ᒪᑎᔪᐤ 28 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᔅ ᑲ ᐅᓂᔅᑲᑦ ᓂᐳᐅᓂᒡ ᐅᒡ Matthew 28.1-10 (Easter Sunday Year A)

¹ ᐃᔅᐱ ᒪᒃ ᑲ ᐎᒪᐱᔨᒡ ᐊᓂᔭ ᐊ ᐊᔭᒥᐊᐅᒋᓯᑲᔨᒡ, ᐊᓐ ᒪᒃ ᐊᑎ ᐸᑕᐸᒡ ᒪᕆ ᒪᒃᑕᓕᓐ ᑭᔭ ᒪᕆ ᒋ ᓂᑐᐛᐸᑎᒧᒡ ᐊᓂᔭ ᒋᐱᐃᒋᐛᐱᔪᐤ᙮

² ᓯᔅᒋᑯᒡ ᒪᒃ ᒋ ᒥᔅᑎ ᑯᐃᐧᑯᓐ, ᐊᑯ ᐅᑎᐸᔨᒋᒐᐤ ᐅᑦ ᐊᓐᒋᓇᒪ ᒂ ᐸᒋ ᔭᓯᔨᒋ ᒋᒋᒋᓯᑯᒡ ᐅᒡ, ᒂ ᐃᒐᑎᑎᐱᓇᔨᒋ ᐊᓂᔭ ᐊᓯᓂᔭ ᐊᓐᑕ ᐃᔎᑕᒥᒡ ᐅᒡ ᒂ ᐊᑎ ᑕᑎᐱᔨᒋ ᐊᓐᑕ᙮

³ ᒧᔭᒻ ᒪᒃ ᐊ ᐛᔅᑕᐱᔨᒡ ᑲ ᐃᔅᐱᔅ ᒋᐧᑲᔭᔅᑐᐛᒡ ᐊᐅᑯᓐ ᑲ ᐃᓯᓇᑯᓯᑦ ᐊᓐ ᐊᓐᒋᓐ ᐃᔅᐱ ᐛᒋ ᓄᑯᓯᑦ, ᑭᔭ ᐅᑦ ᐊᐱᒋᑕᐅᓇ ᑕᐱᔅᑯᓐ ᑯᓐ ᑲ ᐃᔅᐱᔅ ᐛᐱᓯᑦ ᐊᐅᑯᓐ ᑲ ᐃᓯᓇᑯᓂᔨᒋ᙮

⁴ ᐊᓐᒡ ᒪᒃ ᐊᓯᒪᑭᓂᓯᒡ ᑲ ᓂᓇᑭᑐᐛᔨᑕᒡ ᐊᓂᔭ ᒋᐱᐃᒋᐛᐱᔪᐤ ᐊ ᐃᔅᐱᔅ ᑯᔅᑕᒋᒡ, ᒋ ᓇᓇᒥᐱᔪᒡ ᒋ ᐸᒋᓯᓄᐅᒡ ᒪᒃ ᐊᑯ ᒧᔭᒻ ᐊ ᓂᐱᒡ ᑲ ᐃᓯᓇᑯᓯᒡ᙮

⁵ ᐊᑯ ᐊᓐ ᐊᓐᒋᓐ ᒂ ᐃᑕᑦ ᐊᓂᔭ ᐃᔎᐛ, “ᐊᑲᐎᔾ ᑯᔅᑕᒋᒄ, ᒋ ᒋᔅᒐᔨᒥᑎᓇᐛᐤ ᐊ ᓇᓂᑐᐛᔨᒪᒄ ᒋᓴᔅ ᐊᓐ ᑲ ᒋᔅᑕᔎᑕᑭᓄᐅᑦ᙮

⁶ ᓇᒪ ᑕᐤ ᐅᑕ, ᐛᔅ ᒋ ᐅᓂᔅᑲᐤ ᒧᔭᒻ ᑕᓐ ᑲ ᐃᔅᒋᔄᑦ ᒐ ᐃᑎᑦ᙮ ᐸᑐᑕᒄ ᐸᒋ ᑭᓄᐛᐸᑎᒺᐧᒄ ᐊᓐᑕ ᑲ ᐱᒥᓯᒪᑭᓄᐅᑦ᙮

⁷ ᐎ ᒋᓯᐱᔨᒄ ᒪᒃ ᐎᑎᒧᒪᐧᑯ ᐅᒋᔅᒋᓄᐊᒧᐛᑭᓇ, ᐊᒋ ᐅᓂᔅᑲᑦ ᓂᐳᐅᓂᒡ ᐅᒡ, ᐊᓄᒡ ᒪᒃ ᓂᑲᓐ ᐃᑐᑕᐤ ᑲᓕᓕᒡ ᐊᑯᑕ ᐊᓐᑕ ᒐ ᐛᐱᒪᒄ᙮ ᐎ ᒋᔅᒋᓯᒄ ᒪᒃ ᐅ ᑲ ᐃᑎᑎᑯᒡ᙮”

⁸ ᐊᓐᒡ ᒪᒃ ᐃᔎᐅᒡ ᒋ ᐎᐎᐸᔨᑐᐅᒡ ᐊᓐᑕ ᒋᐱᐃᒋᐛᐱᒡ ᐅᒋ ᐊ ᓴᒋᓯᒡ ᑭᔭ ᐊ ᒧᒋᒐᔨᑕᒡ, ᒂ ᐎᑎᒧᐛᒡ ᐊᓂᔭ ᒋᔅᒋᓄᐊᒧᐛᑭᓇ᙮

⁹ ᓯᔅᒋᑯᒡ ᒪᒃ ᒋ ᐅᒋ ᓂᒋᔅᑯᐛᐅᒡ ᒋᓴᓴ ᐊᑯ ᒂ ᐃᑎᑯᒡ, “ᐎ ᒋᔭᒪᔨᑎᒧᒄ᙮” ᐊᑯ ᒂ ᐅᒋᒋᐧᑯᓂᐱᔪᐅᒡ ᐊ ᑕᔨᒋ ᒂ ᒪᑯᓂᒺᒡ ᐅᓯᑎᔪᐛ ᐊᑯ ᒂ ᓄᒋᔅᑐᐛᒡ᙮

¹⁰ ᐊᑯ ᒋᓴᔅ ᒂ ᐃᑕᑦ, “ᐊᑲᐎᔾ ᑯᔅᑕᒋᒄ, ᐎᑎᒪᐧᑯᒡ ᓂᐧᑲᓂᓯᒡ ᑲᓕᓕᒡ ᒐᒋ ᐃᑐᑕᒡ, ᐊᑯᑕ ᐊᓐᑕ ᒐ ᐛᐱᒥᒡ᙮”

ᑕᓐ ᑲ ᐃᑎᓱᒪᑭᓄᐎᒡ ᐊᓐᒡ ᒋᐱᐃᒋᐛᐱᔪᐤ ᑲ ᓂᓇᑭᑐᐛᔨᑕᒡ

¹¹ ᒪᒂᒡ ᒪᒃ ᐊᓐᒡ ᐃᔎᐅᒡ ᐊ ᐃᔅᐱᓯᒡ ᐊ ᐎ ᐎᑎᒧᐛᒡ ᐊᓂᔭ ᒋᔅᒋᓄᐊᒧᐛᑭᓇ, ᐱᔅᒐ ᐊᓐᒡ ᐊᓯᒪᑭᓂᓯᒡ ᑲ ᓂᓇᑭᑐᐛᔨᑕᒡ ᐊᓂᔭ ᒋᐱᐃᒋᐛᐱᔪᐤ ᒋ ᐃᑐᑕᐅᒡ ᐊᓐᑕ ᐅᑕᓇᒡ, ᒂ ᐎᑎᒧᐛᒡ ᐊᓂᔭᔪᐛ ᑲ ᓂᑲᓂᔅᑯᐛᔨᒋ ᐊᔭᒥᐊᐅᒋᒪᐛ ᒥᓯᐛ ᑕᓐ ᑲ ᐃᓯ ᐛᐸᑕᒡ ᐊ ᐃᔅᐱᔨᒡ᙮

¹² ᐊᑯ ᐊᓐᒡ ᑲ ᓂᑲᓂᔅᑯᐛᒡ ᐊᔭᒥᐊᐅᒋᒪᐛ ᑭᔭ ᐊᓐᒡ ᑲ ᓂᑲᓂᔅᑯᐛᒡ ᐃᔪᐛ ᒂ ᒪᒧᐎᒡ ᐊᑯ ᒂ ᐎᔭᔨᑕᒡ ᑕᓐ ᒐ ᐃᑎᒡ᙮ ᒋ ᒥᔅᑎ ᒥᔭᐅᒡ ᒪᒃ ᓱᓇᔭᔪᐤ ᐊᓂᔭ ᐊᓯᒪᑭᓂᓴ᙮

¹³ ᐊᑯ ᐊᓐᒡ ᑲ ᓂᑲᓂᔅᑯᐛᒡ ᐊᔭᒥᐊᐅᒋᒪᐛ ᒂ ᐃᑕᒡ ᐊᓂᔭ ᐊᓯᒪᑭᓂᓴ, “ᒐ ᐃᑕᑯᒡ ᐊᐛᓐᒋ, ᑕᐱᔅᑲᒡ ᒪᒂᒡ ᑲ ᓂᐸᔭᒡ ᐅᒋᔅᒋᓄᐊᒧᐛᑭᓐᒡ ᒋᒧᑦ ᒋ ᐸᒋ ᓂᑐᐛᐸᑎᒧᐛᐅᒡ ᐊᓂᔭ ᐎᔭᔪᐤ, ᐊᑯ ᒂ ᔅᑐᑕᐛᒡ᙮

¹⁴ ᐸᑕᒐ ᒪᒃ ᐅᔭ ᐊᓐ ᒋᓴᐅᒋᒪᐤ, ᓂᑭ ᓴᐧᑯᒋᒪᓇᓐ ᐊᑲ ᒋᔨᐛᐤ ᒐᒋ ᐊᑕᒪᔨᒥᑯᐅᔭᒄ, ᒋᑭ ᒥᔪᐱᔨᐃᑎᓇᓐ ᐊᑲ ᒐᒂᓐ ᒐᒋ ᐃᑐᑕᑯᐅᔭᒄ᙮”

¹⁵ ᐊᑯ ᐊᓐᒡ ᐊᓯᒪᑭᓂᓯᒡ ᒂ ᐅᑎᓇᒡ ᐊᓂᔭ ᓱᓇᔭᔪᐤ, ᐊᐅᑯᓐ ᒪᒃ ᒂ ᐃᑎᒡ ᐊᓂᔭ ᑲ ᐃᑎᓱᒪᑭᓄᐎᒡ᙮ ᐅ ᒪᒃ ᑎᐸᒋᒧᐅᓐ ᐊᐅᑯᓐ ᑲ ᐃᓯ ᑎᐸᒋᒧᔅᑐᐛᑭᓄᐎᒡ ᒍᐤ ᐃᔪᒡ ᐅ ᒪᒂᒡ ᑭᔭ ᐊᓄᒡ ᑲ ᒋᓯᑲᒡ ᐊᔅᒄ ᐊᐅᑯᓐ ᐊ ᐃᑕᑭᓄᐎᒡ᙮

ᒋᓴᔅ ᑲ ᐛᑎᓱᒪᑦ ᒥᓯᐛ ᐅᒋᔅᒋᓄᐊᒧᐛᑭᓇ Matthew 28.16-20 (Trinity Year A)

¹⁶ ᐊᑯ ᐊᓐᒡ ᐸᐃᑯᓴᑉ ᒋᔅᒋᓄᐊᒧᐛᑭᓐᒡ ᒂ ᐃᑐᑕᒡ ᐊᓐᑕ ᐊᓂᔭ ᐱᔅᑯᑎᓇᔪᐤ ᑲᓕᓕᒡ ᑲ ᑎᑯᓂᔨᒡ ᐊᓐᑕ ᑲ ᐃᑎᑯᒡ ᒋᓴᓴ ᒐ ᐃᑐᑕᒡ᙮

¹⁷ ᐃᔅᐱ ᒪᒃ ᐎᔭᐱᒪᒡ, ᒋ ᐊᔭᒥᐊᔅᑐᐛᐅᒡ ᐊᑎ ᐱᔅᒐ ᐊᓐᑕ ᐊ ᑎᓯᒡ ᐊᒋ ᐊᓏᑕᒡ᙮

¹⁸ ᐊᑯ ᒂ ᓇᑎᑯᒡ ᒋᓴᓴ ᒂ ᐃᑎᑯᒡ, “ᓂᒋ ᒥᔨᑯᐅᓐ ᓂᔾ ᓇᔅᒡ ᒐᒋ ᐅᒋᒪᐧᑲᑎᒪᓐ ᒋᒋᒋᓯᒄ ᑭᔭ ᐊᔅᒋᔾ᙮

¹⁹ ᐅ ᒪᒃ ᐅᒋ ᒪᒋᒄ ᓂᑐᐛᐱᒪᐧᑯᒡ ᒥᓯᐛ ᐊ ᐃᑎᔅᑲᓇᓯᒡ ᐊᐛᓐᒋ ᒐ ᐃᑐᑐᐛᑯᒡ ᒐᒋ ᐅᒋᔅᒋᓄᐊᒧᐛᑭᓂᔭᓐ, ᒐ ᓯᑲᐃᑐᐛᑯᒡ ᐅᑦ ᐃᓯᓂᐧᑲᓱᐅᓂᔪᐤ ᐅᑕᐎᒪᐛ ᑭᔭ ᐅᑯᓯᓯᒪᐛ ᑭᔭ ᑲ ᐸᔭᒋᓯᔨᒋ ᐊᒐᒂ᙮

²⁰ ᑭᔭ ᒐ ᒋᔅᑯᑎᒧᐛᑯᒡ ᒐᒋ ᓂᓇᐃᑕᒡ ᒥᓯᐛ ᑕᓐ ᑲ ᐃᑎᓱᒥᑎᑯᒡ᙮ ᒧᔅ ᒪᒃ ᒋᑭ ᐎᒐᐅᑎᓇᐛᐤ ᐱᐃᒻ ᐊᑎ ᐃᔎᐱᔨᒐ ᐊᔅᒋᔾ᙮”