ᒥᔽᒋᒧᐅᓂᔪᐤ ᑲ~ᒥᓯᓇᐊᐧᒃ ᒪᕐᒃ 11 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐᒋᕈᓯᓕᒥᒡ ᑲ ᐱᒐᑦ ᒋᓴᔅ ᐊ ᒪᒥᒋᒪᑭᓄᐅᑦ ᒪᑎᔪᐤ 21.1-11 ; ᓗᒃ 19.28-40 ; ᒠᓐ 12.12-19 1 ᒋᓴᔅ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓇ ᐊᓐᑕ ᒋᕈᓯᓕᒥᒡ ᒋ ᐎ ᐃᑐᑕᐅᒡ᙮ ᐃᔅᐱ ᐊ ᐊᑎ ᐸᓱᐛᐸᑕᒡ ᒋ ᐅᑎᑎᒧᒡ ᐊᓂᔭᔪᐛ ᐅᑕᓇᐛ ᐸᑕᓂ ᑭᔭ ᐸᑦᐸᐃᒡ ᑲ ᐃᓯᓂᐧᑲᑕᔨᒋ᙮ ᐊᓐᑕ ᐊᓕᐱᔅ ᐱᔅᑯᑎᓇᒡ ᐊᑯᑕ ᑲ ᑎᒂᒋ ᐅᔭ ᐅᑕᓇᐛ᙮ ᐊᑯᑕ ᒪᒃ ᐅᑕ ᒋᓴᔅ ᑲ ᓂᑲᓂᑎᓴᐛᑦ ᓂᓱ ᐅᒋᔅᒋᓄᐊᒧᐛᑭᓇ ᐊ ᐃᑕᑦ, 2 “ᓇᑕ ᐃᑐᑕᒄ ᐊᓐ ᐅᑕᓇᐤ᙮ ᑎᑯᓯᓂᔭᒂ ᓇᑕ ᒋᑭ ᐛᐱᒪᐛᐤ ᐅᐧᑲᓂᔅ ᒧᔭᒻ ᐊ ᐊᐱᓯᓯᑦ ᑲᐸᐃᑭᔎᐤ ᑲ ᐃᓯᓇᑯᓯᑦ, ᐊᑲ ᓂᑕ ᐊᔅᒄ ᐅᒋ ᑕᑎᐱᔨᒋ ᐊᐛᔪᐛ ᐅᔅᐱᔅᑯᓂᒡ᙮ ᒐ ᐊᐱᐧᑯᓇᒄ ᐊᑯ ᒐ ᐸᓱᐛᒄ ᐅᑕ᙮ 3 ᑯᒂᒋᒥᑕᒂ ᐊᐛᓐ ᒐᒂᔪᐤ ᐛᒋ ᐊᐱᐧᑯᓂᒪᑯ, ᐊᑯ ᒐ ᐃᑕᒄ, ‘ᐅᑎᐸᔨᒋᒐᐤ ᓂᑐᐛᔨᒪᐤ᙮ ᑎᐛᒡ ᒪᒃ ᒋᑭ ᐱᔅᑎᓂᑯᐛᐤ ᒐᒋ ᐅᑎᓂᒪᑯ᙮’ ” 4 ᐊᑯ ᒂ ᔅᑐᑕᒡ ᒂ ᒥᔅᑯᐛᒡ ᐊᓂᔭᔪᐛ ᐅᐧᑲᓇ ᒧᔭᒻ ᐊ ᐊᐱᓯᓯᑦ ᑲᐸᐃᑭᔎᐛ ᑲ ᐃᓯᓇᑯᓯᔨᒋ ᐊᓐᑕ ᒪᔅᑭᓇᒡ᙮ ᐎᐎᑎᒥᒡ ᒥᒋᐛᐱᔪᐤ ᐊ ᒋᓯᑲᐱᐧᑲᓱᔨᒋ᙮ 5 ᐊᓂᔭ ᒪᒃ ᒪᒂᒡ ᐊ ᐊᐱᐧᑯᓇᒡ ᐊᓂᔭ ᐅᐧᑲᓇ ᒋ ᐸᒋ ᓇᓂᐳᔪᐛ ᐊᐛᔪᐛ ᐊ ᑭᓄᐛᐱᒥᑯᒡ ᐊᑯ ᒂ ᐃᑎᑯᒡ, “ᑕᓐ ᐊ ᐃᑎᔭᒄ ᐛᒋ ᐊᐱᐧᑯᓇᒄ ᐊᓐ ᐅᐧᑲᓐ ?” 6 ᐊᑯ ᒂ ᐃᑕᒡ ᐊᓂᔭ ᑕᓐ ᑲ ᐃᑎᑯᒡ ᒋᓴᓴ ᒐ ᐃᓯ ᐎᑎᒧᐛᒡ ᐊᑯ ᒂ ᐱᔅᑎᓂᑯᒡ ᐊᓂᔭᔪᐛ ᓇᐸᐛ ᒐᒋ ᔅᑐᑕᐊᒡ ᐊᓂᔭ ᐅᐧᑲᓇ᙮ 7 ᐊᑯ ᐊᓐᑕ ᒋᓴᓴ ᐊ ᑕᔨᒋ ᐊᑯᑕ ᑲ ᐃᑐᑕᐊᒡ ᐅᔭ ᐅᐧᑲᓇ ᒂ ᓴᑥᑭᔅᑕᒡ ᐅᑦ ᐊᑯᐳᐛᐛ ᐊᓐᑕ ᐅᔅᐱᔅᑯᓂᔨᒡ ᐊᓂᔭ ᐅᐧᑲᓇ ᐊᑯ ᒋᓴᔅ ᒂ ᑕᑎᐳᐛᑦ ᐅᔅᐱᔅᑯᓂᔨᒡ᙮ 8 ᒥᒐᑦ ᒪᒃ ᐊᐛᓐᒋ ᐊᓐᑕ ᒪᔅᑭᓇᒡ ᒋ ᐃᓯ ᓴᑥᑭᔅᑕᐅᒡ ᐅᑦ ᐊᑯᐳᐛᐛ ᑕᓐᑕ ᒐ ᐊᑎ ᐱᒧᑕᐃᑯᔨᒋ ᒋᓴᓴ ᐊᓂᔭ ᐅᐧᑲᓇ, ᐊᑯ ᑯᑎᑭᒡ ᓂᐱᓯᔭᑎᒂ ᒋ ᓇᓇᑥᓂᒧᒡ ᐊᑯ ᐊᓐᑕ ᒪᔅᑭᓇᒡ ᑲ ᐊᔅᑕᒡ᙮ 9 ᐊᓐᒡ ᒪᒃ ᐊᐛᓐᒋ ᓂᑲᓄᒡ ᑭᔭ ᐊᓐᒡ ᐅᑕᒡ ᑲ ᐸᒋ ᐱᒧᑕᒡ ᒋ ᑕᑈᐅᒡ ᐊ ᐃᔅᒋᔄᒡ, “ᒋᔅᑕᔨᑕᑯᓱᐤ ᒋᓴᒪᓂᑐᐤ᙮ ᓱᐛᔨᑕᑯᓱᐤ ᐊᓐ ᑲ ᐸᒋ ᐃᑎᓴᐅᑯᑦ ᐅᑎᐸᔨᒋᒐᐛ᙮ 10 ᓱᐛᔨᑕᑯᓱᐤ ᐊᓐ ᑕᐸᔨᒋᒐᑦ, ᐊᓐ ᐊᓂᔭᐧᑲ ᒋᑦ ᐊᓂᔅᒐ ᒋᒧᓱᒥᓄᐤ ᑎᐱᑦ ᐊ ᑕᔨᒋ ᑲ ᐅᒋ ᐊᓂᔅᒐ ᐱᒪᑎᓯᑦ᙮ ᒪᒥᒋᒪᑕᐤ ᒋᓴᒪᓂᑐᐤ ᒪᐅᒡ ᑲ ᐃᔅᐸᔨᑕᑯᓯᑦ᙮” 11 ᐃᔅᐱ ᒪᒃ ᒋᓴᔅ ᑕᑯᓯᐧᒃ ᐊᓐᑕ ᒋᕈᓯᓕᒥᒡ ᒋ ᐱᒐᐤ ᐊᓂᔭ ᒋᓴᐊᔭᒥᐊᐅᒋᐛᐱᔪᐤ, ᒥᓯᐛ ᐊᓐᑕ ᐛᔅᑲ ᑲ ᐃᑕᐱᑦ ᐊ ᑭᑭᓄᐛᐸᑕᐧᒃ ᒐᒂᔪᐛ᙮ ᓴᔅ ᒪᒃ ᒋ ᐊᑎ ᐅᑕᑯᓯᔪᐤ ᐊᑯ ᐊᓐᑕ ᐸᑕᓂᒡ ᒂ ᐃᑐᑕᑦ ᐊᓂᔭᔪᐛ ᑲ ᓂᓱᓴᐳᔨᒋ ᐅᒋᔅᒋᓄᐊᒧᐛᑭᓇ ᐊ ᐎᒐᐅᑯᑦ᙮ ᒋᓴᔅ ᑲ ᐊᓏᔨᒪᑦ ᒥᔅᑎᒂ ᒪᑎᔪᐤ 21.18 , 19 12 ᒥᓐ ᐎᔭᐱᓂᔨᒡ ᒪᒂᒡ ᐊ ᐱᒧᑕᒡ ᐸᑕᓂᒡ ᐊ ᐅᑐᑕᒡ ᐊᑯ ᒂ ᐎ ᒥᒋᓱᑦ ᒋᓴᔅ᙮ 13 ᒋ ᐛᐱᒪᐤ ᓇᑕ ᐛᔪᐎᔅ ᐊ ᒋᒥᓱᔨᒋ ᒥᓯᓱᒥᓇᑎᒂ ᐊ ᓂᐱᓱᔨᒋ᙮ ᒂ ᓇᑕᑦ ᐊ ᐎ ᓂᑐ ᒋᔅᒐᔨᒪᑦ ᐊ ᒥᓂᓱᔨᒂᓂ᙮ ᐃᔅᐱ ᒪᒃ ᐛᑎᑕᑦ ᒥᒄ ᓂᐱᔭ ᒋ ᐛᐸᑎᒻ ᐛᔅ ᑕᐸ ᐊᔅᒄ ᐅᒋ ᐅᑎᒋᐱᔪᐤ ᐊᓐᑕ ᑲᒋ ᒥᓂᓱᔨᒋ᙮ 14 ᒋ ᐃᔨᒪᐊᐤ ᐊᓂᔭᔪᐛ ᒥᔅᑎᒂ ᒂ ᐃᑕᑦ, “ᐊᑯᓐ ᒐ ᐃᓯᓇᑯᓯᔨᓐ, ᓇᒪ ᒥᓐ ᓂᑕ ᒋᑭ ᐅᒋ ᓂᑕᐅᒋᓇ ᒥᓂᓴ ᐊᓐᑕ ᐊ ᑕᔨᓐ ᒐᒋ ᒥᒋᒡ ᐊᐛᓐᒋ᙮” ᒋ ᐸᑕᑯᐤ ᒪᒃ ᐅᒋᔅᒋᓄᐊᒧᐛᑭᓇ ᐅᔭ ᑲ ᐃᓯ ᐃᔨᒪᐊᔨᒋ ᐊᓂᔭᔪᐛ ᒥᔅᑎᒂ᙮ ᒋᓴᔅ ᑲ ᐎᐎᑎᓴᐛᑦ ᐊᐛᔪᐛ ᐊᓐᑕ ᒋᓴᐊᔭᒥᐊᐅᒋᐛᐱᒡ ᒪᑎᔪᐤ 21.12-17 ; ᓗᒃ 19.45-48 ; ᒠᓐ 2.13-22 15 ᐃᔅᐱ ᒋᕈᓯᓕᒥᒡ ᑕᑯᓯᓂᒡ ᐊᑯ ᒋᓴᔅ ᒂ ᐱᒐᑦ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮ ᒂ ᐊᑎ ᐎᐎᑎᓴᐛᑦ ᐊᓂᔭ ᐊᑕᐛᓱᐛ ᑭᔭ ᐊᓂᔭᔪᐛ ᑲ ᐅᑎᓇᓱᔨᒋ ᐊᓐᑕ ᐱᑎᑭᒥᒡ ᑲ ᑕᔨᒋ᙮ ᒋ ᑯᑎᐳᐛᐱᓂᒺᐤ ᐅᒥᒋᓱᐛᑭᓇᑎᑯᔪᐛ ᐊᓂᔭᔪᐛ ᓱᓇᔭᔪᐤ ᑲ ᒥᔅᑯᑐᓇᔨᒋ ᑭᔭ ᐊᑯᓐ ᑲ ᐃᑐᑎᒺᑦ ᐅᑕᑎᐳᐛᑭᓂᔪᐛ ᐊᓂᔭᔪᐛ ᐅᒥᒥᐅᐛ ᑲ ᐊᑕᐛᔨᒋ᙮ 16 ᒋ ᓂᑲᓇᐤ ᑭᔭ ᐊᐛᔪᐛ ᒐᒋ ᓴᐳᑐᐛᑎᑕᔨᒋ ᒐᒂᔪᐤ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮ 17 ᒋ ᒋᔅᑯᑎᒪᒐᐤ ᒪᒃ, ᐊ ᐃᔅᒋᔄᑦ, “ᓇᒪᐎᔾ ᐊ ᐃᑎᔅᑕᐤ ᒋᓴᒪᓂᑐᐤ ᐅᒥᓯᓇᐃᑭᓂᒡ, ᐊᔭᒥᐊᐅᒋᐛᑉ ᒋᑭ ᐃᓯᓂᐧᑲᑕᐤ ᓂᒡ, ᐊᓐᑕ ᒥᓯᐛ ᐊᐛᓐ ᐊ ᐃᑎᔅᑲᓇᓯᑦ ᒐᒋ ᐊᔭᒥᐊᑦ ? ᒋᔨᐛᐤ ᒪᒃ ᒧᔭᒻ ᑲᒋᒧᑎᒡ ᐅᐛᑎᑯᐛᐤ ᐊᑯᓐ ᐊ ᐃᓯᓇᑯᑕᐛᒄ ᒋᓴᒪᓂᑐᐤ ᐎᒡ᙮” 18 ᐊᓐᒡ ᒪᒃ ᑲ ᓂᑲᓂᐱᒡ ᐊᔭᒥᐊᐅᒋᒪᐅᒡ ᑭᔭ ᐊᓐᒡ ᐎᓱᐛᐅᓂᔪᐤ ᑲ ᒋᔅᑯᑎᒪᒐᒡ ᒋ ᐸᑎᒧᒡ ᐅᔭ ᐊᒋ ᐃᔅᒋᔄᔨᒂᓂ᙮ ᐊᓂᔭ ᒪᒃ ᒥᓯᐛ ᐊᐛᔪᐛ ᐊ ᒥᔅᑲᓯᑎᒥᔨᒋ ᑕᓐ ᑲ ᐃᓯ ᒋᔅᑯᑎᒪᒐᔨᒋ ᒋᓴᓴ ᒋ ᓴᒋᓱᐅᒡ ᐅᒡ ᒋᓴᐊᔭᒥᐊᐅᒋᒪᐅᒡ ᑭᔭ ᐊᓐᒡ ᒥᓯᓇᐃᒐᓱᐅᒡ ᐊᑯ ᑲ ᓇᓂᑐ ᒋᔅᒐᔨᑕᒡ ᑕᓐ ᒐᒋ ᐃᑎᒡ ᒐᒋ ᓂᐸᐊᑭᓄᔨᒋ ᒋᓴᓴ᙮ 19 ᐃᔅᐱ ᒪᒃ ᐛᑕᑯᓯᔨᒡ ᒋᓴᔅ ᑭᔭ ᐅᒋᔅᒋᓄᐊᒧᐛᑭᓇ ᒋ ᓂᑭᑎᒧᒡ ᐊᓂᔭ ᐅᑕᓇᔪᐤ᙮ ᑕᑈᑎᒧᐅᓐ ᑭᔭ ᐊᔭᒥᐊᔅᑎᒪᒐᐅᓐ ᒪᑎᔪᐤ 21.20-22 20 ᐎᐱᒡ ᒥᓐ ᐎᔭᐱᓂᔨᒡ ᒪᒂᒡ ᐊ ᐱᒧᑕᒡ ᒪᔅᑭᓇᒡ ᒋ ᐛᐱᒪᐅᒡ ᐊᓂᔭ ᒥᓯᓱᒥᓇᑎᒂ ᓇᔅᒡ ᐊ ᓂᐱᔨᒋ, ᐛᐛᒡ ᐊᓂᔭᔪᐛ ᐅᑎᐱᔭ ᐊ ᓂᐱᒥᑭᓂᔨᒋ᙮ 21 ᐱᑕᕐ ᒪᒃ ᒋ ᐅᒋ ᒋᔅᒋᓱᐤ ᐊᓂᔭ ᑕᓐ ᑲ ᐃᔅᐱᔨᒡ ᐊᑯ ᒂ ᐃᑕᑦ ᒋᓴᓴ, “ᒋᔅᑯᑎᒪᒐᓱᐤ, ᐃᑕᐱ ᒪ᙮ ᐅ ᒥᓯᓱᒥᓇᑎᒄ ᑲ ᐊᓏᔨᒥᑦ ᓇᔅᒡ ᐸᓱᐤ᙮” 22 ᒋᓴᔅ ᒋ ᐃᑕᐤ ᐊᓂᔭᔪᐛ ᐅᒋᔅᒋᓄᐊᒧᐛᑭᓇ, “ᑕᑈᐅᒐᔨᒪᒄ ᒋᓴᒪᓂᑐᐤ᙮ 23 ᑯᐃᔅᒄ ᒋ ᐎᑎᒪᑎᓇᐛᐤ, ᐊᐛᓐ ᒐᒋ ᐃᑎᓱᐛᑕᒧᒂ ᐅᔭ ᐱᔅᑯᑎᓇᔪᐤ, ‘ᐱᐧᑯᒋ, ᐊᑯ ᐊᓐᑕ ᐎᓂᐸᑯᒡ ᒐ ᐃᓯ ᐛᐱᓂᓱᔨᓐ,’ ᐊᑲ ᒪᒃ ᓇᔅᒡ ᐊᓏᑕᒐ ᒐᒋ ᐃᔅᐱᔨᒡ ᐅᔭᔪᐤ, ᓇᔅᒡ ᑕᑈᑕᒐ ᐊᓂᔭ ᑲ ᐃᔅᒋᔄᑦ ᒐ ᐃᔅᐱᔨᒡ, ᐊᑯᓐ ᒐ ᐃᑐᑎᒧᐛᑭᓄᐅᑦ ᑕᓐ ᑲ ᐃᓯ ᓂᑐᐛᔨᑕᐧᒃ᙮ 24 ᐊᑯ ᒪᒃ ᐊ ᐃᑎᑎᑯᒡ, ᒥᒄ ᑕᓐ ᒐ ᐃᓯ ᓂᑐᑎᒪᔭᒄ ᐊ ᐊᔭᒥᐊᔭᒄ, ᑕᑈᑎᒧᒄ ᓴᔅ ᐊ ᐊᔭᔭᒄ ᑭᔭ ᒐ ᒥᔨᑯᔭᒄ ᐊᓐ ᑲ ᐃᓯ ᓂᑐᑎᒪᔭᒄ᙮ 25 ᑭᔭ ᑕᑥᐤ ᓂᐳᔨᓇ ᐊ ᐊᔭᒥᐊᔨᓐ, ᐛᐸᔨᑎᒧᐤ ᐊᓐ ᐊᐛᓐ ᑲ ᐅᓂᑐᑕᔅᒃ, ᑭᔭ ᒍᑕᐎᔾ ᒋᒋᒋᓯᑯᒡ ᐊ ᑕᑦ ᑭᔭ ᐎᔾ ᒐ ᐛᐸᔨᑎᒪᔅᒃ ᒋᒥᒋᑥᐅᓇ᙮ 26 ᐊᑲ ᐛᐸᔨᑎᒪᒐᔨᓇ ᓇᒪ ᑭᔭ ᐎᔾ ᒍᑕᐎᔾ ᒋᒋᒋᓯᑯᒡ ᐊ ᑕᑦ ᒋᑭ ᐅᒋ ᐛᐸᔨᑎᒪᒄ ᒋᒥᒋᑥᐅᓇ᙮” ᒋᓴᔅ ᑲ ᑯᒂᒋᒪᑭᓄᐅᑦ ᐊᐛᔪᐛ ᑲ ᒥᔨᑯᑦ ᒐᒋ ᐃᑎᑦ ᑕᓐ ᑲ ᐃᑎᑦ ᒪᑎᔪᐤ 21.23-27 ; ᓗᒃ 20.1-8 27 ᒥᓐ ᑲᐤ ᒋ ᐃᑐᑕᐅᒡ ᒋᕈᓯᓕᒥᒡ᙮ ᐊ ᐱᒧᑕᑦ ᒪᒃ ᒋᓴᔅ ᐊᓐᑕ ᐊ ᑎᑯᓂᔨᒡ ᐊᓂᔭ ᒋᓴᐊᔭᒥᐊᐅᒋᐛᐱᔪᐤ ᒋ ᓂᑐᐛᐱᒥᑯᐤ ᐊᓂᔭᔪᐛ ᑲ ᓂᑲᓂᐱᔨᒋ ᐊᔭᒥᐊᐅᒋᒪᐛ ᑭᔭ ᐊᓂᔭᔪᐛ ᐎᓱᐛᐅᓂᔪᐤ ᑲ ᒋᔅᑯᑎᒪᒐᔨᒋ ᑭᔭ ᐊᓂᔭᔪᐛ ᒍᐤ ᐃᔪᐛ ᑲ ᓂᑲᓂᔅᑯᐛᔨᒋ, 28 ᐊᑯ ᒂ ᐃᑎᑯᑦ, “ᑕᓐ ᐊ ᐃᑎᔨᓐ ᐅ ? ᐊᐛᓐ ᑲ ᐃᑎᓱᒥᔅᒃ ᒐᒋ ᐃᑐᑎᒥᓐ ᐅᔭ ᒐᒂᔪᐛ ?” 29 ᒋᓴᔅ ᒋ ᐃᑕᐤ, “ᒋᑭ ᑯᒂᒋᒥᑎᓇᐛᐤ ᒐᒂᓐ, ᒐ ᐸᒋ ᐎᑎᒧᐅᔭᒄ ᑭᔭ ᒐ ᐎᑎᒪᑎᑯᒡ ᑕᓐᑕ ᐛᒋᐱᔨᒡ ᐅ ᑎᐸᔨᒋᒐᐅᓐ ᑲ ᐊᔭᔭᓐ ᐅᔭ ᒐᒋ ᐃᑐᑎᒪᓐ᙮ 30 ᒠᓐ ᒪ ᑲ ᓯᑲᐃᑐᐛᑦ ᐊᐛᔪᐛ, ᐊᐛᔪᐛ ᑲ ᐃᑎᓱᒥᑯᑦ ᒐᒋ ᓯᑲᐃᑕᒐᑦ, ᒋᓴᒪᓂᑐᐛ ᐊ, ᑭᔭ ᒪᒃ ᓇᐸᐛ ? ᐎᑎᒧᐅᒄ ᒪᒃ᙮” 31 ᒋ ᒥᒋᐱᔪᒡ ᒪᒃ ᐊᓐᑕ ᐎᔨᐛᐤ ᐊ ᐃᔅᒋᔄᒡ, “ᐃᔅᒋᔄᔭᒂ, ‘ᒋᓴᒪᓂᑐᐛ ᒋ ᐃᑎᑯᐤ,’ ᒋᑭ ᐃᑎᑯᓄᐤ, ‘ᒐᒂᓐ ᒪᒃ ᐛᒋ ᐊᑲ ᐅᒋ ᑕᑈᑐᐛᒄ ?’ 32 ᒋᑭ ᐃᑕᓄᐤ ᐊ ᒪᒃ, ‘ᓇᐸᐛ ᑲ ᐃᑎᑯᑦ᙮’ ” ᒋ ᐛᐛᓇᔨᑎᒧᒡ ᑕᓐ ᒐᒋ ᐃᓯ ᐎᑎᒧᐛᒡ ᐊᒋ ᑯᔅᑕᒡ ᐊᓂᔭᔪᐛ ᐃᔪᐛ ᐊᓐᑕ ᑲ ᑕᔨᒋ᙮ ᐛᔅ ᒥᓯᐛ ᒋ ᑕᑈᑎᒥᔪᐛ ᑕᑈ ᐊᒋ ᐅᒋᔅᒋᐛᐃᒐᓱᔨᒋ ᐊᓂᔭᐧᑲ ᒠᓇ᙮ 33 ᐊᑯ ᒂ ᐃᑕᒡ ᒋᓴᓴ, “ᓇᒪ ᓂ ᒋᔅᒐᔨᒪᓇᓐ ᐊᐛᔪᐛ ᑲ ᐃᑎᓱᒥᑯᑦ ᒠᓐ ᒐᒋ ᓯᑲᐃᑐᐛᑦ ᐊᐛᔪᐛ᙮” ᒋᓴᔅ ᒋ ᐃᑕᐤ, “ᑭᔭ ᓂᔾ ᓇᒪ ᒋᑭ ᐅᒋ ᐎᑎᒪᑎᓇᐛᐤ ᐊᐛᓐ ᑲ ᐸᒋ ᐃᑎᓱᒥᑦ ᐅ ᒐᒋ ᐃᑐᑎᒪᓐ᙮” |
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada
Wycliffe Bible Translators, Inc.