ᒪᑎᔪᐤ 23 - ᒋᓴᒪᓂᑐ ᐅᑦ ᐃᔨᒧᐅᓐ - ᒋᒋᒥᓯᓇᐃᑭᓐ

ᒋᓴᔅ ᑲ ᐊᔨᒧᒪᑦ ᐊᓂᔭ ᐎᓱᐛᐅᓂᔪᐤ ᑲ ᒋᔅᑯᑎᒪᒐᔨᒋ ᑭᔭ ᐸᕆᓯᐊ Matthew 23.1-12 (Proper-26 Year A)

¹ ᐊᑯ ᒋᓴᔅ ᒂ ᐃᔨᒪᐊᑦ ᐊᓂᔭ ᐃᔪᐛ ᑭᔭ ᐊᓂᔭ ᐅᒋᔅᒋᓄᐊᒧᐛᑭᓇ᙮

² ᒋ ᐃᑕᐤ ᒪᒃ, “ᐊᓐᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᑭᔭ ᐊᓐᒡ ᐸᕆᓯᔨᒡ ᒋᔅᑯᑎᒪᒐᐅᒡ ᒧᓱᓴ ᐅᐎᓱᐛᐅᓂᔪᐤ, ᒋᓴᒪᓂᑐᐛ ᑲ ᒥᔨᑯᔨᒋ᙮

³ ᐊᐅᒄ ᒪᒃ ᐅ ᐅᒋ, ᓂᓇᐃᑎᒺᐧᒄ ᒥᓯᐛ ᑕᓐ ᐊ ᐃᓯ ᐎᑎᒪᑕᑯᒡ᙮ ᒥᒄ ᒪᒃ ᐊᑲᐎᔾ ᒋᑭ ᐅᒋ ᒋᔅᒋᓄᐛᐱᒪᐛᐅᒡ ᑕᓐ ᐊ ᐃᑕᑎᓯᒡ, ᐛᔅ ᑕᐸ ᐃᑐᑎᒧᒡ ᐊᓂᔭ ᑕᓐ ᐊ ᐃᓯ ᑭᒐᔅᒋᒧᒡ᙮

⁴ ᐱᑯᓴᔨᒪᐅᒡ ᐊᐛᔪᐛ ᒐᒋ ᓂᓇᐊᔨᑎᒥᔨᒋ ᐊᓂᔭ ᑕᓐ ᐊ ᐃᓯ ᑭᒐᔅᒋᒧᒡ᙮ ᐊᔨᐧᑭᒥᐊᐅᒡ ᐊᐛᔪᐛ ᐊ ᑯᓯᑯᓂᔨᒋ ᒐᒂᔪᐛ ᒐᒋ ᐱᒧᑕᔨᒋ᙮ ᐊᔨᒥᐃᑯᔪᐛ ᒪᒃ ᐅᔭ ᒐᒋ ᐱᒧᑕᔨᒋ᙮ ᓇᒪ ᒪᒃ ᓇᔅᒡ ᐎ ᐎᒋᐊᐅᒡ ᐊᓂᔭ ᑕᓐ ᐊ ᐃᓯ ᐊᔨᒥᐃᑯᔨᒋ᙮”

⁵ ᒥᓯᐛ ᒐᒂᔪᐤ ᑲ ᑐᑕᒡ ᐅᒡ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ ᑭᔭ ᐸᕆᓯᔨᒡ ᐱᑯᓴᔨᑎᒧᒡ ᒥᓯᐛ ᐊᐛᔪᐛ ᒐᒋ ᐛᐱᒥᑯᒡ᙮ ᐊᓂᔭ ᐊ ᐃᑕᔅᐱᓱᒡ ᑭᔭ ᐊ ᑕᐱᔅᑲᒡ ᒥᐅᑎᓯᔪᐤ ᒋ ᐱᑯᓴᔨᒧᐅᒡ ᒐᒋ ᐃᑕᔨᒥᑯᒡ ᐊᐛᔪᐛ ᓇᔅᒡ ᐊ ᐊᔭᒥᐊᐛᑎᓯᒡ᙮

⁶ “ᓂᑐᐛᔨᑎᒧᒡ ᐊᓐᑕ ᒪᐅᒡ ᐊ ᒋᔅᑕᔨᑕᑯᓂᔨᒡ ᒐᒋ ᐊᔭᑭᓄᐎᒡ ᐊᔭᒥᐊᐅᒋᐛᐱᒡ, ᑭᔭ ᐊ ᒥᒋᓱᓇᓄᐎᒡ ᒐᒋ ᐊᔭᑭᓄᐎᒡ ᐊᓐᑕ ᐊ ᐅᒋᒪᐅᐱᓇᓄᐎᒡ᙮

⁷ ᓂᑐᐛᔨᑎᒧᒡ ᔭᐃᑕᔾ ᒧᔅ ᒐᒋ ᐊᑎᒥᔅᑯᐛᑭᓄᐎᒡ ᐊᓐᑕ ᐊ ᒥᒐᑎᓇᓄᐎᒡ ᑭᔭ ᓂᑐᐛᔨᒪᐅᒡ ᐊᐛᔪᐛ ‘ᒋᔅᑯᑎᒪᒐᓱᐤ’ ᒐᒋ ᐃᓯᓂᐧᑲᑎᑯᒡ᙮”

⁸ “ᐊᑲᐎᔾ ᒪᒃ ᐎ ᒋᔨᐛᐤ ᓂᑐᐛᔨᑎᒧᒄ ‘ᒋᔅᑯᑎᒪᒐᓱᐤ’ ᒐᒋ ᐃᓯᓂᐧᑲᑎᑯᐅᔭᒄ, ᐛᔅ ᒥᓯᐛ ᒋ ᐎᐧᑲᓂᓯᑕᑐᓇᐛᐤ, ᑭᔭ ᒥᒄ ᐸᐃᑯᓱᐤ ᒋ ᒋᔅᑯᑎᒪᒐᓯᒧᐛᐤ᙮

⁹ ᐊᑲᐎᔾ ᑭᔭ ᒋᑭ ᐅᒋ ᐃᓯᓂᐧᑲᑕᐛᐤ ᐊᐛᓐ ᐅᑕ ᐊᔅᒋᒡ, ‘ᓄᑕᐎᓇᓐ,’ ᐛᔅ ᒥᒄ ᐸᐃᑯᓱᐤ ᒍᑕᐎᐛᐤ ᐊᐅᒄ ᐊᓐ ᒋᒋᒋᓯᑯᒡ ᐊ ᑕᑦ᙮

¹⁰ ᐊᑲᐎᔾ ᓂᑐᐛᔨᑎᒧᒄ, ‘ᐅᒋᒪᐤ’ ᒐᒋ ᐃᓯᓂᐧᑲᑎᑯᐅᔭᒄ, ᐛᔅ ᐸᐃᑯᓱᐤ ᒥᒄ ᒋᐅᒋᒪᒧᐛᐤ, ᐊᐅᒄ ᙭᙮

¹¹ ᐊᐛᓐ ᐊ ᓂᑲᓇᔨᑕᑯᓯᑦ ᐊᓐᑕ ᐊ ᑎᓯᔭᒄ, ᐊᑯᔅ ᒥᒄ ᐊᐱᒋᐊᑭᓐ ᒋᑭ ᐃᓯ ᑭᓄᐛᐱᒥᓱᐤ᙮

¹² ᐛᔅ ᐊᐛᓐ ᒥᔅᑎ ᑲ ᐎ ᐃᑕᔨᒥᑯᓯᑦ ᒋᑭ ᑎᑯᓂᔪᐤ ᑕᓐ ᒐ ᐃᑐᑐᐛᑭᓄᐅᑦ ᐊᓐᑕ ᒐᒋ ᐅᒋ ᓂᑕᔨᒥᑎᓱᑦ᙮ ᐊᓐ ᒪᒃ ᑲ ᑎᐱᑕᔨᒥᑎᓱᑦ ᐊᐅᑯᓐ ᐊᓐ ᒥᔅᑎ ᒐ ᐃᑕᔨᑕᑯᐃᑯᑦ ᒋᓴᒪᓂᑐᐛ᙮”

¹³ “ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐎᓱᐛᐅᓐ ᑲ ᒋᔅᑯᑎᒪᒐᔭᒄ ᑭᔭ ᒋᔨᐛᐤ ᐸᕆᓯᔨᒡ, ᒋᔨᐛᐤ ᑲ ᐊᔭᒥᐊᐧᑲᓱᔭᒄ, ᒋᔨᐛᐤ ᑲ ᑭᒋᐱᔅᑯᐛᑯᒡ ᐊᐛᓐᒋ ᒐᒋ ᐱᒐᒡ ᐊᓐᑕ ᒋᒋᒋᓯᒄ ᒋᓴᐅᒋᒪᐅᓂᒡ, ᐊᑲ ᒪᒃ ᐛᐛᒡ ᒐᒋ ᐱᒐᔭᒄ ᒋᔨᐛᐤ᙮ ᓇᒪ ᒋ ᐱᔅᑎᓇᐛᐅᒡ ᐊᓐᒡ ᑲ ᐎ ᐱᒐᒡ ᐊᓐᑕ ᒋᒋᒋᓯᒄ ᒋᓴᐅᒋᒪᐅᓂᒡ ᒐᒋ ᐱᒐᒡ᙮

¹⁴ ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐎᓱᐛᐅᓐ ᑲ ᒋᔅᑯᑎᒪᒐᔭᒄ ᑭᔭ ᒋᔨᐛᐤ ᐸᕆᓯᔨᒡ, ᒋᔨᐛᐤ ᑲ ᐊᔭᒥᐊᐧᑲᓱᔭᒄ᙮ ᓇᔅᒡ ᒋ ᐎ ᑯᐃᔅᑯᓇᑯᐃᓱᓇᐛᐤ ᐊᓐ ᐅᒋ ᓇᐅᔅ ᐊ ᐊᔭᒥᐊᔭᒄ, ᒥᒄ ᒪᒃ ᐊᓐᑕ ᐊ ᐅᑎᓂᒺᒄ ᒪᓐ ᑲ ᐸᐃᑯᓯᒡ ᐃᔎᐅᒡ ᑕᓐ ᐊ ᐃᓯ ᑎᐱᔨᐛᐅᓯᒡ ᐊᑯᑕ ᐊ ᓄᒂᒡ ᒋᒋᐛ ᑕᓐ ᐊ ᐃᑕᔨᑕᑯᓯᔭᒄ᙮ ᐅ ᒪᒃ ᑲ ᐃᓯ ᐃᑐᑎᒪᒄ ᐊᑐᐎᔅ ᒋᔨᐛᐤ ᒋᑭ ᐛᐛᓯᐃᑯᓇᐛᐤ᙮”

¹⁵ “ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐎᓱᐛᐅᓐ ᑲ ᒋᔅᑯᑎᒪᒐᔭᒄ ᑭᔭ ᒋᔨᐛᐤ ᐸᕆᓯᔨᒡ ᒥᒄ ᑲ ᐊᔭᒥᐊᐧᑲᓱᔭᒄ᙮ ᒥᓯᐛ ᐊ ᐃᔅᐱᑎᔅᑭᒥᑲᒡ ᐅ ᐊᔅᒋᔾ ᒋ ᐃᑐᑕᓇᐛᐤ ᐸᐃᒄ ᐊᐛᓐ ᒐᒋ ᐃᑐᑐᐛᒄ ᒐᒋ ᑕᑈᑕᑕᒄ ᒪᒃ ᒐᒋ ᐃᑐᑕᐧᒃ ᑕᓐ ᐊ ᐃᓯ ᒋᔅᑯᑎᒪᒐᐛᒄ᙮ ᐃᔅᐱ ᒪᒃ ᑲ ᓴᑯᑕᔅᑯᓇᒄ ᒋ ᐃᑐᑐᐛᐛᐤ ᐅᔅᑕ ᐎᔾ ᒐᒋ ᒥᒐᑎᓯᑦ ᐃᔅᐱᔅ ᒋᔨᐛᐤ᙮ ᓂᔄᐤ ᒋ ᑕᐧᑯᑎᔅᑕᐛᓇᐛᐤ ᑕᓐ ᐊ ᐃᑕᔨᑕᑯᓯᑦ ᒐᒋ ᐅᒋ ᐃᑐᑕᑦ ᒥᒋ ᐃᔅᑯᑕᒡ᙮”

¹⁶ “ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᒧᔭᒻ ᐊᑲ ᐛᐸᑎᒪᒄ ᑲ ᐃᓯᓇᑯᓯᔭᒄ ᐃᔭᐱᒡ ᒪᒃ ᑲ ᐎ ᒋᔅᒋᓄᑕᐊᑯᒡ ᐊᐛᓐᒋ᙮ ᒋᑦ ᐃᔅᒋᔄᓇᐛᐤ, ‘ᐊᐛᓐ ᓇᔅᒡ ᐊ ᐎ ᑕᑕᑈᑦ ᒐ ᐃᑐᑎᒧᐛᑦ ᒋᓴᒪᓂᑐᐛ ᒐᒂᔪᐤ, ᐊᓐᑕ ᒪᒃ ᒋᓴᐊᔭᒥᐊᐅᒋᐛᐱᒡ ᐊ ᐃᓯ ᑕᑈᑦ ᐊᓂᔭ, ᓇᒪ ᓂᑐᐛᔨᑕᑯᓱᐤ ᔭᐃᑕᔾ ᒐᒋ ᐃᑐᑕᐧᒃ ᐊᓂᔭ ᑕᓐ ᑲ ᐃᔅᒋᔄᑦ ᒐ ᐃᑐᑕᐧᒃ᙮ ᐊᑯ ᐊᐛᓐ ᓇᔅᒡ ᐊ ᐎ ᑕᑕᑈᑦ ᒐ ᐃᑐᑎᒧᐛᑦ ᒋᓴᒪᓂᑐᐛ ᒐᒂᔪᐤ ᐊᓐᑕ ᒪᒃ ᐊᓂᔭᔪᐛ ᐎᔄᐅᓱᓇᔭᐱᔎ ᐊᓐᑕ ᒋᓴᐊᔭᒥᐊᐅᒋᐛᐱᒡ ᑲ ᑕᔨᒋ ᐃᓯ ᑕᑈᒐ ᐅᔭ ᑲ ᐃᔅᒋᔄᑦ, ᐃᑕᔨᑕᑯᓂᔪᐤ ᔭᐃᑕᔾ ᒐᒋ ᐃᑐᑕᐧᒃ ᐊᓂᔭ ᑕᓐ ᑲ ᐃᔅᒋᔄᑦ᙮’

¹⁷ ᒋᔨᐛᐤ ᐊᑲ ᐛᐸᑎᒪᒄ ᑲ ᐃᓯᓇᑯᓯᔭᒄ, ᑕᑈ ᓇᒪ ᔅᒋ ᓂᔅᑐᑕᓇᐛᐤ ! ᑕᓐ ᐅᔅᑕ ᒐᔅᑕᔨᑕᒂᒡ, ᐊᓐ ᐎᔄᐅᓱᓇᔭᐱᔅᒄ ᒪᒃ ᐊᓐ ᒋᓴᐊᔭᒥᐊᐅᒋᐛᑉ ᐊᓐᑕ ᐛᒋ ᐱᔭᒐᔨᑕᑯᓯᑦ ᐊᓐ ᐎᔄᐅᓱᓇᔭᐱᔅᒄ ?

¹⁸ ᒋᑦ ᐃᔅᒋᔄᓇᐛᐤ ᑭᔭ ᐊᐛᓐ ᓇᔅᒡ ᐊ ᐎ ᑕᑕᑈᑦ ᒐ ᐃᑐᑎᒧᐛᑦ ᒋᓴᒪᓂᑐᐛ ᒐᒂᔪᐤ ᐊᓂᔭᔪᐤ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᐊᔭᒥᐊᐅᒋᐛᐱᒡ ᐅᒋ, ᓇᒪ ᓂᑐᐛᔨᑕᑯᓱᐤ ᔭᐃᑕᔾ ᒐᒋ ᐃᑐᑕᐧᒃ ᐊᓂᔭ ᑲ ᐃᔅᒋᔄᑦ ᒐ ᐃᑐᑕᐧᒃ᙮ ᑭᔭ ᒋᑦ ᐃᔅᒋᔄᓇᐛᐤ, ᐊᓐ ᐊᐛᓐ ᓇᔅᒡ ᐊ ᐎ ᑕᑕᑈᑦ ᒐ ᐃᑐᑎᒧᐛᑦ ᒋᓴᒪᓂᑐᐛ ᒐᒂᔪᐤ ᐊᓐᑕ ᐊᓂᔭ ᒥᔨᐛᐅᓂᔪᐤ ᐊᓐᑕ ᐱᔅᑎᓂᒐᐅᓇᐱᔅᑯᒡ ᑲ ᐊᔅᑕᑭᓄᐎᒡ ᐃᓯ ᑕᑈᑕ ᐃᑕᔨᑕᑯᓂᔪᐤ ᔭᐃᑕᔾ ᒐᒋ ᐃᑐᑕᐧᒃ ᐊᓂᔭ ᑕᓐ ᑲ ᐃᔅᒋᔄᑦ ᒐ ᐃᑐᑕᐧᒃ᙮

¹⁹ ᒋᔨᐛᐤ ᐊᑲ ᐛᐸᑎᒪᒄ ᑲ ᐃᓯᓇᑯᓯᔭᒄ, ᑕᓐ ᐅᔅᑕ ᒐᔅᑕᔨᑕᒂᒡ, ᐊᓐ ᐊ ᒥᔨᐛᐅᓐ ᑭᔭ ᒪᒃ ᐊᓐ ᐱᔅᑎᓂᒐᐅᓇᐱᔅᒄ ? ᐛᔅ ᐊ ᐊᔅᑕᑭᓄᐅᒡ ᒥᔨᐛᐅᓐ ᐊᓐᑕ ᐊᓐ ᑲᒋ ᐱᔅᑎᓂᒧᐛᑭᓄᐅᑦ ᒋᓴᒪᓂᑐᐤ ᒐᒂᔪᐤ ᐊᑯᑕ ᒥᒄ ᐛᒋ ᒋᔅᑕᔨᑕᒂᒡ ᐊᓐ ᒥᔨᐛᐅᓐ᙮

²⁰ ᓇᒪᐎᔾ ᐊ ᒋ ᓂᔅᑐᑕᓇᐛᐤ᙮ ᐊᐛᓐ ᓇᔅᒡ ᐊ ᐎ ᑕᑕᑈᑦ ᒐ ᐃᑐᑎᒧᐛᑦ ᒋᓴᒪᓂᑐᐛ ᒐᒂᔪᐤ ᐊᓐᑕ ᐃᓯ ᐱᔅᑎᓂᒐᐅᓇᐱᔅᑯᒡ, ᒥᓯᐛ ᑕᓐ ᐊ ᐃᓯ ᐊᔅᑕᔨᒡ ᐊᓐᑕ ᐊᑯᑕ ᑭᔭ ᓇᔅᒡ ᐊ ᐎ ᑕᑕᑈᑦ᙮

²¹ ᐊᑯ ᐊᓐ ᐊᐛᓐ ᓇᔅᒡ ᐊ ᐎ ᑕᑕᑈᑦ ᒋᓴᐊᔭᒥᐊᐅᒋᐛᐱᒡ ᐃᔅ, ᒋᓴᒪᓂᑐᐛ ᐊ ᑕᔨᒋ ᐎ ᐃᓯ ᑕᑕᑈᐤ, ᐊᓂᔭ ᐊ ᑕᔨᒋ ᐊᓐᑕ ᒋᓴᐊᔭᒥᐊᐅᒋᐛᐱᒡ᙮

²² ᐊᓐ ᐊᐛᓐ ᑲ ᐎ ᑕᑕᑈᑦ ᒋᒋᒋᓯᑯᒡ ᐃᔅ, ᒋᓴᒪᓂᑐᐛ ᐅᒋᓴᐅᒋᒪᐤ ᑕᑎᐳᐛᑭᓂᔨᒡ ᐎ ᐃᓯ ᑕᑕᑈᐤ ᑭᔭ ᐊᓂᔭᔪᐛ ᐊᓐᑕ ᐊ ᑕᑎᐱᔨᒋ ᐊᑯᑕ ᐊ ᐃᓯ ᑕᑕᑈᑦ᙮”

²³ “ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐎᓱᐛᐅᓐ ᑲ ᒋᔅᑯᑎᒪᒐᔭᒄ ᑭᔭ ᒋᔨᐛᐤ ᐸᕆᓯᔨᒡ᙮ ᐊᐅᒄ ᒋᔨᐛᐤ ᑲ ᐊᔭᒥᐊᐧᑲᓱᔭᒄ᙮ ᓇᔅᒡ ᐃᔭᒂ ᒋ ᓂᓇᑭᑐᐛᔨᑕᓇᐛᐤ ᐊ ᐃᓯ ᐸᒂᓂᒧᐛᒄ ᒋᓴᒪᓂᑐᐤ ᓂᓇᐧᑯᐤ ᓂᑕᐅᒋᑕᑭᓂᓴ ᑲ ᓂᑕᐅᒋᑕᔭᒄ ᒧᔭᒻ ᐊᓂᔭ ᒥᓐᑦ, ᑎᓪ ᑭᔭ ᑯᒥᓐ ᑲ ᐃᓯᓂᐧᑲᑕᒋ᙮ ᒥᔽᐤ ᑭᑈ ᐅ ᐊ ᐃᑐᑎᒪᒄ᙮ ᒥᒄ ᒪᒃ ᓇᒪ ᓇᔅᒡ ᒋᑦ ᐊᐱᑕᔨᑎᒥᐃᑯᓇᐛᐤ ᐊᓂᔭᔪᐛ ᒋᒋᐛ ᑲ ᐃᑕᔨᑕᒂᒋ ᒋᔅᑯᑎᒪᒐᐅᓇ ᐊᓐᑕ ᐎᓱᐛᐅᓂᒡ ᑲ ᐊᔨᒧᑕᒋ, ᒧᔭᒻ ᑯᐃᔅᒄ ᑎᐸᔅᑯᓂᒐᐅᓐ, ᓱᐛᔨᒋᒐᐅᓐ ᑭᔭ ᑕᑈᑎᒧᐅᓐ᙮ ᐊᔪᑯᓐ ᐅᔭ ᓂᔅᑎᒻ ᔭᐃᑕᔾ ᒋᐸ ᐎ ᐃᓯ ᓂᓇᑭᑐᐛᔨᑎᒥᐃᑯᓇᐛᐤ ᒐᒋ ᐃᑐᑎᒪᒄ ᒥᒄ ᒪᒃ ᐊᑲᐎᔾ ᒋᑭ ᐅᒋ ᐅᓂᒋᔅᒋᓯᑕᓇᐛᐤ ᑭᔭ ᒐᒋ ᐸᒂᓂᒧᐛᒄ ᒋᓴᒪᓂᑐᐤ᙮

²⁴ ᒋᔨᐛᐤ ᐊᑲ ᐛᐸᑕᒡ ᑲ ᐃᓯᓇᑯᓯᔭᒄ, ᐊᑲ ᓇᔅᒡ ᓂᔅᑐᑎᒪᒄ, ᐃᔭᐱᒡ ᐊ ᐎ ᒋᔅᒋᓄᑕᐊᑯᒡ ᐊᐛᓐᒋ᙮ ᓇᔅᒡ ᐃᔭᒂ ᒋ ᐎᓯ ᓂᓇᑭᑐᐛᔨᑕᓇᐛᐤ ᑕᓐ ᐊ ᐃᓯ ᓂᐃᑕᑭᓄᐅᒋ ᐊᓂᔭ ᐎᓱᐛᐅᓇ ᐊᑲ ᓇᔅᒡ ᒋᔅᑕᔨᑕᒂᒋ ᐊᑯ ᐊᓂᔭ ᑲ ᒋᔅᑕᔨᑕᒋ ᓇᒪ ᒋ ᐃᔅᐱᔅ ᓂᓇᑭᑐᐛᔨᑎᒥᐃᑯᓇᐛᐤ, ᒧᔭᒻ ᐊᐛᓐ ᓇᔅᒡ ᐃᔭᒂ ᑲ ᐃᑎᑦ ᒐᒋ ᓴᐳᐱᔨᐊᑦ ᒥᓐᑐᓯᓴ ᒥᒄ ᒪᒃ ᒧᔅ ᑲ ᓴᐳᑐᐛᐱᔨᐃᑯᑦ ᐊᑯᓐ ᐊ ᐃᓯᓇᑯᓯᔭᒄ᙮”

²⁵ “ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᑲ ᒋᔅᑯᑎᒪᒐᔭᒄ ᐎᓱᐛᐅᓐ ᑭᔭ ᒋᔨᐛᐤ ᐸᕆᓯᔨᒡ ᑲ ᐊᔭᒥᐊᐧᑲᓱᔭᒄ᙮ ᓇᔅᒡ ᐃᔭᒂ ᐊ ᐃᓯ ᐸᔭᒋᑕᔭᒄ ᐅᔅᒡ ᒋᐎᔭᑭᓄᐛᐤ ᑭᔭ ᒋᒥᓂᒂᑭᓄᐛᐤ ᐊᑲ ᒪᒃ ᐸᔭᒋᑕᔭᒄ ᐊᓐᑕ ᐱᒡ᙮ ᐊᑯᓐ ᐊ ᐃᓯᓇᑯᐃᓱᔭᒄ ᑭᔭ ᒋᔨᐛᐤ ᓇᔅᒡ ᐊ ᒥᔪᓇᑯᐃᓱᔭᒄ ᐊᓐᑕ ᐅᔅᒡ ᒥᒄ ᒪᒃ ᐊᓐᑕ ᐱᒡ ᒋᑦ ᐃᑕᑎᓯᐅᓄᐛᒡ ᓇᒪ ᒋ ᒥᔪᓇᑯᓯᓇᐛᐤ ᐊ ᐃᔅᐱᔅ ᐛᓴ ᐛᔪᒋᐱᔨᒡ ᑕᓐ ᐛ ᐃᓯ ᓂᓇᑭᑐᐛᔨᒥᓱᔭᒄ᙮

²⁶ ᒋᔨᐛᐤ ᐸᕆᓯᔨᒡ ᐊ ᒋᔅᒋᓄᑕᐊᑯᒡ ᐊᓐᒡ ᐊᑲ ᐛᐸᑕᒡ ᑲ ᐃᓯᓇᑯᓯᔭᒄ, ᓂᔅᑎᒻ ᐊᓐᑕ ᐱᒡ ᒋᐸ ᐸᔭᒋᑕᓇᐛᐤ ᐊᓂᔭ ᒋᒥᓂᒂᑭᓄᐛᐛ, ᑭᔭ ᐃᔭᒄ ᓇᔅᒡ ᒐ ᒥᔽᐱᔅᑲᒋ᙮”

²⁷ “ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᑲ ᒋᔅᑯᑎᒪᒐᔭᒄ ᐎᓱᐛᐅᓐ ᑭᔭ ᒋᔨᐛᐤ ᐸᕆᓯᔨᒡ ᒥᒄ ᑲ ᐊᔭᒥᐊᐧᑲᓱᔭᒄ᙮ ᒧᔭᒻ ᒋᐱᐃᒋᐛᑉ ᐊᓐᑕ ᐅᔅᒡ ᓇᔅᒡ ᐊ ᒥᔪᓇᑯᑕᑭᓄᐅᒡ ᐊᑯ ᒥᒄ ᐊᓐᑕ ᐱᒡ ᐱᓯᒄ ᓂᐳᐅᓐ ᑭᔭ ᐊ ᐎᓇᒡ ᒐᒂᓐ ᐊ ᐃᓯᓇᒂᒡ ᐊᑯᓐ ᐊ ᐃᑕᔨᑕᑯᓯᔭᒄ ᒋᐱᒪᑎᓯᐅᓄᐛᒡ᙮

²⁸ ᐊᑯᓐ ᑕᑈ ᒧᔭᒻ ᐊ ᐃᓯᓇᑯᓯᔭᒄ᙮ ᓇᔅᒡ ᒋ ᒥᔪᓇᑯᓯᓇᐛᐤ ᐅᔅᒡ ᐊᓐᑕ ᐊ ᑭᓄᐛᐱᒥᑯᐅᔭᒄ ᒥᒄ ᐱᒡ ᐊᓐᑕ ᒋᔭᐛᒡ ᐱᓯᒄ ᐊᔭᒥᐊᐧᑲᓱᐅᓐ ᑭᔭ ᒥᒋᑐᑎᒧᐅᓐ ᒋᑦ ᐃᓯᓇᑯᓯᓇᐛᐤ᙮”

ᒋᓴᔅ ᑲ ᓂᑲᓐ ᐎᑕᐧᒃ ᑕᓐ ᒐ ᐃᓯ ᐛᐛᓯᐊᑭᓄᔨᒋ ᐸᕆᓯᐊ ᑭᔭ ᐊᓂᔭᔪᐛ ᒍᐤ ᐎᓱᐛᐅᓂᔪᐤ ᑲ ᒋᔅᑯᑎᒪᒐᔨᒋ

²⁹ “ᒐᒂᓐ ᒋᑭ ᐃᓯ ᒥᒋᐱᔨᓇᐛᐤ ᒋᔨᐛᐤ ᐎᓱᐛᐅᓐ ᑲ ᒋᔅᑯᑎᒪᒐᔭᒄ ᑭᔭ ᒋᔨᐛᐤ ᐸᕆᓯᔨᒡ, ᒋᔨᐛᐤ ᑲ ᐊᔭᒥᐊᐧᑲᓱᔭᒄ᙮ ᓇᔅᒡ ᔅᒋ ᒥᔪᑕᓇᐛᐤ ᐊᓐᑕ ᑲ ᓂᒂᔅᑲᑕᑭᓄᐅᒡ ᐊᓐᒡ ᐅᒋᔅᒋᐛᐃᒐᓱᒡ, ᑭᔭ ᔅᒋ ᐛᐛᓯᑕᐛᓇᐛᐤ ᐅᒋᐱᐃᒋᐛᐳᐛᐤ ᐊᓐᒡ ᑯᐃᔅᒄ ᑲ ᐃᓯ ᐱᒪᑎᓯᒡ᙮

³⁰ ᑭᔭ ᒋᑦ ᐃᔅᒋᔄᓇᐛᐤ, ᒋ ᐱᒪᑎᓯᔭᒡ ᒪᒂᒡ ᑲ ᐱᒪᑎᓯᒡ ᐊᓂᔭᐧᑲ ᐊᓂᔅᒐ ᓂᐛᐧᑯᒪᑭᓇᓂᒡ, ᓇᒪ ᓂᐸ ᐅᒋ ᐃᑎᓇᓐ ᐊᓂᔭ ᑲ ᐃᑐᐛᒂ, ᑲ ᓂᐸᐊᒡ ᐊᓂᔭᐧᑲ ᐅᒋᔅᒋᐛᐃᒐᓱᐛ᙮

³¹ ᐊᑯᑕ ᒪᒃ ᓇᔅᒡ ᑕᐸᒋᒥᓱᔭᒄ ᑕᑈ ᐊᒋ ᐊᓂᔅᒐ ᐱᒪᑎᓯᔭᒄ ᐊᓐᑕ ᐅᒋ ᐊᓂᔭᐧᑲ ᑲ ᓂᐸᐊᒡ ᐊᓂᔭ ᐅᒋᔅᒋᐛᐃᒐᓱᐛ᙮

³² ᐊᑯᓐ ᑭᑈ ᒐ ᐎ ᐃᑎᔭᒄ, ᒋᔅᑕᐛᒄ ᐊᓂᔭ ᑕᓐ ᑲ ᐃᓯ ᒋᒋᐱᔨᑕᒡ ᐊᓂᔭᐧᑲ ᐊᓂᔅᒐ ᒋᐛᐧᑯᒪᑭᓄᐛᐅᒡ᙮”

³³ “ᒋᔨᐛᐤ ᒋᓇᐱᑯᒡ ᑭᔭ ᑲ ᐅᑯᓯᑐᑕᑕᑯᒡ ᒋᓇᐱᑯᒡ ᓇᔅᒡ ᑲ ᑭᔅᒋᐅᔭᒄ ᓂᑎᒥᒄ ᐊ ᐃᓯ ᐎᔭᓯᒪᑯᒡ ᐊᐛᓐᒋ, ᑕᓐᑕ ᒐᒋ ᐅᒋ ᐎᐧᑯᒋᐅᔭᒄ ᒐ ᐊᑲ ᒋ ᐃᑐᑕᔭᒄ ᒥᒋ ᐃᔅᑯᑕᒡ ?”

³⁴ ᐊᑯ ᒋᓴᔅ ᒂ ᐃᑕᑦ, “ᐊᐅᒄ ᒪᒃ ᐅ ᐛᒋ ᐃᑎᑎᑯᒡ, ᓂᑭ ᐸᒋ ᐃᑎᓴᐛᐅᒡ ᐊᓐᒡ ᐅᒋᔅᒋᐛᐃᒐᓱᒡ ᑭᔭ ᐊᓐᒡ ᑲ ᑭᒐᑕᐛᔨᑕᒡ ᑭᔭ ᑲ ᒋᔅᑯᑎᒪᒐᒡ ᐎᓱᐛᐅᓂᔪᐤ᙮ ᐃᔭᐱᒡ ᒪᒃ ᐛᔅ ᐊᑯᓐ ᒐ ᐃᓯᓇᑯᓯᔭᒄ ᐊ ᓂᓂᐸᐊᑯᒡ ᐱᔅᒐ, ᑯᑎᑭᒡ ᐊ ᒋᔅᑕᔎᑕᑯᒡ ᒋᐱᔭᑎᑯᒡ ᑭᔭ ᑯᑎᑭᒡ ᐊ ᐸᐱᓯᔅᑕᐛᑯᒡ ᐊᓐᑕ ᒋᒋᓴᐊᔭᒥᐊᐅᒋᐛᐳᐛᒡ, ᑭᔭ ᓂᓇᐧᑯᐤ ᐅᑕᓇᒡ ᐊ ᐃᑕᒧᒐᔭᒄ᙮

³⁵ ᒋᔨᐛᐤ ᒪᒃ ᒋᑭ ᐊᓂᔅᒐ ᒪᑎᑯᔅᑲᑯᓇᐛᐤ ᑕᓐ ᒐ ᐃᓯ ᐛᐛᓯᐊᑭᓄᐎᒡ ᐊᓐᒡ ᑲ ᓂᐸᐊᒡ ᒥᓯᐛ ᐊᓂᔭ ᑲ ᑯᐃᔅᑯᑕᑎᓯᔨᒋ ᐊᐛᔪᐛ, ᐊᐳᓪ ᐊ ᑕᑦ ᐅᒋ ᐊᓐᑕ ᒪᒃ ᐃᔅ ᓴᑲᕋᔭ, ᐸᕋᑲᔭ ᐅᑯᓴ᙮ ᓴᑲᕋᔭ ᒪᒃ ᑎᔅᑐᐎᒡ ᐊᓂᔭ ᐱᔅᑎᓂᒐᐅᓇᐱᔅᑯᔪᐤ ᐊᓐᑕ ᒪᒃ ᒪᐅᒡ ᐊ ᐸᔭᒐᔨᑕᒂᒡ ᒋᓴᐊᔭᒥᐊᐅᒋᐛᑉ ᐊᑯᑕ ᑲ ᓂᐸᐊᑭᓄᐅᑦ᙮

³⁶ ᓂᐦᐃ, ᒋ ᐎᑎᒪᑎᓇᐛᐤ, ᑭᔭ ᒋᔨᐛᐤ ᐊᓄᒡ ᑲ ᐱᒪᑎᓯᔭᒄ ᒋᑭ ᐊᓂᔅᒐ ᒪᑎᑯᔅᑲᑯᓇᐛᐤ ᑕᓐ ᒐ ᐃᓯ ᐛᐛᓯᐊᑭᓄᐎᒡ ᐅᒡ᙮”

ᑕᓐ ᑲ ᐃᔅᐱᔅ ᒋ ᓴᒋᑕᑦ ᒋᓴᔅ ᒋᕈᓯᓕᒥᔪᐤ

³⁷ “ᒋᔨᐛᐤ ᒋᕈᓯᓕᒥᒡ ᑲ ᑕᔭᒄ, ᑲ ᓂᐸᐊᑯᒡ ᐊᓐᒡ ᐅᒋᔅᒋᐛᐃᒐᓱᒡ ᑭᔭ ᑲ ᐸᐱᒧᓯᓇᑕᐛᑯᒡ ᐊᓂᔭ ᒋᓴᒪᓂᑐᐤ ᑲ ᐸᒋ ᐃᑎᓴᐊᒪᑕᒄ, ᑕᓐ ᑕᑥᐤ ᑲ ᐎ ᒪᐅᓱᑯᐱᑎᑎᑯᒡ ᐊᓐᑕ ᐃᔅ ᐊ ᑕᔭᓐ, ᒧᔭᒻ ᐱᑲᒂᓐ ᐊ ᐃᑐᑐᐛᑦ ᐅᐱᑲᒂᓂᒥᓴ, ᓯᐸ ᐅᑎᑎᑭᓂᒡ ᐊ ᐃᓯ ᒪᐅᓱᑯᓇᑦ ᐊ ᐎ ᓂᓇᑭᑐᐛᔨᒪᑦ᙮ ᐊᐅᑯᓐ ᒪᒃ ᒧᔭᒻ ᑲ ᐎ ᐃᑐᑕᑎᑯᒡ᙮ ᒥᒄ ᓇᒪ ᒋ ᐅᒋ ᐱᔅᑎᓇᐛᐤ ᐅ ᒐᒋ ᐃᑐᑕᑎᑯᒡ᙮

³⁸ ᓂᑐᑎᒧᒄ ᒪ ᒋᑭ ᓂᑭᑎᒪᑯᓇᐛᐤ ᒋᒋᐛᐛ ᓇᔅᒡ ᐊ ᐱᓯᒂᒋ ᑭᔭ ᐊ ᓂᓱᐅᓇᑎᔨᒋ᙮

³⁹ ᐛᔅ ᒋ ᐎᑎᒪᑎᓇᐛᐤ ᓇᒪ ᒥᓐ ᒋᑭ ᐅᒋ ᐛᐱᒥᓇᐛᐤ ᐸᑐᔅ ᐅᑎᒋᐱᔨᒐ ᒐ ᐃᔅᒋᔄᔭᒄ, ᓱᐛᔨᑕᑯᓱᐤ ᐊᓐ ᑲ ᐸᒋ ᑎᑯᓯᐧᒃ ᐅᑎᐸᔨᒋᒐᐛ ᐅᑦ ᐃᓯᓂᐧᑲᓱᐅᓂᔨᒡ᙮”