ᒪᑎᔪᐤ 3 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒠᓐ ᐅᓯᑲᐃᑕᒐᐤ ᑲ ᑭᒐᔅᒋᒧᑦ ᐊᓐᑕ ᐸᐧᑯᑎᔅᑭᒥᑲᒡ Matthew 3.1-12 (Advent-2 Year A)

¹ ᐊᑯᑕ ᒪᒃ ᐅᑕ ᒪᒂᒡ ᒠᓐ ᐅᓯᑲᐃᑕᒐᐤ ᑲᒋ ᐃᑐᑕᑦ ᐊᓐᑕ ᐸᐧᑯᑎᔅᑭᒥᑲᒡ, ᐊᓐᑕ ᒍᑎᔭ ᐊᔅᒋᒡ ᐃᑕᒐ, ᐊᑯ ᑲ ᒋᒋᐱᔨᑦ ᐊ ᑭᒐᔅᒋᒧᑦ᙮

² ᐊ ᐃᔅᒋᔄᑦ, “ᒂᔅᑲᑎᓯᒄ, ᐛᔅ ᓴᔅ ᐸᓱᓇᑯᓐ ᐊᓐ ᒋᒋᒋᓯᒄ ᒋᓴᐅᒋᒪᐅᓐ᙮”

³ ᐊᐅᒄ ᒪᒃ ᐅᔭ ᒠᓇ ᑲ ᐊᔨᒧᒪᑦ ᐊᓂᔭ ᐅᒋᔅᒋᐛᐃᒐᓱᐤ ᐊᐃᓴᔭ ᑲ ᐃᓯᓂᐧᑲᓱᑦ ᐃᔅᐱ ᑲ ᐃᔅᒋᔄᑯᐱᓇ, ᑕᐤ ᐊᐛᓐ ᐊ ᑕᑈᑦ ᐊᓐᑕ ᐸᐧᑯᑎᔅᑭᒥᑲᒡ ᐊ ᐃᔅᒋᔄᑦ, ᐊᔭᔅᑯᐎᔅᑕᒺᐧᒄ ᐅᑎᐸᔨᒋᒐᐤ ᐅᒪᔅᑭᓇᒻ ᐊᓐᑕ ᒐ ᐱᒧᑕᑦ, ᑯᐃᔅᑯᒧᑕᐛᐧᒄ᙮

⁴ ᐅ ᒪᒃ ᒠᓐ, ᑲ ᒥᔅᑎ ᐱᔎᐅᑯᓇᔨᒋ ᐊᐛᓯᓴ ᐅᐱᐎᐛ ᒋ ᐅᒋ ᐅᓯᑕᑭᓄᐅᔪᐛ ᐅᑦ ᐊᐱᒋᑕᐅᓇ, ᑭᔭ ᐱᓴᑭᓇᔭᐱᔾ ᒋ ᐃᑕᔨᑕᑯᓂᔪᐤ ᐊᓂᔭᔪᐤ ᒐᒂᔪᐤ ᑲ ᐅᐱᒂᑕᐅᓂᑦ ᑭᔭ ᒂᔅᑯᑎᓴ ᑭᔭ ᑲᓯᐛᓯᐛᐳᔪᐤ ᐊᒧᐎᒋᔅᑐᓂᔨᒡ ᑲ ᑎᑯᓂᔨᒡ ᐊᔪᐅᒄ ᐅᔭ ᑲ ᐅᒥᒋᒥᑦ᙮

⁵ ᒋ ᐸᒋ ᓂᑐᑕᑯᐤ ᒪᒃ ᒠᓐ ᐊᓂᔭᔪᐛ ᐊᐛᔪᐛ ᒋᕈᓯᓕᒥᒡ ᑲ ᐅᒋᔨᒋ ᑭᔭ ᐊᓐᑕ ᒥᓯᐛ ᒍᑎᔭ ᐊᔅᒋᒡ ᑲ ᐅᒋᔨᒋ, ᑭᔭ ᐊᓂᔭᔪᐛ ᐊᐛᔪᐛ ᒥᓯᐛ ᐊᓐᑕ ᐊᓂᔭᔪᐛ ᐅᑕᓇᐛ ᒥᒋᒪ ᒠᕐᑕᓐ ᓯᐱᒡ ᑲ ᑎᑯᓂᔨᒋ᙮

⁶ ᒧᓴ ᒋ ᐎᑎᒧᒡ ᑕᓐ ᑲ ᐃᓯ ᒥᒋᑐᑎᒧᐛᒂ ᑭᔭ ᒂ ᓯᑲᐃᑕᑯᒡ ᒠᓇ ᐊᓐᑕ ᒠᕐᑕᓐ ᓯᐱᒡ᙮

⁷ ᐃᔅᐱ ᒪᒃ ᒠᓐ ᐎᔭᐱᒪᑦ ᒥᒐᑦ ᐸᕆᓯᐊ ᑭᔭ ᓴᑎᔪᓯᐊ ᐊ ᐸᒋ ᑎᑯᓯᓂᔨᒋ ᒐᒋ ᓯᑲᐃᑐᐛᑭᓄᔨᒋ, ᒋ ᐃᑕᐤ, “ᒧᔭᒻ ᑕᑈ ᒋᓇᐱᑯᒡ ᒂ ᐃᑕᔨᑕᑯᓯᔭᒄ᙮ ᐊᐛᓐ ᑲ ᐃᑎᑕᒄ ᒐᒋ ᒋᑎᓯᒧᑎᒺᒄ ᒋᓴᒪᓂᑐᐤ ᐅᑦ ᐊᐧᑯᔪᐛᓱᐅᓐ ?

⁸ ᓄᑯᑕᒄ ᑕᑈ ᐊ ᒂᔅᑲᑎᓯᔭᒄ, ᐊ ᓂᑭᑎᒪᒄ ᒋᒥᒐᑎᓯᐅᓄᐛᐛ᙮

⁹ ᑭᔭ ᐊᑲᐎᔾ ᐃᑕᔨᑎᒧᒄ ᒐ ᐊᑲ ᐅᒋ ᐛᐛᓯᐃᑕᒄ ᒋᓴᒪᓂᑐᐤ ᐊ ᐅᓂᑐᑎᒪᒄ ᒥᒄ ᐊᑉᕋᐊᒻ ᐊ ᑕᑦ ᐊ ᐅᒋᔭᒄ᙮ ᒋ ᐎᑎᒪᑎᓇᐛᐤ, ᒋᓴᒪᓂᑐᐤ ᒋᑭ ᒋ ᐃᑐᑐᐛᐤ ᐅᔭᔪᐛ ᐊᓯᓂᔭ ᑲ ᐃᑎᐱᔨᒋ ᒐᒋ ᐅᒋ ᐅᓯᐊᑦ ᐊᐛᔪᐛ ᐊᑉᕋᐊᒪ ᒐ ᐅᑦ ᐊᐛᓯᒥᔨᒋ᙮

¹⁰ ᐛᔅ ᒧᔭᒻ ᓴᔅ ᐊ ᐊᔭᔅᑯᔅᑕᒡ ᐊᑭᑕᔅᒄ ᐊᐅᒄ ᒐ ᐃᓯᓇᒂᒡ ᒐ ᓇᑥᑲᐛᑭᓄᐅᑦ ᐊᓐ ᒥᔅᑎᒄ ᐊᓐᑕ ᐊ ᐅᑎᐱᔪᐅᑦ᙮ ᐛᔅ ᑕᑐᐤ ᒥᔅᑎᒄ ᐊᑲ ᒥᔪ ᒥᓂᓱᐅᑦ ᒋᑭ ᓇᑥᑲᐛᑭᓄᐤ ᑭᔭ ᒋᑭ ᒥᑐᔅᑕᐛᐱᓇᑭᓄᐤ ᐃᔅᑯᑕᒡ᙮”

¹¹ “ᓂᐱᔾ ᓂᔾ ᒋ ᓯᑲᐃᑕᑎᓇᐛᐤ ᐊ ᓄᒂᒡ ᐊ ᐎ ᒂᔅᑲᑎᓯᔭᒄ, ᒥᒄ ᒪᒃ ᑯᑎᒃ ᐊᐛᓐ ᒋᑭ ᑎᑯᓯᓄᐤ ᐊᔪᐛᒃ ᐊ ᒋᔅᑕᔨᑕᑯᓯᑦ ᐃᔅᐱᔅ ᓂᔾ᙮ ᓇᒪ ᒪᒃ ᐛᐛᒡ ᓂᑦ ᐃᔅᐱᑕᔨᑕᑯᓯᓐ ᒐᒋ ᐊᐱᐧᑯᓂᒧᒡ ᐅᒥᔅᒋᓇᔭᐱᔭ᙮ ᐎᔾ ᒪᒃ ᒋᑭ ᓯᑲᐃᑕᑯᐛᐤ ᑲ ᐸᔭᒋᓯᔨᒋ ᐊᒐᒂ, ᑭᔭ ᐃᔅᑯᑕᔪᐤ᙮

¹² ᐅ ᒐ ᑎᑯᓯᐧᒃ ᒋᑭ ᐃᑕᔨᑕᑯᓱᐤ ᒧᔭᒻ ᓇᐸᐤ ᑲ ᐸᔭᒋᑕᑦ ᐸᒂᓯᑭᓂᒥᓇᑎᑯᔪᐤ ᐊᓐᑕ ᒐᒋ ᐅᑎᓇᑦ ᐸᒂᓯᑭᓇ ᑭᔭ ᑎᐸᓂᔅᑕᐤ ᐊᓂᔭᔪᐛ ᑲ ᒥᔽᔨᒋ ᐊᓐᑕ ᐊᔅᑕᓱᐅᒋᐛᐱᒡ᙮ ᐊᑯ ᐊᓂᔭᔪᐛ ᐊᑲ ᐎᔭᔅ ᐃᑕᐱᑎᓂᔨᒋ ᐃᔎᓯᒻ ᐊᓐᑕ ᐊᑲ ᓂᑕ ᐊᔅᑐᐛᔨᒡ ᐃᔅᑯᑕᔪᐤ᙮” ᐊᐅᒄ ᒪᒃ ᐅᔭ ᑲ ᐃᑕᑦ ᒠᓐ ᐅᓯᑲᐃᑕᒐᐤ ᐊᓂᔭᔪᐛ ᐃᔪᐛ ᑲ ᐸᒋ ᓂᑐᑕᑯᑦ ᐊ ᑭᒐᔅᒋᒧᑦ᙮

ᒋᓴᔅ ᑲ ᓯᑲᐃᑐᐛᑭᓄᐅᑦ

¹³ ᓇᓇᒐ ᒪᒃ ᒋᓴᔅ ᒋ ᑎᑯᓯᓄᐤ ᑲᓕᓕ ᐊᔅᒋᒡ ᐊ ᐅᑐᑕᑦ, ᒋ ᓂᑐᐛᐱᒪᐤ ᒠᓇ ᐊᓐᑕ ᒠᕐᑕᓐ ᓯᐱᒡ ᒐᒋ ᓯᑲᐃᑕᑯᑦ᙮

¹⁴ ᒥᒄ ᒪᒃ ᒠᓐ ᒋ ᐎ ᓂᑲᓇᐤ ᐊ ᐃᑕᑦ, “ᐃᓯᓇᑯᓐ ᒋᔾ ᒐᒋ ᐸᒋ ᓯᑲᐃᑐᐎᔨᓐ, ᒐᒂᓐ ᒪᒃ ᐛᒋ ᐸᒋ ᑯᒂᒋᒥᔨᓐ ᒐᒋ ᓯᑲᐃᑐᐛᑕᓐ ?”

¹⁵ ᐊᑯ ᒋᓴᔅ ᐊᑕᑦ, “ᐊᓄᒡ ᐅ ᐃᑐᑕ ᑕᓐ ᐊ ᐃᑎᓱᒥᑕᓐ᙮ ᐛᔅ ᐅ ᐃᑐᑎᒪᒂ ᒋᑭ ᐃᑐᑎᒺᓇᓄᐤ ᒥᓯᐛ ᑕᓐ ᐊ ᐃᓯ ᓂᑐᐛᔨᑕᐧᒃ ᒋᓴᒪᓂᑐᐤ᙮” ᑭᑈ ᑲ ᓂᔅᑯᒪᑦ ᒠᓐ᙮

¹⁶ ᐃᔅᐱ ᒪᒃ ᒋᓴᔅ ᑲ ᓯᑲᐃᑐᐛᑭᓄᐅᑦ, ᑎᐛᒡ ᐊ ᐊᑎ ᑭᐸᑦ ᒪᒃ ᒋ ᔪᑕᐱᔪᐤ ᒋᒋᒋᓯᒄ᙮ ᒋ ᐛᐱᒪᐤ ᒪᒃ ᒋᓴᒪᓂᑐᐛ ᐅᑦ ᐊᒐᐧᑯᔪᐛ ᐊ ᐸᒋ ᔭᓯᔨᒋ ᒧᔭᒻ ᐅᒥᒥᐛ ᐊ ᐃᓯᓇᑯᓯᔨᒋ ᑭᔭ ᐊ ᑥᐅᑕᑯᑦ᙮

¹⁷ ᐊᑯ ᒂ ᐸᑐᐛᒡ ᐊᐛᔪᐛ ᐊᓐᑕ ᒋᒋᒋᓯᑯᒡ ᐅᒡ ᐊ ᐃᔅᒋᔄᔨᒋ, “ᐊᐅᑯᐤ ᓂᑯᔅ ᑲ ᓴᒋᐃᒃ ᑭᔭ ᓇᔅᒡ ᑕᑈ ᑲ ᓂᓇᐊᔨᑎᒥᐃᑦ᙮”