ᐃᓯ ᑎᒂᒡ ᐃᔅᐱᒥᒡ ᒋᑭ ᓇᓇᒥᐱᔪᐤ᙮”

²⁶ “ᐊᑯ ᒪᒃ ᒐ ᐛᐱᒪᑭᓄᐅᑦ ᐃᔪᐤ ᐅᑯᓯᓴᓐ ᐊ ᐸᒋ ᔭᓯᑦ ᑭᔅᑯᐅᓂᔅᑯᒡ, ᓇᔅᒡ ᐊ ᓄᑯᓂᔨᒡ ᐅᓱᐧᑲᑎᓯᐅᓐ ᑭᔭ ᐅᒋᔅᑕᔨᑕᑯᓱᐅᓐ᙮

²⁷ ᐊᑯ ᒐ ᐃᑎᓴᐛᑦ ᐊᓐᒋᓇ ᒐᒋ ᒪᒧᓇᔨᒋ ᐊᓂᔭ ᐊᐛᔪᐛ ᑲ ᐎᔭᔨᒪᑦ ᐊᓐᑕ ᓇᐎᔨᒡ ᐊ ᐅᔅᑎᓂᔨᒡ ᑲ ᐅᒋᔨᒋ᙮ ᓇᔅᒡ ᐊ ᐃᔎᔭᔨᒡ ᐊᔅᒋᔪᐤ ᐊᓐᑕ ᒪᒃ ᐃᓯ ᓇᔅᒡ ᐊ ᐃᔎᔭᔨᒡ ᒋᒋᒋᓯᑯᔪᐤ ᒋᑭ ᐅᑎᓇᔪᐛ᙮”

ᒋᓴᔅ ᒥᓯᓱᒥᓇᑎᒄ ᑲ ᐊᐱᒋᐊᑦ ᐊ ᒋᔅᑯᑎᒪᒐᑦ

²⁸ “ᑎᑯᓐ ᒐᒂᓐ ᒐᒋ ᒋᔅᑯᑎᒪᓱᔭᒄ ᒥᓯᓱᒥᓇᑎᒄ ᐊ ᑭᓄᐛᐱᒪᒄ᙮ ᐃᔅᐱ ᐊ ᐊᑎ ᐅᔅᒋᓂᑕᐅᒋᓂᔨᒋ ᐅᑎᐧᑯᓇ ᑭᔭ ᐊ ᐊᑎ ᓂᐱᓱᐅᑦ, ᒋ ᒋᔅᒐᔨᑕᓇᐛᐤ ᓴᔅ ᐎᐱᒡ ᒐ ᓂᐱᒡ᙮

²⁹ ᐅᔭ ᒪᒃ ᒐᒂᔪᐛ ᑲ ᐊᔨᒧᑎᒪᑎᑯᒡ ᒐ ᐃᔅᐱᔨᒋ ᐃᔅᐱ ᐃᔅᐱᔨᒂᐛ ᐊᑯᑕ ᒐ ᐅᒋ ᒋᔅᒐᔨᑎᒪᒄ ᓴᔅ ᐊ ᐸᓱᓇᑯᓂᔨᒡ ᐃᔪᐤ ᐅᑯᓯᓴᓐ ᒐ ᑎᑯᓯᐧᒃ, ᒧᔭᒻ ᓴᔅ ᒋᐱᔎᒡ ᐊ ᐸᒋ ᓂᐳᐅᑦ ᒂ ᐃᓯᓇᑯᓯᑦ᙮

³⁰ ᑯᐃᔅᒄ ᒋ ᐎᑎᒪᑎᓇᐛᐤ, ᐊᓐᒡ ᐸᒪᑎᓯᒡ ᐊᓄᒡ, ᓇᒪ ᒋᑭ ᐅᒋ ᒪᒋ ᓂᐳᐅᒡ ᐊᔅᒄ ᐊᑲ ᐅᑎᒋᐱᔨᒐ ᒥᓯᐛ ᑕᓐ ᒋᐸ ᐃᔅᐱᔪᐤ᙮

³¹ ᒋᒋᒋᓯᒄ ᑭᔭ ᐊᔅᒋᔾ ᒋᑭ ᐃᔎᐱᔪᐛ ᒥᒄ ᒪᒃ ᓂᑦ ᐃᔨᒧᐅᓇ ᓇᒪ ᓂᑕ ᒋᑭ ᐅᒋ ᐃᔎᐱᔪᐛ᙮”

ᒐ ᐎ ᐊᔭᔅᑯᔭᐧᒄ

³² “ᒥᒄ ᒪᒃ ᓇᒪ ᐊᐛᓐ ᒋᔅᒐᔨᑎᒻ ᐊᓂᔭ ᐊ ᒋᓯᑲᔨᒡ ᒪᒃ ᐊᓂᔭ ᑎᐸᐃᑭᓂᔪᐤ ᐱᓯᒧᐧᑲᓂᒡ ᒐ ᐃᔅᐱᔨᒋ ᐅᔭ ᒐᒂᔪᐛ᙮ ᓇᒪ ᐛᐛᒡ ᐊᓐᒋᓐᒡ ᒋᔅᒐᔨᑎᒧᒡ, ᐛᐛᒡ ᐅᑯᓯᓯᒪᐤ, ᒥᒄ ᐅᑕᐎᒪᐤ ᒋᔅᒐᔨᑎᒻ᙮

³³ ᐃᔭᒂᒥᒄ, ᒧᔅ ᐸᒋ ᐊᔭᔅᑯᐎᔅᑐᐛᐧᒄ᙮ ᐛᔅ ᑕᐸ ᒋ ᒋᔅᒐᔨᑕᓇᐛᐤ ᑕᐃᔅᐱ ᐅ ᒐ ᐃᔅᐱᔨᒡ᙮

³⁴ ᐊᑯᓐ ᒧᔭᒻ ᐊ ᐃᓯᓇᒂᒡ ᐃᔪᐤ ᐛᔪᐤ ᐊ ᐎ ᐃᑐᑕᑦ᙮ ᐃᔅᐱ ᒐ ᓂᑭᑕᐧᒃ ᐎᒡ ᐅᑦ ᐊᐱᒋᐊᑭᓇ ᒥᔭᐤ ᒐ ᐅᒋᒪᐎᔨᒋ ᒪᒂᒡ ᐊᑲ ᑕᒐ᙮ ᒥᓯᐛ ᐸᐸᐃᒄ ᐎᑎᒧᐛᐤ ᒐ ᐃᑕᐱᑎᓯᔨᒋ᙮ ᑭᔭ ᐊᓂᔭᔪᐛ ᑲ ᑭᓄᔎᑎᐛᔨᒋ ᐃᑎᓱᒪᐤ ᐃᔭᒂ ᒐᒋ ᓂᓇᑭᑐᐛᐸᑎᒥᔨᒋ ᐃᔎᑕᒥᔪᐤ᙮”

³⁵ “ᐃᔭᒂᒥᒄ ᐛᔅ ᑕᐸ ᒋ ᒋᔅᒐᔨᑕᓇᐛᐤ ᑕᐃᔅᐱ ᒐ ᑎᑯᓯᐧᒃ ᒋᐅᒋᒪᒧᐛᐤ ᑲ ᓂᓇᑭᑐᐛᔨᑕᒺᒄ ᐎᒡ, ᐊ ᐅᑕᑯᓯᔨᒡ ᒐ ᑎᑯᓯᓂᒂ, ᑭᔭ ᒪᒃ ᐊᐱᑕᑎᐱᔅᑲᔨᒐ ᑭᔭ ᒪᒃ ᐸᑕᐱᓂᔨᒐ, ᑭᔭ ᒪᒃ ᐸᑐᔅ ᐊ ᐛᐸᓂᔨᒐ ᒐ ᑎᑯᓯᓂᒂ᙮

³⁶ ᐃᔭᒂᒥᒄ ᒪᒃ, ᐃᔭᒂ ᒐᔅᑲᑯᐅᔭᒂ ᐊ ᓂᐸᔭᒄ ᓯᔅᒋᑯᒡ ᑎᑯᓯᒐ᙮

³⁷ ᐅ ᒐ ᐃᑎᑎᑯᒡ, ᓂᑦ ᐃᑕᐅᒡ ᑭᔭ ᑯᑎᑭᒡ ᐊᐛᓐᒋ, ᐊᔭᔅᑯᐎᔅᑐᐛᐧᒄ᙮”